Mɩnla Ti Mɔɔ Gyehova Dasɩvʋlɔmaa Bɛáva Bɔ Nwʋ Bowula Ɔlʋbɔlilɛ Anzɛnyɩɩ Awuwa Azʋlɔtʋ Be Nu a?

• Kɛ ɩyɛ mɔɔ Gyehova Dasɩvʋlɔmaa nwʋ yɩ kɛɛ ɔlʋbɔlilɛ be sɔ Nyamɩnlɩ anyɩ anzɛnyɩɩ ɩázɔ yɩ anyɩ a?

• Gyehova Dasɩvʋlɔmaa mɔɔ bɛáva bɔ nwʋ bowula ɔlʋbɔlilɛ be nu nɩ, asʋ̃ bɛ nɩɩ bo mmusunwamaa avinli dɩ baaba a?

• Asʋ̃ Gyehova Dasɩvʋlɔmaa hyɛ mmenii mvʋlɔ kɛɛ áma bedi ɔlʋbɔ anzɛnyɩɩ awuwa azʋlɔtʋ be a?

Kɛ ɩyɛ mɔɔ Gyehova Dasɩvʋlɔmaa nwʋ yɩ kɛɛ ɔlʋbɔlilɛ be sɔ Nyamɩnlɩ anyɩ anzɛnyɩɩ ɩázɔ yɩ anyɩ a?

Ansaana Gyehova Dasɩvʋlɔmaa keli ɔlʋbɔ be anzɛnyɩɩ bɛkɛva bɔ nwʋ bokowula numɔ nɩ, bedi bɔmʋnlɩ bosunzu mɔɔ Bayɩbʋlʋ yɩ kã wɔ nwʋ nɩ nwʋ. Awuwa nɩɩ ɔlʋbɔlilɛ azʋlɔtʋ be wɔ kɛnɩ a, ɩ nɩɩ Bayɩbʋlʋ egyinalɛzʋ-ndwokɔ iáyiyia. Sɛ bɔnwʋ yɩ zɔ a, mɛyɩ bɛáli anzɛnyɩɩ bɛáva bɔ nwʋ bowula nu. Naasʋ̃ ɔlʋbɔlilɛ azʋlɔtʋ mɔɔ Bayɩbʋlʋ yɩ ɩáhyɛda ɩkã nwʋmɔ odwokɔ mɛyɩ, Dasɩvʋlɔ bela yɩzayɩ isi nwʋmɔ pɔkɔ, na ɩbɔ mmɔdɩnɩ “kɛɛ ikenyia adwɩnɩ mɔɔ numɔ ɩtɩ nɩ wɔ Nyamɩnlɩ nɩɩ mmenii bɛ anyunu.”​—Egyima 24:16.

Ansaana Gyehova Dasɩvʋlɔmaa kezi pɔkɔ kɛɛ bekeli ɔlʋbɔ anzɛnyɩɩ awuwa be nɩ, bebiziabizia bɔ nwʋ ndwokɔ azʋlɔtʋ be. Ebiye yɛ ilili zʋlɔ yɩ a.a

• Asʋ̃ awuwa anzɛnyɩɩ ɔlʋbɔlilɛ yɩ gyĩ awohwi ehilehilelɛ zʋ a?

  Mɔɔ Bayɩbʋlʋ yɩ kã: “Niibenyia Nyamɩnlɩ sʋ̃ ise, “Mʋnlʋmmɔ béyiaki bɛ, na mʋnlʋmmɔ bɔhwɩ̃ bɔ nwʋ wɔ bɔ nwʋ. Máma mʋnlʋmmɔ bɛfa bɛ sa bɛkã dɩyɛ mɔɔ nwʋmɔ ɩádɩ nɩ, na mikele mʋnlʋmmɔ.”​—2 Kɔlɛntɩmaa 6:15-17.

  Mɔɔ ɩkɛyɛ na Gyehova Dasɩvʋlɔmaa bɛahwɩ̃ bɔ nwʋ wɔ ehilehilelɛ bela mɔɔ nwʋmɔ ɩádɩ wɔ Nyamɩnlɩ yɩ anyɩ zʋ anzɛnyɩɩ mɔɔ ɩ nɩɩ Bayɩbʋlʋ ehilehilelɛ iáyiyia nwʋ nɩ, bɛáva bɔ nwʋ bowula awuwa anzɛnyɩɩ ɔlʋbɔlilɛ azʋlɔtʋ eyimmɔ nu.

  Awuwalilɛ mɔɔ igyĩ awohwi ehilehilelɛ anzɛnyɩɩ awʋzʋmɩzʋ̃mɩnlɛ zʋ. Gyisɛsɩ hanlɩ kɛɛ: “Sʋ̃mɩ Niibenyia wʋ Nyamɩnlɩ nɩ, na mɛyɩ nkʋ̃ la yɛ ɩwɔ kɛɛ ɔsʋ̃mɩ yɩ a.” (Matiyu 4:​10) Iluwa odwokɔ eyi ti, Gyehova Dasɩvʋlɔmaa bɛáli Bulonyia, Easter, anzɛnyɩɩ May Day. Iluwakɛɛ awuwa eyimmɔ zʋ̃ awʋzʋmɩzʋ̃mɩnlɛ nu. Akʋ̃ sʋ̃, bɛáva bɔ nwʋ bowula awuwalilɛ azʋlɔtʋ mɔɔ ilili zʋlɔ eyimmɔ nu.

  • Kwanzaa. Dima Kwanzaa “zʋ̃ Swahili odwokɔ matunda ya kwanza, mɔɔ ikile ‘mma mɔɔ ili bɔmʋnlɩ’ nɩ nu. Na eyi ma yɛnwʋ kɛɛ, Kwanzaa zʋ̃ awuwa be mɔɔ nɩ Africa maa bedi mmɩlɩ mɔ bodua bo nnuwalɩba mɔɔ ili bɔmʋnlɩ nɩ nu.” (Encyclopedia of Black Studies) Ɩwɔ numɔ kɛɛ abiyemmɔ de di kɛɛ Kwanzaa dɩ awuwa be mɔɔ ɩávalɩ ɔzʋ̃mɩnlɛ nwʋ dɩyɛ, naasʋ̃ Encyclopedia of African Religion kã kɛɛ, Kwanzaa dɩkɛɛ Africa maa bɛ awuwa be mɔɔ nɩ bedi nɩ. Nɩ sɛ bedii ɔzɔ awuwa yɩ a, bokohunwahunwa be egyini nu mma mɔɔ ili bɔmʋnlɩ nɩ yi munwa na “bɛfa bɔbɔ afɔlɩ bɛma awʋzʋmɩ nɩ mmɔ nɩɩ be nlabenyiammɔ mɔɔ bowuwu nɩ bɛfa bɛda bɛ asɩ.” Buuku yi zia hanlɩ kɛɛ: “Ɔzɔ adwɩnɩ yɩ la yɛ bɛfa bedi African American holiday, mɔɔ ɩdɩ Kwanzaa nɩ a.”

