Asʋ̃ Odwokɔba Nɩ Ɩzʋ̃ Nyamɩnlɩ Yɩ Ɛkɛnɩ Amba a?

1. Aninyia yɛɛ ɩdɩ Bayɩbʋlʋ Ɩhɛlɛlɛvʋlɔ a?

Bɛhɛlɛ odwokɔba nɩ mɔɔ mɛyɩ yɛ lɛ kɛɛ, mmenii bɔkɔwʋwa azɩ eɣile bela wɔ azɩlɛ yɩ zʋ nɩ wɔ Bayɩbʋlʋ yɩ nu. (Matiyu 5:5) Awuuku ngyɩkɩ̃ɩ̃ ngyɩkɩ̃ɩ̃ 66 yɛɛ ɩkã ɩbonumɔ ɩyɛ Bayɩbʋlʋ munli nɩ a. Nyamɩnlɩ ɩmanlɩ mmenyia nɔhʋanlɛmaa 40 yɛ bɛhɛlɛlɩ Bayɩbʋlʋ yɩ a. Mosisi yɛɛ ɩhɛlɛlɩ awuuku anlu mɔɔ ili bɔmʋnlɩ nɩ kɛyɛ alʋbɔ 3,500 mɔɔ idua numɔ yɩ nɩ a. Na buuku mɔɔ itualɩ ɩtʋ nɩ, ɔzʋ̃mavʋlɔ Dwɔɔnʋ yɛ ɩhɛlɛlɩ wɔ alʋbɔ mɔɔ ɩbʋ 1,900 mɔɔ idua nu nɩ a. Aninyia dɩyɛ ɩadwɩnɩ yɛ Bayɩbʋlʋ ɩhɛlɛlɛmaa yɩ nɩ bɛhɛlɛlɩ a? Nyamɩnlɩ iluwa yɩ sunzuma nwanzanwanza ɩzʋ ɩnɩ Bayɩbʋlʋ ɩhɛlɛlɛmaa nɩ dɩndɛlɛ. Bɛhɛlɛlɩ mɔɔ Nyamɩnlɩ ɩhanlɩ bela na kɛ bɛzabɛ bɛadwɩnɩ yɛ bɛhɛlɛlɩ a. Meti Gyehova yɛɛ ɩdɩ Bayɩbʋlʋ Ɩhɛlɛlɛvʋlɔ a.​—Kɩnga 2 Timoti 3:16; 2 Pita 1:20, 21.

Kilá vidiyo mɔɔ ise Aninyia Yɛ Ɩdɩ Bayɩbʋlʋ Ɩhɛlɛlɛvʋlɔ a?

2. Kɛ ɩkɛyɛ na yɛale yɛali kɛɛ Bayɩbʋlʋ yɩ ɩdɩ nɔhʋanlɛ a?

Yezi kɛɛ Bayɩbʋlʋ ɩzʋ̃ Nyamɩnlɩ yɩ ɛkɛnɩ iluwakɛɛ, sɛ ɩkã eɣile be nwʋ odwokɔ a, ɩdɩ pɛpɛɛpɛ. Desanii bela íni ɛkɛnɩ mɔɔ ɩkɔhʋla ɩkɛyɛ ɔzɔ. (Joshua 23:14, NW) Nyamɩnlɩ Tumivʋlɔ yɩzayɩ nkʋ̃ kyeinyii yɛɛ ɩkɔhʋla ɩkɔnwʋ adasamaa yɛ eɣile be pɛpɛɛpɛ a.​—Kɩnga Tayɩtɔsɩ 1:2, 3.

Yekila ɔhʋanɩ kɛɛ buuku mɔɔ ɩzʋ̃ Nyamɩnlɩ yɩ ɛkɛnɩ nɩ ɩkɛyɛ sʋnʋnkʋ̃, na ɩdɩ ɔzɔ sʋ̃. Bɛhyɩhyɛ Bayɩbʋlʋ mbɩmmbɩɩ wɔ ɛdɩndɛlɛ sʋ̃maa zɛ nu. Yɛávalɩ ɔnwʋmɔ kɛɛ ɩdɩ buuku mɔɔ ɩhyɛ nɩ, Bayɩbʋlʋ yɩ ɩnɩ abɔdɩ nu nɣɛlɛbɛ yiyia. Akʋ̃ sʋ̃, ndwokɔ mɔɔ mmenii 40 bɛhɛlɛlɩ yɩ nɩ munwatĩĩ iyiyia pɛpɛɛpɛ. Dɔkʋ̃ sʋ̃ nɩ, Bayɩbʋlʋ ɩda Nyamɩnlɩ yɩ ɔlɔlɛ ali bʋwɔ, na ɩla ɔnwʋmɔ la ɩwɔ tumi mɔɔ ɩkʋla ɩsɩnza mmenii bɛ ɛbɩlawɔlɛ ma ɩyɛ bʋwɔ. Nɔhʋanlɛ ndwokɔ eyi ɩma mmenii mbɩmmbɩɩ bele beli kɛɛ, Bayɩbʋlʋ yɩ ɩdɩ Nyamɩnlɩ Odwokɔ.​—Kɩnga 1 Tɛsalonikamaa 2:13.

