DƖYƐZUMANLƐ 1

Anyunumiyɩlɛ Mɔɔ Itu Mpʋnɩ

Egyima 17:22

MƆ ƖSƐ KƐƐ ƐYƐ: Má wʋ anyunumiyɩlɛ ɩyɛ anyɩnlɩlelɛ, dá wʋ odwokɔtile nɩ ali, na kilé sianti mɔɔ ɩsɛ kɛɛ wʋ ediyelɛmaa nɩ bɛ anyɩ ideli nwʋmɔ.

Má ɩyɛ anyɩnlɩlelɛ. Fá odwokɔɣizialɛ, odwokɔ mɔ bɛta bɛkã, ɛbɩlawɔlɛ nu ozumalɛnwʋnlɛ, anzɛnyɩɩ amanɩyɛwɔlɛ be mɔɔ wʋ ediyelɛmaa nɩ bɛ anyɩ ikeleli nwʋ nɩ di egyima.

Dí bɔmʋnlɩ sunzu ndwokɔ mɔɔ ɩla wʋ ediyelɛmaa nɩ bɛ ahʋnlɩnɩ zʋ nɩɩ mɔɔ bɛ anyɩ ikeleli nwʋmɔ nɩ nwʋ bʋwɔ, na má ɩ nɩɩ wʋ anyunumiyɩlɛ nɩ iyiyia.
Dá wʋ odwokɔtile nɩ ali. Bɔ́ mmɔdɩnɩ kɛɛ wʋ anyunumiyɩlɛ nɩ ɩkɛma wʋ ediyelɛmaa nɩ bɛkɛdɩ wʋ odwokɔtile nɩ nɩɩ sianti mɔɔ ɛvalɩ ɔzɔ odwokɔtile nɩ yɩ tʋ bʋwɔ.
Kilé sianti mɔɔ wʋ odwokɔtile nɩ nwʋ ihyinyia. Má odwokɔ mɔɔ ɛkɛhã nɩ ɩ nɩɩ wʋ ediyelɛmaa bɛ ahyinyiadɩ nɩ iyiyia. Ɩsɛ kɛɛ bɛtɩ ɔhʋanɩ mɔɔ ɔzɔ odwokɔtile nɩ ɩkɔhʋla ɩkɔwʋwa bɛ nɩ tʋ bʋwɔ baaba.

Mmɩlɩ mɔ esiyeziyee ndɛnɩ yɩ nɩ, bizia wʋ nwʋ kɛɛ, ‘Mɩnla bʋwabɩlɛ yɛɛ mi mmeliyema mmenyia nɩɩ mmaalɛ mɔɔ bɔwɔ mɩ asafʋ yɩ nu nɩ beyiyiaa?’ Na akʋ̃ ma wʋ anyunumiyɩlɛ nɩ, ɩ nɩɩ bɛ ahyinyiadɩ nɩ iyiyia.