Kyiná Pindinyii Wɔ Mmɩlɩ Mɔ Awielɩyɛ Nɩ Ibikee Nɩ

SIANTI MƆƆ IHYINYIA: Ɩlɛ́kyɛ, nninyeni mɔɔ ɩyɛ asibɔnwʋ ikodwe yɛ akɛnɣazɩzɩbɛ nɩɩ dedi mɔɔ yɛlɛ wɔ Gyehova nu nɩ ikehila ɩkɛdɛla mmɩlɩ bela mɔ ɩɣa ɩzɩ̃ ɩhɔ. Sa bɛsɩkɛ awohwi ɔzʋ̃mɩnlɛ bɛfa bɔbɔ anwʋhyɩlɩlɛ kezile yɩ tʋ. (Mt 24:21; Yik 17:16, 17) Wɔ ɔzɔ anwʋhyɩlɩlɛ mmɩlɩ nu nɩ, ebiye a, yɛkɛhã ndɛnɩwuwalɛ ndwokɔ mɔɔ yi munwa yɛ ɛhyɩmɛ. (Yik 16:21) Gɔgʋ mɔɔ ɩzʋ̃ Magɔgʋ nɩ ɩkɔdʋ ɩkɛhyɛ yɛ zʋ. (Izi 38:10-12, 14-16) Mɔɔ ɩkɛyɛ na Gyehova ɩawɔ yi mmenii nwʋ banɩ nɩ, ɩkɛva ‘Nyamɩnlɩ nɩ mɔɔ ɩdɩ Tumivʋlɔ nɩ yɩ kʋnɛ eɣile nɩ’ ɩkɛɣa. (Yik 16:14, 16) Sɛ yɛkɔhʋla yekenyia akɛnɣazɩzɩbɛ yekegyina eɣile be ndwokɔ mɔɔ ɩkɛɣa nɩ yi munwa a, ɩsɛ kɛɛ yekyina pindinyii wɔ odwohilalɛ mɔɔ yekeyiyia wɔ nnɛ nɩ yi munwa.

KEZIMƆ ƐKƐYƐ YƖ:

• Kyiná Gyehova yɩ mmɛla mɛda na fá di egyima wɔ wʋ ɛbɩlawɔlɛ nu.—Ayɩ 5:20

• Ɛ nɩɩ wʋ ɔhɔnwʋmmɔ Kilisinyiamaa bɔzʋ̃mɩ bɔwɔ nu.—Hib 10:24, 25

• Dé ɔhʋanɩhilelɛ mɔɔ ɩzʋ̃ Gyehova yɩ ahyɩhyɛdɩ yɩ ɛkɛnɩ nɩ tiã numɔ ndɛndɛ zʋ.—Hib 13:17

• Dwɩnɩndwɩnɩ́ kezimɔ Gyehova ileli yi mmenii wɔ ɔwɔkɩ nɩ nwʋ.—2Pit 2:9

• Bɔ́ Gyehova mpayɩ na fá wʋ nwʋ tiã yɩ zʋ.—Ndw 112:7, 8

KILÁ DƖLAMA MƆƆ ISE NNINYENI MƆƆ IKEZIZI EƔILE BE MƆƆ IKEHYINYIA KƐƐ YENYIA AKƐNƔAZƖZƖBƐ—YƖ ƆFƲÃ BE, NA AKƲ̃ YƖ́ NDWOKƆƔIZIALƐ EYIMMƆ MUNWA:

• 

  Mmɩlɩ mɔ bɛhanlɩ asafʋ azʋlɔtʋ nɩ bɔwɔlɩ numɔ na bezia bɛhyɩhyɛlɩ numɔ fʋlɔ nɩ, mɩnla sutiye nwʋ odwohilalɛ yɛ ɛlawulowɔlɛmaa nɩ beyiyialɩ a?

• 

  Mɩnla ɔhʋanɩ zʋ yɛ sɛ yɛyɛ sutiye a, ɩma yenyia akɛnɣazɩzɩbɛ a?

• 

  Sɛ Amagadɔnʋ ipuko a, mɩnla ti mɔɔ yekehyinyia akɛnɣazɩzɩbɛ a?

• 

  Mɩnla Bayɩbʋlʋ nu odwokɔ yɛ ɩkɔwʋwa wʋ ma ɛkɛhyɛ dedi mɔɔ ɔwɔ wɔ Gyehova yi tumi mɔɔ ɩfa ide yi mmenii nɩ nu ɛzɩzɩbɛ a?—2Mm 20:1-24