OZUMALƐDƖYƐ 14
Kɛ Ɩkɛyɛ Na Yɛ Ɔzʋ̃mɩnlɛ Ɩazɔ Nyamɩnlɩ Yɩ Anyɩ a?
Kɛmɔ yeli bɔmʋnlɩ yezuma nɩ, kɛ ɔzʋ̃mɩnlɛ munwatĩĩ yɛ ɩsɔ Nyamɩnlɩ yɩ anyɩ a. Naasʋ̃, sa yɛkʋla yɛsʋ̃mɩ yɛ Wɔlɛvʋlɔ nɩ wɔ ɔhʋanɩ be zʋ mɔɔ ɩkɛma yɩ anyɩ ikele. Mɩnla “ɔzʋ̃mɩnlɛ” yɛ ɩsɔ yɩ anyɩ a? (Gyemisi 1:27) Sunzu mɔɔ Bayɩbʋlʋ yɩ ikilehile nɩ nwʋ kila.
1. Mɩnla yɛ ɩsɛ kɛɛ yɛfa yɛ ɔzʋ̃mɩnlɛ yekyina ɔzʋlɔ a?
Ɩsɛ kɛɛ yɛfa yɛ ɔzʋ̃mɩnlɛ yekyina Bayɩbʋlʋ yɩ zʋ. Gyisɛsɩ ɩhanlɩ ihileli Nyamɩnlɩ kɛɛ: ‘Wʋ odwokɔ ɩdɩ nɔhʋanlɛ.’ (Dwɔɔnʋ 17:17) Ɔzʋ̃mɩnlɛ ebiyemmɔ bu bɛ anyɩ kua nɔhʋanlɛ mɔɔ ɩwɔ Nyamɩnlɩ yɩ Odwokɔ Bayɩbʋlʋ, mɔɔ ɩvalɩ yɩ sunzunma ɩhɛlɛlɩ nɩ zʋ, na bekilehile enii nɣɛlɛbɛ nɩɩ amamɩlɛ. Naasʋ̃ Gyehova yɩ anyɩ iáleli bɛzabɛ mɔɔ “bɔpʋ Nyamɩnlɩ mmɛla nwʋ.” (Kɩnga Maakɩ 7:9.) Naasʋ̃ sɛ yɛfa Bayɩbʋlʋ nu fʋlɔdulɛ yɛbɔ yɛ ɛbɩla a, ɩma yɩ anyɩ ide baaba.
2. Mɩnla ɔhʋanɩ zʋ yɛ ɩsɛ kɛɛ yɛsʋ̃mɩ Gyehova a?
Gyehova yɛ ɩdɩ yɛ Wɔlɛvʋlɔ a, meti ɩsɛ kɛɛ yɛsʋ̃mɩ yɩzayɩ nkʋ̃ kyeinyii. (Yikile 4:11) Eyi ikile kɛɛ ɩsɛ kɛɛ yɛdɔ yɩ na yɛsʋ̃mɩ yɩzayɩ nkʋ̃ kyeinyii mɔɔ yɛlɛ́fa mfonyini anzɛnyɩɩ mmoduwaba yekeli egyima.—Kɩnga Ayɩzaya 42:8.
Ɩsɛ kɛɛ yɛfa ɔzʋ̃mɩnlɛ mɔɔ “nwʋmɔ ɩtɩ na ɩsɔ anyɩnlɩ” yɛma Gyehova. (Wulomimaa 12:1) Eyi ikile kɛɛ ɩsɛ kɛɛ yɛfa yɩ mmɛla yɛbɔ yɛ ɛbɩla. Kɛ ndianwʋ nɩ, bɛzabɛ mɔɔ bɔdɔ Gyehova nɩ bɔdɔ yɩ mmɛla mɔɔ ɩfalɩ agyiahʋnlɩ nwʋ na bɛfa bɛyɛ egyima. Na bɔtwɩ̃ bɔ nwʋ wɔ nyɛlɩyɛ mɔɔ ɩkɔhʋla ɩkɛva bɔ nnwʋanlɩ ikediã asianɩ nu dɩkɛɛ sɩgɛlɛtɩnlʋnlɛ, nnuno tanɩ nlʋnlɛ nɩɩ nzãnlʋnlɛ sʋ̃maa nwʋ.a
