Sɛ Yewu a Mɩnla Yɛ Ɩtʋ Yɛ a?

Asʋ̃ wʋ dɔvʋlɔ be wu kyɩ̃ a? Wɔ ɔzɔ mmɩlɩ mɔ edii ɛyɛkɛ nɩ, ebiye a ekeɣizia kɛɛ: ‘Yewu a mɩnla yɛ ɩtʋ yɛ a? Asʋ̃ anyɩnlɩlazʋ wɔ ɛkɛnɩ kɛɛ yɛkɔnwʋ yɛ alɔvʋlɔ mɔɔ bowuwu nɩ dɔkʋ̃ a?’ Wɔ ozumalɛdɩyɛ eyi nɩɩ mɔɔ ili ɛkɛnɩ yi nu nɩ, ɔkɔnwʋ Bayɩbʋlʋ yɩ munwalɩyɛ mɔɔ ɩkɛma wʋ ahʋnlɩnɩ ɩkɔdɔ wu kunlu.

1. Sɛ yewu a mɩnla yɛ ɩtʋ yɛ a?

Gyisɛsɩ ɩvalɩ owulo idindianlɩ nna nwʋ. Abiye mɔɔ ɩla ɩhɔ aɣinzi nɩ, ɩánwʋ mɔɔ ɩkɔlɩɩ zʋ. Mɩnla ɔhʋanɩ zʋ yɛ owulo ɩdɩ kɛɛ nna a? Sɛ abiye wu a, ɩádɩ ɛyɛkɛ na ɩánwʋ amanɩyɛ. Bayɩbʋlʋ ɩka kɛɛ “awuvʋlɔ bézi dɩyɛ bela.”—Kɩnga Odwokɔhanlɛvʋlɔ 9:5.

2. Mɩnla mfasʋ yɛ yekenyia mmɩlɩ mɔ yɛnwʋ nɔhʋanlɛ mɔɔ ɩfalɩ owulo nwʋ a?

Mmenii sʋ̃maa bo kunlu ituli owulo nwʋ, na bo kunlu ituli mmenii mɔɔ bowuwu po nwʋ! Naasʋ̃ mɔɔ Bayɩbʋlʋ ɩka ɩfalɩ owulo nwʋ nɩ ɩkɔhʋla ɩkɛyɩkyɩ yɛ ɛɣɛɛlɛ. Gyisɛsɩ ɩhanlɩ kɛɛ: “Nɔhʋanlɛ nɩ ɩkɛma mʋnlʋmmɔ bekenyia fanwʋdi.” (Dwɔɔnʋ 8:32) Ɔzʋ̃mɩnlɛ azʋlɔtʋ bekilehile kɛɛ, sɛ enii wu a dɩyɛ be wula yi nu mɔɔ mɛyɩ iáwu kyɩ̃ na ɩkɔlɩ ɔzʋlɔ ɩbʋwa azɩ, naasʋ̃ kɛ ɔzɔ yɛ Bayɩbʋlʋ ikilehile a. Meti sɛ abiye wu a, ɩánwʋ amanɩyɛ. Akʋ̃ sʋ̃, iluwakɛɛ awuvʋlɔ bézi dɩyɛ bela nɩ ti, bɔlɔ́kʋla bɛkɛyɛ tanɩ yɛ. Meti nwʋmɔ iáhyinyia kɛɛ yɛkɔzʋ̃mɩ awuvʋlɔ anzɛnyɩɩ yɛkɛyɛ dɩyɛ be yɛkɛbɩda bɛ na yɛawɔ mpayɩ yɛama bɛ.

Abiyemmɔ bɛkã kɛɛ sa bɔkʋla bɛ nɩɩ awuvʋlɔ tɩndɛ. Naasʋ̃ eyi ɩlɔ́kʋla ɩkɛyɛ bʋwɔ. Kɛmɔ yezuma yɩ sikalɛyɩ nɩ, awuvʋlɔ “bézi dɩyɛ bela.” Bɛzabɛ mɔɔ bɔdwɩnɩ kɛɛ bɛ nɩɩ bɛ alɔvʋlɔ mɔɔ bowuwu nɩ bɛtɩndɛɛ nɩ, bɛ nɩɩ azunzuma evinli mɔɔ bɛyɛ bɔ nwʋ kɛɛ mmenii mɔɔ bowuwu nɩ mfomi yɛ bɛtɩndɛɛ a. Meti sɛ yɛnwʋ nɔhʋanlɛ mɔɔ ɩfalɩ owulo nwʋ a, ɩkɔwɔ yɛ nwʋ banɩ wɔ azunzuma evinli nwʋ. Gyehova ɩbɔ yɛ kɔkɔ wɔ awuvʋlɔ mɔɔ yɛkɔwɔ mmɔdɩnɩ kɛɛ yɛ nɩɩ bɛ kɛdɩndɛ nɩ nwʋ, iluwakɛɛ izi kɛɛ sɛ yɛ nɩɩ azunzuma evinli di nkitanwʋ a, sa bɔkʋla bepila yɛ.—Kɩnga Ditilonɔmi 18:10-12.

