Kezimɔ Yekodu Mpʋnɩ Wɔ Yɛ Mpayɩwɔlɛ Nu

1. Mɩnla yɛ Gyehova pɛ kɛɛ yɩ azʋ̃mɩvʋlɔ bɛyɛ a? (Kila mfonyini yi sʋ̃.)

SƐ YƐPƐƐ ɛɣɛɛlɛyɩkyɩlɛ nɩɩ ɔhʋanɩhilelɛ a, aninyia kɛnɩ yɛ yɛkɔhɔ a? Yezi odwokɔɣizialɛ eyi nwʋ munwalɩyɛ. Sa yɛkʋla yɛbɔ Gyehova Nyamɩnlɩ mpayɩ. Ɔzɔ yɛ Gyehova pɛ kɛ yɛyɛ a. Bayɩbʋlʋ kã kile yɛ kɛɛ Gyehova pɛ kɛɛ yɛbɔ yɩ “mpayɩ eɣile bela.” (1 Tɛs. 5:17) Sa yɛkʋla yɛzʋ̃ yɛ ahʋnlɩnɩ munwala nu yɛbɔ yɩ mpayɩ na yɛpɩbɛ yɩ ɔhʋanɩhilelɛ wɔ yɛ ɛbɩlawɔlɛ nu eɣile bela. (Ɛɣɛ. 3:5, 6) Iluwakɛɛ Gyehova yi kunlu ɩdɩyɛnɛ ti, ɩma ɔhʋanɩ yɛ kɛɛ yɛkʋla yɛbɔ yɩ mpayɩ mmɩlɩ dʋdʋ bela mɔɔ yɛpɛ yɩ.

2. Mɩnla yɛ yekozunzu nwʋmɔ wɔ dɩyɛzumanlɛ eyi nu a?

² Yɛla Gyehova asɩ kɛɛ ɩma yɛkʋla yɛbɔ yɩ mpayɩ. Naasʋ̃ ɩyɛ a, ɩyɛ sɩ kɛɛ yekenyia alagyɩ yɛkɔwɔ mpayɩ. Ɩyɛ sʋ̃ a, yɛtɩ nɣanlɩ kɛɛ ihyinyia kɛɛ yɛma yɛ mpayɩwɔlɛ tu mpʋnɩ. Anyɩnlɩlelɛ odwokɔ yɛ lɛ kɛɛ sa yɛkʋla yenyia ɛzɩzɩbɛhyɛlɛ nɩɩ ɔhʋanɩhilelɛ wɔ Bayɩbʋlʋ yɩ nu. Wɔ dɩyɛzumanlɛ eyi nu nɩ, yekehila kezimɔ yekozumazuma Gyisɛsɩ na yeanyia mmɩlɩ yɛawɔ mpayɩ. Akʋ̃ sʋ̃ yekehila nninyeni azʋlɔtʋ anlu be mɔɔ nwʋmɔ hyinyia mɔɔ ɩkɔwʋwa yɛ ma yɛ mpayɩwɔlɛ kodu mpʋnɩ.

NƖ GYISƐSƖ WƆ MMƖLƖ MƆ ƖFA ƖBƆ MPAYƖ

3. Mɩnla yɛ nɩ Gyisɛsɩ zi falɩ mpayɩwɔlɛ nwʋ a?

³ Nɩ Gyisɛsɩ zi kɛɛ mpayɩwɔlɛ nwʋ hyinyia Gyehova baaba. Ansaana ɩbaɣa azɩlɛ yɩ zʋ nɩ, ɩnwʋnlɩ kezimɔ yɩ Zɩ diyeli mmenyia nɩɩ mmalɛ nɔhʋanlɛmaa bɛ mpayɩ. Kɛ ndianwʋ nɩ, nɩ Gyisɛsɩ wɔ yɩ Zɩ pɛ mmɩlɩ mɔ idiyeli mpayɩ mɔɔ Hana, Devidi, Ilayɩgya nɩɩ nɔhʋanlɛmaa mvʋlɔ zʋ̃ bɛ ahʋnlɩnɩ nu wɔlɩ nɩ. (1 Sa. 1:10, 11, 20; 1 Aw. 19:4-6; Ndw. 32:5) Meti mɔɔ Gyisɛsɩ hileli yɩ adʋwavʋlɔ yɩ kɛɛ bɛvá anwʋlazʋ bɔwɔ mpayɩ eɣile bela yɩ a.