3. Mɩnla ti mɔɔ ɩsɛ kɛɛ yɛ nɩɩ yɛ ɔhɔnwʋmmɔ dedimaa bɔ numɔ sʋ̃mɩ Gyehova a?
Dɩyɛzumanlɛ mɔɔ yɛkɔ yɩ dapɛnɩ bela nɩ ɩma yenyia ɔnwʋmɔ ɔhʋanɩ ‘yɛyɩ Gyehova ayɛlɛ wɔ asafʋ yi nu.’ (Ndwomi 111:1, 2) Ɔhʋanɩ ɔkʋ̃ mɔɔ yeduwa ɔzʋlɔ yɛyɛ ɔzɔ yɛ lɛ ndwomi mɔɔ yɛtʋ yɛfa yɛyɩ Nyamɩnlɩ ayɛlɛ nɩ. (Kɩnga Ndwomi 104:33.) Gyehova ɩkã kɛɛ yɛhɔ́ dɩyɛzumanlɛ iluwakɛɛ ɩdɔ yɛ na izi kɛɛ ɩkɔwʋwa yɛ ma yɛ anyɩ ikele daabaa. Sɛ yeyiyia numɔ yɛhyɛ yɛ nwʋ ɛzɩzɩbɛ a, ɩbʋwa yɛ .
SUMÁ SƲ̃MAA
Kilá sianti mɔɔ Gyehova iále itiã numɔ kɛɛ yekoluwa aboduwaba zʋ yɛkɔzʋ̃mɩ yɩ nɩ. Sumá ɔhʋanɩba mɔɔ sa yɛkʋla yeduwa ɔzʋlɔ yɛsʋ̃mɩ Nyamɩnlɩ.
4. Íni kɛɛ yɛfa mmoduwaba yedi egyima wɔ yɛ ɔzʋ̃mɩnlɛ nu
Kɛ ɩyɛ mɔɔ yɛnwʋ kɛɛ sɛ yɛyɛ ɔzɔ a Nyamɩnlɩ ɩábɛ yɩ a? Yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.
Wɔ ɔwɔkɩ nɩ, mmɩlɩ mɔ Nyamɩnlɩ yɩ mmenii be bɛyɛlɩ kɛɛ boduwaa aboduwaba zʋ bɔkɔzʋ̃mɩ yɩ nɩ, mɩnla yɛ izili a?
Abiyemmɔ bɛtɩ nɣanlɩ kɛɛ sɛ boduwa aboduwaba zʋ bɔsʋ̃mɩ Nyamɩnlɩ a, ɩkɛma bekeɣike yɩ. Naasʋ̃ sɛ bɛyɛ ɔzɔ a, ɩlɛ́ma ɩkɔhwɩ̃ yɩ nwʋ wɔ bɔ nwʋ mfomi a? Kɩnga Ɛkɩsadɔsʋ 20:4-6 nɩɩ Ndwomi 106:35, 36, na akʋ̃ bozunzú ndwokɔɣizialɛ eyimmɔ nwʋ:
Mɩnla mmoduwaba anzɛnyɩɩ mfonyini yɛ ɔnwʋ kɛɛ abiyemmɔ bɛlɛ bedii egyima wɔ bɔ ɔzʋ̃mɩnlɛ nu a?
Mmoduwaba mɔɔ bɛfa bedi egyima nɩ, kɛ Gyehova ɩtɩ nɣanlɩ wɔ nwʋmɔ ise a?
Ekila a, ɩdɩ baaba kɛɛ yɛkɛva aboduwaba yekeli egyima wɔ yɛ ɔzʋ̃mɩnlɛ nu a? Mɩnla ti mɔɔ ɛkãã ɔzɔ a?
5. Gyehova yɩzayɩ nkʋ̃ kyeinyii mɔɔ yɛkɔzʋ̃mɩ yɩ nɩ ikele yɛ wɔ awohwi ehilehilelɛ nwʋ
Kila kezimɔ sɛ yɛsʋ̃mɩ Gyehova wɔ ɔhʋanɩ mɔɔ ide itiã numɔ zʋ a, ɩkʋla ide yɛ wɔ awohwi ehilehilelɛ nwʋ. Yɩ́ VIDIYO nɩ.
Kɩnga Ndwomi 91:14, na akʋ̃ bozunzú odwokɔɣizialɛ eyi nwʋ:
Sɛ yɛsʋ̃mɩ Gyehova yɩzayɩ nkʋ̃ kyeinyii yɛfa yekile kɛɛ yɛdɔ yɩ a, mɩnla yɛ ɩwɔ anʋhʋba kɛɛ ɩkɛyɛ ɩkɛma yɛ a?
