Mɩnla Ti Mɔɔ Mmenii Bɛáhʋla Bɛma Azʋ̃nudwolɩyɛ Ba a?​—Mɩnla Yɛ Bayɩbʋlʋ Yɩ Kã a?

Amanlɩ mbanimbani nɩɩ okuwu azʋlɔtʋ mɔɔ beli nninyeni anyunu wɔ oyuwadɩ yɩ nu nɩ, bɛáhʋla bɛma azʋ̃nudwolɩyɛ ba mmenii avinli. Ɔzʋmɩ Oyuwadɩ Kʋnɛ Mɔɔ Ɩtɔ Zʋlɔ Anwɩ̃ mɛda nɩ, kʋnɛ nɩɩ basabasayɛlɛ mɔɔ ɩkɔlɩ zʋlɔ wɔ nnɛ nɩ dɛla mmɩlɩ bela mɔɔ ɩɣa ɩzɩ̃ ɩhɔ. Sɛ ɛkyɛ mmenii munwala mɔɔ bɔwɔ oyuwadɩ yɩ nu anla a, basabasayɛlɛ kã bo nu ɔkʋ̃ mɔɔ bɔ dʋdʋ dɩ kɛyɛ billion anwɩ̃ nɩ.

Mɩnla ti mɔɔ adasamaa bɛáhʋla bɛma azʋ̃nudwolɩyɛ ba a? Mɩnla yɛ Bayɩbʋlʋ yɩ kã a?

Sianti asã ti mɔɔ adasamaa bɛáhʋla bɛma azʋ̃nudwolɩyɛ ba

1. 1. Subanɩ mɔɔ mmenii da yɩ ali nɩ, ɩma ɩyɛ sɩ ɩma bɛ po kɛɛ bɛkɛbɩbɛ azʋ̃nudwolɩyɛ. Bayɩbʋlʋ yɩ hyɛlɩ nkɔmɩ kɛɛ wɔ yɛ mmɩlɩ eyi nu nɩ, ‘mmenii kɛyɛ angʋmidi, ozukua nwʋ anyɩnlɩbʋlʋ, apigyiabigyiabɔnwʋ, ahantanɩ, belédi nɔhʋanlɛ, mmenii mɔɔ bɛáhʋla bɛ nɩɩ bɛ yɛ nhyɩhyɛlɩyɛ, mmenii mɔɔ bɛáhʋla bɛhyɛ bɔ nwʋ zʋ, bɔ nwʋ kɛyɛ ɛyɛlɛ, bɛ azʋ̃ kɛyɛ sɩ, mmenii mɔɔ botu bɔ nwʋ.’​—2 Timoti 3:2-4.

2. 2. Abiyela íni oyuwadɩ yɩ nu mɔɔ ɩlɛ tumi mɔɔ ɩkɔhʋla ikeli yɩ ɔhawʋ nwʋ egyima. Gyehovaa Nyamɩnlɩ mɔɔ ɩdɩ yɛ Wɔlɛvʋlɔ yɩ la yɛ ɩkɔhʋla ɩkɔwʋwa yɛ ma yekenyia yi munwa awudo a. Bayɩbʋlʋ ma yɛnwʋ kɛɛ, “kezimɔ enii iluwa a ikodudu yɩ agyia po, íni yi sa nu.”​—Gyɛlɩmaya 10:23.

3. 3. Setanɩ Abɔnsamɩ mɔɔ ɩdɩ tumililɛvʋlɔ mɔɔ yɩ ti nu yɛ sɩ nɩ, yɛ idii oyuwadɩ yɩ zʋ a, na mɛyɩ sʋ̃ yɛ “ɩdahɩlɩdahɩlɩ azɩlɛ yɩ zʋ maa munwala” a. (Yikile 12:9) Mbɔmɩ dʋdʋ mɔɔ “oyuwadɩ yɩ munwala la tanɩvʋlɔ yɩ yi tumi nu” nkʋ̃tɩnyɩɩ mɛyɩ, kʋnɛ nɩɩ basabasayɛlɛ la yɛ ɩkɔhɔlɩ zʋlɔ a.​—1 Dwɔɔnʋ 5:19.

Aninyia yɛ ɩkɔhʋla ɩkɛma azʋ̃nudwolɩyɛ kɛɣa a?

Bayɩbʋlʋ yɩ ma yenyia anwʋlazʋ kɛɛ, sɛ enii kũ yɩ nwʋ mɩnla la po a, ɩlɔ́kʋla ɩkɛma azʋ̃nudwolɩyɛ kɛɣa, Nyamɩnlɩ la yɛ ɩwɔ yi munwa awudo a.

• “‘Na mɩzamɩ mizi adwɩnɩ mɔɔ mɩva wɔ bɔ nwʋ,’ Gyehova yɛ ise a, ‘ɩdɩ azʋ̃nudwolɩyɛ adwɩnɩ, na kɛ mmuzulo a, kɛ mɩkɛma eɣile be nɩɩ anyɩnlɩlazʋ bɛ.’”​—Gyɛlɩmaya 29:11.

Kɛ Nyamɩnlɩ keli ɔzɔ anʋhʋba yɩ nwʋ egyima keze a? “Nyamɩnlɩ mɔɔ ɩma azʋ̃nudwolɩyɛ nɩ, ɩlɛ́kyɛ bela na ɩaɣɛtɛ Abɔnsamɩ wɔ mʋnlʋmmɔzabɛ bɛ agyia tʋ.” (Wulomimaa 16:20) Nyamɩnlɩ koluwa sʋlɔ aɣanɩ be mɔɔ Bayɩbʋlʋ yɩ fʋlɔ yɩ “Nyamɩnlɩ Yɩ Bulombunlililɛ” nɩ zʋ ɩkɛma azʋ̃nudwolɩyɛ kɛɣa oyuwadɩ munwala. (Luuku 4:43) Sɛ Gyisɛsɩ Kɩlayɩsɩ mɔɔ ɩdɩ ɔzɔ Bulombunlililɛ yɩ zʋ Bulombunli nɩ bɔ yɩ tʋ kɛɛ idii tumi wɔ azɩlɛ yɩ zʋ a, mmenii kozuma kezimɔ bɛkɛma azʋ̃nudwolɩyɛ kɔwʋwa bɛ nɩɩ mmenii mvʋlɔ avinli.​—Ayɩzaya 9:6, 7.

• Sɛ ɛpɛ kɛɛ ɔnwʋ sʋ̃maa a, kɩnga odwokɔ eyi “Dɛn na Onyankopɔn Ahenni Bɛyɛ?”