4. Mɩnla yɛ yesuma wɔ kezimɔ nɩ Gyisɛsɩ bɔ mpayɩ nɩ nu a?

⁴ Gyisɛsɩ wɔlɩ Gyehova mpayɩ va yɛlɩ ndianwʋ manlɩ yɩ adʋwavʋlɔ yɩ. Wɔ Gyisɛsɩ yi ɔzʋ̃mɩnlɛ egyima yɩ nu nɩ, nɩ ɩta ɩbɔ mpayɩ. Iluwakɛɛ nɩ íni alagyɩ na mmenii sʋ̃maa tua yɩ nwʋ yiyia eɣile bela ti, nɩ ɩsɛ kɛɛ ɩyɩ mmɩlɩ isiye ahanlɩ ɩfa ɩbɔ mpayɩ. (Mk. 6:31, 45, 46) Nɩ yɩzayɩ nkʋ̃ ɩkɔ iwula dɩka be ɩbɔ mpayɩ awulobahɩ̃. (Mk. 1:35) Mmɩlɩ be, ɩwɔlɩ mpayɩ ohunluma munwala mmɩlɩ mɔ nɩ ibazi pɔkɔ be mɔɔ nwʋmɔ hyinyia paa nɩ. (Lk. 6:12, 13) Nunuma mɔɔ ansaana Gyisɛsɩ ibawu nɩ, ɩwɔlɩ mpayɩ mbɔmɩ sʋ̃maa na eyi wʋwalɩ yɩ ma ɩhʋla iwieli yɩ ɔzʋ̃mɩnlɛ egyima yɩ wɔ azɩlɛ yɩ zʋ.—Mt. 26:39, 42, 44

5. Kɛ ɩkɛyɛ na yɛazumazuma Gyisɛsɩ wɔ yɛ mpayɩwɔlɛ nu a?

⁵ Gyisɛsɩ yɩ ndianwʋ yɩ ɩma yesuma kɛɛ sɛ yéni alagyɩ kɛɛ mɩnla la po a, ɩsɛ kɛɛ yɛyɩ mmɩlɩ yesiye ahanlɩ yɛbɔ mpayɩ. Dɩkɛɛ Gyisɛsɩ nɩ, sa yɛkʋla yetwodwu awulobahɩ̃ anzɛnyɩɩ ohunluma dasuwonu yɛbɔ mpayɩ. Sɛ yɛyɛ zɔ a, nɩ yekilee Gyehova kɛɛ yɛ anyɩ sɔ ɔnwʋmɔ ɔhʋanɩ mɔɔ ɩva ɩma yɛ kɛɛ yɛwɔ́ yɩ mpayɩ nɩ. Mmɩlɩ mɔ eliyema baalɛ be mɔɔ bɔfʋlɔ yɩ Lynne ɣa nwʋnlɩ ɔnwʋmɔ ɔhʋanɩ mɔɔ yɛlɛ kɛɛ yɛbɔ mpayɩ nɩ, ɩhanlɩ yɩ ahʋnlɩnɩ baaba. Ɩhanlɩ kɛɛ, “Mmɩlɩ mɔ mɩɣa mʋnwʋnlɩ kɛɛ sa mʋkʋla mɩ nɩɩ Gyehova tɩndɛ mmɩlɩ munwala nɩ, ɩmanlɩ mɩɣa mʋnwʋnlɩ yɩ kɛɛ mʋ ɔhɔnwʋ mɔɔ ibike mɩ paa na nɩ mɩpɛ kɛɛ mɩ mpayɩwɔlɛ tu mpʋnɩ.” Pɩlazunɛ bela íni nwʋmɔ kɛɛ ɔzɔ la yɛ ye nu sʋ̃maa tɩ nɣanlɩ a. Meti bɛmá yehila nninyeni aditili anlu mɔɔ yɛkɔhʋla yɛkɔwɔ nwʋmɔ mpayɩ.