    

  • Mid-Autumn Festival. Bedi “awuwa eyi bɛfa bɛhyɛ eziyianɩ nyamɩnlɩ nɩ animinyiamɩ.” (Holidays, Festivals, and Celebrations of the World Dictionary) Sɛ bedii ɔzɔ awuwa yɩ a, bɛma “mmaalɛ nɩ kã bo nu azɩ sʋ̃mɩ bʋzʋmɩ mɔɔ ɩdɩ baalɛ nɩ. Na wɔ Chinese nu nɩ, bɔfʋlɔ ɔzɔ dɩyɛ yɩ kowtow.”​—Religions of the World—A Comprehensive Encyclopedia of Beliefs and Practices.

  • Nauruz (Nowruz). “Awuwa eyi zʋ̃ Zoroaster bɔ ɔzʋ̃mɩnlɛ nu, bedi bɛfa bɛkakɛ eɣile mɔɔ bobu yi kɛɛ ɩdɩ nwanzanwanza wɔ Zoroaster bɛ kalɛnda yɩ zʋ . . . . Zoroaster maa bɔ ɔzʋ̃mɩnlɛ nu abakɔsɛmɩ kile kɛɛ sɛ itwu ɛyɛbɛ mmɩlɩ a, Ɛyɛbɛ nyamɩnlɩ nɩ twɩ̃ Ɛpɛ mmɩlɩ nu nyamɩnlɩ mɔɔ bɔfʋlɔ yɩ [Rapithwin] nɩ kowula azɩlɛ yɩ tʋ. Sɛ bedii Nauruz awuwa yɩ a, yɛ Rapithwin isia ɩba a. Meti bedi ɔzɔ awuwa yɩ bɛfa bɛma yɩ akwaaba.”​—United Nations Educational, Scientific and Cultural Organization.

  • Shab-e Yalda. Kɛmɔ Sufism in the Secret History of Persia kile nɩ, bedi awuwa eyi wɔ ɔlʋbɔ yɩ nu wɔ eziyianɩ mɔɔ oyuwa yɩ iávi baaba nɩ “bɛfa bɔsʋ̃mɩ Mithra,” mɔɔ ɩdɩ hanyɩɩ nyamɩnlɩ nɩ wɔ December nu. Bekile sʋ̃ kɛɛ, awuwa eyi ɩ nɩɩ awuwa mɔɔ nɩ Wulomimaa nɩɩ Gilikimaa di fa sʋ̃mɩ oyuwa nyamɩnlɩ nɩ dɩ ɔkʋ̃.b

  • Thanksgiving. Awuwa eyi dɩ kɛɛ Kwanzaa awuwa yɩ la. Mɛyɩ sʋ̃ ɩzʋ̃ ɔwɔkɩmaa bɛ awuwa be mɔɔ nɩ bedi mmɩlɩ mɔ bodua bo nnuwalɩba mɔɔ ili bɔmʋnlɩ nɩ nu. Nɩ bedi ɔzɔ awuwa yɩ bɛfa bɛhyɛ awʋzʋmɩ yɩ animinyiamɩ. Mmɩlɩ kɔ zʋlɔ nɩ, “Kilisinyianɩ nsɔlɩ nsɔlɩ azʋlɔtʋ nɩ leli ɔwɔkɩ amamu eyi dianlɩ nu.”​—A Great and Godly Adventure—The Pilgrims and the Myth of the First Thanksgiving.

  Awuwa anzɛnyɩɩ ɔlʋbɔlilɛ azʋlɔtʋ mɔɔ igyĩ dedi mbʋanlɩ zʋ̃. Bayɩbʋlʋ yɩ kã kɛɛ bɛzabɛ mɔɔ ‘bɔtʋ ɔbʋnlɩ bɛma nyamɩnlɩ mɔɔ ɩma abiye yi ti yɛ bʋwɔ’ nɩ dɩ “mmenii mɔɔ bɔbʋ Gyehova.” (Ayɩzaya 65:11) Meti, Gyehova Dasɩvʋlɔmaa bɛáva bɔ nwʋ bowula awuwa mɔɔ ilili zʋlɔ eyi nu:

  • Ivan Kupala. The A to Z of Belarus buuku nɩ kã kɛɛ, “mmenii sʋ̃maa de di kɛɛ sɛ bedii [Ivan Kupala] awuwa yɩ a, nninyeni azʋlɔtʋ be kɔ zʋlɔ wɔ oyumi mɔɔ sɛ ɔwɔ dedi na sɛ wʋ ti yɛ bʋwɔ a, sa ɔkʋla enyia ɔzɔ tumi nɩ be.” Ahyɛasɩ nɩ, nɩ ɩdɩ awʋzʋmɩzʋ̃mɩnlɛmaa bɛ awuwa be mɔɔ bedi yi wɔ mmɩlɩ mɔ oyuwa yɩ kyina zʋlɔ kyɛ paa wɔ June nu nɩ. Akʋ̃, Encyclopedia of Contemporary Russian Culture hanlɩ kɛɛ, “mmɩlɩ mɔ awʋzʋmɩzʋ̃mɩnlɛmaa ɣa leli Kilisinyianɩ ɔzʋ̃mɩnlɛ dianlɩ numɔ nɩ, nɩ bedi ɔzɔ awuwa yɩ bɛkɩnla awuwa be mɔɔ nɩ Asɔlɩ yɩ di fa kakɛ Dwɔɔnʋ Numavʋlɔ nɩ nwʋ.”

  • Lunar New Year (Chinese New Year anzɛnyɩɩ Korean New Year). “Sɛ itwu mmɩlɩ eyi wɔ ɔlʋbɔ yɩ nu a, dɩyɛ titili mɔɔ mmusunwa, ɔhɔnwʋmmɔ, nɩɩ mmenii sʋ̃maa yɛ lɛ kɛɛ, besiã kɛɛ, áma mmuzulo tʋ bɛ alɔvʋlɔ, bɛkã bo nu azɩ bɛma bɛ awʋzʋmɩ na besiã kɛɛ ɔlʋbɔ baaba ɩdʋ bɛ.” (Mooncakes and Hungry Ghosts—Festivals of China) Ɔzɔ la sʋ̃ yɛ wɔ Korean New Year yi nu nɩ, “bɔsʋ̃mɩ bɛ nlabenyiammɔ mɔɔ bowuwu nɩ, bɛyɛ nninyeni be bɛfa botudu azunzuma evinli ama ɔlʋbɔ baaba ɩadʋ bɛ. Akʋ̃ bɛyɩ [ngongyia] bɛfa bɔnwʋ mɔɔ ikezi wɔ ɔlʋbɔ fʋlɔ yi nu.”​—Encyclopedia of New Year’s Holidays Worldwide.

