Ɛbɩlawɔlɛ Nɩɩ Dasɩlɛlilɛ Dɩyɛzumanlɛ Kɛlɛta Nwʋ Awuuku Nu Ɛbɩbɛlɛ
JANUARY 3-9
BAYƖBƲLƲ NU ANWƲNYIA | NDƐNƖWUWALƐMAA 15-16
“Ɩdɩ Atinuzɩzɩbɛ Kɛɛ Ɛkɛyɩ Abiye Ɛkɛma!”
w12 4/15 8 ¶4
Mmenii Mɔɔ Bɛkɛyɩ Bɔ Nwʋ Bɛkɛma—Ɩdɩ Awielɩyɛ Yɩ Nwʋ Sɛnkyɩlɛdɩ!
Mɔ ili bɔmʋnlɩ nɩ, bɛmá yezunzu nnahɩlɩbɛvʋlɔ Dɩlayɩla mɔɔ nɩ ɩdɩ ndɛnɩwuwualɛvʋlɔ Samɩsɩnɩ yɩ dɔvʋlɔ nɩ nwʋ. Nɩ Samɩsɩnɩ ɩpɛ kɛɛ idi Nyamɩnlɩ yi mmenii bɛ anyunu ɩ nɩɩ Fɩlɩsɩtiyiamaa nɩ bɔkɔ bɔkʋ̃. Ɩkɛyɛ kɛɛ Fɩlɩsɩtiyiamaa bɛ awulombunli anlu yi bɛɣa bɔnwʋnlɩ kɛɛ nɩ Dɩlayɩla ɩálɔ Samɩsɩnɩ, meti bɛvalɩ ozukua kezile bɛmanlɩ yɩ kɛɛ ɩbɩbɛ sianti mɔɔ Samɩsɩnɩ yɩ nwʋ ɩyɛ sɩ nɩ, na ama bɛahʋla bɛahũ yi. Dɩlayɩla mɔɔ nɩ yɩ anyɩ ɩbʋlʋ dɩyɛ nɩ ileli idianlɩ numɔ, na ɩwɔlɩ mmɔdɩnɩ mbɔmɩ asã kɛɛ ɩkɔnwʋ Samɩsɩnɩ yɩ ɛɣɩntanlɛ odwokɔ, naasʋ̃ ɩáyɛ bʋwɔ. Baalɛ yɩ “ɩhɔlɩ ɔzʋlɔ ɩvalɩ odwokɔ nɩ ilileli yi eɣile bela na ɩhyɛlɩ yɩ.” Akʋ̃ nɩ Samɩsɩnɩ “ɩvɛ na inyianlɩ a, ankɩ iwu.” Meti ɩhanlɩ ihileli yi kɛɛ ɩlɛ́tɩdɩlɩ yi ti eɣinli kyɩ̃, na sɛ ɩtɩdɩ a, yɩ anwʋzɩzɩbɛ ɩkɛzã. Mmɩlɩ mɔ Dɩlayɩla ɩɣa ɩnwʋnlɩ eyi nɩ, ɩlɩlalɩ Samɩsɩnɩ wɔ yɩ nzɔlɔ zʋ, na ɩvʋlɔlɩ abiye ma ɩɣa ɩdɩdɩlɩ Samɩsɩnɩ yi eɣinli nɩ. Akʋ̃ ɩvalɩ yɩ ɩmanlɩ yɩ adamvʋlɔ ma bɛyɛlɩ mɔɔ bɛpɛ yɩ. (Ndɛ. 16:4, 5, 15-21) Mɔɔ Dɩlayɩla ɩyɛlɩ nɩ, ɩdɩ atinuzɩzɩbɛ odwokɔ paa. Kila kɛɛ Samɩsɩnɩ yɩ ahʋnlɩnɩ ɩla Dɩlayɩla nwʋ naasʋ̃ ozukua anyɩnlɩbʋlʋ ti ɩyɩ yɩ ɩma!