NNINYENI ADITILI ANLU MƆƆ YƐKƆHƲLA YƐKƆWƆ NWƲMƆ MPAYƖ

6. Kɛmɔ Yikile 4:10, 11 kile nɩ, mɩnla yɛ ɩfata Gyehova a?

⁶ Yɩ Gyehova ayɛlɛ. Wɔ anyɩnlɩzʋdɩyɛnwʋnlɛ be mɔɔ Dwɔɔnʋ nyianlɩ nu nɩ, ɩnwʋnlɩ mbanimbani 24 wɔ sʋlɔ mɔɔ bɔsʋ̃mɩɩ Gyehova. Bɛyɩlɩ Nyamɩnlɩ ayɛlɛ na bɛhanlɩ kɛɛ “ɩfata kɛɛ ide animinyiamɩ, nnililɛ nɩɩ tumi.” (Kɩnga Yikile 4:10, 11.) Awɔvʋlɔ nɔhʋanlɛmaa sʋ̃ wɔ sianti sʋ̃maa ti mɔɔ bɛyɩ Gyehova ayɛlɛ. Bɛ nɩɩ yɩ da sʋlɔ na bezi yi bʋwɔ paa. Bɔnwʋ Gyehova yɩ subanɩ azʋlɔtʋ wɔ kezimɔ ɩyɛ yɩ dɩyɛ nɩ nu. Sɛ bɔnwʋ kezimɔ Gyehova yɛ yɩ dɩyɛ a, ɩkã bɛ ma bɛyɩ yɩ ayɛlɛ.—Dwb. 38:4-7.

7. Mɩnla yɛ yɛkɔhʋla yɛkɛyɩ Gyehova ayɛlɛ wɔ nwʋ a?

⁷ Amɩyɛ sʋ̃ yɛpɛ kɛɛ yɛyɩ Gyehova ayɛlɛ wɔ yɛ mpayɩwɔlɛ nu, sa yɛkʋla yɛkã yi subanɩ mɔɔ yɛ anyɩ deli nwʋmɔ nɩ nwʋ odwokɔ yekile yi. Mmɩlɩ mɔ osumaa Bayɩbʋlʋ yɩ nɩ, bɔ mmɔdɩnɩ pɩbɛ Gyehova yɩ subanɩ azʋlɔtʋ mɔɔ wʋ anyɩ deli nwʋmɔ paa nɩ. (Dwb. 37:23; Wul. 11:33) Akʋ̃ kã kezimɔ ɛtɩ nɣanlɩ wɔ ɔzɔ subanɩ azʋlɔtʋ nɩ nwʋ kile Gyehova. Sa yɛkʋla yɛyɩ Gyehova ayɛlɛ iluwakɛɛ ɩbʋwa yɛ nɩɩ ye mmeliyema Kilisinyiamaa munwala. Ikila yɛ na ɩbɔ yɛ nwʋ banɩ eɣile bela.—1 Sa. 1:27; 2:1, 2.

8. Sianti mɔɔ ɩsɛ kɛɛ yɛda Gyehova asɩ nɩ ebiye yɛ lɛ mɩnla? (1 Tɛsalonikamaa 5:18)

⁸ Da Gyehova asɩ. Yɛwɔ sianti sʋ̃maa ti mɔɔ ɩsɛ kɛɛ yɛda Gyehova asɩ wɔ yɛ mpayɩwɔlɛ nu. (Kɩnga 1 Tɛsalonikamaa 5:18.) Sa yɛkʋla yɛda yɩ asɩ wɔ nninyeniba mɔɔ yɛwɔ nɩ nwʋ iluwakɛɛ akyɛdɩ baaba bela zʋ̃ yɩ kɛ. (Gye. 1:17) Kɛ ndianwʋ nɩ, sa yɛkʋla yɛda yɩ asɩ wɔ azɩlɛ kɩnlɩma nɩɩ nninyeni mɔɔ ɩyɛ nnwʋánlɩ mɔɔ ɩwɔ nɩ nwʋ. Sa yɛkʋla sʋ̃ yɛda Gyehova asɩ wɔ yɛ nnwʋanlɩ, yɛ abusunwa, yɛ ɔhɔnwʋmmɔ, nɩɩ yɛ anyɩnlɩlazʋ nwʋ. Na yɛpɛ kɛɛ yɛda Gyehova asɩ kɛɛ ɩma ɔhʋanɩ yɛ ma yɛ nɩɩ yɩ nyia abusunwawɔlɛ mɔɔ ɩtʋ bʋlɔ.