    

  Ɔlʋbɔlilɛ mɔɔ igyĩ ɛkɛla mɔɔ iáwu kyɩ̃ ehilehilelɛ zʋ. Bayɩbʋlʋ yɩ kã yɩ petee kɛɛ ɛkɛla kʋla wu. (Izikɩyɛlɩ 18:4) Meti Gyehova Dasɩvʋlɔmaa bɛáli awuwa mɔɔ ɩhyɛ ɛkɛla mɔɔ iáwu kyɩ̃ ehilehilelɛ nwʋ ɛzɩzɩbɛ nɩ:

  • All Souls’ Day (Day of the Dead). Kɛmɔ New Catholic Encyclopedia kile nɩ, bɛfa ɔzɔ eɣile eyi “bɛkakɛ nɔhʋanlɛmaa mɔɔ bowuwu nɩ munwala.” Na “ɔzʋmɩ ɔlʋbɔ kɛyɛ 500 Y.M. nu kɔbʋmɩ ɔlʋbɔ kɛyɛ 1500 Y.M. nu nɩ, nɩ mmenii de di kɛɛ sɛ itwu ɔzɔ eɣile yi a, bɛzabɛ mɔɔ bowuwu nɩ bɛ ɛkɛla bɛawula bɛzabɛ mɔɔ bɛda azɩ nɩ bo nu. Na bɛdanɩ bɔ nwʋ ngyɛnɩ, ɔmʋmʋnlɩ, ahɛlɛmɩ nɩɩ nninyeni azʋlɔtʋ be na bɛba bonwunlanwunla bɛzabɛ mɔɔ bɛyɛlɩ tanɩ bediyialɩ bɛ mmɩlɩ mɔ nɩ bɛda azɩ nɩ.”

  • Qingming Festival (Ch’ing Ming) nɩɩ Hungry Ghost Festival. Bedi awuwa anwɩ̃ eyi bɛfa bɛhyɛ nlabenyiammɔ mɔɔ bowu nɩɩ animinyiamɩ. Celebrating Life Customs Around the World​—From Baby Showers to Funerals buuku yi kã kɛɛ, sɛ bedii Ch’ing Ming awuwa yɩ a, “bɛyɩba alɩyɛ, nninyeni mɔɔ bɔnʋ, nɩɩ ozukua ama kɔmɩ anzɛnyɩɩ ohobe iáhunli bɛzabɛ mɔɔ bowuwu nɩ, na bɛáhyinyianlɩ ozukua nwʋ sʋ̃.” Buuku yi zialɩ hanlɩ kɛɛ, “wɔ Hungry Ghost Eziyianɩ yɩ nu nɩ, [bɛzabɛ mɔɔ bedi awuwa yɩ] nɩ de di kɛɛ, nunuma mɔɔ eziyianɩ yɩ kevinde paa nɩ, abusunwawɔlɛ mɔɔ ɩwɔ awuvʋlɔ nɩɩ bɛzabɛ mɔɔ bɛda azɩ nɩ nu yɛ sɩ tɛla nunuma bela. Meti ihyinyia kɛɛ bɛyɛ mɔɔ bɔkɔhʋla bela ama bɛámanlɩ awuvʋlɔ bɛávalɩ ɛya, na bɛhyɛ nlabenyiammɔ mɔɔ bowuwu nɩ animinyiamɩ.”

  • Chuseok. The Korean Tradition of Religion, Society, and Ethics buuku nɩ kã kɛɛ, sɛ bedii ɔzɔ awuwa yɩ a, “bɛfa alɩyɛ nɩɩ nzã bɛma mmenii mɔɔ bowu nɩ.” Mɔɔ bɛyɛ nɩ da yɩ ali kɛɛ, “bede be di kɛɛ ɛkɛla be wɔ enii nu mɔɔ sɛ abiye wu po a, ɔzɔ ɛkɛla yɩ mɛyɩ ɩkɔ zʋlɔ ɩbʋwa nnwʋanlɩ nu.”

  Ɔlʋbɔlilɛ mɔɔ bedi azunzuma ndwokɔ wɔ nu. Bayɩbʋlʋ yɩ kã kɛɛ: Gyehova kyi abiyela mɔɔ ɩyɛ nninyeni eyimmɔ be nɩ, ‘mɔɔ ɩkɔ abisa, abiye mɔɔ ɩyɩ ngongyia, abiye mɔɔ ɩpɩbɛ mɔɔ ikezi wɔ eɣile be nwʋ sɛnkyɩlɛdɩ, mɔɔ ɩkyɩkyɩ mmenii, mɔɔ ɩkɔ ahɔmɩnlɩ anzɛnyɩɩ bɛzabɛ mɔɔ bɛkã eɣile be nwʋ odwokɔ bɛ kɛnɩ.’ (Ditilonɔmi 18:10-12) Mɔɔ ɩkɛyɛ na Gyehova Dasɩvʋlɔmaa bɛahwɩ̃ bɔ nwʋ wɔ azunzuma ndwokɔ nɩɩ ɔhɔnlɔnwa nu hilalɛ (mɔɔ mɛyɩ sʋ̃ ɩdɩ azunzuma ndwokɔ) nwʋ nɩ, bɛáli Halloween anzɛnyɩɩ ɔlʋbɔlilɛ mɔɔ ilili zʋlɔ nɩ:

  • Sinhala nɩɩ Tamil New Year. “Nninyeni mɔɔ bɛyɛ wɔ awuwa eyi tʋ nɩ be yɛ lɛ ahɔnlɔnwa nu mɔɔ bekila ama bɛanwʋ kɛɛ dɩyɛ bela kɔhɔ bʋwɔ.”​—Encyclopedia of Sri Lanka.

  • Songkran. Benyianlɩ awuwa eyi mɔɔ Asia maa di nɩ yi dima “wɔ Sanskrit odwokɔpɔkɔ nu . . . mɔɔ ikile ‘debe mɔɔ ituu agyiakɛ’ anzɛnyɩɩ ‘nzɩnzanlɩyɛ.’ Bɛzabɛ mɔɔ bekila ahɔnlɔnwa nu nɩ kile kɛɛ, ɔhɔnlɔnwa be wɔ kɛnɩ mɔɔ bɔfʋlɔ yɩ Aries, na bɛzabɛ mɔɔ bedi ɔzɔ [awuwa yɩ] de di kɛɛ, itwu mmɩlɩ be a, oyuwa yɩ kɔ ɔzɔ ɔhɔnlɔnwa okuwu yi nu. Meti bedi ɔzɔ awuwa yɩ bɛfa bɛkakɛ ɔzɔ mmɩlɩ yɩ.”​—Food, Feasts, and Faith​—An Encyclopedia of Food Culture in World Religions.