w05 1/15 27 ¶5
Ndɛnɩwuwalɛmaa Buuku Yi Nu Ndwokɔ Aditili
14:16, 17; 16:16. Ozunɛ mɔɔ bosũ bokua abiye zʋ nɩɩ elilelɛ mɔɔ bedide abiye bɛfa bɛpɩbɛ dɩyɛ be nɩ, ɩkɔhʋla ɩkɛzɩkɛ abusunwawɔlɛ mɔɔ ɩla bɛ avinli nɩ.—Ɛɣɛ. 19:13; 21:19.
w12 4/15 11-12 ¶15-16
Mmenii Mɔɔ Bɛkɛyɩ Bɔ Nwʋ Bɛkɛma—Ɩdɩ Awielɩyɛ Yɩ Nwʋ Sɛnkyɩlɛdɩ!
Mɩnla yɛ agyiahʋnlɩmaa kɛyɛ na bɛahʋla bɛali bɔ nwʋ nɔhʋanlɛ mmɩlɩ munwala? Nyamɩnlɩ yɩ Odwokɔ ɩkã kɛɛ: “Ɛ nɩɩ wʋ yɩ [anzɛnyɩɩ wʋ hũ] mɔɔ egyialɩ yɩ wʋ mmɩlantɩyɛ mmɩlɩ nu nɩ bɛ anyɩ ilé” na, “Ɛ nɩɩ wʋ yɩ [anzɛnyɩɩ wʋ hũ] mɔɔ ɔdɔ yɩ nɩ bɛ anyɩ ilé.” (Ɛɣɛ. 5:18; Odw. 9:9) Mmɩlɩ mɔ agyiahʋnlɩmaa yɩ bɛzabɛ anwɩ̃ munwala benyii nɩ, ɩsɛ kɛɛ abiyela ɩyɛ mɔɔ ɩkɔhʋla ma agyiahʋlɩ nɩ ɩsɔ. Na bɛyɛ dɩyɛ bela bɛfa bekile kɛɛ bɔdɔ bɔ nwʋ. Eyi ikile kɛɛ agyiahʋnlɩmaa nɩ bo nu bela ɩkɛyɛ azʋnlɩ ɩkɛma yɩ ɔhɔnwʋ, bo nu bela ikenyia mmɩlɩ ɩkɛma yɩ ɔhɔnwʋ, na abiyela iaɣike yɩ ɔhɔnwʋ. Ɩsɛ kɛɛ beminyia bɔ nwʋ ma agyiahʋnlɩ nɩ ikyina na bɛ nɩɩ Gyehova sʋ̃ avinli abusunwawɔlɛ ɩyɛ baaba. Sɛ agyiahʋnlɩmaa bɔkɔhʋla bɛkɛyɛ eyi a, ihyinyia kɛɛ bɔbɔ numɔ bosuma Bayɩbʋlʋ, bɔbɔ numɔ bɛyɛ dasɩlɛlilɛ egyima yɩ, na bɔbɔ numɔ bɔbɔ mpayɩ bɛpɩbɛ Gyehova yi nyilalɛ.
KƆ́ ƆZƲLƆ DI GYEHOVA NƆHƲANLƐ
Sɛ asafʋ yi nu maa bo nu be yɛ tanɩ mɔɔ numɔ ɩyɛ ɔlʋmɔ a, ‘botwi bɛ anyunu baaba ama be dedi ianyi.’ (Tay. 1:13) Abiyemmɔ wɔ ɛkɛnɩ mɔɔ bo subanɩ ti ɩma botu bɛ wɔ asafʋ yi nu. “Bɛzabɛ mɔɔ bɔkɔzɔ bɛ ɛdɩnyɩanlɛ nu na bekele bekediã nu nɩ,” bɔkʋla bekyina bɛ agyia zʋ ebiyekʋ̃ wɔ Nyamɩnlɩ yɩ ɔzʋ̃mɩnlɛ nu. (Hib. 12:11) Sɛ bodu ye busunwanii anzɛnyɩɩ yɛ ɔhɔnwʋ mɔɔ yɛpɛ yɩ odwokɔ pa sʋ̃ ɛ? Sɛ ɩba yɩ ɔzɔ a, Nyamɩnlɩ mɔɔ yekeli yɩ nɔhʋanlɛ nɩ yɛ ihyinyia a, na kɛ enii mɔɔ bodu yi nɩ a. Gyehova ɩhyɛ yɛ kɛɛ, máma yɛ nɩɩ abiyela mɔɔ bodu yi nɩ bɔ. Sɛ yetiye yɩ o, sɛ yeátiye o, yɩ anyɩ dua yɛ.—Kɩnga 1 Kɔlɛntɩmaa 5:11-13.
