Fá Bʋtayɩ Azʋlɔtʋ Siye Wʋ Anyɩ Zʋ Wɔ Ɛhakɛlɛlilɛ Mmɩlɩ Nu

Ɔlʋbɔ bela, Gyehova yi mmenii kila ɔhʋanɩ kɛɛ bekeli Ɛhakɛlɛlilɛ yɩ bɔkɔwɔ nu. Sɛ ɩka dapɛnɩ ɛgyɩkɩ̃ɩ̃ ma Ɛhakɛlɛlilɛ yɩ itwu nɩɩ Ɛhakɛlɛlilɛ yɩ mɛda a, yɛfa ɔnwʋmɔ ɔhʋanɩ yɛda Gyehova asɩ na yɛyɩ yɩ ayɛlɛ wɔ akyɛdɩ mɔɔ ɩdɩ elelɛdɩyɛ yɩ nɩ nwʋ. (Ɛfɩ 1:3, 7) Kɛ ndianwʋ nɩ, yɛbɔ mmɔdɩnɩ yɛtʋ salɛ yɛfʋlɔ mmenii ma bɛba Ɛhakɛlɛlilɛ yɩ be. Wɔ March anzɛnyɩɩ April eziyianɩ yɩ nu nɩ, ye nu be yɛ nzɩnzanlɩyɛ wɔ bɛ mmɩlɩ nu na ama bɛava dɔnɩhwɩlɩ 30 anzɛnyɩɩ 50 bɛayɛ ɔhʋanɩbukolɛ awʋwavʋlɔ egyima yɩ be. Asʋ̃ ɛkɛbɛ yɩ kɛɛ ɛkɛyɛ sʋ̃maa wɔ Ɛhakɛlɛlilɛ mmɩlɩ eyi nu a? Mɩnla yɛ ɩkɔwʋwa wʋ a?

Mbɔmɩ sʋ̃maa nɩ, sɛ yɛyɛ dɩyɛ be nwʋ nhyɩhyɛlɩyɛ yetiã ɛkɛ a, ɩma yɛkʋla yɛyɛ sʋ̃maa. (Ɛɣɛ 21:5) Ɩlɛ́kyɛ na Ɛhakɛlɛlilɛ mmɩlɩ nɩ iadwu, meti ɩsɛ kɛɛ yɛbɔ yɩ tʋ yɛyɛ nhyɩhyɛlɩyɛ sɩkalɛpɛyɩ. Sunzu mɔɔ ɛpɛ kɛɛ ɛyɛ ɛfa ɛtɛlɛ wʋ ɔzʋ̃mɩnlɛ nu wɔ Ɛhakɛlɛlilɛ mmɩlɩ yɩ nu nɩ nwʋ na si mɔɔ ɛyɛ a, ɩkɛma okodwu wʋ bʋtayɩ nwʋ nɩ nwʋ pɔkɔ. Akʋ̃, siã Gyehova ma iyilá wʋ mmɔdɩnɩwɔlɛ yɩ zʋ.—1Dwɔ 5:14, 15.

Asʋ̃ ɔkɔhʋla okozunzu ahʋanɩ mvʋlɔ mɔɔ ɔkɔhʋla okoluwa ɔzʋlɔ ɛkɛdɛlɛ wʋ dasɩlɛlilɛ egyima yɩ nu wɔ Ɛhakɛlɛlilɛ mmɩlɩ yɩ nu a?