  Awuwa anzɛnyɩɩ ɔlʋbɔlilɛ azʋlɔtʋ mɔɔ Mosisi Mmɛla yɩ hanlɩ nwʋmɔ odwokɔ, mɔɔ Gyisɛsɩ yɩ afɔlɩwɔlɛ yɩ manlɩ ɩɣalɩ awielɩyɛ. Bayɩbʋlʋ yɩ kã kɛɛ: “Kɩlayɩsɩ ɩɣalɩ la yɛ mmɛla nɩ yi tumi ɩɣalɩ awielɩyɛ a.” (Wulomimaa 10:4) Egyinalɛzʋ-ndwokɔ mɔɔ ɩwɔ Mosisi Mmɛla mɔɔ bɛva bɛmanlɩ ɔwɔkɩ Yizilayamaa yi nu nɩ, Kilisinyiamaa nyia zʋlɔ mfasʋ wɔ nnɛ po. Naasʋ̃, bɛáli awuwa azʋlɔtʋ mɔɔ Mosisi Mmɛla yɩ kã nwʋmɔ odwokɔ nɩ, titili mɔɔ ɩfalɩ Mɛzaya yɩ ɛɣalɩyɛ nwʋ nɩ. Iluwakɛɛ Kilisinyiamaa de di kɛɛ Mɛzaya yɩ ɩɣa dada. Bayɩbʋlʋ yɩ kã kɛɛ, “ɩdɩ mɔɔ bɛbaɣa nɩ yi sunzuma, na Kɩlayɩsɩ yɛ ɩdɩ yɩ baaba yɩ a.” (Kolosiyiamaa 2:17) Meti Gyehova Dasɩvʋlɔmaa bɛáli awuwa azʋlɔtʋ mɔɔ ilili zʋlɔ nɩ be, iluwakɛɛ awuwa eyimmɔ dua numɔ, na bɛva nninyeni mɔɔ Bayɩbʋlʋ yɩ tɩndɛ tiyia nɩ bɔvʋla:

  • Hanukkah. Bedi awuwa eyi bɛfa bɛkakɛ Dwuumaa bɛ asɔlɩ pika mɔɔ nɩ ɩwɔ Gyelusalamɩ mɔɔ bezia beyilalɩ zʋlɔ dɔkʋ̃ nɩ. Naasʋ̃, Bayɩbʋlʋ yɩ kã kɛɛ Gyisɛsɩ ɣa yɛlɩ Azɔfʋ Mbanimbani Nu Ebani ‘wɔ ɛdamɛ aliyia [anzɛnyɩɩ, asɔlɩ pika] mɔɔ ɩdɩ kezile na idi munli nu nɩ. Kɛ enii yɛ igyinanlɩ a, yɛɛ ɩáhɩnla oyuwadɩ nninyeni mɔɔ bɔwɔlɩ nɩ nwʋ.’ (Hibulumaa 9:11) Wɔ Kilisinyiamaa bɔ ɔfʋã nu nɩ, bede be di kɛɛ sunzuma ɔfʋã nu asɔlɩ pika nɩ ɩɣa ziyeli asɔlɩ pika mɔɔ nɩ ɩwɔ Gyelusalamɩ nɩ yɩ agyia nu.

  • Rosh Hashanah. Eyi dɩ eɣile mɔɔ ili bɔmʋnlɩ wɔ Dwuumaa bɔ ɔlʋbɔ nu. Wɔ ɔwɔkɩ mmɩlɩ nu nɩ, nɩ bɔbɔ afɔlɩ sʋnʋnkʋ̃ be wɔ ɔzɔ awuwa yɩ tʋ bɛma Nyamɩnlɩ. (Nɔmɛsɩ 29:1-6) Naasʋ̃ Gyisɛsɩ Kɩlayɩsɩ mɔɔ ɩdɩ Mɛzaya nɩ ‘manlɩ beyiakili afɔlɩ nɩɩ akyɛdɩ afɔlɩwɔlɛ nɩ.’ Eyi ti ɔzɔ afɔlɩwɔlɛ yɩ nwʋ iáhyinyia Nyamɩnlɩ dɔkʋ̃.​—Danɩyɛlɩ 9:26, 27.

• Asʋ̃ awuwa nɩ ɩma mmenii mɔɔ bɔwɔ ɔzʋ̃mɩnlɛ azʋlɔtʋ nu mɔɔ ɩsʋnɩ be dedi nɩ bɔ numɔ sʋ̃mɩ a?

  Mɔɔ Bayɩbʋlʋ yɩ kã: “Mɩnla ɔkʋ̃yɛlɛ yɛ dedinii nɩɩ enii mɔɔ ɩ́dɩ dedinii bɛlɛ a? Mɩnla nkitanwʋ yɛ ɩwɔ Nyamɩnlɩ Asɔlɩ Aliyia nɩ, nɩɩ awʋzʋmɩ ɔzʋ̃mɩnlɛ aliyia nɩ bɛ avinli a?”​—2 Kɔlɛntɩmaa 6:15-17.

  Ɩwɔ numɔ kɛɛ Gyehova Dasɩvʋlɔmaa bɔ mmɔdɩnɩ kɛɛ bɛ nɩɩ mmenii kɔwʋwa wɔ azʋ̃nudwolɩyɛ nu na bɛádɩndɛ betiyia abiyela yi dedi dɩyɛ, naasʋ̃ awuwa azʋlɔtʋ mɔɔ ɩma mmenii mɔɔ bɔwɔ ɔzʋ̃mɩnlɛ azʋlɔtʋ nu nɩ bɔ numɔ sʋ̃mɩ dɩkɛɛ mɔɔ ilili ɔzʋlɔ nɩ, bɛáva bɔ nwʋ bowula nu.

  Awuwa mɔɔ bɛfa bɛkakɛ mmenii mɔɔ bele dima wɔ Nyamɩnlɩ ɔzʋ̃mɩnlɛ nu anzɛnyɩɩ mɔɔ ɩma ɔzʋ̃mɩnlɛ azʋlɔtʋ mɔɔ ɩsʋnɩ abiyela yi dedi nɩ kã bɔ nwʋ bɔ numɔ. Wɔ ɔwɔkɩ mmɩlɩ nu mɔɔ Nyamɩnlɩ idii yi mmenii bɛ anyunu ma bɔkɔhɔ azɩlɛ fʋlɔ mɔɔ ɔzʋlɔ mmenii wɔ ɔzʋ̃mɩnlɛ azʋlɔtʋ nu nɩ, ɩhanlɩ ihileli bɛ kɛɛ: ‘Íni kɛɛ bɛ nɩɩ bɛ anzɛnyɩɩ bɛ anyamɩnlɩ nɩ yɛ nhyɩhyɛlɩyɛ bela. Sɛ bɔsʋ̃mɩ bɛ anyamɩnlɩ nɩ be a, ɩkɛyɛ ɛhanɩ ɩkɛma mʋnlʋmmɔ.’ (Ɛkɩsadɔsʋ 23:32, 33) Meti Gyehova Dasɩvʋlɔmaa bɛáli awuwa azʋlɔtʋ be dɩkɛɛ mɔ ilili ɔzʋlɔ nɩ.