Pɩbɛlɩ Bayɩbʋlʋ Yi Nu
w05 3/15 27 ¶6
Samɩsɩnɩ Ilili Nkunimi Iluwa Gyehova Yɩ Anwʋzɩzɩbɛ Zʋ!
Samɩsɩnɩ ɩvalɩ yɩ adwɩnɩ iziyeli yɩ bʋtayɩ mɔɔ mɛyɩ yɛ lɛ kɛɛ ɩkɔhʋ̃ ikediyia Fɩlɩsɩtiyiamaa nɩ zʋ. Yɩ bʋtayɩ mɔɔ mɛyɩ yɛ lɛ kɛɛ ɩkɔhʋ̃ ikediyia Nyamɩnlɩ yɩ adamvʋlɔ nɩ ɩmanlɩ ɩhɔlɩ tuutuunii be yɩ awudo wɔ Geeza. Nɩ Samɩsɩnɩ ihyinyia dɩka mɔɔ ɩkɔzʋkɔ ɔzɔ nunuma yɩ wɔ yɩ adamvʋlɔ bo twonwa zʋ. Na nɩ dɩka mɔɔ ikenyia ɩkɔzʋkɔ yɛ lɛ tuutuunii nɩ yɩ awudo. Naasʋ̃ nɩ ɛbɩlazɩkɛlɛ nwʋ adwɩnɩ bela íni Samɩsɩnɩ yi ti nu. Ohunluma dasuwonu yɛ ɩzʋ̃ baalɛ nɩ yɩ awudo ɛkɛnɩ ɩyɩlɩ yɩ nwʋ a, na iduduli twonwa yɩ ayɩnkɛ nɩɩ yi filemi anwɩ̃ munwala na ɩzʋwalɩ wɔ yɩ apadi zʋ ɩhɔlɩ file mɔɔ ibike Hibʋlɔnʋ yi ti sʋlɔ, kɛyɛ mayɛlɩ 37 [kilomita 60]. Nɩ Nyamɩnlɩ ide itiã numɔ na ɩmanlɩ anwʋzɩzɩbɛ yɩ ma ɩvalɩ ɩyɛlɩ eyi.—Ndɛ. 16:1-3.
JANUARY 10-16
BAYƖBƲLƲ NU ANWƲNYIA | NDƐNƖWUWALƐMAA 17-19
“Sɛ Yɛpʋ́ Nyamɩnlɩ Yɩ Mmɛla a, Ɩfa Ndwokɔ Ɛzɩzɩbɛ Ɩba”
it-2 390-391
Mayɩka
1. Ɩzʋ̃ Efilemi abusunwa okuwu nu. Iwuli Mmɛla Bunlu nɩ mɔɔ ɩtɔ ɔzʋlɔ awɔtwɛ nɩ zʋ (Ɛkɩ. 20:15) mmɩlɩ mɔ iwuwalɩ yɩ maamɩ yɩ dwɛtɛ fuvulo 1,100 nɩ. Mmɩlɩ mɔ ɩhanlɩ nɔhʋanlɛ yɩ na izia ɩvalɩ ozukua nɩ ɩɣalɩ nɩ, yɩ maamɩ ɩhanlɩ kɛɛ: “Ɔhʋanɩ bela zʋ, sa mɩtɩ dwɛtɛ fuvulo mɔɔ ɩwɔ mɩ sa nu nɩ nwʋ mɩma Gyehova, na mɩ ɣa yɩ ɩava ɩayɛ aboduwaba mɔɔ bezeni nɩɩ bulalɛ aboduwaba. Meti kakɩ misia mɩkɛva mɩkɛma wʋ.” Meti baalɛ nɩ ɩyɩlɩ dwɛtɛ fuvulo nɩ numɔ 200 ɩmanlɩ abiye mɔɔ ɩyɛ dwɛtɛ fuvulo nwʋ egyima na ɩva ɩyɛlɩ “aboduwaba mɔɔ bezeni nɩɩ bulalɛ aboduwaba” na bɛva bɔhɔ beziyeziyeli Mayɩka yɩ awudo. Nɩ Mayɩka wɔ “pika be mɔɔ anyamɩnlɩ wɔ numɔ,” na ɩyɛlɩ ɛfɔdʋ nɩɩ tɛlafɩmɩ mmoduwaba na ɩmanlɩ yɩ ɣa ɔkʋ̃ ɩyɛlɩ ɔsɔfʋ ɩmanlɩ yɩ. Nɩ yɩ adwɩnɩ yɛ lɛ kɛɛ ɩlɛ ɩhyɛ Gyehova animinyiamɩ, naasʋ̃ nɩ ɩdɩ tanɩ kʋlaa, iluwakɛɛ nɩ itiyia mmɛla mɔɔ ɩfalɩ awʋzʋmɩ ɔzʋ̃mɩnlɛ nwʋ nɩ (Ɛkɩ. 20:4-6) na iádidili nhyɩhyɛlɩyɛ sʋ̃ mɔɔ Gyehova ɩyɛ mɔɔ bɛfa bɔsʋ̃mɩ yɩ nɩ zʋ. (Ndɛ. 17:1-6; Dit. 12:1-14) Aɣinzi yi, Mayɩka ɩvalɩ Dwonatanɩ mɔɔ ɩdɩ Levinii na ɩdɩ Mosisi yɩ ɣa Gɛhyɔnʋ yɩ tʋnii ɩɣalɩ yɩ awudo kɛɛ ɩɣa ɩyɛ ɔsɔfʋ ɩma yɩ na iduwa kakɛ yɩ. (Ndɛ. 18:4, 30) Mayɩka ilili mfʋmɩ izunzunli kɛɛ mɔɔ ɩyɛɛ yɩ ɩdɩ yɩ ɔhʋanɩ zʋ, meti ɩhanlɩ kɛɛ: “Kakɩ mizi kɛɛ Gyehova ɩ nɩɩ mɩ ikeli yi bʋwɔ.” (Ndɛ. 17:7-13) Naasʋ̃ nɩ Dwonatanɩ ɩ́dɩ Elɔnʋ yɩ tʋnii, meti nɩ ɩávata po kɛɛ ikeli ɔsɔfʋ, eyi ɩmanlɩ Mayɩka yɩ odwokɔ yɩ ɩzɩkɛlɩ kʋlaa.—Nɔ. 3:10.
