Mɩnla Ɔhʋanɩ Zʋ Yɛɛ Ɔhʋanɩhilelɛ Okuwu Yɩ Nɩ Ɩyɛɛ Yɩ Egyima Nnɛ a?

Wɔ adʋwavʋlɔ bɛ mmɩlɩ yɩ zʋ nɩ, okuwu ɛgyɩkɩ̃ɩ̃ be, “asʋ̃mavʋlɔ nɩ mmɔ nɩɩ mbanimbani” mɔɔ nɩ bɔwɔ Gyelusalamɩ nɩ, yɛ nɩ bɔsʋ̃mɩ kɛɛ ɔhʋanɩhilelɛ okuwu a. Nɩ besi abɔkɔ mɔɔ ɔnwʋmɔ ihyinyia bɛma Kilisinyiamaa mɔɔ bɛba ngɔlɔ bɛ mɔɔ nɩ bɔwɔ asafʋ azʋlɔtʋ yɩ nu nɩ. (Egyima 15:2) Sɛ bɛ adwɩnɩ iyiyia wɔ pɔkɔzilɛ be nwʋ a, nɩ igyĩ Ɛhɛlɛlɛ Odwokɔ be mɔɔ bozunzu ɔnwʋmɔ bʋwɔ bɔnwʋ mɔɔ ɩkã, nɩɩ Nyamɩnlɩ yɩ sunzuma nwanzanwanza yɩ ɔhʋanɩhilelɛ mɔɔ bele bediã numɔ nɩ ti a. (Egyima 15:25) Ɔzɔ ehilalɛzʋdɩyɛ nɩ la yɛ boduwa ɔzʋlɔ nnɛ a.

Nyamɩnlɩ ɩfa ɩyɛ egyima idi yɩ apɛdɩ nwʋ egyima. Mmeliyema mɔɔ bɛba ngɔlɔ bɛ mɔɔ bɔsʋ̃mɩ kɛɛ Ɔhʋanɩhilelɛ Okuwu yɩ nɩ wɔ ɛpɛ mɔɔ numɔ yɛ ɛzɩzɩbɛ ma Nyamɩlɩ yɩ Odwokɔ, na bɔwɔ ozumalɛnwʋlɛ wɔ kezimɔ ɩsɛ kɛɛ bɛyɛ egyima yɩ nɩɩ kezimɔ bɛkɛyɩ ɔzʋ̃mɩnlɛ nwʋ ndwokɔɣizialɛ munwa. Beyiyia numɔ dapɛnɩ bela kɛmɔ ɩkɛyɛ na bɛazunzu oyuwadɩ munwala mmeliyema okuwu yɩ nɩ bɛ ahyinyiadɩ azʋlɔtʋ nwʋ. Dɩkɛ mɔɔ nɩ ɩdɩ wɔ adʋwavʋlɔ bɛ mmɩlɩ ɩzʋ nɩ, boduwa ahɛlɛta mɔɔ bɛkɛlɛ, ehilalɛmaa mɔɔ botudu ahʋanɩ, nɩɩ mvʋlɔ bɔzʋ bɛfa Bayɩbʋlʋ nu ɔhʋanɩhilelɛ bɛma yɛ. (Egyima 16:4, 5) Ɔhʋanɩhilelɛ Okuwu yɩ yɛɛ ikila ma besiyeziyee sunzuma fʋãnu alɩyɛ yɩ a, ɩma Bulombunlililɛ ɩnwʋ odwokɔhanlɛ egyima yɩ ɩkɔ yɩ anyunu, na ikila ma bɛfa egyimalilɛ be bowula mmeliyema mmenyia be bɛ sa.

Bɛma Nyamɩnlɩ yɩ sunzuma ikile ɔhʋanɩ bɛ. Ɔhʋanɩhilelɛ Okuwu yɩ nɩ ide ɔhʋanɩhilelɛ wɔ Amansɔnɩ Tumivʋlɔ, Gyehova nɩɩ asafʋ yi Ti Gyisɛsɩ, bɛ ɛkɛnɩ. (1 Kɔlɛntɩmaa 11:3; Ɛfɩsɛsɩmaa 5:23) Okuwu eyi yɩ nu maa yɩ nɩ bɛánwʋ bɔnwʋ kɛɛ bɔnlʋmmɔ bedi Nyamɩnlɩ yɩ mmenii yɩ nɩ bɔzʋ. Bɛzabɛ bɛ nɩɩ Ahilisinyiamaa mɔɔ bɛba ngɔlɔ bɛ munwatĩĩ yɛɛ “dɩka bela mɔɔ Owuanɩɣalɛ [Gyisɛsɩ] nɩ ɩkɔɔ nɩ, bɔdʋwa yɩ a.” (Yikile 14:4) Sɛ yɛbɔ mpayɩ yɛma Ɔhʋanɩhilelɛ Okuwu yɩ nɩɩ bɛ egyima mɔɔ bedi yɩ nɩ a, bɛ anyɩ ɩsɔ yɩ baaba paa.

• Aninyiammɔ yɛɛ nɩ bedi egyima kɛɛ ɔhʋanɩhilelɛ okuwu wɔ adʋwavʋlɔ bɛ mmɩlɩ yɩ zʋ a?

• Mɩnla ɔhʋanɩ zʋ yɛɛ Ɔhʋanɩhilelɛ Okuwu yɩ nɩ ɩpɩbɛ Nyamɩnlɩ yɩ ɔhʋanɩhilelɛ nnɛ a?