Tanɩfakyɛ Ansaana Elelɛdɩyɛ Nɩ Ɩbaa

Sɛ bɔkɔhʋla bɛkɛva yɛ tanɩ bɛkɛhyɛ yɛ a, gyɩsɛ iluwa Gyisɛsɩ yɩ elelɛdɩyɛ afɔlɩ mɔɔ ɩvalɩ yi mmegyia ɩwɔlɩ nɩ zʋ nkʋ̃ la. (Ɛfɩ. 1:7) Naasʋ̃, Bayɩbʋlʋ yɩ kã kɛɛ: “Bɔmʋnlɩ nɩ mɛyɩ [Nyamɩnlɩ] izili abʋtalɩ na iwuli yɩ anyɩ igualɩ mmenii bɛ tanɩ nɩ mmɔ zʋ,” kile kɛɛ, ansaana Gyisɛsɩ ɩlɛ yɩ nnwʋanlɩ ɩbayɛ elelɛdɩyɛ. (Wul. 3:25) Kɛ ɩyɛlɩ mɔɔ Gyehova ɩhʋlalɩ ɩvalɩ tanɩ ɩhyɛlɩ ansaana elelɛdɩyɛ nɩ ɩbaa na mmɩlɩ ɔkʋ̃ yɩ la ɩahɔ zʋlɔ ɩayɛ pɛlɩpɛlɩlilɛ Nyamɩnlɩ a?

Wɔ Gyehova anyɩ zʋ nɩ, mmɩlɩ mɔ ɩwɔlɩ anʋhʋba kɛɛ ɩkɛma “yɩ tʋnii” be kɛɣa na ɩaɣa iale adasamaa mɔɔ bede yi bedi nɩ, nɩ ɩdɩ kɛɛ mɔɔ iduwa elelɛdɩyɛ nɩ iwie daada. (Gyn. 3:15; 22:18) Nɩ Nyamɩnlɩ zi paa kɛɛ, wɔ yɩzayɩ yɩ mmɩlɩ mɔ ɩfata nu nɩ, yɩ Ɣa ɔkʋ̃ kyeinyii nɩ ɩzʋ̃ yɩ pɛ nu ikoduwa elelɛdɩyɛ nɩ. (Gal. 4:4; Hib. 10:7-10) Mmɩlɩ mɔ nɩ Gyisɛsɩ wɔ azɩlɛ yɩ zʋ kɛɛ Nyamɩnlɩ yɩ agyianugyinanlɛvʋlɔ nɩ, Gyehova manlɩ tumi yi mɔɔ nɩ ɩkʋla ɩfa tanɩ ɩkyɛ ansaana ibaduwa elelɛdɩyɛ nɩ po. Gyisɛsɩ hʋlalɩ valɩ abiyemmɔ bɛ tanɩ hyɛlɩ bɛ iluwakɛɛ nɩ izi kɛɛ elelɛdɩyɛ afɔlɩ mɔɔ nɩ ɩbawɔ nɩ koduwa mmenii eyi mɔɔ nɩ bede yi bedi nɩ bɛ tanɩ nwʋ kakɛ.—Mt. 9:2-6.