it-2 391 ¶2
Mayɩka
Mmɩlɩ ɛgyɩkɩ̃ɩ̃ be mɛda nɩ, Mayɩka nɩɩ yɩ ɔlɔmɩ nɩ bɔdʋwalɩ Daanɩmaa na bɔhɔ bɔdʋlɩ bɛ. Mmɩlɩ mɔ beɣizialɩ Mayɩka yɩ amanɩyɛ nɩ, ɩhanlɩ kɛɛ: “Bɛva mɩ anyamɩnlɩ mɔɔ mɩyɛlɩ nɩ na bɛva ɔsɔfʋ yɩ sʋ̃ bɔhɔ. Bɛva mɩ dɩyɛ bela.” Na Daanɩmaa bɛhanlɩ kɛɛ sɛ Mayɩka ɩkɔ zʋ ɩtʋwa bɛ na ɩtɩnyɩa dɩnyɩa nu ikua bɔ zʋ a, sa bɛyɛ dɩyɛ yɩ. Meti mmɩlɩ mɔ Mayɩka ɩnwʋnlɩ kɛɛ Daanɩmaa bɔ nwʋ ɩyɛ sɩ ɩtɛla yɩ ɔlɔmɩ yɩ nɩ, izialɩ yɩ mɛda ɩhɔlɩ awudo. (Ndɛ. 18:22-26) Mɛyɩ mɛda nɩ, Daanɩmaa bohunhunli Leyihyɩmaa na bɛyɩbalɩ twonwa nɩ, na bezia bɛyɩkyɩlɩ twonwa nɩ na bɔvʋlɔlɩ yɩ Daanɩ. Dwonatanɩ nɩɩ yɩ mma mmenyia yɩ bɛɣa bɛyɛlɩ Daanɩmaa bɛ azɔfʋ, na “bɛvalɩ aboduwaba mɔɔ Mayɩka izeninli nɩ beziyeli ɛkɛnɩ, na ɩhɔlɩ zʋ ɩwʋwalɩ ɛkɛnɩ eɣile munwatĩĩ mɔɔ nɩ nɔhʋanlɛ Nyamɩnlɩ yi pika [ɛdamɛ aliyia] nɩ ɩla nwʋ la ɩwɔ Hyayɩlo nɩ.”—Ndɛ. 18:27-31.
Pɩbɛlɩ Bayɩbʋlʋ Yi Nu
w15 12/15 10 ¶6
Bayɩbʋlʋ Mɔɔ Ɩtʋhilelɛ Nu Ɩla Ɛkɛnɩ
Nnɛ, yenyia dasɩlɛ sʋ̃maa mɔɔ yɛkʋla yekyina ɔzʋlɔ yɛfa dima Gyehova yedi egyima wɔ Bayɩbʋlʋ yi nu. New World Translation Bayɩbʋlʋ mɔɔ bɛyɛlɩ wɔ 2013 nu nɩ, Nyamɩnlɩ yi dima ivindenli numɔ mbɔmɩ 7,216. Eyi kile kɛɛ, ɩbʋlɩ mɔɔ bɛyɛlɩ wɔ 1984 yɩ zʋ 6. Bɔnwʋnlɩ numɔ anlu wɔ 1 Sa. 2:25; 6:3; 10:26; 23:14, 16. Mɔɔ ɩmanlɩ bɛvalɩ anlu eyi bɛhɩnlanlɩ nwʋmɔ yɛ lɛ kɛɛ, bɔnwʋnlɩ Nyamɩnlɩ yi dima wɔ Ngyemvile Mɔɔ Iwu Yɩ Ɔnwʋma Mɔɔ Bɛyɩnya fʋlɔ mɔɔ bɔnwʋ yɩ aɣile asã yɩ la nɩ yɩ ɔfʋã be. Ɔzɔ Ɔnwʋma eyi ɩhyɛ ɩdɛla Hibulu Masɔlɛtɩmaa bɛ ɛhɛlɛlɛ nɩ alʋbɔ 1,000 nɩ yɩ mɛda. Mɔɔ ɩtɔ ɔzʋlɔ ahyiã nɩ wɔ Ndɛ. 19:18. Bɛva bɛhɩnlanlɩ nwʋmɔ iluwakɛɛ bɛyɛlɩ ɛbɩbɛlɛnu bɔnwʋnlɩ kɛɛ, nɩ ɩwɔ ɔwɔkɩ Bayɩbʋlʋ salɛti ɛhɛlɛlɛ yɩzayɩ nu.
JANUARY 17-23
BAYƖBƲLƲ NU ANWƲNYIA | NDƐNƖWUWALƐMAA 20-21
“Kɔ́ Ɔzʋlɔ Pɩbɛ́ Gyehova Yɩ Ɔhʋanɩhilelɛ”
w11 9/15 32 ¶2
Ɔkɔhʋla Ɛkɛyɛ Kɛ Fɩnɩhasɩ Mmɩlɩ Mɔ Eyiyiaa Ndwokɔ Ɛzɩzɩbɛ Nɩ a?