3. Sumá nɔhʋanlɛ mɔɔ ɩfalɩ bʋwabɩlɛ mɔɔ awuvʋlɔ wɔ numɔ nɩ nwʋ

Wɔ oyuwadɩ dɩka bela nɩ, ɩsʋnɩ dedi mɔɔ mmenii sʋ̃maa bɛlɛ wɔ mɔɔ yewu a ɩtʋ yɛ nɩ nwʋ. Naasʋ̃, kɛ ɔzɔ dedi yi munwatĩĩ yɛ ɩdɩ nɔhʋanlɛ a.

• Mɩnla dedi yɛ mmenii lɛ wɔ awuvʋlɔ nwʋ wɔ dɩka mɔɔ ɛda nɩ a?

VIDIYO: Mɩnla Bʋwabɩlɛ Yɛ Awuvʋlɔ Wɔ Numɔ a?—Yɩ Ɔfʋã Be (1:19)

Kɩnga Odwokɔhanlɛvʋlɔ 3:20, na akʋ̃ bozunzú ndwokɔɣizialɛ eyimmɔ nwʋ:

• Kɛmɔ ɛhɛlɛlɛ odwokɔ eyi ikile nɩ, sɛ abiye wu a, ɩkɔ ɛhɩnla?

• Asʋ̃ dɩyɛ be wɔ ye nu mɔɔ iáwu kyɩ̃ a?

Bayɩbʋlʋ ɩkã Gyisɛsɩ yɩ ɔhɔnwʋ baaba Lazʋlɔsʋ yi owulo nwʋ odwokɔ ikile yɛ. Mmɩlɩ mɔ ɛkɩngaa Dwɔɔnʋ 11:11-14 nɩ, yɛ́ kezimɔ Gyisɛsɩ ɩhanlɩ bʋwabɩlɛ mɔɔ nɩ Lazʋlɔsʋ ɩwɔ numɔ nɩ ndwɩ. Akʋ̃ bozunzú ndwokɔɣizialɛ eyimmɔ nwʋ:

• Mɩnla yɛ Gyisɛsɩ ɩvalɩ owulo idindianlɩ nwʋ a?

• Mɩnla ɔhʋanɩ zʋ yɛ ɔzɔ ndindianwʋ nɩ ɩma yɛnwʋ bʋwabɩlɛ mɔɔ awuvʋlɔ wɔ numɔ a?

• Asʋ̃ ntɩyasɩ wɔ mɔɔ Bayɩbʋlʋ ɩkã ɩfalɩ awuvʋlɔ nwʋ nɩ nu a?

4. Nɔhʋanlɛ mɔɔ ɩfalɩ awuvʋlɔ nwʋ nɩ ɩbʋwa yɛ

Sɛ yɛnwʋ nɔhʋanlɛ mɔɔ ɩfalɩ owulo nwʋ a, ɩáma ye kunlu ituli awuvʋlɔ nwʋ. Kɩnga Odwokɔhanlɛvʋlɔ 9:10, na akʋ̃ bozunzú odwokɔɣizialɛ eyi nwʋ:

• Asʋ̃ mmenii mɔɔ bowuwu nɩ bɔkɔhʋla bekebila yɛ a?

Nɔhʋanlɛ mɔɔ ɩwɔ Bayɩbʋlʋ nu nɩ, ɩbɔ yɛ nwʋ banɩ wɔ dedi mɔɔ mmenii lɛ kɛɛ ɩsɛ kɛɛ yɛpɩda awuvʋlɔ anzɛnyɩɩ yɛsʋ̃mɩ bɛ po nɩ nwʋ. Kɩnga Ayɩzaya 8:19 nɩɩ Yikile 4:11, na akʋ̃ bozunzú odwokɔɣizialɛ eyi nwʋ:

• Ekila a, abiye mɔɔ ɩsʋ̃mɩ awuvʋlɔ anzɛnyɩɩ ɩpɩbɛ mmʋwalɩyɛ wɔ bɛ ɛkɛnɩ nɩ, kɛ Gyehova ibu yi ise a?