  • Loy Krathong. Sɛ bedii Thai awuwa yɩ a, “mmenii fa fɩlawɛsɩ kua kyɩansɩ nu, bɔsʋzɔ ahɩnlanɩyɛ anzɛnyɩɩ ɛyɛlɛ ovuãmɛ bɛkɩnla nwʋ na beyiaki bokua nzulo yɩ anyɩ. Bekile numɔ kɛɛ ɔzɔ kyɩansɩ nɩ fa mmuzulo munwatĩĩ kɔ. Nɔhʋanlɛ odwokɔ yɛ lɛ kɛɛ awuwa nɩ zʋ̃ Buddha ɔzʋ̃mɩnlɛ nu.”​—Encyclopedia of Buddhism.

  • National Repentance Day. Manlɩ ebani be hanlɩ wɔ Papua New Guinea bɛ amanɩyɛwɔlɛ kɛlɛta be mɔɔ bɔfʋlɔ yɩ The National yɩ nu kɛɛ, “bɛzabɛ mɔɔ bedi awuwa eyi be nɩ de Kilisinyiamaa be ehilehilelɛ tiã nu.” Izia ɩhanlɩ kɛɛ, “awuwa eyi bʋwa ma bɛfa Kilisinyiamaa be ehilehilelɛ bɛyɛ egyima.”

  • Vesak. “Buddhamaa bu eɣile mɔɔ bɛfa bedi awuwa eyi kɛɛ ɩdɩ nwanzanwanza paa ɩtɛla eɣile bela. Na bedi awuwa eyi bɛfa bɛkakɛ eɣile mɔɔ bɛva bɔwʋlɩ Buddha, yi owulo, anzɛnyɩɩ mmɩlɩ mɔ ɩhɔlɩ Nirvana nɩ.”​—Holidays, Festivals, and Celebrations of the World Dictionary.

    

  Ɔlʋbɔlilɛ azʋlɔtʋ mɔɔ igyĩ ɔzʋ̃mɩnlɛ nu amamu mɔɔ Bayɩbʋlʋ yɩ tɩndɛ tiyia nɩ zʋ. Gyisɛsɩ hanlɩ hileli Nyamɩnlɩzʋ̃mɩnlɛ mbanimbani nɩ mmɔ kɛɛ: “Boduwa ɔzɔ ɔhʋanɩ yɩ zʋ betiã Nyamɩnlɩ odwokɔ nɩ ahanlɩ ama bɛahʋla bɛalili bɛ amamu zʋ.” Izia sʋ̃ ɩhanlɩ bɔ nwʋ odwokɔ kɛɛ, bɔ ɔzʋ̃mɩnlɛ dɩ mbʋanlɩ “iluwakɛɛ bekilehile nninyeni mɔɔ ɩdɩ enii nhyɩhyɛlɩyɛ kɛɛ gyama ɩdɩ mɩ mmɛla.” (Matiyu 15:​6, 9) Iluwakɛɛ Gyehova Dasɩvʋlɔmaa fa kɔkɔwɔlɛ eyi yɛ egyima ti, ɔzʋ̃mɩnlɛ nu amamu sʋ̃maa wɔ kɛ mɔɔ bɛáva bɔ nwʋ bowula nu.

  • Epiphany (Three Kings’ Day, Timkat, anzɛnyɩɩ Los Reyes Magos). Bedi awuwa eyi bɛfa bɛkakɛ mmɩlɩ mɔ ahɔnlɔnwa nu ehilalɛmaa be bɔhɔ begyelalɩ Gyisɛsɩ nɩɩ mmɩlɩ mɔ bonlumanlɩ Gyisɛsɩ nɩ. Buuku be kile numɔ kɛɛ, bɛva awuwa eyi “beziye awuwa be mɔɔ nɩ awʋzʋmɩzʋ̃mɩnlɛmaa bedi bɛfa bɛhyɛ azudɩnlɩ nɩɩ nzulo nyamɩnlɩ nɩ animinyiamɩ nɩ yɩ agyia nu na bɛyɛ yɩ Kilisinyiamaa bɛ awuwa.” (The Christmas Encyclopedia) Timkat, mɔɔ mɛyɩ sʋ̃ ɩdɩ kɛɛ awuwa eyi la, “zʋ̃ awʋzʋmɩzʋ̃mɩnlɛ nu.”​—Encyclopedia of Society and Culture in the Ancient World.

  • Feast of the Assumption of the Virgin Mary (Awuwa Mɔɔ Bɛfa Bɛkakɛ Mmɩlɩ Mɔ Mɛɛlɩ Mɔɔ Ɩdɩ Baalɛ Amunli Nɩ Hɔlɩ Sʋlɔ). Bɛzabɛ mɔɔ bedi awuwa eyi nɩ de di kɛɛ Gyisɛsɩ yɩ maamɩ valɩ yi eniiwudo yi hɔlɩ sʋlɔ. Religion and Society​—Encyclopedia of Fundamentalism buuku yi kã kɛɛ, “nɩ ɔwɔkɩ Kilisinyiamaa béni ɔzɔ dedi yi yɛɛ Bayɩbʋlʋ yɩ sʋ̃ ɩáhã nwʋmɔ odwokɔ.”

  • Feast of the Immaculate Conception. Buuku be kã kɛɛ “Ehilehilelɛ mɔɔ mɛyɩ yɛ lɛ kɛɛ bɛáɣɩnzɛ [Mɛɛlɩ] wɔ tanɩ nu nɩ, Bayɩbʋlʋ yɩ ɩáhyɛda ɩkã nwʋmɔ odwokɔ . . . Asɔlɩ yɩ yɛ ikilehile [zɔ] a.”​—New Catholic Encyclopedia.

  • Lent. New Catholic Encyclopedia kile numɔ kɛɛ, bɛhɛlɛlɩ Bayɩbʋlʋ yɩ bowieli yɩ mɛda alʋbɔ 200 nɩɩ yɩ mɛda yɛ bɔwɔlɩ yɩ tʋ kɛɛ bedii kɔmɩhyɩlɛ nɩɩ bɔ nwʋ mɔɔ bo nu wɔ bɛ tanɩ nwʋ awuwa yɩ a. Encyclopedia yɩ kã eɣile mɔɔ ili bɔmʋnlɩ mɔɔ belili ɔzɔ awuwa yɩ nwʋ odwokɔ kɛɛ: “Wɔ eɣile mɔɔ bedii Ash Wednesday nɩ, ɔsɔfʋ yɩ fa nzʋnɩ yɛ asɔlɩmaa yɩ bɔ bʋma zʋ fa kakɛ bɛ kɛɛ bonlú bɔ nwʋ. Na Katɩlɩkɩmaa leli eyi dianlɩ nu ɔzʋmɩ ɔlʋbɔ 1091.”