9. Mɩnla ti mɔɔ ɩsɛ kɛɛ yesuma kɛɛ yekehile anyɩnlɩzɔlɛ wɔ mɔɔ Gyehova ɩyɛ ɩma yɛ nɩ nwʋ a?

⁹ Ihyinyia kɛɛ yɛbʋwa azɩ yɛdwɩnɩndwɩnɩ nninyeni mɔɔ Gyehova ɩyɛ ɩma yɛ mɔɔ ihyinyia kɛɛ yɛda yɩ asɩ wɔ nwʋmɔ nɩ nwʋ. Yɛda oyuwadɩ be nu mɔɔ mmenii iáhile anyɩnlɩzɔlɛ wɔ nninyeni nwʋ. Mbɔmɩ sʋ̃maa nɩ, sɛ bɛ sa kã mɔɔ behyinyia nɩ bowie a, bɛáhakɛ enii mɔɔ ɩva ɩmanlɩ bɛ nɩ. Sɛ yesumazuma subanɩ mɔɔ ɩdɩ ɔzɔ a, yɛ mpayɩwɔlɛ kɛyɛ dɩyɛzianlɛ nkʋ̃. Mɔɔ ɩkɛyɛ na eyi iázili nɩ, ihyinyia kɛɛ yɛkɔ ɔzʋlɔ yekile nninyeni mɔɔ Gyehova ɩyɛ ɩma yɛ nɩ nwʋ anyɩnlɩzɔlɛ.—Lk. 6:45.

10. Mɩnla ɔhʋanɩ zʋ yɛ anyɩnlɩzɔlɛ mɔɔ eliyema baalɛ be hileli nɩ, ɩwʋwalɩ yɩ ma ɩhʋla igyinanlɩ odwohilalɛ munwa a? (Kila mfonyini yi sʋ̃.)

¹⁰ Sɛ yesuma kɛɛ yekehile nninyeni nwʋ anyɩnlɩzɔlɛ a, sa ɩkʋla ɩbʋwa yɛ ma yɛkʋla yekyina ndwokɔzɩzɩbɛ munwa. Dwɩnɩndwɩnɩ eliyema Kyung-sook yɩ ozumanlɛnwʋnlɛ nɩ nwʋ kila, ivindenli January 15, 2015, Ɔwɩɛnɩlɛ Aɣanɩ yi nu. Inyianlɩ kansa ɛyɛlɛ ɛyɛlɛ be. Ɩhanlɩ kɛɛ: “Adimakɛlɛ yɩ manlɩ mɩ padi golɔlɩ baaba. Mɩdɩlɩ nɣanlɩ kɛɛ mu oyuwadɩ ɣa awielɩyɛ. Ɩmanlɩ mu kunlu duli baaba.” Mɩnla yɛ ɩwʋwalɩ yɩ ma ɩhʋla igyinanlɩ yi munwa a? Ɩhanlɩ kɛɛ nunuma bela ansaana ɩkɛla nɩ, ɩfʋ ɩkɔ ɩbʋwa yɩ aliyia yɩ sʋlɔ ɩbɔ mpayɩ na ɩkã nninyeni anlu mɔɔ yɩ anyɩ lelili nwʋmɔ wɔ eɣile yi nu ɩfa ikile anyɩnlɩzɔlɛ. Eyi dɩlɩ yɩ adwɩnɩndwɩnɩ zʋ na ɩhanlɩ yɩ ma ɩlalɩ yɩ ali kɛɛ ɩdɔ Gyehova. Ɩɣa ɩnwʋnlɩ kɛɛ sɛ Gyehova yɩ azʋ̃mɩvʋlɔ nɔhʋanlɛmaa yiyia odwohilalɛ a, ɩbʋwa bɛ. Akʋ̃ sʋ̃ ɩɣa ɩnwʋnlɩ kɛɛ nyilalɛ azʋlɔtʋ mɔɔ yenyia nɩ ɩzʋnɩ ɩtɛla yɛ amanɩyɛnwʋnlɛ. Dɩkɛɛ Kyung-sook nɩ, yɛwɔ sianti sʋ̃maa ti mɔɔ ihyinyia kɛɛ yɛda Gyehova asɩ ɩávalɩ nwʋmɔ kɛɛ yeyiyiaa odwohilalɛ nɩ. Sɛ yɛda Gyehova asɩ wɔ mpayɩwɔlɛ nu a, sa ɩkʋla ɩtɩ yɛ adwɩnɩndwɩnɩ zʋ na yɛahʋla yɛagyina odwohilalɛ nɩ munwa.

