Sí Pɔkɔ Kɛɛ Ɔkɔzʋ̃mɩ Gyehova

Sɛ ɛdɩ ɛlawulowɔlɛvʋlɔ mɔɔ olónumanlɩ anzɛnyɩɩ bɛ nɩɩ wʋ suma Bayɩbʋlʋ a, asʋ̃ ɛva eziye wʋ anyɩ zʋ kɛɛ okonluma a? Mɩnla ti mɔɔ ɩsɛ kɛɛ enyia ɛpɛ kɛɛ okonluma a? Wʋnwʋzʋyilalɛ nɩɩ onlumanlɛ ɩkɛma ɛ nɩɩ Gyehova bekenyia abusunwawɔlɛ sʋnʋnkʋ̃. (Ndw 91:1) Ɩkɔhʋla ikele wʋ nnwʋanlɩ. (1Pit 3:21) Kɛ ɩkɛyɛ na wʋadwu bʋtayɩ eyimmɔ nwʋ a?

Wʋzawʋ pɩbɛlɩ numɔ kila kɛɛ nɔhʋanlɛ yɩ ɛdɩ a. Sɛ ndwokɔɣizialɛ be ɩba wʋ ti nu a, yɛ́ ɛbɩbɛlɛnu fa nyia nwʋmɔ mmunwalɩyɛ. (Wul 12:2) Kila kɛɛ sɛ ɩsɛ kɛɛ ɛyɛ nzɩnzanlɩyɛ be a, na má ɛpɛ mɔɔ ɔwɔ kɛɛ ɔkɔzɔ Gyehova anyɩ nɩ ɩhã wʋ ma ɛyɛ ɔzɔ. (Ɛɣɛ 27:11; Ɛfɩ 4:23, 24) Bɔ́ mpayɩ pɩbɛ yɩ mmʋwalɩyɛ eɣile bela. Nyiá anwʋlazʋ kɛɛ, Gyehova ɩkɛhyɛ wʋ ɛzɩzɩbɛ na ɩava yɩ sunzuma nwanzanwanza mɔɔ tumi ɩwɔ numɔ nɩ ɩawʋwa wʋ. (1Pit 5:10, 11) Sa enyia wʋ mmɔdɩwɔlɛ yɩ zʋ akatuwa. Gyehova mɔɔ yɛkɔzʋ̃mɩ yɩ nɩ, ɩdɩ dɩyɛba mɔɔ ɩtɛla dɩyɛ bela!—Ndw 16:11.

KILÁ VIDIYO MƆƆ ISE MƆƆ ƖMA ABIYE INUMA, NA AKƲ̃ YƖ́ NDWOKƆƔIZIALƐ EYIMMƆ BO MUNWA:

Mɩnla ndwokɔ ɛzɩzɩbɛ yɛ abiyemmɔ beli zʋ na ama bɛahʋla bɛanluma a?
Kɛ ɩkɛyɛ na wʋanyia dedi mɔɔ ihyinyia mɔɔ ɩkɛma ekeyila wʋ zʋ ɛkɛma Gyehova a?
Mɩnla yɛ ɩhanlɩ abiyemmɔ ma boduli agyiakɛ mɔɔ ihyinyia na ama bɛavata bɛama onlumanlɛ a?
Bɛzabɛ mɔɔ besi pɔkɔ kɛɛ bɔkɔzʋ̃mɩ Gyehova nɩ, mɩnla nyilalɛ yɛ ɩfa ɩma bɛ a?
Bɔnwʋzʋyilalɛ nɩɩ onlumanlɛ, kɛ yɩ tʋ ikile a?

Sɛ bɛma onlumanlɛ ndɛnɩ nɩ bowie a, ndɛnɩmanlɛvʋlɔ nɩ ɩkɔvʋlɔ bɛzabɛ mɔɔ bɛbanluma nɩ ma bokodwodwu bekegyina na bɛabigyia bɛ nnɩ sʋlɔ bɛawuwa ndwokɔɣizialɛ anwɩ̃ eyi:

Asʋ̃ onlu wʋ nwʋ wɔ wʋ tanɩ nwʋ, eyila wʋ nwʋ zʋ ɛma Gyehova, na ele yɩ nnwʋanlɩlelɛ nhyɩhyɛlɩyɛ mɔɔ iluwa Gyisɛsɩ Kɩlayɩsɩ yɩ zʋ ɩyɛ nɩ ediã nu a?

Asʋ̃ ɛtɩ yɩ tʋ kɛɛ, wʋ onlumanlɛ yɩ nɩ ɩda wʋ ali kɛɛ Gyehova Dasɩvʋlɔmaa bo nu ɔkʋ̃ mɔɔ ɛ nɩɩ Gyehova yɩ ahyɩhyɛdɩ yɛ bɛbawɔ a?

Onlumanlɛmaa nɩ bo munwalɩyɛ ma ɔzɔ ndwokɔɣizialɛ eyi mɔɔ numɔ ɩla ɛkɛnɩ nɩ, ikile ‘bo munwa mɔɔ bɛlɛ bɛkã kɛɛ’ bele elelɛdɩyɛ nɩ beli na bɔzʋ̃ bɛ ahʋnlɩnɩ munwala nu beyila bɔ nwʋ zʋ bɛma Gyehova.—Wul 10:9, 10.