Mɩnla Yɛ Lɛ Nyamɩnlɩ Bulombunlililɛ Nɩ a?

Nyamɩnlɩ Bulombunlililɛ yɩ nɩ yɛ lɛ Bayɩbʋlʋ yi odwokɔtile titili a. Gyehova koluwa ɔzɔ Bulombunlililɛ yɩ zʋ ɩkɛma yi tile nu pɔkɔ mɔɔ ɩwɔ ɩfalɩ azɩlɛ yɩ nwʋ nɩ ɩkɛɣa numɔ. Mɩnla yɛ lɛ Bulombunlililɛ yɩ a? Kɛ ɩyɛ mɔɔ yɛnwʋ yɩ kɛɛ idii tumi nnɛ a? Mɩnla yɛ ɩhʋla ɩyɛ a? Na mɩnla yɛ ɩkɛyɛ wɔ eɣile be sʋ̃ a? Yekenyia munwalɩyɛ nɩ wɔ ozumalɛdɩyɛ eyi nɩɩ ozumalɛdɩyɛ anwɩ̃ mɔɔ ili ɛkɛnɩ nɩ nu.

1. Mɩnla yɛ lɛ Nyamɩnlɩ Bulombunlililɛ nɩ a, na aninyia yɛ ɩdɩ ɔzʋlɔ Bulombunli a?

Ɩdɩ aɣanɩ mɔɔ Gyehova Nyamɩnlɩ yɛ ɩhyɩhyɛ a. Gyisɛsɩ Kɩlayɩsɩ yɛ ɩdɩ ɔzʋlɔ Bulombunli a, na ɩda sʋlɔ yɛ idii tumi a. (Matiyu 4:​17; Dwɔɔnʋ 18:​36) Bayɩbʋlʋ ɩkã ɩfalɩ Gyisɛsɩ nwʋ kɛɛ: ‘Ikeli bulombunli, na yi bulombunlililɛ ɩlɛ́ba awielɩyɛ kyɩ̃.’ (Luuku 1:​32, 33) Kɛ Nyamɩnlɩ yi Bolumbunlililɛ zʋ Bulombunli nɩ, Gyisɛsɩ ikeli abiyela mɔɔ ɩwɔ azɩlɛ yɩ zʋ nɩ zʋ tumi.

2. Aninyiammɔ yɛ bɛ nɩɩ Gyisɛsɩ ikeli tumi a?

Kɛ Gyisɛsɩ yɩzayɩ nkʋ̃ yɛ ikeli tumi a. Mmenii mɔɔ bɔzʋ̃ “abusunwa bela, ɛdɩndɛlɛ bela nɩɩ amanlɩ bela nu” yɛ bɛ nɩɩ yɩ ikeli tumi a. (Yikile 5:​9, 10) Mmenii mɔɔ bɛ nɩɩ Kɩlayɩsɩ keli tumi nɩ, bɔ dʋdʋ ɩdɩ ana? Ɔzʋmɩ kɛɛ Gyisɛsɩ ɩɣalɩ azɩlɛ yɩ zʋ nɩ, Kilisinyiamaa abʋmɩ abʋmɩ sʋ̃maa yɛ bɛɣa bɛyɛ yɩ mmɛdalilɛmaa. Naasʋ̃ bo nu 144,000 la yɛ bɔkɔhɔ sʋlɔ na bɛ nɩɩ Gyisɛsɩ bɛali tumi a. (Kɩnga Yikile 14:​1-4.) Kilisinyiamaa mɔɔ bɛha nɩ munwala kɛyɛ Bulombunlililɛ yɩ manlɩmaa wɔ azɩlɛ yɩ zʋ.​—Ndwomi 37:29.