11. Mmɩlɩ mɔ Gyisɛsɩ hɔlɩ sʋlɔ mɛda nɩ, mɩnla ti mɔɔ nɩ yɩ adʋwavʋlɔ yɩ hyinyia akɛnɣazɩzɩbɛ a?

¹¹ Siã Gyehova ma ɩma akɛnɣazɩzɩbɛ wʋ wɔ dasɩlɛlilɛ nu. Ɩka ɛgyɩkɩ̃ɩ̃ ma Gyisɛsɩ sia kɔ sʋlɔ nɩ, ɩhakɛlɩ yɩ adʋwavʋlɔ yɩ egyima mɔɔ nɩ iwula bɛ sa nɩ, kɛɛ belí yɩ nwʋ dasɩlɛ wɔ ‘Gyelusalamɩ nɩɩ Dwudiyia nɩɩ Samaliyia munwala bɛva bɔhɔ bodwu azɩlɛ yɩ dɩka bela.’(Egy. 1:8; Lk. 24:46-48) Ɩákyɛ, Dwuumaa mbanimbani hyɩlɩ sʋ̃mavʋlɔ Pita nɩɩ Dwɔɔnʋ ɣalɩ Sanɩhɩdɩlɩnɩ abaguamaa nɩ anyunu na bɛhyɛlɩ mmenyia nɔhʋanlɛmaa eyimmɔ kɛɛ, beyiakí odwokɔba nɩ hanlɛ na bonwunlanwunlanlɩ bɛ po. (Egy. 4:18, 21) Kɛ Pita nɩɩ Dwɔɔnʋ yɛlɩ bɛ dɩyɛ zeli a?

12. Kɛmɔ Egyima 4:29, 31 kile nɩ, mɩnla yɛ adʋwavʋlɔ yɩ yɛlɩ a?

¹² Mmɩlɩ mɔ nɩ Pita nɩɩ Dwɔɔnʋ bɛmaa Dwuumaa nyamɩnlɩzʋ̃mɩnlɛmaa mbanimbani munwalɩyɛ nɩ, bɛhanlɩ kɛɛ: “Mʋnlʋmmɔzabɛ bowuwá kɛɛ mɔɔ ɩwɔ ɛhɩnla yɛ ɩdɩyɛnɛ wɔ Nyamɩnlɩ yɩ anyunu a, kɛ yediye mʋnlʋmmɔ anzɛnyɩɩ yediye Nyamɩnlɩ. Na amɩyɛ mɛyɩ mɔɔ yɛdɩ nɩɩ mɔɔ yɛnwʋ yɩ nɩ yɛlɔ́kʋla yekeyiaki yɩ ɛhanlɛ.” (Egy. 4:19, 20) Mmɩlɩ mɔ bodwulalɩ Pita nɩɩ Dwɔɔnʋ nɩ, adʋwavʋlɔ yɩ wɔlɩ Gyehova mpayɩ kɛɛ ɩma yɩ pɛ ɩyɛlɩ kɛ. Bɔwɔlɩ mpayɩ kɛɛ: “Ma wʋ azʋ̃mɩvʋlɔ akɛnɣazilɛ ma yɛhã wʋ odwokɔ nɩ.” Gyehova diyeli mpayɩ mɔɔ bɔzʋ̃ bɛ ahʋnlɩnɩ nu bɔwɔlɩ nɩ.—Kɩnga Egyima 4:29, 31.

