Bulombunlililɛ Be Mɔɔ Ikeli Azɩlɛ Yɩ Munwatĩĩ Zʋ

Sɛ ekila a, ɛhɩnla Bulombunlililɛ yɛ yɛkãã ɔnwʋmɔ odwokɔ yɩ a?— Amba, ɩdɩ Nyamɩnlɩ yi Bulombunlililɛ yɩ nɩ, Bulombunlililɛ nɩ mɔɔ ɩkɛyɛ azɩlɛ yɩ paladayɩsɩ nɩ. Asʋ̃ ɛkɛbɛyɩ kɛɛ okozuma sʋ̃maa ɛkɛvalɩ ɔzɔ Bulombunlililɛ yɩ nɩ nwʋ a?—

Bulombunlililɛ bela ɩwɔ bulombunli. Na bulombunli nɩ idi mmenii mɔɔ bɔwɔ yɩ azɩlɛ yɩ zʋ nɩ bɔzʋ tumi. Ezi enii mɔɔ ɩdɩ Bulombunli wɔ Nyamɩnlɩ yi Bulombunlililɛ nɩ zʋ a?— Ɩdɩ Gyisɛsɩ Kɩlayɩsɩ. Ɩwɔ sʋlɔ. Ɩlɛ́kyɛ bela, sa ɩba ɩyɛ Bulombunli wɔ abiyela mɔɔ ɩda azɩlɛ yɩ zʋ nɩ ɩzʋ! Ekila a, sɛ Gyisɛsɩ ɩba ɩyɛ Bulombunli wɔ azɩlɛ yɩ munwatĩĩ zʋ a, yɛ anyɩ ikele a?—

Sa yɛ anyɩ ide baaba paa! Wɔ Paladayɩsɩ yi nu nɩ, mmenii bɔlɔ́kʋ̃ anzɛnyɩɩ bɔlɔ́kɔ kʋ̃nɛ dɔkʋ̃. Bɔkɔlʋlɔ bɔnwʋ bɔnwʋ. Abiyela ɩnwʋ ɩlɛ́payɩ anzɛnyɩɩ ilówu sʋ̃. Mmenii mɔɔ bɛ anyɩ izũ nɩ bɔkɔnwʋ dɩyɛ, mmenii mɔɔ bɛ azʋ̃ idi nɩ bɛkɛdɩ odwokɔ, na mmenii mɔɔ bɛáhʋla betiyia nɩ sʋ̃, bɔkɔhʋla bokodu tɔlɔnwa na bɛawuluwulu. Abiyela ikenyia alɩyɛ sʋ̃maa ikeli. Na nnamɩ sʋ̃ bɛ nɩɩ bɔnwʋ bɔnwʋ keli ɛɣɛlɛ, na sa amɩyɛzayɛ sʋ̃ yɛ nɩɩ bɛ di ɛɣɛlɛ. Mmenii mɔɔ bowuwu nɩ, bekezia bɛkɛɣa nnwʋanlɩ nu dɔkʋ̃. Mmenyia nɩɩ mmaalɛ sʋ̃maa mɔɔ ozuma bɔnwʋ dɩyɛ wɔ blohyʋɔ eyi nu dɩkɛ Lɩbɛka, Ɣɩlahabɩ, Devidi, nɩɩ Ilayɩgya bɛzabɛ sʋ̃ bekezia bɛkɛɣa nnwʋanlɩ nu dɔkʋ̃! Asʋ̃ ɛkɛbɛyɩ kɛɛ ɔkɔnwʋ bɛ wɔ mmɩlɩ mɔɔ bezia bɛɣa nnwʋanlɩ nu nɩ a?—

Gyehova ɩdɔ wʋ na ɩpɛyɩ kɛɛ wʋ anyɩ ide. Sɛ ɔkɔ ɔzʋlɔ osuma Gyehova ɩnwʋ dɩyɛ na etiye yɩ odwokɔ a, sa ɔkʋla ɔbʋwa azɩ eɣile bela wɔ paladayɩsɩ pɩkɛpɩkɛ yi nu! Asʋ̃ wʋábɛyɩ yɩ a?—