  • Meskel (anzɛnyɩɩ, Maskal). Encyclopedia of Society and Culture in the Medieval World buuku yi kã kɛɛ, bedi Yitiyopiyiamaa bɛ awuwa eyi bɛfa bɛkakɛ “(nɣɛlɛnuwudo mɔɔ bohunli Kɩlayɩsɩ wɔ zʋlɔ nɩ). Sɛ bedii awuwa yɩ a, bɔsɔ sɩnɩ kezile paa na besi ndwomi wɔ nwʋ.” Naasʋ̃ Gyehova Dasɩvʋlɔmaa bɛáva nɣɛlɛnuwudo bedi egyima wɔ bɔ ɔzʋ̃mɩnlɛ nu.

• Asʋ̃ bɛfa awuwa yɩ bɛkamvʋ enii, ahyɩhyɛdɩ anzɛnyɩɩ manlɩ ndwɩyɛlɛ be a?

  Mɔɔ Bayɩbʋlʋ yɩ kã: “Mɔɔ Gyehova ɩhã ɛdɩ: ‘Mmuzulo ɩhã enii mɔɔ ɩfa yɩ nwʋ itiã desanii zʋ, mɔɔ ɩfa yɩ ɛɣɛɛlɛ iwula enii yi tumi nu, na yɩ ahʋnlɩnɩ twɩ̃ yɩ nwʋ wɔ Gyehova nwʋ.’”​—Gyɛlɩmaya 17:5.

  Gyehova Dasɩvʋlɔmaa bu mmenii mvʋlɔ na bɔbɔ mpayɩ bɛma bɛ po naasʋ̃ bɛáli awuwa eyimmɔ be:

  Ɔlʋbɔlilɛ mɔɔ ɩma bɛhyɛ manlɩ ebani anzɛnyɩɩ bulombunli be animinyiamɩ. Bayɩbʋlʋ yɩ ka kɛɛ, “Bɛzabɛ bɔ bʋwɔyɛlɛ ti, áma bɛfa bɔ nwʋ betiã desanii mɔɔ ɩdɩ kɛɛ yɩzayɩ yɩ anwʋkunlu anwʋma nɩ zʋ. Mɩnla ti mɔɔ ɩsɛ kɛɛ obu yɩ nwʋ ngʋnda a?” (Ayɩzaya 2:​22) Eyi ti, kɛ ndianwʋ nɩ, Gyehova Dasɩvʋlɔmaa bɛáli manlɩ ebani anzɛnyɩɩ bulombunli be yɩ awʋbɔɣile.

  Ɔlʋbɔlilɛ mɔɔ ɩma bɛhyɛɛ manlɩ yɩ fɩlagɩ animinyiamɩ. Gyehova Dasɩvʋlɔmaa bɛáli Flag Day awuwa nɩ be. Mɩnla ti a? Iluwakɛɛ Bayɩbʋlʋ yɩ nɩ kã kɛɛ: “Bɔhwɩ̃ bɔ nwʋ wɔ awʋzʋmɩzʋ̃mɩnlɛ nwʋ.” (1 Dwɔɔnʋ 5:​21) Nnɛ, mmenii sʋ̃maa bɛáwu fɩlagɩ kɛɛ ɩdɩ bʋzʋmɩ anzɛnyɩɩ ɔzʋ̃mɩnlɛ nu debe, naasʋ̃ abakɔsɛmɩ ɛhɛlɛvʋlɔ Carlton J. H. Hayes hɛlɛlɩ kɛɛ: “Manlɩ nwʋ ɔlɔlɛ nwʋ sɛnkyɩlɛdɩ mɔɔ bekyina zʋlɔ bɔsʋ̃mɩ yɛ lɛ fɩlagɩ nɩ.”

  Awuwa anzɛnyɩɩ ɔlʋbɔlilɛ mɔɔ bɛfa bɛhyɛ saint be animinyiamɩ. Mmɩlɩ mɔ benyia be mɔɔ yi kunlu tuli Nyamɩnlɩ nwʋ yɛlɩ kɛɛ ɩkʋtʋʋ sʋ̃mavʋlɔ Pita nɩ, mɩnla yɛ ɩhanlɩ a? Bayɩbʋlʋ yɩ kã kɛɛ: “Pita ɩzɔlɩ yi nu ma idwodwuli na izeli yɩ kɛɛ, ‘Twodwu, na mɩzamɩ sʋ̃ mɩdɩ enii kɛɛ wʋzawʋ la.’” (Egyima 10:25, 26) Kɛmɔ Pita anzɛnyɩɩ asʋ̃mavʋlɔ mɔɔ bɛha nɩ nu bela bɛáde betiã nu kɛɛ mmenii zʋ̃mɩ bɛ nɩ, Gyehova Dasɩvʋlɔmaa bɛáli awuwa mɔɔ bɛfa bɛhyɛ bɛzabɛ mɔɔ bobu bɛ kɛɛ bɛdɩ saints animinyiamɩ, dɩkɛɛ mɔɔ ilili zʋlɔ nɩ:

  • All Saints’ Day. “Bedi awuwa eyi bɛfa bɛhyɛ saints maa munwala animinyiamɩ . . . Abiyela ízi dɩka mɔɔ awuwa eyi ɩzʋ̃ ɩɣalɩ.”​—New Catholic Encyclopedia.

  • Fiesta of Our Lady of Guadalupe. Bedi awuwa eyi bɛfa bɛhyɛ “saint mɔɔ ɩwɔ Mexico” mɔɔ mbiyemmɔ de di kɛɛ ɩdɩ Gyisɛsɩ yɩ maamɩ nɩ animinyiamɩ. Bekile kɛɛ ɩyɩlɩ yɩ nwʋ ihileli kuwuavʋlɔ ehyinyianii be wɔ ɔlʋbɔ 1531.​—The Greenwood Encyclopedia of Latino Literature.

    

  • Name Day. Celebrating Life Customs Around the World​—From Baby Showers to Funerals buuku nɩ kã kɛɛ, “Bedi awuwa eyi mmɩlɩ mɔ bonluma kuakula be anzɛnyɩɩ beyila yɩ wɔ asɔlɩ aliyia nu na bɛva saint be yi dima bediã yɩ zʋ nɩ.” Buuku yi zia hanlɩ kɛɛ, sɛ bedii awuwa yɩ a, “bɛyɛ ɔzʋ̃mɩnlɛ nu nninyeni azʋlɔtʋ be.”

