Ɩmanlɩ Yɩ Papa Nɩɩ Gyehova Bɛ Anyɩ Ileli

Ɔnwʋ kuakula baalɛ nɩ mɔɔ ɩwɔ mfonyini yi nu yɩ a?— Ɩdɩ benyia be mɔɔ bɔfʋlɔ yɩ kɛɛ Gyɛfɩta nɩ yɩ ɣa baalɛ. Bayɩbʋlʋ yɩ ɩábɔ yi dima ikile yɛ, naasʋ̃ yezi kɛɛ ɩmanlɩ yɩ papa nɩɩ Gyehova bɛ anyɩ ileli. Ma yezuma yɩzayɩ nɩɩ yɩ papa, Gyɛfɩta bɔnwʋ dɩyɛ.

Nɩ Gyɛfɩta ɩdɩ enii baaba na ɩvalɩ yɩ mmɩlɩ sʋ̃maa ihilehileli yɩ ɣa baalɛ yɩ nɩ Gyehova yɩ nwʋ dɩyɛ. Nɩ ɩdɩ enii mɔɔ ɩnwʋ yɛ ɛzɩzɩbɛ na nɩ ɩkʋla idi mmenii anyunu bʋwɔ ma bɛyɛ dɩyɛ. Meti, Yizilayamaa nɩ bɛmanlɩ ɩɣa ilili bɛ anyunu ma bɔhʋnlɩ bediyialɩ bɛ adamvʋlɔ.

Gyɛfɩta ɩwɔlɩ Nyamɩnlɩ mpayɩ kɛɛ ɩwʋwa yɩ ma ili nkunimi. Gyɛfɩta ɩwɔlɩ anʋhʋba kɛɛ sɛ idi nkunimi a, ɩkɛva enii mɔɔ ikeli bɔmʋnlɩ ɩkɛɣa ikeyiyia yɩ nɩ wɔ mmɩlɩ mɔɔ isia ɩkɛɣa awudo nɩ ɩkɛma Gyehova. Enii ɔkʋ̃ nɩ, nɩ ɩkɔwʋwa ɛkɛnɩ na yɛayɛ egyima wɔ Nyamɩnlɩ yɩ ɛdamɛ aliyia nɩ nwʋ yɩ nnwʋanlɩ eɣile nɩ munwatĩĩ. Nɩ ɛdamɛ aliyia nɩ ɩdɩ dɩka mɔɔ mmenii bɔkɔ bɔsʋ̃mɩ Nyamɩnlɩ wɔ tɩɩtɩɩ mmɩlɩ nu. Amba sʋ̃, Gyɛfɩta ilili nkunimi wɔ kʋ̃nɛ yi nu! Ezi enii mɔɔ ilili bɔmʋnlɩ ɩɣa iyiyialɩ yɩ wɔ mmɩlɩ mɔɔ nɩ isia ɩkɛɣa awudo nɩ a?—

Nɩ ɩdɩ Gyɛfɩta yɩ ɣa baalɛ! Nɩ ɩdɩ yɩ ɣa ɔkʋ̃ pɛ, na sikalɛ yɩ, nɩ ɩsɛ kɛɛ Gyɛfɩta ɩfa yɩ ɩkɔ. Eyi ɩmanlɩ yɩ ɛɣɛɛlɛ ɩwɔlɩ baaba. Naasʋ̃ kakɛ kɛɛ, nɩ ɩwɔ anʋhʋba. Ndɛndɛ zʋ la nɩ, yɩ ɣa baalɛ nɩ ɩhanlɩ kɛɛ: ‘Mɩ zɩ, ɔwɔ Gyehova anʋhʋba, meti ɩsɛ kɛɛ edi ɔzʋlɔ.’

Gyɛfɩta yɩ ɣa baalɛ sʋ̃ yɩ ɛɣɛɛlɛ ɩwɔlɩ. Wɔ ɛdamɛ aliyia dɩka nɩ, nɩ ilékyia na nɩ ɩlɔ́wʋ nnwuakula sʋ̃. Naasʋ̃ nɩ ɩpɛyɩ paa kɛɛ ikeli yɩ papa yɩ anʋhʋba nɩ ɩzʋ na ɩama Gyehova yɩ anyɩ ale. Nɩ eyi ihyinyia yɩ baaba ɩtɛla kɛɛ ikegyia anzɛnyɩɩ ɩkɔwʋ nnwuakula. Meti ɩzʋ̃ awudo ɩhɔlɩ na ɩhɔ ɩwʋwalɩ ɛdamɛ aliyia yɩ dɩka yɩ nɩ wɔ yɩ nnwʋanlɩ eɣile munwatĩĩ nu.

Asʋ̃ ekila a, mɔɔ ɩyɛlɩ nɩ ɩmanlɩ yɩ zɩ nɩɩ Gyehova bɛ anyɩ ileli a?— Amba, ɩmanlɩ bɛ anyɩ ileli! Sɛ ɛyɛ sutiye na sɛ ɔdɔ Gyehova a, sa ɔkʋla ɛba ɛyɛ kɛɛ Gyɛfɩta yɩ ɣa baalɛ nɩ. Wʋzawʋ sʋ̃ ɛkɛma wʋ awʋvʋlɔ nɩɩ Gyehova bɛ anyɩ ikele baaba.