Suma Sʋ̃maa Wɔ Mfonyini Nu

Mfonyini sʋ̃maa wɔ yɛ awuuku azʋlɔtʋ yɩ nu, na bɔbʋwa yɛ ma yenyia ozumalɛdɩyɛ mɔɔ nwʋmɔ hyinyia sʋ̃maa. Mɩnla ɔhʋanɩ zʋ yɛ yɛkɔhʋla kenyia mfonyini azʋlɔtʋ eyimmɔ zʋ̃ mfasʋ kezile a?

• Di bɔmʋnlɩ kilahila mfonyini mɔɔ ɩwɔ yɛ awuuku yi nu ansaana wʋaɣɩnga. Mfonyini yi kodunwo wʋ anyɩnlɩlelɛ na ɩahyɛ wʋ ɛzɩzɩbɛ ma wʋaɣɩnga. Sɛ wʋ anyɩ bɔ alɩyɛ be mɔɔ ɩyɛ akɔnɔ zʋ a, ɩma wʋ nwʋ pɩlɩ wʋ kɛɛ ekeli ebiye. Ɔzɔ la sʋ̃ yɛ sɛ edi bɔmʋnlɩ kila mfonyini mɔɔ ɩwɔ yɛ awuuku azʋlɔtʋ yɩ nu a, ɩkɛma wʋ nwʋ kɛbɩlɩ wʋ kɛɛ ɛkɛɣɩnga. Meti ansaana ɛkɛɣɩnga nɩ, di bɔmʋnlɩ bizia wʋ nwʋ kɛɛ, mɩnla mfonyini yɛ ɩwɔ numɔ a?—Em. 7:​7, 8.

• Mmɩlɩ mɔ ɛkɩngaa odwokɔ yɩ nɩ, dwɩnɩndwɩnɩ sianti mɔɔ bɛvalɩ ɔzɔ mfonyini yi bowulalɩ numɔ nɩ nwʋ. Sɛ ndwokɔ wɔ mfonyini yi nwʋ a, kɩnga. Kila kezimɔ mfonyini yi falɩ mɔɔ osumaa nɩ nwʋ na akʋ̃ sunzu kezimɔ ɛkɛva ozumalɛdɩyɛ mɔɔ ɩwɔ numɔ nɩ kɛyɛ egyima nɩ nwʋ.

• Sɛ ɛkɩnga odwokɔ yɩ owie a, sia kila mfonyini mɔɔ ɩwɔ numɔ nɩ dɔkʋ̃. Ɩkɔwʋwa wʋ ma ɛkɛhakɛ ozumalɛdɩyɛ mɔɔ enyianlɩ wɔ numɔ nɩ. Akʋ̃ kɩda wʋ anyɩ na bɔ mmɔdɩnɩ kɛɛ ɛkɛhakɛ mfonyini yi nɩɩ ozumalɛdɩyɛ mɔɔ enyianlɩ wɔ numɔ nɩ.

• Mɩnla ti mɔɔ wʋáhila mfonyini mɔɔ ɩwɔ Ɔwɩɛnɩlɛ Aɣanɩ eyi nu nɩ dɔkʋ̃ sɛ ɛkɛhakɛ ozumalɛdɩyɛ mɔɔ ɩwɔ numɔ nɩ a?