Asʋ̃ Nnamɩ Kɔ Sʋlɔ a?

Mɔɔ Bayɩbʋlʋ yɩ kã

Bayɩbʋlʋ yɩ ma yɛnwʋ kɛɛ, abɔdɩ mɔɔ bɔwɔ azɩlɛ yɩ zʋ munwala nu nɩ, mmenii yɛ bɔkɔhɔ sʋlɔ a. Na mɛyɩ po nɩ, bo nu ɛgyɩkɩ̃ɩ̃ be la yɛ bɔkɔhɔ a. (Yikile 14:1, 3) Bɛ nɩɩ Gyisɛsɩ kɔwɔ numɔ keli tumi kɛɛ awulombunli nɩɩ azɔfʋ. (Luuku 22:28-30; Yikile 5:9, 10) Bokodunwo mmenii abʋmɩ abʋmɩ sʋ̃maa ma bɛkɛɣa nnwʋanlɩ nu wɔ paladayɩsɩ azɩlɛ yɩ zʋ.—Ndwomi 37:11, 29.

Bɛlɛ́kanlɩ yɩ wɔ Bayɩbʋlʋ yɩ dɩka bela kɛɛ nyɛmʋwa bahɔ sʋlɔ, na ntɩyasɩ wɔ nu sʋ̃. Mɔɔ ɩsɛ kɛɛ abiye yɛ na ama ɩavata sʋlɔhɔlɛ nɩ, nnamɩ lɔ́kʋla kɛyɛ. (Hibulumaa 3:1, New World Translation) Mɔɔ ɩma abiye fata nɩ be yɛ lɛ Nyamɩnlɩ nwʋ nnimidi mɔɔ ikenyia, yi nu dedi, nɩɩ yɩ mmɛla mɔɔ ikelili zʋlɔ. (Matiyu 19:17; Dwɔɔnʋ 3:16; 17:3) Adasamaa nkʋ̃ la yɛ bɔwɔlɩ bɛ kɛɛ bɔwʋwá azɩ daabaa.—Gyɛnɛsɩsɩ 2:16, 17; 3:22, 23.

Ansaana abiye kɔhɔ sʋlɔ nɩ, ɩsɛ kɛɛ bedi bɔmʋnlɩ botunwo yi wɔ owulo nu. (1 Kɔlɛntɩmaa 15:42) Bayɩbʋlʋ yɩ kã awudunwolɩyɛ nwʋ ndwokɔ sʋ̃maa. (1 Awulombunli 17:17-24; 2 Awulombunli 4:32-37; 13:20, 21; Luuku 7:11-15; 8:41, 42, 49-56; Dwɔɔnʋ 11:38-44; Egyima 9:36-42; 20:7-12) Naasʋ̃ yi munwatĩĩ dɩ mmenii, nnamɩ ɩáhɩnla nwʋmɔ.

Asʋ̃ nnamɩ wɔ ɛkɛla a?

Anhã. Bayɩbʋlʋ yɩ kã kɛɛ nnamɩ nɩɩ mmenii munwala dɩ ɛkɛla. (Nɔmɛsɩ 31:28) Mmɩlɩ mɔ bɔwɔlɩ enii mɔɔ ili bɔmʋnlɩ, Adamɩ nɩ, bɛáma ɛkɛla yɩ, mfomi “ɩɣa ɩyɛlɩ ɛkɛla mɔɔ ɩda nnwʋanlɩ nu.” (Gyɛnɛsɩsɩ 2:7, azɩkɛnɩ odwokɔ) Nninyeni anwɩ̃ yɛ ɩbɔ numɔ ɩyɛ ɛkɛla a. Ɔzɔ nninyeni yi yɛ lɛ “azɩ ndɛdɛlɛ” yɛɛ “nnwʋanlɩ ahʋmɩ.”

Asʋ̃ ɛkɛla kɔhʋla kowu a?

Nyɛ, Bayɩbʋlʋ yɩ kã kɛɛ ɛkɛla kɔhʋla kowu. (Lɛvitikɔsʋ 21:11, azɩkɛnɩ odwokɔ; Izikɩyɛlɩ 18:20) Sɛ nnamɩ nɩɩ mmenii wu a, besia bɔkɔ ndɛdɛlɛ nu. (Odwokɔhanlɛvʋlɔ 3:19, 20) Eyi kile kɛɛ béni kɛnɩ dɔkʋ̃.a

Asʋ̃ nnamɩ yɛ tanɩ a?