3. Mɩnla ti mɔɔ Nyamɩnlɩ Bulombunlililɛ ɩdɩ baaba ɩtɛla enii yɩ aɣanɩ a?

Sɛ mmenii mɔɔ bɔwɔ tumi bɔ mmɔdɩnɩ kɛɛ bɛkɛyɛ nninyeni baaba po a, béni tumi mɔɔ bɛkɛva bɛkɛyɛ dɩyɛ bela mɔɔ benyianlɩ a ankɩ bɛkɛyɛ nɩ. Na mbɔmɩ sʋ̃maa nɩ, bɛsɩnza bɛ ma adumivʋlɔ mɔɔ bɛádwɩnɩ bɛ manlɩmaa nwʋ bɛba besiye bɛ agyia nu. Naasʋ̃ Gyisɛsɩ mɔɔ ɩdɩ Nyamɩnlɩ Bulombunlililɛ yɩ zʋ Bulombunli nɩ, bɛlɛ́sɩnza yɩ ma abiye ɩkɛɣa ikeziye yi agyia nu. Nyamɩnlɩ Bulombunlililɛ yɩ, ‘bɛlɛ́sɩkɛ yɩ kyɩ̃.’ (Danɩyɛlɩ 2:​44) Gyisɛsɩ keli azɩlɛ yɩ munwala zʋ, na ɩlɛ́yɛ nyiyimi. Ɩwɔ ɔlɔlɛ, ɩda kunlumiba ali, na ɩdɩ pɛlɩpɛlɩ. Ikehilehile mmenii ma bɛ nɩɩ bɔ ɔhɔnwʋmmɔ keli wɔ ɔlɔlɛ, kunlumiba nɩɩ pɛlɩpɛlɩlilɛ nu.​—Kɩnga Ayɩzaya 11:9.

4. Nyamɩnlɩ Bulombunlililɛ ikeli tumi wɔ azɩlɛ yɩ zʋ

Gyisɛsɩ Kɩlayɩsɩ wɔ tumi kezile tɛla enii aɣanɩ bela. Kɩnga Matiyu 28:​18, na akʋ̃ bozunzú odwokɔɣizialɛ eyi nwʋ:

• Mɩnla ɔhʋanɩ zʋ yɛ Gyisɛsɩ ɩlɛ tumi ɩtɛla enii aɣanɩ bela a?

Bɛta bɛsɩnza enii aɣanɩ azʋlɔtʋ nu, na adumivʋlɔ yɩ bo nu bela di azɩlɛ yɩ ɔfʋã ɛgyɩkɩ̃ɩ̃ be la zʋ tumi. Na Nyamɩnlɩ Bulombunlililɛ yɩ sʋ̃ ɛ? Kɩnga Danɩyɛlɩ 7:​14, na akʋ̃ bozunzú ndwokɔɣizialɛ eyimmɔ nwʋ:

• Mɩnla ti mɔɔ ɩdɩ baaba kɛɛ “bɛlɛ́sɩkɛ” Nyamɩnlɩ Bulombunlililɛ yɩ kyɩ̃ a?

• Mɩnla ti mɔɔ ɩdɩ baaba kɛɛ ikeli azɩlɛ yɩ munwala zʋ tumi a?

5. Ɩsɛ kɛɛ bɛyɩ enii yɩ aɣanɩ wɔ ɛkɛnɩ

Mɩnla ti mɔɔ ɩsɛ kɛɛ Nyamɩnlɩ Bulombunlililɛ ɩba isiye enii yɩ aɣanɩ yɩ agyia nu a? Yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.

VIDIYO: Nyamɩnlɩ Bulombunlililɛ Nɩ, Mɛyɩ Yɛ Lɛ Mɩnla?​—Yɩ Ɔfʋã Be (1:41)

• Mɩnla yɛ ɩzʋ̃ enii yi tumililɛ nu ɩɣa a?

Kɩnga Odwokɔhanlɛvʋlɔ 8:​9, na akʋ̃ bozunzú ndwokɔɣizialɛ eyimmɔ nwʋ:

• Asʋ̃ osunzu kɛɛ ɩsɛ kɛɛ Nyamɩnlɩ Bulombunlililɛ nɩ ɩba isiye enii yɩ tumililɛ yɩ agyia nu a? Mɩnla ti a?

6. Bɛzabɛ mɔɔ bekeli tumi wɔ Nyamɩnlɩ Bulombunlililɛ yɩ zʋ nɩ bɛtɩ yɛ tʋ

Iluwakɛɛ ye Bulombunli Gyisɛsɩ ɩɣa ɩwʋwalɩ azɩlɛ yɩ zʋ kɛɛ enii nɩ ti, sa “ɩnwʋ yɛ ngokɛ wɔ ye sinidɔlɛ nu.” (Hibulumaa 4:​15) Gyehova ɩyɩlɩ mmenyia nɩɩ mmaalɛ nɔhʋanlɛmaa 144,000 mɔɔ bɛ nɩɩ Gyisɛsɩ keli tumi nɩ wɔ “abusunwa bela, ɛdɩndɛlɛ bela nɩɩ amanlɩ bela nu.”​—Yikile 5:9.