13. Mɩnla yɛ yɛkɔhʋla yekozuma wɔ Jin-hyuk yɩ ndianwʋ yɩ nu a?

¹³ Sɛ aɣanɩ hyɛ yɛ kɛɛ yeyiaki odwokɔbahanlɛ egyima yɩ a, sa yɛkʋla yesumazuma adʋwavʋlɔ yɩ na yɛahɔ zʋ yɛahã odwokɔba yɩ. Ma yehila eliyema Jin-hyuk yɩ ndianwʋ yɩ, bedianlɩ yɩ fiyiadɩ iluwa ɔfʋã bela mɔɔ iákyina nɩ ti. Mmɩlɩ mɔ ɩwɔ fiyiadɩ kɛnɩ nɩ, bɛva bowulalɩ yɩ sa kɛɛ ihila bɛzabɛ mɔɔ bɔwɔ fiyiadɩ kɛnɩ nɩ zʋ, naasʋ̃ nɩ bɛ ahyinyiadɩ la yɛ nɩ ɩsɛ kɛɛ ɩ nɩɩ bɛ bɔ nwʋmɔ nkɔmmɔ a, nɩ íni kɛɛ ɩ nɩɩ bɛ bɔ Bayɩbʋlʋ nu nkɔmmɔ bela. Izianlɩ Gyehova kɛɛ ɩma akɛnɣazɩzɩbɛ yɩ na nwʋmɔ ɔhʋanɩ bela mɔɔ ikenyia nɩ ialuwa anyɩnlɩdɩlɛ ɔhʋanɩ zʋ iali dasɩlɛ. (Egy. 5:29) Ɩhanlɩ kɛɛ: “Gyehova diyeli mɩ mpayɩ na ɩmanlɩ akɛnɣazɩzɩbɛ nɩɩ nɣɛlɛbɛ mɩ ma mɩva mɩyɛlɩ Bayɩbʋlʋ dɩyɛzumanlɛ sʋ̃maa wɔ fiyiadɩ anyɩnkɛ munwa mɔɔ nɩ miniti anlu la yɛ nɩ mɩfa mɩyɛ a. Akʋ̃ itwu nunuma a, nɩ mɩkɛlɛ ahɛlɛta mɔɔ sɛ awulokyɩ̃ a mɩkɛva mɩkɛma abiliziyiamaa nɩ.” Amɩyɛ sʋ̃ sa yɛkʋla yenyia anwʋlazʋ kɛɛ Gyehova kɔwʋwa yɛ ma yɛkɛyɛ dasɩlɛlilɛ egyima yɩ. Dɩkɛɛ Jin-hyuk nɩ, sa yɛkʋla yɛbɔ mpayɩ yesiã akɛnɣazɩzɩbɛ nɩɩ nɣɛlɛbɛ.

14. Sɛ yeyiyia ndwokɔzɩzɩbɛ a, mɩnla yɛ ɩkɔwʋwa yɛ a? (Ndwomi 37:3, 5)

¹⁴ Siã Gyehova ma ɩwʋwa wʋ na wʋahʋla wʋagyina ndwokɔzɩzɩbɛ munwa. Ye nu sʋ̃maa wɔ ɛkɛnɩ a, adimakɛlɛ, yɛ alɔvʋlɔ mɔɔ bowuwu, abusunwa nu ndwokɔzɩzɩbɛ, odwodwudiyialɛ nɩɩ ɔhawʋ mvʋlɔ ɩtɩɩdɩɩ yɛ. Na nninyeni be dɩkɛɛ Covid-19 nɩɩ kʋnɛ azʋlɔtʋ mɔɔ ɩkɔlɩɩ zʋlɔ nɩ, ɩma ɩyɛ sɩ kɛɛ yekegyina ndwokɔzɩzɩbɛ eyimmɔ munwa. Kɛmɔ ankɩ ɛ nɩɩ wʋ ɔhɔnwʋ mɔɔ ibike wʋ paa tɩndɛɛ a, ɛkã kezimɔ ɛtɩ nɣanlɩ ekile yɩ nɩ, kã wʋ ahʋnlɩnɩ nu odwokɔ kile Gyehova. Nyia anwʋlazʋ kɛɛ Gyehova “keli kɛma wʋ.”—Kɩnga Ndwomi 37:3, 5.

