Ɩyɛ a, Ɛtɩ Nɣanlɩ Kɛɛ Wʋ Nwʋ Ɩyɛ Kɔnwʋʋ Na Wʋ Kunlu Idu a?

Kila kuakula benyia ɛgyɩkɩ̃ɩ̃ mɔɔ ɩwɔ mfonyini yɩ nu nɩ. Ɩnwʋ ɩyɛ kɔnwʋʋ na ikunlu idu, ɩ́dɩ ɔzɔ a? Asʋ̃ ɛdɩ nɣanlɩ ɔzɔ kyɩ̃ a?— Ɩyɛ a, abiyela ɩtɩ nɣanlɩ ɔzɔ. Bayɩbʋlʋ yɩ ɩkã Gyehova yɩ ɔhɔnwʋmmɔ be mɔɔ bɔnwʋ ɩyɛlɩ kɔnwʋʋ na bo kunlu iduli nwʋ odwokɔ. Bonu ɔkʋ̃ yɛ lɛ Ilayɩgya. Ma yezuma ɩnwʋ dɩyɛ.

Ilayɩgya ɩwʋwalɩ azɩ wɔ Yizilaya mmɩlɩ tɩndɩnlɩ mɔɔ idua numɔ nɩ, ansaana bɛbɛawʋ Gyisɛsɩ. Nɩ Ehabɩ, Yizilaya bulombunli nɩ ɩázʋ̃mɩ nɔhʋanlɛ Nyamɩnlɩ, Gyehova. Nɩ Ehabɩ nɩɩ yɩ yɩ, Gyezibɛlɩ munwala bɔsʋ̃mɩ Baalɩ bʋzʋmɩ. Meti ɩmanlɩ Yizilayamaa sʋ̃maa bɔwɔlɩ ɩtʋ bɔzʋ̃mɩnlɩ Baalɩ bʋzʋmɩ nɩ. Nɩ bulombunli baalɛ Gyezibɛlɩ yɩ ti nu yɛ ɛzɩzɩbɛ na nɩ ɩpɛyɩ kɛɛ ikũ mmenii munwala mɔɔ bɔsʋ̃mɩ Gyehova nɩ, mɔɔ nɩ Ilayɩgya ɩkɩnla ɔnwʋmɔ! Ezi mɔɔ Ilayɩgya ɩyɛlɩ a?—

Ilayɩgya iɣiandinli! Ɩhɔlɩ aɣinzi aɣinzi wɔ ɛsɛlɛ be zʋ na ɩhɔlɩ ɩɣɩntanlɩ ɩnwʋ wɔ bʋlɔ bɔnɩ be nu. Ekila a, mɩnla ti mɔɔ ɩyɛlɩ ɔzɔ a? — Amba, nɩ ikunlu idu. Naasʋ̃, nɩ iáhyinyia kɛɛ Ilayɩgya ɩma ikunlu itu. Mɩnla ti a? Iluwakɛɛ nɩ izi kɛɛ Gyehova ɩkɔwʋwa yɩ. Nɩ Gyehova ɩla yi tumi ali ihile Ilayɩgya kyɩ̃. Eɣile ɔkʋ̃ be nɩ, Gyehova iwuwalɩ Ilayɩgya yɩ mpayɩwɔlɛ iluwa sɩnɩ mɔɔ ɩmanlɩ ɩzʋ̃ sʋlɔ ɩɣalɩ nɩ. Meti nɩ ɩdɩ nɔhʋanlɛ kɛɛ Gyehova ɩkɔhʋla ɩkɔwʋwa Ilayɩgya sikalɛpɛyɩ sʋ̃!

Mmɩlɩ mɔɔ nɩ Ilayɩgya iwula bʋlɔ bɔnɩ yi nu nɩ, Gyehova ɩ nɩɩ dɩndɛnlɩ na iɣizialɩ yɩ kɛɛ: ‘Mɩnla yɛ ɛyɛɛ yɩ wɔ ɛkɩhyɩ a?’ Ilayɩgya iwuwalɩ yɩ kɛɛ: ‘Mɩzamɩ nkʋ̃tɩnyɩɩ la yɛ mɩla ɔnwʋmɔ mʋsʋ̃mɩ wʋ a. Ɩha mɩzamɩ nkʋ̃tɩnyɩɩ, na mukunlu itu kɛɛ bokohũ mɩ.’ Nɩ Ilayɩgya ɩdwɩnɩ kɛɛ bohũ mmenii mvʋlɔ mɔɔ bɔsʋ̃mɩ Gyehova munwatĩĩ. Naasʋ̃ Gyehova ɩhanlɩ ihileli Ilayɩgya kɛɛ: ‘Anhã, ɩ́dɩ nɔhʋanlɛ. Mmenii mvʋlɔ 7,000 wɔ ɛkɛnɩ mɔɔ bɛla ɔnwʋmɔ la bɔsʋ̃mɩ mɩ. Nyia akɛnɣazɩzɩbɛ. Mʋwɔ egyima sʋ̃maa wɔ ɛkɛnɩ ma wʋ!’ Ekila a, Ilayɩgya yɩ anyɩ ileli kɛɛ ɩdɩlɩ ɔzɔ odwokɔ yɩ a?—

Mɩnla yɛ ɔkɔhʋla okozuma wɔ mɔɔ ɩdʋlɩ Ilayɩgya yi nu a?— Íni kɛɛ ɛtɩ nɣanlɩ kɛɛ ɩha wʋzawʋ nkʋ̃tɩnyɩɩ na ɛma wu kunlu itu. Ɔwɔ ɔhɔnwʋmmɔ mɔɔ bɔdɔ Gyehova na bɔdɔ wʋzawʋ sʋ̃. Akʋ̃ sʋ̃, Gyehova ɩwɔ tumi kezile, na ɩkɔwʋwa wʋ eɣile bela! Asʋ̃ wʋ anyɩ ile kɛɛ ɔnwʋ yɩ kɛɛ, ɩlɛ́kalɩ wʋzawʋ nkʋ̃tɩnyɩɩ a?—