• Mmenii mɔɔ bɛtɩ adasamaa yɛ bʋwabɩlɛ tʋ mɔɔ Gyisɛsɩ ɩ nɩɩ bɛ keli tumi nɩ, ɩma wʋ ɛɣɛɛlɛ ɩkyɩkyɩ a? Mɩnla ti a?

7. Nyamɩnlɩ Bulombunlililɛ nɩ wɔ mmɛla mɔɔ idi munli

Aɣanɩ bela hyɩhyɛ mmɛla mɔɔ ɩkɔwʋwa yɩ manlɩmaa na ɩawɔ bɔ nwʋ banɩ. Nyamɩnlɩ Bulombunlililɛ yɩ sʋ̃ wɔ mmɛla mɔɔ ɩsɛ kɛɛ yɩ manlɩmaa bɛfa bɛyɛ egyima. Kɩnga 1 Kɔlɛntɩmaa 6:​9-​11, na akʋ̃ bozunzú ndwokɔɣizialɛ eyimmɔ nwʋ:

• Sɛ abiyela idi Nyamɩnlɩ yɩ mmɛla zʋ a, ekila a, ankɩ kɛ oyuwadɩ eyi ɩkɛyɛ ikeze a?a

• Asʋ̃ ekila a, ntɩyasɩ wɔ numɔ kɛɛ Gyehova kehila ɔhʋanɩ kɛɛ yɩ manlɩmaa keli mmɛla eyimmɔ zʋ a? Mɩnla ti a?

• Mɩnla yɛ ikile kɛɛ mmenii mɔɔ bɛádiye ɔzɔ mmɛla eyimmɔ nɩ bɔkɔhʋla bɛkɛzɩnza a?​—Kilá nkyɩkyɛmi 11.

YƖ DƆKƆWƆLƐ

Nyamɩnlɩ Bulombunlililɛ ɩdɩ aɣanɩ ankasa mɔɔ ɩwɔ sʋlɔ mɔɔ ikeli azɩlɛ yɩ munwala zʋ tumi.

Kɛ Okowuwa Ekeze a?

• Aninyiammɔ yɛ bekeli tumi wɔ Nyamɩnlɩ Bulombunlililɛ yɩ zʋ a?

• Mɩnla ɔhʋanɩ zʋ yɛ Nyamɩnlɩ Bulombunlililɛ ɩdɩ baaba ɩtɛla enii yɩ aɣanɩ a?

• Mɩnla nninyeni yɛ Gyehova ikilaa ɔhʋanɩ kɛɛ Bulombunlililɛ yɩ manlɩmaa bɛkɛyɛ a?

PƖBƐ́ SƲ̃MAA

Kilá mɔɔ Gyisɛsɩ ihilehileli ɩvalɩlɩ dɩka mɔɔ Bulombunlililɛ yɩ ɩwɔ nɩ nwʋ.

“Asʋ̃ Nyamɩnlɩ Bulombunlililɛ Yɩ Ɩwɔ Wʋ Ahʋnlɩnɩ Nu Anzɛnyɩɩ?” (Ndwokɔ mɔɔ ɩwɔ jw.org zʋ)

Gyehova Dasɩvʋlɔmaa besi pɔkɔ kɛɛ bekeli Nyamɩnlɩ Bulombunlililɛ nɔhʋanlɛ tɛla kɛɛ bekeli enii yi tumililɛ nɔhʋanlɛ. Mɩnla ti a?

Begyinanlɩ Nyamɩnlɩ Bulombunlililɛ Mɛda (1:​43)

Kilá mɔɔ Bayɩbʋlʋ ɩkã ɩfalɩ mmenii 144,000 mɔɔ Gyehova ɩyɩ bɛ kɛɛ bɛ nɩɩ Gyisɛsɩ beli bulombunli nɩ nwʋ

“Aninyiammɔ Yɛ Bɔkɔhɔ Sʋlɔ a?” (Ndwokɔ mɔɔ ɩwɔ jw.org zʋ)

Mɩnla yɛ ɩmanlɩ baalɛ be mɔɔ ɩla fiyiadɩ ileli ilili kɛɛ Nyamɩnlɩ yɩzayɩ nkʋ̃ la yɛ ɩkɔhʋla ɩkɛva pɛlɩpɛlɩlilɛ ɩkɛɣa oyuwadɩ a?

“Mɩɣa Minyianlɩ Nsisi Yi Munwa Awudo” (Awake!, November 2011)