Fá Sa Ɔkʋla Enyia Anyɩnlɩlelɛ Daabaa! Di Egyima Wɔ Dasɩlɛlilɛ Nu

Kilá kezimɔ ɩyɛ yɛ anyɩnlɩlelɛ kɛɛ yenyia blohyʋɔ nɩɩ buuku fʋlɔ mɔɔ yɛkɛva yɛkɛyɛ Bayɩbʋlʋ dɩyɛzumanlɛ! Yesiãã Gyehova kɛɛ iyila mmɔdɩnɩ mɔɔ yɛbɔɔ kɛɛ yɛkɛyɛ adʋwavʋlɔ sʋ̃maa nɩ zʋ. (Mt 28:18-20, NWT; 1Kɔl 3:6-9) Kɛ yɛkɛva yɛkɛyɛ egyima yekeze a?

Iluwakɛɛ Sa Ɔkʋla Enyia Anyɩnlɩlelɛ Daabaa!, Bayɩbʋlʋ dɩyɛzumanlɛ yɩ tʋwɔlɛ nɩ ɩda ɔhʋanɩ fʋlɔ mɔɔ yekoluwa zʋ yekehilehile ali nɩ ti, dí ɔhʋanɩhilelɛ eyimmɔ mɛda mmɩlɩ mɔ esiyeziyee wʋ nwʋ ɛkɛma nɩɩ mmɩlɩ mɔ ɛyɛɛ Bayɩbʋlʋ dɩyɛzumanlɛ nɩ.a

• Kɩngá nkyɩkyɛmi yi, na bozunzu ndwokɔɣizialɛ nɩ nwʋ

• Kɩngá ɛhɛlɛlɛ odwokɔ mɔɔ bɛhɛlɛ ɔnwʋmɔ kɛɛ “kɩnga” nɩ, na bʋwa Bayɩbʋlʋ dɩyɛzumanlɛvʋlɔ nɩ ma ɩdɩ kezimɔ ɩkɛva ɩkɛyɛ egyima nɩ tʋ bʋwɔ

• Yɩ́ vidiyo nɩ na sɛ ndwokɔɣizialɛ be ɩwɔ ɔnwʋmɔ a, bozunzu nwʋ

• Mmɩlɩ bela mɔɔ bekeyiyia kɛɛ bosumaa dɩyɛ nɩ, bɔ́ mmɔdɩnɩ kɛɛ okowie ozumalɛdɩyɛ ɔkʋ̃

Dí bɔmʋnlɩ fa blohyʋɔ nɩ ma enii nɩ wɔ dasɩlɛlilɛ nu fa kila kɛɛ yɩ anyɩ ikeleli nwʋ a. (Kilá alɩka mɔɔ ise “Kezimɔ Ɛkɛva Sa Ɔkʋla Enyia Anyɩnlɩlelɛ Daabaa! Blohyʋɔ Nɩ Ɛkɛma Wɔ Egyelalɛ Mɔɔ Ili Bɔmʋnlɩ” nɩ nu.) Sɛ bosuma blohyʋɔ nɩ bowie na Bayɩbʋlʋ dɩyɛzumanlɛvʋlɔ nɩ ɩpɛ kɛɛ ɩtʋwa zʋ a, fá buuku yɩ nɩ ma yɩ na bɔwɔ yɩ tʋ wɔ ozumalɛdɩyɛ 04. Sɛ ɛ nɩɩ abiye sumaa awuuku mɔɔ yɛfa yɛyɛ Bayɩbʋlʋ dɩyɛzumanlɛ nɩ numɔ bela a, bɔdʋwa zʋ wɔ Sa Ɔkʋla Enyia Anyɩnlɩlelɛ Daabaa! Buuku yi nu na wʋzawʋ kile dɩka mɔɔ bɔkɔwɔ yɩ tʋ.

KILÁ VIDIYO MƆƆ ISE YƐMA WƲ AKWAABA BA WƲ BAYƖBƲLƲ DƖYƐZUMANLƐ YƖ TƲWƆLƐ, NA AKƲ̃ YƖ NDWOKƆƔIZIALƐ EYIMMƆ BO MUNWA:

• Mɩnla yɛ Bayɩbʋlʋ dɩyɛzumanlɛmaa bokozuma wɔ buuku fʋlɔ nɩ nu a?

• Mɩnla ti mɔɔ ɩsɛ kɛɛ ɛyɩ vidiyo eyi ekile Bayɩbʋlʋ dɩyɛzumanlɛmaa mvʋlɔ a?

• Mɩnla bʋtayɩ azʋlɔtʋ yɛ mmɩlɩ ɩkɔlɩ ɔzʋlɔ nɩ, ɩsɛ kɛɛ ɛhyɛ wʋ Bayɩbʋlʋ dɩyɛzumanlɛvʋlɔ ɛzɩzɩbɛ ma ɩfa isiye yɩ anyɩ zʋ na itwu nwʋ a?—Kilá alɩka mɔɔ ise “Mɔɔ Yekozuma Nɩɩ Bʋtayɩ Ma Ɔfʋã Bela”