Ɛdɩnyɩanlɛ—Ikile Gyehova Yɩ Ɔlɔlɛ

Ɛdɩnyɩanlɛ ikile kɛɛ bɛkɛma abiye ɔhʋanɩhilelɛ anzɛnyɩɩ ikozuma dɩyɛ be, naasʋ̃ ikile sʋ̃ kɛɛ bɛkɛdɩnɣɛ anzɛnyɩɩ bokɔhwɩ̃ abiye yɩ azʋ̃. Gyehova ɩtɩnyɩa yɛ na ama yɛazʋ̃mɩ yɩ wɔ ɔhʋanɩba zʋ. (Wul 12:1; Hib 12:10, 11) Nɔhʋanlɛ, ɩyɛ a ɛdɩnyɩanlɛ ɩyɛ ɛyɛkɛ dɩyɛ, naasʋ̃ ɩkʋla ɩma yɛbɔ ɛbɩla mɔɔ ɩtɩnɣɛ na yenyia nyilalɛ sʋ̃. (Ɛɣɛ 10:7) Bɛzabɛ mɔɔ bɛtɩnyɩa abiye nɩɩ enii mɔɔ bɛtɩnyɩaa yɩ nɩ, mɩnla yɛ ɩsɛ kɛɛ bɛma ɩbʋwa bɛ adwɩnɩ nu a?

Enii mɔɔ ɩtɩnyɩa abiye. Ɩsɛ kɛɛ asafʋ nu mbanimbani, awʋvʋlɔ, nɩɩ bɛzabɛ mɔɔ bɔkʋla bɛtɩnyɩa mmenii nɩ, bɔbɔ mmɔdɩnɩ kɛɛ bɔzʋ̃ kunlumiba nɩɩ ɔlɔlɛ nu bɛkɛyɛ ɔzɔ kɛmɔ Gyehova ɩyɛ nɩ la. (Gyɛ 46:28) Ɛdɩnyɩanlɛ mɔɔ numɔ yɛ ɛzɩzɩbɛ po nɩ, ɩsɛ kɛɛ bɛfa bɛma wɔ ɔlɔlɛ nɩɩ ɔhʋanɩba zʋ.—Tay 1:13.

Enii mɔɔ bɛtɩnyɩa yɩ nɩ. Kezimɔ ɛdɩnyɩanlɛ yɩ ɩdɩ bela nɩ, íni kɛɛ yɛpʋ, mfomi ɩsɛ kɛɛ yɛfa yedi egyima ndɛndɛ zʋ la. (Ɛɣɛ 3:11, 12) Kɛ mmenii mɔɔ yɛtɔ sini nɩ, ye munwatĩĩ yehyinyia ɛdɩnyɩanlɛ na sa bɔkʋla bɛtɩnyɩa yɛ wɔ ahʋanɩ azʋlɔtʋ zʋ sʋ̃. Ɩyɛ a, yenyia ɛdɩnyɩanlɛ wɔ mɔɔ yɛkɩnga wɔ Bayɩbʋlʋ yɩ nu anzɛnyɩɩ mɔɔ yɛtɩ wɔ dɩyɛzumanlɛ tʋ nɩ. Ɩyɛ sʋ̃ a, odwokɔlilɛ kɔmitii yɛ bɛtɩnyɩa yɛ a. Ɛdɩnyɩanlɛ mɔɔ yɛkɛva yɛkɛyɛ egyima nɩ, ɩkɛma yekenyia nnwʋanlɩ.—Ɛɣɛ 10:17.

KILÁ VIDIYO MƆƆ ISE ‘GYEHOVA ƖTƖNƔƐ ENII MƆƆ ƖDƆ YƖ NƖ,’ NA AKƲ̃ YƖ NDWOKƆƔIZIALƐ EYIMMƆ BO MUNWA:

• 

  Kɛ Canon ɩwɔlɩ yɩ ɛbɩlawɔlɛ tʋ izeli a, na kɛ ɩyɛlɩ mɔɔ ɩzɩnzanlɩ a?

• 

  Kɛ Gyehova ɩzʋ̃ ɔlɔlɛ nu ɩdɩnyɩanlɩ yɩ izeli a?

• 

  Mɩnla yɛ yesuma wɔ yɩ ozumanlɛnwʋnlɛ yi nu a?