15. Mɩnla ɔhʋanɩ zʋ yɛ mpayɩwɔlɛ kɔhʋla kɔwʋwa yɛ ma “yekegyina amanɩyɛnwʋnlɛ munwa” a? Ma nwʋmɔ ndianwʋ.

¹⁵ Sɛ yɛkɔ zʋ yɛbɔ mpayɩ a, ɩkɔwʋwa yɛ ma “yekegyina amanɩyɛnwʋnlɛ munwa.” (Wul. 12:12, NWT) Gyehova zi mɔɔ yɩ azʋ̃mɩvʋlɔ beyiyiaa na “itiye bo ozunɛ.” (Ndw. 145:18, 19) Ɔhʋanɩbukolɛvʋlɔ mɔɔ bɔfʋlɔ yɩ Kristie mɔɔ inyia alʋbɔ 29 ɣa nwʋnlɩ kɛɛ odwokɔ eyi dɩ nɔhʋanlɛ. Adimakɛlɛ ɛyɛlɛ ɛyɛlɛ be mɔɔ nɩ iahila yɩ ɔhʋanɩ wɔlɩ yɩ tʋ kɛɛ ididee yɩ. Eyi manlɩ yɩ ɛɣɛɛlɛ wɔlɩ baaba. Aɣinzi yɩ ɩnwʋnlɩ kɛɛ yɩ maamɩ nyia adimakɛlɛ be mɔɔ ɩkɔhʋla kohũ yi. Kristie hanlɩ kɛɛ: “Mʋwɔlɩ Gyehova mpayɩ ɛzɩzɩbɛ ɛzɩzɩbɛ kɛɛ, ɩma minyia anwʋzɩzɩbɛ mɔɔ mɩkɛva mikegyina yi munwa. Mʋwɔlɩ mmɔdɩnɩ kɛɛ mʋkɔhɔ dɩyɛzumanlɛ na mɩayɛ mɩzamɩ mɩ dɩyɛzumanlɛ eɣile bela.” Ɩva ɩzɔlɩ zʋlɔ kɛɛ: “Mpayɩwɔlɛ yɛ ɩwʋwalɩ mɩ ma migyinanlɩ ndwokɔzɩzɩbɛ eyimmɔ munwa a. Nɩ mizi kɛɛ Gyehova wɔ kɛnɩ eɣile bela na ɔzɔ adwɩnɩ yɩ yɛ ɩyɩkyɩlɩ mɩ ɛɣɛɛlɛ a. Ɩwɔ numɔ kɛɛ mɩ adimakɛlɛ yɩ ɩákɔ wɔ kɛnɩ la dɩyɛ naasʋ̃ Gyehova diyeli mɩ mpayɩwɔlɛ, ɩmanlɩ minyianlɩ azʋ̃nudwolɩyɛ na mɩ ahʋnlɩnɩ dɔlɩ mu kunlu.” Máma yɛ ɛɣɛɛlɛ fi kyɩ̃ kɛɛ “Gyehova zi kezimɔ ɩkɛyɩ bɛzabɛ mɔɔ bɔsʋ̃mɩ yɩ wɔ odwohilalɛ nu.”—2 Pit. 2:9, NWT.

16. Mɩnla ti mɔɔ yehyinyia Gyehova yɩ mmʋwalɩyɛ na yɛahʋla yɛahʋ̃ yɛadiyia odwohilalɛ a?

¹⁶ Siã Gyehova ma ɩwʋwa wʋ ma egyina odwohilalɛ munwa. Iluwakɛɛ iáli munli ti, ihyinyia kɛɛ yɛkɔ zʋ yɛkʋ̃ yetiyia tanɩ mɔɔ itwe yɛ ikila nɩ eɣile bela. Setanɩ ɩbɔɔ mmɔdɩnɩ kɛɛ ɩkɛma ɩkɛyɛ sɩ ɩkɛma yɛ kɛɛ yɛkɔhwɩ̃ yɛ nwʋ wɔ tanɩ nwʋ. Ɔhʋanɩ ɔkʋ̃ mɔɔ iduwa zʋlɔ ɩyɛ zɔ yɛ lɛ kɛɛ ɩkɛma yɛkɛva nninyeni mɔɔ nwʋmɔ ɩádɩ yekele yɛ anyɩ. Ɔzɔ nninyeni yɩ kɛma yekenyia adwɩnɩ mɔɔ ɩávata. Ɩlɛ́ma yɛ nwʋ kɛdɩ wɔ Gyehova anyunu na ɩkɔhʋla ɩkɛma yɛkɛyɛ tanɩ.—Mk. 7:21-23; Gye. 1:14, 15.