6. Yɛsʋ̃mɩ Nyamɩnlɩ wɔ asafʋ ayiyialɩyɛ tʋ
Yɛyɩ Gyehova ayɛlɛ na yɛhyɛ yɛ nwʋ yɛ nwʋ ɛzɩzɩbɛ iluwa ndwomidʋlɛ nɩɩ munwalɩyɛ mɔɔ yɛma wɔ asafʋ ayiyialɩyɛ tʋ nɩ. Kɩnga Ndwomi 22:22, na akʋ̃ bozunzú ndwokɔɣizialɛ eyimmɔ nwʋ:
Asʋ̃ wʋ anyɩ ideli munwalɩyɛ mɔɔ ɛtɩ wɔ dɩyɛzumanlɛ tʋ nɩ nwʋ a?
Asʋ̃ wʋ anyɩ ikeleli nwʋmɔ kɛɛ ekeziyeziye wʋ nwʋ ɛkɛma munwalɩyɛ a?
7. Sɛ yɛkã mɔɔ yesuma nɩ be yekile mmenii mvʋlɔ a, ɩma Gyehova anyɩ de
Ɔhʋanɩ sʋ̃maa wɔ ɛkɛnɩ mɔɔ sa yɛkʋla yeduwa ɔzʋlɔ yɛkã Bayɩbʋlʋ nu nɔhʋanlɛ yɩ be yekile mmenii mvʋlɔ. Kɩnga Ndwomi 9:1 nɩɩ 34:1, na akʋ̃ bozunzú odwokɔɣizialɛ eyi nwʋ:
Mɩnla yɛ ozuma wɔ Bayɩbʋlʋ yi nu mɔɔ ɛpɛ kɛɛ ɛkã nwʋmɔ odwokɔ ekile abiye a?
ABIYEMMƆ BƐKÃ KƐƐ: “Yɛlɔ́kʋla yɛkɔzɔ Nyamɩnlɩ yɩ anyɩ.”
Kɛ ɔdwɩnɩ nwʋmɔ ese a?
YƖ DƆKƆWƆLƐ
Sɛ yɛsʋ̃mɩ yɛ Wɔlɛvʋlɔ yɩ yɩzayɩ nkʋ̃ kyeinyii, yɛyɩ yɩ ayɛlɛ wɔ asafʋ ayiyialɩyɛ tʋ, na yɛkã mɔɔ yesuma nɩ be yekile mmenii mvʋlɔ a, ɩkɛma yɛkɔzɔ yɩ anyɩ.
Kɛ Okowuwa Ekeze a?
Kɛ ɩkɛyɛ na yɛanwʋ kezimɔ yɛkɔzʋ̃mɩ Nyamɩnlɩ wɔ ɔhʋanɩ mɔɔ ide itiã numɔ zʋ a?
Mɩnla ti mɔɔ ɩsɛ kɛɛ yɛsʋ̃mɩ Gyehova yɩzayɩ nkʋ̃ kyeinyii a?
Mɩnla ti mɔɔ ɩsɛ kɛɛ yɛ nɩɩ mmenii mɔɔ bɛpɛ kɛɛ bɔsɔ Nyamɩnlɩ anyɩ nɩ bɔ numɔ sʋ̃mɩ a?
PƖBƐ́ SƲ̃MAA
Kɩnga sianti mɔɔ baalɛ be yɩ anyɩ ile kɛɛ iyiaki awʋzʋmɩzʋ̃mɩlɛ nɩ.
“Bayɩbʋlʋ Ɩsɩnza Ɛbɩlawɔlɛ” (Ɔwɩɛnɩlɛ Aɣanɩ, October 1, 2011)
Sumá dɩyɛ mɔɔ ɩkɔwʋwa wʋ ma ɛkɛma munwalɩyɛ wɔ asafʋ ayiyialɩyɛ tʋ.
“Yɩ́ Gyehova Ayɛlɛ Wɔ Asafʋ Yi Nu” (Ɔwɩɛnɩlɛ Aɣanɩ, January 2019)
Kila kezimɔ abɩlantɩyɛ be inyianlɩ asafʋ ayiyialɩyɛ zʋ mfasʋ, ɩávalɩ nwʋmɔ kɛɛ ahyɛasɩ yɩ nɩ ɩyɛ sɩ ɩma yɩ kɛɛ ɩkɔhɔ ebiye nɩ.
Mmenii sʋ̃maa sunzu kɛɛ kʋlɔɔsʋ ɩdɩ Kilisinyiamaa bɔ ndwɩyɛlɛ, naasʋ̃ ekila a, ɩsɛ kɛɛ yɛfa yedi egyima wɔ yɛ ɔzʋ̃mɩnlɛ nu a?
a Aɣinzi yi sa yesunzu ndwokɔ eyimmɔ nwʋ.