  Ɔlʋbɔlilɛ mɔɔ bedi bɛfa bɛkakɛ manlɩyɛlɛ okuwu anzɛnyɩɩ okuwu azʋlɔtʋ be. Bayɩbʋlʋ yɩ kã kɛɛ, “Ɩdɩ baaba kɛɛ ɛkɛva Gyehova kɛyɛ wʋ eɣiandilɛhɔlɛdɩka tɛla kɛɛ ɛkɛva wʋ nwʋ ekediã enii zʋ.” (Ndwomi 118:8, 9) Gyehova Dasɩvʋlɔmaa bɛáli awuwa azʋlɔtʋ be dɩkɛɛ Youth Day anzɛnyɩɩ Women’s Day mɔɔ begyĩ manlɩyɛlɛ anzɛnyɩɩ okuwu be mɛda nɩ, iluwakɛɛ ɩkɛyɛ kɛɛ mɔɔ bɛlɛ bɔ nwʋ betiã enii zʋ ma ikeli oyuwadɩ yi nu ɔhawʋ azʋlɔtʋ nwʋ egyima tɛla kɛɛ bɛkɛva bɔ nwʋ bekediã Gyehova zʋ. Ɔzɔ la sʋ̃ yɛ bɛáva bɔ nwʋ bowula Emancipation Day anzɛnyɩɩ awuwa mɔɔ ɩdɩ zɔ nɩ nu. Mfomi bɛlɛ anwʋlazʋ kɛɛ Nyamɩnlɩ yɩ Bulombunlililɛ yɩ la yɛ ɩkɔhʋla ikeli mmenii nu nkyɩkyɛmi nɩɩ ɔhawʋ azʋlɔtʋ nwʋ egyima a.​—Wulomimaa 2:11; 8:21.

• Asʋ̃ awuwa nɩ ma ɩyɛ kɛɛ mɔɔ manlɩ be anzɛnyɩɩ abusunwa okuwu be bɔ nwʋ hyinyia tɛla mvʋlɔ a?

  Mɔɔ Bayɩbʋlʋ yɩ kã: “Nyamɩnlɩ ɩába mmenii nu. Nyamɩnlɩ ide abiyela mɔɔ ɩyɛ yɩ nɩ na ide pɛlɩpɛlɩ itiã nu, mɔɔ iáhila dɩka mɔɔ ɩzʋ̃ nɩ a.”​—Egyima 10:34, 35.

  Gyehova Dasɩvʋlɔmaa sʋ̃maa bɛ anyɩ deli manlɩ mɔɔ bɔwɔ numɔ nɩ nwʋ, naasʋ̃ bɛáva bɔ nwʋ bowula ɔlʋbɔlilɛ anzɛnyɩɩ awuwa azʋlɔtʋ mɔɔ ikile kɛɛ manlɩ anzɛnyɩɩ abusunwa okuwu be nwʋ hyinyia tɛla biye nɩ nu.

  Egyimalilɛ azʋlɔtʋ mɔɔ bɛfa bɛhyɛ azogyiamaa animinyiamɩ. Kɛ ankɩ Gyisɛsɩ kɛhyɛ kʋnɛ nwʋ ɛzɩzɩbɛ nɩ, ɩhanlɩ ihileli yɩ mɛdalilɛmaa kɛɛ: “Bɔlɔ́ bɛ adamvʋlɔ, na mʋnlʋmmɔ bɔwɔ́ mpayɩ bɛma mmenii mɔɔ bɛyɛ mʋnlʋmmɔ atɩɩtɩɩ nɩ.” (Matiyu 5:​44) Meti Gyehova Dasɩvʋlɔmaa bɛáva bɔ nwʋ bowula awuwa azʋlɔtʋ mɔɔ bɛfa bɛhyɛ azogyiamaa animinyiamɩ nɩ nu. Dɩkɛɛ mɔɔ ili zʋlɔ nɩ:

  • Anzac Day. “Anzac gyĩ kɛnɩ ma Australian and New Zealand Army Corps,” na “sikalɛ yɩ, Anzac Day ɩɣa ɩyɛ eɣile mɔɔ bɛfa bɛkakɛ mmenii mɔɔ bohunhunli bɛ wɔ kʋnɛ nu nɩ.”​—Historical Dictionary of Australia.

  • Veterans Day (Remembrance Day, Remembrance Sunday, anzɛnyɩɩ Memorial Day). Bɛfa awuwa eyi bɛkakɛ “azogyiamaa mɔɔ bɔhɔ pɛnhyɩnɩ nɩɩ bɛzabɛ mɔɔ bohunhunli bɛ wɔ kʋnɛ nu nɩ.”​—Encyclopædia Britannica.

  Ɔlʋbɔlilɛ mɔɔ ɩfalɩ manlɩ be yɩ abakɔsɛmɩ anzɛnyɩɩ bɛ fanwʋdi nwʋ. Gyisɛsɩ hanlɩ yɩ mɛdalilɛmaa nwʋ odwokɔ kɛɛ: “Bɛ́dɩ oyuwadɩ yɩ ɔfʋã, kɛmɔ mɩ́dɩ oyuwadɩ yɩ fʋã nɩ.” (Dwɔɔnʋ 17:16) Gyehova Dasɩvʋlɔmaa bɛ anyɩ deli nwʋmɔ kɛɛ bokozuma bɛ manlɩ nwʋ abakɔsɛmɩ, naasʋ̃ bɛáva bɔ nwʋ bowula awuwa anzɛnyɩɩ ɔlʋbɔlilɛ eyimmɔ nu:

  • Australia Day. Worldmark Encyclopedia of Cultures and Daily Life buuku nɩ kã kɛɛ, bedi awuwa eyi bɛfa bɛkakɛ “eɣile mɔɔ England azogyiamaa bigyialɩ bɛ fɩlagɩ sʋlɔ na bɛhanlɩ kɛɛ Australia maa bɛɣa bɛhɩnla manlɩ mɔɔ bowula bɔ tʋ yɩ nwʋ wɔ 1788 nɩ.”

  • Guy Fawkes Day. “Manlɩ yɩ nɩ di awuwa eyi fa kakɛ mmɩlɩ mɔ Guy Fawkes nɩɩ Katɩlɩkɩmaa bɛ mɛdalilɛmaa be mɔɔ bɔwɔlɩ mmɔdɩnɩ kɛɛ, bokũũ King James I nɩɩ Mmɛlahyɛlɛmaa be mɔɔ bɔwɔ [England] wɔ 1605.”​—A Dictionary of English Folklore.

