Mɩnla Ti Mɔɔ Nyamɩnlɩ Ɩma Tanɩ Nɩɩ Amanɩyɛnwʋnlɛ Nwʋ Ɔhʋanɩ a?

1. Kɛ ɩyɛlɩ mɔɔ tanɩ ɩwɔlɩ ɩtʋ a?

Tanɩ ɩwɔlɩ ɩtʋ mmɩlɩ mɔɔ Abɔnsamɩ ilili awohwi mɔɔ ili bɔmʋnlɩ nɩ. Ahyɛasɩ nɩ , nɩ Abɔnsamɩ ɩdɩ bɔvʋlɔ mɔɔ idi munli, naasʋ̃ “ɩákyina nɔhʋanlɛ yɩ nu.” (Dwɔɔnʋ 8:44, NW) Nɩ ɩpɛyɩ kɛɛ bɛfa ɔzʋ̃mɩnlɛ mɔɔ ɩsɛ kɛɛ bɛfa bɛma Nyamɩnlɩ yɩzayɩ nkʋ̃ʋ̃ la nɩ bɛma yɩ. Abɔnsamɩ ilili awohwi ihileli baalɛ mɔɔ ili bɔmʋnlɩ yɩ nɩ, Yifi, na ɩlahɩlɩlɩ yɩ ma idiyeli yɩ ɩdɛlalɩ kɛɛ ikediye Nyamɩnlɩ. Adamɩ ɩhɔ ɩhɩnlanlɩ Yifi nwʋ ma bɛyɛlɩ Nyamɩnlɩ ɩzʋ azʋ̃nɩzɩzɩbɛ. Pɔkɔ mɔɔ Adamɩ izili nɩ ɩhɔ iwieli amanɩyɛnwʋnlɛ nɩɩ owulo nu.​—Kɩnga Wulomimaa 5:19; 2 Kɔlɛntɩmaa 11:3.

Nɩ Abɔnsamɩ itwodwu itiyia Nyamɩnlɩ yɩ tumililɛ anzɛnyɩɩ yɩ gyinabʋ mɔɔ ɩwɔ kɛɛ idi Tumi nɩ mmɩlɩ mɔɔ nɩ ɩmaa Yifi ɩkɛyɛ Nyamɩnlɩ ɩzʋ azʋ̃nɩzɩzɩbɛ nɩ. Mmenii sʋ̃maa zɛ bɔhɔ bɛhɩnla Abɔnsamɩ nwʋ ma bɔbʋ Nyamɩnlɩ kɛɛ Bɔzʋhilalɛvʋlɔ. Meti, Abɔnsamɩ yɛɛ “isiye tanɩ oyuwadɩ eyi” a.​—Kɩnga Dwɔɔnʋ 14:30; Yikile 12:9.

2. Asʋ̃ mfʋmɩ wɔ nninyeni mɔɔ Nyamɩnlɩ ɩwɔlɩ yɩ nɩ nwʋ a?

Nninyeni mɔɔ Nyamɩnlɩ ɩwɔ yɩ munwatĩĩ idi munli. Mmenii nɩɩ awɔvʋlɔ mɔɔ Nyamɩnlɩ ɩwɔlɩ bɛ munwatĩĩ nɩ, nɩ sa bɔkʋla bɛyɛ sutiye mɔɔ idi munli bɛma Nyamɩnlɩ. (Deuteronomy 32:4, 5, NW) Nyamɩnlɩ ɩva fawʋnwʋdi mɔɔ ɩma yɛkʋla yesi pɔkɔ kɛɛ yɛkɛyɛ dɩyɛ baaba anzɛnyɩɩ dɩyɛ tanɩ nɩ ɩwɔlɩ yɛ. Ɔzɔ fawʋnwʋdi nɩ yɛɛ ɩma yenyia ɔnwʋmɔ ɔhʋanɩ yɛda yɛ ɔlɔlɛ ali yekile Nyamɩnlɩ a.​—Kɩnga Gyemisi 1:13-15; 1 Dwɔɔnʋ 5:3.

3. Mɩnla ti mɔɔ Nyamɩnlɩ ɩma amanɩyɛnwʋnlɛ nwʋ ɔhʋanɩ ɩɣa ɩbʋmɩ nnɛ a?

Ɔzʋ̃mɩ kɛɛ bɛdɩlɩ atunwa wɔ Ɛdɩnɩ bɛabʋmɩ nnɛ nɩ, Gyehova ɩma ɔnwʋmɔ ɔhʋanɩ ma bodwodwu bediyia itumililɛ. Mɩnla ti a? Ɩma ɩkɛla ali kɛɛ sɛ ɛyɩ mɛyɩ esiye ahanlɩ a, tumililɛ bela íni ɛkɛnɩ mɔɔ ɩkɔhʋla ɩkɛva mfasʋ ɩkɛɣɩlɛ adasamaa. (Ecclesiastes 7:29; 8:9, NW) Alʋbɔ 6,000 nɩ yɩ mɛda wɔ enii yɩ azɩwʋwalɛ nu nɩ, ɩla ali petee. Enii yɩ tumililɛ ɩlɔ́kʋlalɩ ɩlɛ́yɩlɩ kʋnɛ, awulilɛ, nsisii, anzɛnyɩɩ adimakɛlɛ wɔ ɛkɛnɩ.​—Kɩnga Jeremiah 10:23, NW; Wulomimaa 9:17.