17. Mmɩlɩ mɔ yɛwɔ mpayɩ yeziã mmʋwalɩyɛ mɛda nɩ, mɩnla yɛ ɩsɛ kɛɛ yɛyɛ a? (Kila mfonyini yi sʋ̃.)

¹⁷ Yehyinyia Gyehova yɩ mmʋwalɩyɛ na yɛahʋla yɛahʋ̃ yɛadiyia odwohilalɛ. Gyisɛsɩ hanlɩ eyi wɔ mpayɩ mɔɔ ihileli yɛ nɩ nu kɛɛ: “Máma ɔhʋanɩ ma odwohilalɛ idi yɛ zʋ, mfomi yɩ yɛ wɔ mmuzulo nu.” (Mt. 6:13) Gyehova mɛyɩ ɩpɛ kɛɛ ɩbʋwa yɛ, naasʋ̃ ɩsɛ kɛɛ yebizia yɩ mmʋwalɩyɛ. Ɩsɛ kɛɛ yɛyɛ yɛ mpayɩ yɩ nwʋ egyima. Ɩsɛ kɛɛ yɛbɔ mmɔdɩnɩ kɛɛ yɛlɛ́kɩnga, yelékila anzɛnyɩɩ yelétiye dɩyɛ bela mɔɔ ɩkɔhʋla ɩkɛzɩkɛ yɛ adwɩnɩ wɔ Setanɩ oyuwadɩ eyi nu. (Ndw. 97:10) Sɛ yɛkɩnga na yɛdwɩnɩndwɩnɩ Bayɩbʋlʋ yɩ nwʋ a, ɩkɔwʋwa yɛ ma yɛkɔdwɩnɩndwɩnɩ nninyeni baaba nwʋ. Sɛ yɛkɔ dɩyɛzumanlɛ nɩɩ dasɩlɛlilɛ sʋ̃ a, ɩkɔwʋwa yɛ ma yɛkɔdwɩnɩndwɩnɩ nninyeni mɔɔ ɩfata nwʋ. Gyehova sʋ̃ wɔ yɛ anʋhʋba kɛɛ ɩlɛ́ma odwohilalɛ mɔɔ yɛlɔ́kʋla yekegyina yi munwa nɩ kɔdʋ yɛ.—1 Kɔl. 10:12, 13.

18. Sɛ ɩba yɩ nɩ mpayɩwɔlɛ a, mɩnla yɛ ɩsɛ kɛɛ ye munwala yɛyɛ a?

¹⁸ Ɩsɛ kɛɛ ye munwala yeminyia yɛ mpayɩwɔlɛ nu na ama yɛahɔ zʋ iali Gyehova nɔhʋanlɛ wɔ awielɩyɛ mmɩlɩ eyi nu. Yɩ́ mmɩlɩ siye ahanlɩ na ɔzʋ̃ wʋ ahʋnlɩnɩ nu bɔ Gyehova mpayɩ eɣile bela. Gyehova pɛ kɛɛ ‘yɛkã yɛ ahʋnlɩnɩ nu ndwokɔ yekile yi’ wɔ mpayɩwɔlɛ nu. (Ndw. 62:8)Yɩ́ Gyehova ayɛlɛ na da yɩ asɩ wɔ mɔɔ ɩyɛ ɩma wʋ nɩ munwala nwʋ. Siã yɩ kɛɛ ɩma enyia akɛnɣazɩzɩbɛ wɔ dasɩlɛlilɛ nu. Siã Gyehova kɛɛ ɩwʋwa wʋ ma egyina ndwokɔzɩzɩbɛ nɩɩ odwohilalɛ bela mɔɔ ekeyiyia nɩ munwa. Áma abiye anzɛnyɩɩ dɩyɛ bela si wʋ ɔhʋanɩ kɛɛ ɔkɔwɔ Gyehova mpayɩ eɣile bela. Mɩnla ɔhʋanɩ zʋ yɛ Gyehova tiye yɛ mpayɩwɔlɛ a? Yekozunzu odwokɔɣizialɛ eyi mɔɔ nwʋmɔ hyinyia yɩ nwʋ wɔ dɩyɛzumanlɛ mɔɔ ili kɛnɩ nɩ nu.