Anhã. Sɛ kezimɔ abiye dwɩ̃, ɩtɩ nɣanlɩ, anzɛnyɩɩ ɩyɛ nninyeni be nɩ, ɩ nɩɩ Nyamɩnlɩ yɩ mmɛla iáyiyia a, yɛ ikile kɛɛ ɩyɛ tanɩ a. Ansaana abiye kɛyɛ tanɩ nɩ, ɩsɛ kɛɛ ɩkʋla isizi abɔkɔ mɔɔ ɩfalɩ ɛbɩlawɔlɛ nwʋ, naasʋ̃ nnamɩ ɩáhʋla yɛ zɔ. Wɔ mmɩlɩ ɛgyɩkɩ̃ɩ̃ mɔɔ nnamɩ fa bʋwa azɩ yɩ nu nɩ, mɔɔ bɛ nɣanlɩdɩlɛ kã kile bɛ kɛɛ bɛyɛ nɩ, yɛ bɛyɛ a. (2 Pita 2:12) Sɛ mmɩlɩ dʋdʋ mɔɔ ɩsɛ kɛɛ bɛfa bɔbʋwa azɩ nɩ twu a, bowu ɩávalɩ nwʋ kɛɛ bɛáyɛ tanɩ bela nɩ.

Asʋ̃ ɩdɩ baaba kɛɛ yɛkɛyɛ nnamɩ ayɛkwa a?

Anhã. Nyamɩnlɩ manlɩ adasamaa tumi kɛɛ behilá nnamɩ zʋ, naasʋ̃ ɩákã kɛɛ bɛyɛ́ bɛ ayɛkwa. (Gyɛnɛsɩsɩ 1:28; Ndwomi 8:6-8) Nyamɩnlɩ dwɩnɩ ɛnlamɩ ɔkʋ̃ bela nwʋ, mɔɔ nnʋma ngyɩkɩ̃ɩ̃ ngyɩkɩ̃ɩ̃ po kɩnla nwʋ. (Dwona 4:11; Matiyu 10:29) Ɩhyɛlɩ yɩ azʋ̃mɩvʋlɔ kɛɛ bɔdwɩnɩ́ nnamɩ nwʋ, na áma bɛyɛ bɛ ayɛkwa.—Ɛkɩsadɔsʋ 23:12; Ditilonɔmi 25:4; Ɛɣɛlɛwulɛ 12:10.

Bayɩbʋlʋ nu ndwokɔ mɔɔ ɩfalɩ nnamɩ nwʋ

Gyɛnɛsɩsɩ 1:28: “Nyamɩnlɩ yilalɩ [mmenii mɔɔ beli bɔmʋnlɩ nɩ], na Nyamɩnlɩ hã hileli bɛ kɛɛ: ‘Bɔwʋ́ na bɔ nwʋ zʋnlɩ, na bɛhyɛ azɩlɛ yɩ zʋ manlɩ na beli zʋlɔ tumi, na ngyemvile nu egyeni nɩɩ abɔdɩ mɔɔ botu boduwa duwa oyumi nɩɩ abɔdɩ mɔɔ nnwʋanlɩ wɔ numɔ munwala belí bɔ zʋ tumi.’”

Mɔɔ ikile: Nyamɩnlɩ manlɩ adasamaa ɔhʋanɩ kɛɛ belí nnamɩ yɩ zʋ tumi.

Nɔmɛsɩ 31:28: ‘De ndwuliyɛ wɔ azogyiamaa mɔɔ bɔhɔlɩ kʋnɛ nɩ bɛ kɛnɩ. Mmenii 500 bela, de ɛkɛla ɔkʋ̃, nantwi 500 bela, de ɛkɛla ɔkʋ̃, asʋwasʋwa pɔnkɔ 500 bela, de ɛkɛla ɔkʋ̃, na mmuwuanɩ 500 bela, de ɛkɛla ɔkʋ̃.’

Mɔɔ ikile: Nnamɩ nɩɩ mmenii munwala dɩ ɛkɛla.

Ɛɣɛlɛwulɛ 12:10: “Ɛdɩnɣɛlɛnii kila yɩ nyɛmʋwa zʋ bʋwɔ.”

Mɔɔ ikile: Mmenii baaba ma bɛ anyɩ kɔ nnamɩ nwʋ paa, mɔɔ bɛ nyɛmʋwa po kɩnla nwʋ.

Matiyu 10:29: “Asʋ̃ bɛádɔnɩ nzɩlɩka anwɩ̃ bede kapɛlɩ a? Naasʋ̃ bo nu ɔkʋ̃ po ilówu wɔ mmɩlɩ mɔ bɛ Zɩ ɩlɛ́manlɩ ɔnwʋmɔ ɔhʋanɩ.”

Mɔɔ ikile: Nyamɩnlɩ nwʋ nnamɩ, na ɩdwɩnɩ bɔ nwʋ, mɔɔ nnʋma ngyɩkɩ̃ɩ̃ ngyɩkɩ̃ɩ̃ po kɩnla nwʋ.

a Sɛ ɛpɛ kɛɛ ɔnwʋ sʋ̃maa falɩ eyi nwʋ a, kila Sa Ɔkʋla Enyia Anyɩnlɩlelɛ Daabaa! buuku yi, ozumalɛdɩyɛ 29.