  • Independence Day. Wɔ manlɩ azʋlɔtʋ zʋ nɩ, “bɛfa eɣile eyi bɛkakɛ mmɩlɩ mɔ manlɩ yɩ nyianlɩ fanwʋdi nɩ.”​—Merriam-Webster’s Unabridged Dictionary.

• Asʋ̃ nyɛlɩyɛ azʋlɔtʋ be mɔɔ ɩávata kɔlɩ zʋlɔ wɔ ɔlʋbɔlilɛ anzɛnyɩɩ awuwa yɩ tʋ a?

  Mɔɔ Bayɩbʋlʋ yɩ kã: “Mmɩlɩ mɔ ɩzɩ̃ ɩhɔ nɩ, mʋnlʋmmɔ bɛzɩkɛlɩ mmɩlɩ sʋ̃maa bɛyɛlɩ nninyeni mɔɔ mmenii mɔɔ bézi Nyamɩnlɩ nɩ bɛyɛ nɩ la. Mʋnlʋmmɔ bɔwɔlɩ ɛbɩla mbʋanlɩ mbʋanlɩ mɔɔ bɛdɩdɩ kɛɛ, atinuzɩzɩbɛyɛlɛ, nnwʋnlamɩ akɔnɔ mɛdalilɛ, nzanyianlɛ, nzanlʋnlɛ, ɔbʋnlɩdʋlɛ mbʋanlɩ mbʋanlɩ nɩɩ awʋzʋmɩzʋ̃mɩnlɛ mɔɔ Nyamɩnlɩ ɩábɛ yɩ nɩ.”​—1 Pita 4:3.

  Iluwa egyinalɛzʋ-odwokɔ eyi ti, Gyehova Dasɩvʋlɔmaa bɛáva bɔ nwʋ bowula awuwa anzɛnyɩɩ ɔlʋbɔlilɛ azʋlɔtʋ mɔɔ bɔnʋ nzã sʋ̃maa anzɛnyɩɩ bɛyɛ nninyeni basabasa wɔ yɩ tʋ nɩ nu. Gyehova Dasɩvʋlɔmaa bɛ nɩɩ bɔ ɔhɔnwʋmmɔ bɔ numɔ de bɛ anyɩ, na sɛ besi pɔkɔ kɛɛ bɔkɔnlʋ nzã mɔɔ inyia sʋ̃ a, bɔnʋ ɛgyɩkɩ̃ɩ̃ bela. Bɔbɔɔ mmɔdɩnɩ kɛɛ bɛkɛva Bayɩbʋlʋ yɩ fʋlɔdulɛ eyi bɛkɛyɛ egyima: “Dɩyɛ bela mɔɔ mʋnlʋmmɔ bɛyɛɛ nɩ, sɛ alɩyɛ yɛ mʋnlʋmmɔ bedi o, sɛ nzulo yɛ mʋnlʋmmɔ bɔnʋ o, mʋnlʋmmɔ bɛyɛ́ bɛhyɛ Nyamɩnlɩ animinyiamɩ.”​—1 Kɔlɛntɩmaa 10:31.

  Eyi ti Gyehova Dasɩvʋlɔmaa bɛáva bɔ nwʋ bowula awuwa azʋlɔtʋ mɔɔ bɛyɛ nyɛlɩyɛ azʋlɔtʋ mɔɔ Bayɩbʋlʋ yɩ tɩndɛ tiyia wɔ yɩ tʋ nɩ nu. Eyimmɔ be yɛ lɛ Dwuumaa bɛ awuwa mɔɔ bɔfʋlɔ yɩ Purim nɩ. Essential Judaism buuku nɩ kã kɛɛ: “Ɩwɔ numɔ kɛɛ nɩ Dwuumaa di Purim awuwa fa kakɛ mmɩlɩ mɔ beleli bɔ nwʋ wɔ alɔngɔzʋ̃mɩnlɛ nu bɛ wɔ ɔlʋbɔ kɛyɛ 401 babʋmɩ ɔlʋbɔ 500 A.Y.M. nu dɩyɛ, naasʋ̃ sikalɛyɩ mɛyɩ ɩɣa ɩyɛ kɛɛ “Dwuumaa bɛ awuwa mɔɔ bɔfʋla Mardi Gras anzɛnyɩɩ Carnival yɩ la.” Buuku yi zia hanlɩ kɛɛ sɛ bedii ɔzɔ awuwa yɩ a, “bowulawula ntalɩ azʋlɔtʋ be (mbɔmɩ sʋ̃maa nɩ, mmenyia wula mmaalɛ ntalɩ), bɛyɛ bɛ dɩyɛ basabasa, bɔnʋ nzã sʋ̃maa na betinyiadinyia numɔ sʋ̃maa.”

Gyehova Dasɩvʋlɔmaa mɔɔ bɛáva bɔ nwʋ bowula ɔlʋbɔlilɛ be nu nɩ, asʋ̃ bɛ nɩɩ bo mmusunwamaa avinli dɩ baaba a?

Nyɛ. Bayɩbʋlʋ yɩ kilehile kɛɛ yɛlʋlɔ́ ye mmusunwamaa munwala na yɛva annidi yɛma bɛ ɩávalɩ nwʋ kɛɛ ɩsʋnɩ be dedi nɩ. (1 Pita 3:1, 2, 7) Nɔhʋanlɛ odwokɔ yɛ lɛ kɛɛ sɛ Gyehova Dasɩvʋlɔ be yiaki kɛɛ ikeli awuwa be a, ɩyɛ a, yi mmusunwamaa be fa yɩ nwʋ ɛya, bɛtanɩ yɩ anzɛnyɩɩ bɔpʋ yɩ po. Meti, Gyehova Dasɩvʋlɔmaa sʋ̃maa bɛma bo mmusunwamaa nwʋ yɩ kɛɛ bɔdɔ bɛ, na boduwa anyɩnlɩdɩlɛ ɔhʋanɩ zʋ bekilehile bɔ pɔkɔzilɛ yɩ nu bekile bɛ. Na ɩyɛ sʋ̃ a, bɔkɔ bekyela bɛ wɔ mmɩlɩ azʋlɔtʋ be nu.

Asʋ̃ Gyehova Dasɩvʋlɔmaa hyɛ mmenii mvʋlɔ kɛɛ áma bedi ɔlʋbɔ anzɛnyɩɩ awuwa azʋlɔtʋ be a?

Anhã. Bɔnwʋ yɩ kɛɛ abiyela wɔ nwʋmɔ ɔhʋanɩ kɛɛ isi yɩzayɩ yɩ pɔkɔ. (Dwohyuwa 24:15) Gyehova Dasɩvʋlɔmaa ‘bɛfa annidi bɛma mmenii munwala’ ɩávalɩ nwʋ ɔzʋ̃mɩnlɛ mɔɔ bɔwɔ numɔ nɩ.​—1 Pita 2:17.