Mɔɔ ɩma Nyamɩnlɩ yɩ tuimililɛ ɩyɛ sʋnʋnkʋ̃ wɔ enii yɩ dɩyɛ nwʋ yɛ lɛ kɛɛ, Nyamɩnlɩ yɩ tumililɛ ɩfa mfasʋ ɩbɩlɛ mmenii mɔɔ bede yɩ betiã nu nɩ. (Luuku 11:28) Ɩlɛ́kyɛ, Gyehova ɩbɛava enii yɩ aɣanɩ munwatĩĩ ɩkɛɣa awielɩyɛ. Mmenii mɔɔ besi pɔkɔ kɛɛ bɛkɛma Nyamɩnlɩ ikeli bɔzʋ tumi nɩ la yɛɛ bɔkɔwʋwa azɩlɛ yɩ zʋ a.​—Matiyu 5:5; Kɩnga Yikile 11:15.

Kilá vidiyo mɔɔ ise Mɩnla Ti Mɔɔ Nyamɩnlɩ Ɩma Tanɩ Nɩɩ Amanɩyɛnwʋnlɛ Nwʋ Ɔhʋanɩ a?

4. Mɩnla ɔhʋanɩ yɛɛ Nyamɩnlɩ yɩ abʋtalɩ ɩma yenyia a?

Abɔnsamɩ ɩhã idia ɛkɛnɩ kɛɛ, mfasʋ mɔɔ yekenyia wɔ Nyamɩnlɩ yɩ ɛkɛnɩ ti mɔɔ yɛsʋ̃mɩ yɩ a. Asʋ̃ ɛkɛbɛyɩ kɛɛ ekehile kɛɛ idi awohwi a? Sa ɔkʋla! Nyamɩnlɩ yɩ abʋtalɩ ɩma yenyia ɔnwʋmɔ ɔhʋanɩ yekile kɛɛ yɛpɛ Nyamɩnlɩ yɩ tumililɛ anzɛnyɩɩ enii yɩ dɩyɛ. Kezimɔ yɛbɔ yɛ ɛbɩla nɩ yɛɛ ikile ɔfʋã mɔɔ yegyĩ a.​—Kɩnga Yikile 12:10; 2 Pita 3:9.

5. Kɛ ɩkɛyɛ na yɛagyina Nyamɩnlɩ yɩ mɛda kɛɛ Yɛzʋhilalɛvʋlɔ a?

Sa yɛkʋla yesi pɔkɔ kɛɛ yɛpɛ Nyamɩnlɩ yɩ Tumililɛ iluwa ozumanlɛ mɔɔ yekozuma Nyamɩnlɩ Odwokɔ na yɛava yɛnwʋ yɛawula nɔhʋanlɛ ɔzʋ̃mɩnlɛ mɔɔ igyĩ Bayɩbʋlʋ yɩ zʋ nɩ nu. (Dwɔɔnʋ 4:23) Sa yɛkʋla yɛpʋ Abɔnsamɩ kɛɛ yɛzʋhilalɛvʋlɔ iluwa yɛ nwʋ mɔɔ yɛkɔhwɩ̃ wɔ manlɩwulɛ ndwokɔ nɩɩ kʋnɛ nwʋ dɩ kɛɛ mɔɔ Gyisɛsɩ ɩyɛlɩ nɩ la.​—Kɩnga Dwɔɔnʋ 17:14.

Abɔnsamɩ iluwa yɩ tumililɛ yɩ zʋ ɩma ɛbɩlazɩkɛlɛ nɩɩ nyɛlɩyɛ mɔɔ asɩanɩ wɔ numɔ ɩkɔlɩ ɔzʋlɔ. Sɛ yɛpʋ ɔzɔ nyɛlɩyɛ nɩ a, yɛ ɔhɔnwʋmmɔ nɩɩ yɛ mmusunwamaa be bɛkɛzɩlɩ anzɛnyɩɩ bokodwodwu bekediyia yɛ. (1 Pita 4:3, 4) Meti nɩ ɩsɛ kɛɛ yesi pɔkɔ be. Asʋ̃ yɛnɩ mmenii mɔɔ bɔdɔ Nyamɩnlɩ nɩ kɔwɔ a? Asʋ̃ yekediye yɩ mmɛla mɔɔ nɣɛlɛbɛ nɩɩ ɔlɔlɛ wɔ numɔ yɩ nɩ a? Sɛ yɛyɛ ɔzɔ a, nɩ yekile kɛɛ Abɔnsamɩ ilili awohwi mmɩlɩ mɔɔ ɩhanlɩ kɛɛ, yɛlɔ́kʋla yekeli nɔhʋanlɛ yɛkɛma Nyamɩnlɩ mmɩlɩ mɔɔ yeyiyia odwohilalɛ be nɩ.​—Kɩnga 1 Kɔlɛntɩmaa 6:9, 10; 15:33.

Ɔlɔlɛ mɔɔ Nyamɩnlɩ ɩwɔ ɩma adasamaa nɩ isi ɔzʋlɔ owudo kɛɛ ɩlɛ́kyɛ ɩbɛama tanɩ nɩɩ amanɩyɛnwʋnlɛ ɩkɛɣa awielɩyɛ. Mmenii mɔɔ bekehile kɛɛ bede eyi bedi nɩ yɛɛ bekenyia nnwʋanlɩ mɔɔ íni awielɩyɛ wɔ azɩlɛ yɩ zʋ a.​—Kɩnga Dwɔɔnʋ 3:16.