Kilá vidiyo mɔɔ ise Kɛ Ɩkɛyɛ Na Yɛale Yɛali Kɛɛ Bayɩbʋlʋ Yɩ Ɩdɩ Nɔhʋanlɛ a?

3. Mɩnla ndwokɔ yɛɛ ɩwɔ Bayɩbʋlʋ yɩ nu a?

Odwokɔ titili mɔɔ Bayɩbʋlʋ ɩkã yɛ lɛ kɛɛ, Nyamɩnlɩ ɩwɔ pɔkɔ mɔɔ ɔlɔlɛ wɔ numɔ ɩma desanii. Bayɩbʋlʋ ikehile kezimɔ paladayɩsɩ azɩwʋwalɛ nwʋ ɔhʋanɩ ɩwɔlɩ enii wɔ oyuwadɩ ɩtʋwɔlɛ nɩ la nɩɩ kezimɔ ikezia ɩkɛva paladayɩsɩ yɩ nɩ ɩkɛɣa dɔkʋ̃.​—Kɩnga Yikile 21:4, 5.

Wɔ Nyamɩnlɩ yɩ Odwokɔ nu nɩ, mmɛla, egyinalɛzʋ-ndwokɔ, nɩɩ fʋlɔdulɛ mɔɔ ɩkɔhʋla ɩkɔwʋwa ma yɛ ɛbɩlawɔlɛ ɩkɔhɔlɩ ɔzʋlɔ wɔ numɔ. Mɔɔ ɩkɩnla ɔnwʋmɔ nɩ, Bayɩbʋlʋ yɩ ɩkã kezimɔ Nyamɩnlɩ ɩnɩ mmenii lili—ndwokɔ mɔɔ ɩda Nyamɩnlɩ yɩ subanɩ ali. Meti, Bayɩbʋlʋ yɩ ɩkɔhʋla ɩkɔwʋwa wʋ ma ɔkɔnwʋ Nyamɩnlɩ bʋwɔ. Ikehile kezimɔ ɔkɔhʋla ɛkɛyɛ yɩ ɔhɔnwʋ.​—Kɩnga Wulomimaa 15:4; Gyemisi 2:23; 4:8.

4. Kɛ ɩkɛyɛ na wʋadɩ Bayɩbʋlʋ yɩ ɩtʋ a?

Blohyʋɔ eyi ikoluwa ɔhʋanɩ mɔɔ Gyisɛsɩ iluwalɩ ɔzʋlɔ ihehileli nɩ zʋ ɩkɛma ɛkɛdɩ Bayɩbʋlʋ yɩ ɩtʋ. Ɩ hwɩ̃nlɩ adwɩnɩ iziyeli Bayɩbʋlʋ ɛhɛlɛlɛ zʋ nkʋ̃kʋ̃ nkʋ̃kʋ̃ na ihilehile numɔ ma “bɛdɩlɩ ɛhɛlɛlɛ nɩ yɩ tʋ.”​—Kɩnga Luuku 24:27, 45.

Dɩyɛ bela íni ɛkɛnɩ mɔɔ ɩma anyɩnlɩlelɛ ɩtɛla odwokɔba mɔɔ ɩzʋ̃ Nyamɩnlɩ yɩ ɛkɛnɩ. Naasʋ̃, mmenii sʋ̃maa zɛ bɛanyɩ aléli ɔnwʋmɔ, na mvʋlɔ sʋ̃ benyia ɛya wɔ ɔnwʋmɔ. Máma wʋ padi ikolɔ. Anyɩnlɩlazʋ mɔɔ ɔwɔ kɛɛ ekenyia nnwʋanlɩ mɔɔ íni awielɩyɛ nɩ igyĩ ɔnwʋnlɛ mɔɔ ɔkɔnwʋ Nyamɩnlɩ bʋwɔ nɩ zʋ.​—Kɩnga Dwɔɔnʋ 17:3.