5. Nɔhʋanlɛ mɔɔ ɩfalɩ owulo nwʋ nɩ ɩkyɩkyɩ yɛ ɛɣɛɛlɛ

Behilehile mmenii sʋ̃maa kɛɛ sɛ bowu a, bɔkɔhwɩ̃ bɛ azʋ̃ wɔ tanɩ mɔɔ bɛyɛlɩ nɩ nwʋ. Naasʋ̃ kila kezimɔ ɩkyɩkyɩ yɛ ɛɣɛɛlɛ kɛɛ yɛkɔnwʋ kɛɛ, mmenii mɔɔ bowu nɩ bɛánwʋ amanɩyɛ. Mmenii po mɔɔ bɛyɛlɩ tanɩ nɣezile mɔɔ bowu nɩ bɛánwʋ amanɩyɛ. Kɩnga Wulomimaa 6:7 (NWT), na akʋ̃ bozunzú odwokɔɣizialɛ eyi nwʋ:

• Bayɩbʋlʋ ɩkã kɛɛ sɛ abiye iwu a, nɩ bɛva yɩ tanɩ bɛhyɛ yɩ. Meti sɛ ekila a, abiye iwu a, ɩnwʋ amanɩyɛ iluwa tanɩ be mɔɔ mmɩlɩ be ɩyɛlɩ nɩ ti a?

Sɛ yesuma Gyehova nwʋ dɩyɛ sʋ̃maa a, yɛkɛɣa yɛkɔnwʋ kɛɛ ɩlɛ́yɛ mmenii mɔɔ bowu nɩ atɩɩtɩɩ kyɩ̃. Kɩnga Ditilonɔmi 32:4 nɩɩ 1 Dwɔɔnʋ 4:8, na akʋ̃ bozunzú ndwokɔɣizialɛ eyimmɔ nwʋ:

• Ekila a, Nyamɩnlɩ mɔɔ ɩwɔ subanɩ ngɩnlɩma mɔɔ bɛhɛlɛ yɩ wɔ Bayɩbʋlʋ nu nɩ, ɩkɛma ɔhʋanɩ ma bɛkɛyɛ mmenii mɔɔ bowu nɩ atɩɩtɩɩ a?

• Asʋ̃ nɔhʋanlɛ mɔɔ ɩfalɩ owulo nwʋ nɩ ɩkyɩkyɩ wʋ ɛɣɛɛlɛ a? Mɩnla ti a?

YƖ DƆKƆWƆLƐ

Sɛ abiye iwu a, nɩ yɩ nnwʋanlɩ ɩɣa awielɩyɛ. Awuvʋlɔ bɛánwʋ amanɩyɛ na bɔlɔ́kʋla bɛkɛyɛ tanɩ yɛ.

Kɛ Okowuwa Ekeze a?

• Sɛ yewu a, mɩnla yɛ ɩtʋ yɛ a?

• Nɔhʋanlɛ mɔɔ ɩfalɩ owulo nwʋ nɩ, kɛ ɩbʋwa yɛ ise a?

• Mɩnla ɔhʋanɩ zʋ yɛ nɔhʋanlɛ mɔɔ ɩfalɩ owulo nwʋ nɩ ɩkyɩkyɩ yɛ ɛɣɛɛlɛ a?

PƖBƐ́ SƲ̃MAA

Kilá mɔɔ odwokɔ pɔkɔ “ɛkɛla” yɩ tʋ ikile wɔ Bayɩbʋlʋ yi nu.

“Mɩnla Yɛ Lɛ Ɛkɛla a?” (Ndwokɔ mɔɔ ɩwɔ jw.org zʋ)

Kilá kɛɛ Nyamɩnlɩ ɩfa hɛɛlɩ anzɛnyɩɩ abɔnsamɩ sɩnɩ ɩtwɩ̃ tanɩyɛlɛmaa bɛ azʋ̃ a.

Asʋ̃ Hɛɛlɩ Ɩdɩ Dɩka Mɔɔ Bɛyɛ Mmenii Ayɛkwa a? (3:07)

Asʋ̃ ɩsɛ kɛɛ yɛma ye kunlu ituli awuvʋlɔ nwʋ a?

Awuvʋlɔ Bo Sunzuma—Bɔkɔhʋla Bɔkɔwʋwa Wʋ Anzɛnyɩɩ Bekebila Wʋ a? Asʋ̃ Bɔwɔ Ɛkɛnɩ Amba a? (blohyʋɔ)

Kilá kezimɔ benyia be yɩ ahʋnlɩnɩ ɩdɔlɩ yi kunlu mmɩlɩ mɔ izumanlɩ nɔhʋanlɛ mɔɔ ɩfalɩ bʋwabɩlɛ mɔɔ awuvʋlɔ wɔ numɔ nɩ.

“Bayɩbʋlʋ Yi Munwalɩyɛ Mɔɔ Numɔ Ɩla Ɛkɛnɩ Nɩ Ɩhanlɩ Mɩ Ahʋnlɩnɩ” (Ɔwɩɛnɩlɛ Aɣanɩ, February 1, 2015)