KILISINYIAMAA BƐ ƐBƖLAWƆLƐ
Ayiyialɩyɛ Azʋlɔtʋ—Ɩdɩ Nwʋmɔ Ɔhʋanɩ Mɔɔ Yɛfa Yekile Ɔlɔlɛ
Mɩnla ti mɔɔ yɛ anyɩ ideli yɛ ayiyialɩyɛ azʋlɔtʋ nɩ nwʋ zɛ yɩ a? Dɩkɛɛ ɔwɔkɩ Yizilaya nɩ, ayiyialɩyɛ azʋlɔtʋ mɔɔ yɛyɛ wɔ nnɛ nɩ ɩma yenyia ɔnwʋmɔ ɔhʋanɩ yɛ nɩɩ yɛ ɔhɔnwʋmmɔ dedimaa sʋ̃maa bɔ numɔ sʋ̃mɩ Gyehova. Yɛ anyɩ ideli sunzuma ɔfʋã nu alɩyɛ mɔɔ yenyia nɩ nwʋ baaba. Yɛ anyɩ ɩsɔ mmɩlɩ sʋnʋnkʋ̃ sʋ̃ mɔɔ yenyia yɛ nɩɩ yɛ ɔhɔnwʋmmɔ nɩɩ ye mmusunwamaa bɔ nɩ. Anyɩnlɩzɔlɛ kezile mɔɔ yɛlɛ nɩ ɩkã yɛ ma yɛkɔ aɣile asã ayiyialɩyɛ nɩ munwala.
Sɛ yenyia nwʋmɔ ɔhʋanɩ mɔɔ yɛlɛ yeyiyia numɔ zɛ a, íni kɛɛ yɛdwɩnɩ yɛzayɛ nkʋ̃ yɛ bʋwɔyɛlɛ nwʋ, mfomi ɩsɛ kɛɛ yɛdwɩnɩndwɩnɩ ahʋanɩ azʋlɔtʋ mɔɔ yɛkɔhʋla yɛkɛla ɔlɔlɛ ali yekehile mmenii mvʋlɔ sʋ̃ nɩ nwʋ. (Gal 6:10; Hib 10:24, 25) Sɛ yebuko anyɩnkɛ yɛma ye mmeliyema anzɛnyɩɩ yesiye ayuwa mɔɔ ye mmusunwamaa nkʋ̃ la yɛ bɔkɔwʋwa zʋ a, nɩ yɛdaa yɩ ali kɛɛ yɛpɩbɛɛ mmenii mvʋlɔ sʋ̃ bɔ bʋwɔyɛlɛ. (Fɩl 2:3, 4) Ayiyialɩyɛ ɩma yenyia nwʋmɔ ɔhʋanɩ sʋnʋnkʋ̃ yɛfa yenyia ɔhɔnwʋmmɔ mvʋlɔ sʋ̃. Sa yɛkʋla yɛfa ayiyialɩyɛ yɩ tʋwɔlɛ, mmɩlɩ mɔ yɛbɔ, nɩɩ mmɩlɩ mɔ yɛlɛ yede yɛ mʋnlɩ nɩ yɛfa ye mmeliyema ɔhɔnwʋ. (2Kɔl 6:13) Ɔhɔnwʋmmɔ mɔɔ yekenyia wɔ ɛkɛnɩ nɩ, ɩkɔwʋwa ɛkɛnɩ daabaa! Akʋ̃ sʋ̃, sɛ mmenii mɔɔ bodua yɛ nwʋ beyiyia nɩ bɔnwʋ ɔlɔlɛ mɔɔ yɛda yɩ ali nɩ a, ɩkɛhã bɛ ma bɛ nɩɩ yɛ kɔzʋ̃mɩ Gyehova kɔwɔ numɔ.—Dwɔ 13:35.
KILÁ VIDIYO MƆƆ ISE ƆLƆLƐ ÍNI AWIELƖYƐ”! AMANLƖ AMANLƖ AYIYIALƖYƐ, NA AKƲ̃ YƖ́ NDWOKƆƔIZIALƐ EYIMMƆ BO MUNWA:
Mɩnla ɔhʋanɩ zʋ yɛ bɛlalɩ ngyɛvʋlɔlelɛ ali behileli mmeliyema mɔɔ bɔhɔlɩ 2019 amanlɩ amanlɩ ayiyialɩyɛ nɩ be a?
Mɩnla ti mɔɔ ɔkʋ̃yɛlɛ nɩɩ ɔlɔlɛ mɔɔ ɩwɔ Gyehova yi mmenii bɛ avinli nɩ ɩyɛ nnwʋánlɩ a?
Kilisinyianɩ ɔlɔlɛ nɩ nu ɛhɩnla dɩyɛ yɛ Ɔhʋanɩhilelɛ Okuwu yi nu maa nɩ bɔhwɩnlɩ adwɩnɩ beziyeli zʋ a?
Kɛ ɩkɛyɛ na wʋawʋwa ma ɔlɔlɛ ɩahɔlɩ ɔzʋlɔ wɔ yɛ ayiyialɩyɛ tʋ a?
Mɩnla ɔhʋanɩ zʋ yɛ Kilisinyianɩ ɔlɔlɛ ɩhã mmeliyema mɔɔ bɔwɔ Germany nɩɩ South Korea ɩwɔ numɔ a?
Mɩnla yɛ ɩsɛ kɛɛ yesi yɛ kɛnɣa kɛɛ yɛkɛyɛ a?