Kɛmɔ Bekedindiã Bo Ozukuadwokɔ Bʋwɔ

Ye munwatĩĩ yehyinyia ozukua na ama yɛahʋla yɛava nninyeni mɔɔ ye mmusunwamaa nɩ mmɔ behyinyia nɩ yɛama bɛ. (1 Timoti 6:8-10) Eyi ɩdɩ nɔhʋanlɛ iluwakɛɛ “ozukua ɩdɩ banɩwɔlɛ.” (Ecclesiastes 7:12, NWT) Kɛ agyiahʋnlɩmaa nɩ, ɩkɛyɛ ɛzɩzɩbɛ kɛɛ bɛkɛhã ozukua nwʋ odwokɔ, naasʋ̃ íni mɔ bɛma ozukua ɩba ɩyɛ odwokɔ ɛzɩzɩbɛ wɔ bɛ agyiahʋnlɩ nu. (Ɛfɩsɛsɩmaa 4:32) Ɩsɛ kɛɛ agyiahʋnlɩmaa nɩ bede bɔ nwʋ bɔ nwʋ bedi na bɛyɛ adwɩnɩ ɔkʋ̃ wɔ mmɩlɩ mɔɔ besi kɛmɔ bɛkɛva bo ozukua bekeli egyima nɩ nwʋ pɔkɔ nɩ.

1 BOZUNZU ƆNWƲMƆ BƲWƆ

MƆ BAYƖBƲLƲ YƖ ƖKÃ: “Na bo nu aninyia, yɛ sɛ ɩpɛ kɛɛ ikyina bɔlɔnsanɩ a, iáli bɔmʋnlɩ ɩbʋwa azɩ ɩsɩnzɩ nwʋmɔ kakɛ na ɩnwʋ kɛɛ ɩlɛ ozukua mɔɔ ɩkɔzʋ̃ yɩ kyina a?” (Luuku 14:28) Ɔnwʋmɔ ihyinyia kɛɛ bɔbɔ nu bosunzu kezimɔ bɛkɛva bo ozukua bekeli egyima nɩ nwʋ. (Amos 3:3, NWT) Bozunzu nninyeni mɔɔ ihyinyia kɛɛ bɔtɔ nɩɩ ozukua mɔɔ bɛkɛva bekeli ɔnwʋmɔ egyima nɩ nwʋ. (Proverbs 31:16, NWT) Ozukua mɔɔ bɔwɔ kɛɛ bɛkɛva bɔkɔdɔ dɩyɛ be nɩ iáhile kɛɛ ɩsɛ kɛɛ bɔtɔ. Bɔwɔ́ mmɔdɩnɩ kɛɛ bɛlɛ́fa kakɛ bekediã bɔzʋ. Bɛvá ozukua mɔɔ bɔwɔ nɩ la beli egyima.—Proverbs 21:5; 22:7, NWT.

MƆ ƆKƆHƲLA ƐKƐYƐ:

• Sɛ bo ozukua yɩ be ɩka wɔ ezinyianɩ yɩ awielɩyɛ a, bɔwɔ numɔ bozunzu mɔɔ bɛkɛva bɛkɛyɛ nwʋ

• Sɛ bo ozukua ɩkɔ azɩ a, bɛyɛ nhyɩhyɛlɩyɛ titili be bɛva bodudua nninyeni zʋ. Kɛ ndianwʋ nɩ, sa bɛzabɛ bɔkʋla bɔnʋ̃wa bɛ alɩyɛ bedi kɛdɛla kɛɛ bekeli atɔ alɩyɛ

2 DI NƆHƲANLƐ NA MA NNINYENI NU ƖLA ƐKƐNƖ

MƆ BAYƖBƲLƲ YƖ ƖKÃ: ‘Bɛyɛ́ mɔɔ ɩtɩnɣɛ wɔ Nyamɩnlɩ [Gyehova, NWT] nɩɩ mmenii bɛ anyunu.’ (2 Kɔlɛntɩmaa 8:21) Ma wu hũ anzɛnyɩɩ wʋ yɩ ɩnwʋ ozukua mɔɔ enyia nɩɩ mɔ edi nɩ yi nu bʋwɔ.

Mmɩlɩ bela mɔɔ ɛpɛ kɛɛ esi pɔkɔ kezile be mɔɔ ɩfalɩ wʋ ozukua nwʋ nɩ, ɛ nɩɩ wu hũ anzɛnyɩɩ wʋ yɩ bozunzu ɔnwʋmɔ. (Proverbs 13:10, NWT) Sɛ bɔbɔ ozukua nwʋ nkɔmɔ a, ɩkɛma azʋ̃nudwolɩyɛ kɛɣa bɛ agyiahʋnlɩ nu. Nwʋ́ ozukua mɔɔ enyia nɩ kɛɛ ɩdɩ abusunwa ozukua, na kɛ wʋzawʋ wʋ ti nwʋ ozukua a.—1 Timoti 5:8.

MƆ ƆKƆHƲLA ƐKƐYƐ:

• Bɛyɛ́ adwɩnɩ ɔkʋ̃ wɔ ozukua mɔɔ bonu bela ɩkɔhʋla ɩkɛva ikeli egyima mɔɔ iléhyinyia kɛɛ ɩnwʋ yɩ ɔhɔnwʋ ansa

• Íni mɔ bɛdɩkɛ ma odwokɔ ɛzɩzɩbɛ be itwodwu ansaana bɛahã ozukua nwʋ odwokɔ