Kɛ Ɩkɛyɛ Na Yɛanyia Mfasʋ Wɔ Bulombunli Ayiyialɩyɛ Aliyia Awuukuziyelɛdɩka Yɩ Zʋ a?

Asʋ̃ ɛkɛbɛyɩ kɛɛ ɛkɛbɩbɛ nninyeni nu na ama wʋ Bayɩbʋlʋ nu nnimidi ɩahɔ anyunumi a? Asʋ̃ ɛpɛyɩ kɛɛ ɔnwʋ ɛhɛlɛlɛ odwokɔ be, abiye, dɩka, anzɛnyɩɩ dɩyɛ be mɔɔ bɔwɔ yi dima wɔ Bayɩbʋlʋ yɩ nu bʋwɔ a? Anzɛnyɩɩ ozunzu ɔnwʋmɔ kyɩ̃ kɛɛ ebiye a Nyamɩnlɩ Odwokɔ be ɩkɔhʋla ɩkɔwʋwa wʋ wɔ wʋ ndwokɔ ɛzɩzɩbɛ mɔɔ ɛlɛyɩ nwʋ a? Mɛyɩ dɩyɛ sa ɔkʋla ekyela Bulombunli Ayiyialɩyɛ Aliyia awuukuziyelɛdɩka yɩ.

Ɩma nninyeni mɔɔ ɔkʋla ɛfa ɛpɩbɛ ndwokɔ nu. Yede yedi kɛɛ, éni Gyehova Dasɩvʋlɔmaa bɛ awuuku nɩɩ nninyeni mvʋlɔ mɔɔ igyĩ Bayɩbʋlʋ yɩ zʋ munwala wɔ wʋ ɛdɩndɛlɛ nu. Naasʋ̃ awuukuziyelɛdɩka mɔɔ ɩwɔ Bulombunli Ayiyialɩyɛ Aliyia nu nɩ ɩwɔ awuuku mɔɔ ɩɣa mvʋlɔ mɔɔ ɩkɔhʋla ɩkɔwʋwa wʋ. Ebiye a sa enyia Bayɩbʋlʋ azʋlɔtʋ, odwokɔtʋhilelɛ buuku baaba, nɩɩ nninyeni mvʋlɔ be sʋ̃ mɔɔ bɛfa bɛpɩbɛlɩ ndwokɔ nu wɔ ɛkɛnɩ. Sa ɔkʋla ɛfa awuukuziyelɛdɩka yɩ edi egyima ansaana anzɛnyɩɩ wɔ ayiyialɩyɛ yɩ awielɩyɛ. Sɛ kɔmpiyuta wɔ Bulombunli Ayiyialɩyɛ Aliyia yɩ nu ɛkɛnɩ a, ebiye a Watchtower Library wɔ ɔzʋlɔ. Eyi ɩdɩ kɔmpiyuta zʋ egyimalilɛ mɔɔ bɛva yɛ awuuku nɩɩ nninyeni mvʋlɔ bogua ɔzʋlɔ, nɩɩ dɩka mɔɔ ɩyɛ mɛlɛkɛ kɛɛ ɛkɛva ɛkɛbɩbɛlɩ ndwokɔ adile, ndwokɔ abɔkɔ, anzɛnyɩɩ ɛhɛlɛlɛ odwokɔ be.

Ɩbʋwa egyimalilɛmaa mɔɔ bɔwɔ Ɛbɩlawɔlɛ Nɩɩ Dasɩlɛlilɛ Ayiyialɩyɛ yi nu nɩ. Sa ɔkʋla ɛfa Bulombunli Ayiyialɩyɛ Aliyia yɩ awuukuziyelɛdɩka yɩ nɩ edi egyima bʋwɔ wɔ mmɩlɩ mɔɔ esiyeziyee wʋ egyimalilɛ yɩ nɩ. Ɛbɩlawɔlɛ Nɩɩ Dasɩlɛlilɛ Ayiyialɩyɛ zʋ ehilalɛvʋlɔ yɩ zʋ ehilalɛvʋlɔ nɩ yɛɛ ikila awuukuziyelɛdɩka yɩ zʋ a. Mɛyɩ yɛɛ ikila kɛɛ awuuku nɩɩ nninyeni mvʋlɔ mɔɔ ɩɣa yɩ nɩ be wɔ ɛkɛnɩ na ikila ma bɛhyɩhyɛ na besiyeziye yɩ bʋwɔ. Mɛyɩ anzɛnyɩɩ wʋ Bayɩbʋlʋ kilehilevʋlɔ ɩkɔhʋla ikehile ɔhʋanɩ mɔɔ ɛkɛva ɛkɛbɩbɛ odwokɔ mɔɔ ehyinyia yɩ nɩ. Naasʋ̃ íni kɛɛ ɛfa awuuku mɔɔ ɩwɔ awuukuziyelɛdɩka yɩ be ɔkɔ awudo. Na ɩdɩ nɔhʋanlɛ kɛɛ, yɛpɛyɩ kɛɛ yekila awuuku yɩ nɩ bʋwɔ na yɛábɛyɩ kɛɛ yɛkɛhɛlɛhɛlɛ numɔ.

Bayɩbʋlʋ ikehile nu kɛɛ, sɛ yekenyia Nyamɩnlɩ yɩ nwʋ nnimidi a, ɩsɛ kɛɛ yenyia ɛpɛ kɛɛ, yɛkɛbɩbɛ yɩ dɩkɛ “agyiapadɩ mɔɔ ɩsʋmɩ bʋlɔ mɔɔ abiye ɩva ɩɣɩnta nɩ.” (Kolosiyiamaa 2:3) Bulombunli Ayiyialɩyɛ Aliyia awuukuziyelɛdɩka yɩ nɩ ɩkɔwʋwa wʋ ma ɔkɔwɔ yɩ tʋ kɛɛ ɛpɩbɛ nninyeni nu.

• Mɩnla nninyeni mɔɔ bɛfa bɛpɩbɛlɩ ndwokɔ nu yɛɛ ɩwɔ Bulombunli Ayiyialɩyɛ Aliyia awuukuziyelɛdɩka yɩ nɩ a?

• Aninyia yɛɛ ɩkɔhʋla ɩkɔwʋwa wʋ ma ɛkɛva awuukuziyelɛdɩka yɩ nɩ ekeli egyima bʋwɔ a?