DƖYƐZUMANLƐ 15

Anwʋlazʋ Mɔɔ Bɛfa Bɛtɩndɛ

1 Tɛsalonikamaa 1:5

MƆ ƖSƐ KƐƐ ƐYƐ: Dá yɩ ali kɛɛ mɔ ɛkãã nɩ, ede edi paa kɛɛ ɩdɩ nɔhʋanlɛ na nwʋmɔ hyinyia.

Siyeziyé wʋ nwʋ bʋwɔ. Sumá ndɛnɩ nɩ kɔbʋmɩ kɛɛ ɛkɛdɩ ndwokɔ aditili nɩ tʋ nɩɩ kezimɔ Bayɩbʋlʋ nɩ ɩda yɩ ali kɛɛ ɔzɔ ndwokɔ aditili nɩ ɩdɩ nɔhʋanlɛ. Bɔ́ mmɔdɩnɩ kɛɛ ɛlɛ́fa ndwokɔ sʋ̃maa ekehilehile ndwokɔ aditili mɔɔ ɩwɔ wʋ egyimalilɛ yɩ nu nɩ. Fá wʋ adwɩnɩ siye kezimɔ ɩkɔwʋwa wʋ ediyelɛmaa nɩ zʋ. Bɔ́ mpayɩ siã sunzuma nwanzanwanza.

Bʋbɔ́ wʋ egyimalilɛ nɩ zʋ ma ivindenli wʋ munwa mbɔmɩ sʋ̃maa. Eyi ɩkɛma wʋ ndɛnɩ nɩ ɩkɔwʋwa wʋ adwɩnɩ nu na wʋadu mpʋnɩ wɔ wʋ ndɛnɩmanlɛ nu.
Fá ndwokɔ mɔɔ ɩda anwʋlazʋ ali nɩ di egyima. Kɛ ankɩ ɛkɛva ɔnwʋma mɔɔ ɛlɛ ɛyɛ wʋ egyimalilɛ nu ndwokɔ ɛkɛhã yɩ senyii mbɔmɩ sʋ̃maa nɩ, fá wʋzawʋ wʋ ndwokɔ kã mfomi. Fá ndwokɔ mɔɔ ikile kɛɛ ɔwɔ anwʋlazʋ wɔ mɔɔ ɛkã nɩ nu di egyima.
Ɔzʋ̃ wʋ ahʋnlɩnɩ munwatĩĩ nu da wʋ ndwokɔ nɩ ali. Sɛ ɛtɩndɛɛ a, pigyiá wʋ nnɩ sʋlɔ ma bɛdɩ mɔ ɛkãã nɩ bʋwɔ. Sɛ ɩdɩyɛnɛ wɔ dɩka mɔ ɔwɔ nɩ a, kilá wʋ ediyelɛmaa bɛ anyunu senyii mbɔmɩ sʋ̃maa.

Anwʋlazʋ mɔɔ ɛkɛla yɩ ali nɩ iáhile kɛɛ ɛkɛyɛ nhyɛ, kyɩngyɩ̃ɩ̃, anzɛnyɩɩ okodudu ndwokɔ bumbum. Sɛ mɔɔ ɛkãã yɩ ɩdɩ nɔhʋanlɛ po a, ɛ nɩɩ wʋ ediyelɛmaa nɩ bɛdɩndɛ wɔ ɔlɔlɛ ɔhʋanɩ zʋ.