Mmɩlɩ mɔ Gɩbɩya mmenyia mɔɔ bɔzʋ̃ Bɛngyamanɩ abusunwa okuwu nu bɔdʋlɩ Levinii be yɩ nwɩnwɩ mmɔna ɛyɛkɛ ɛyɛkɛ zʋ ma iwuli nɩ, mmusunwa okuwu mɔɔ bɛha nɩ bodwodwuli bɔhɔlɩ Bɛngyamanɩmaa bɔzʋ kɛɛ bɛ nɩɩ bɛ kɔhʋ̃. (Ndɛ. 20:1-11) Bɔwɔlɩ mpayɩ bɛbɩbɛlɩ Gyehova yɩ mmʋwalɩyɛ ansaana bɛbahɔ kʋnɛ yɩ, naasʋ̃ belili nkugu mbɔmɩ anwɩ̃ na be mmenii sʋ̃maa sʋ̃ bowuwuli. (Ndɛ. 20:14-25) Asʋ̃ nɩ bɛ adwɩnɩ ɩkɛyɛ bɛ kɛɛ iátiye mpayɩ mɔɔ bɔwɔlɩ nɩ a? Asʋ̃ nɩ Gyehova yɩ anyɩ iáleli nwʋmɔ kɛɛ ɩkɔnwʋ bɛ kɛɛ bɛyɛɛ tanɩ mɔɔ izili nɩ nwʋ dɩyɛ be a?
w11 9/15 32 ¶4
Ɔkɔhʋla Ɛkɛyɛ Kɛ Fɩnɩhasɩ Mmɩlɩ Mɔ Eyiyiaa Ndwokɔ Ɛzɩzɩbɛ Nɩ a?
Mɩnla yɛ yɛkɔhʋla yekozuma wɔ odwokɔ eyi nu a? Ɩávalɩ nwʋmɔ kɛɛ mbanimbani yi bɔkɔwɔ mmɔdɩnɩ bekeli odwokɔ ɛzɩzɩbɛ be mɔɔ ɩwɔ asafʋ yi nu nwʋ egyima na bɛawɔ mpayɩ bɛabɩbɛ Nyamɩnlɩ yɩ mmʋwalɩyɛ dɩyɛ, naasʋ̃ ebiye a odwokɔ ɛzɩzɩbɛ nɩ yɩ tʋ ilótua. Sɛ ɩba yɩ ɔzɔ a, ɩsɛ kɛɛ mbanimbani nɩ bɛkakɛ Gyisɛsɩ yɩ odwokɔ eyi: “Mʋnlʋmmɔ beɣiziá, na bɛkɛva bɛkɛma mʋnlʋmmɔ; mʋnlʋmmɔ bɛbɛ́ yɩ, na mʋnlʋmmɔ bɔkɔnwʋ yɩ, mʋnlʋmmɔ bɔwɔ́ numɔ, na bokowuko bɛkɛma mʋnlʋmmɔ.” (Lk. 11:9) Sɛ ɩba yɩ kɛɛ bɛzabɛ mɔɔ bedi nninyeni anyunu nɩ, bɛányia mpayɩ mɔɔ bɔbɔ nɩ nwʋ munwalɩyɛ ndɛndɛ a, bɔkɔhʋla bekenyia anwʋlazʋ kɛɛ Gyehova ikowuwa bɛ mpayɩwɔlɛ wɔ yɩzayɩ yɩ mmɩlɩ nu.
Pɩbɛlɩ Bayɩbʋlʋ Yi Nu
w14 5/1 11 ¶4-6
Asʋ̃ Ezi a?
Wɔ ɔwɔkɩ nɩ, kɛ nɩ bɛfa taayɩ mɔɔ bɔtʋ nɩ bedi egyima wɔ kʋnɛ nu bese a?
Taayɩ yɛ Devidi ɩva ihunli kɔbɩlanɩ Golayatɩ a. Ɩkɛyɛ kɛɛ Devidi izumanlɩ taayɩdʋlɛ mmɩlɩ mɔ nɩ ɩdɩ mmuwuanɩzʋhilalɛvʋlɔ nɩ.—1 Sa. 17:40-50.
Ɔwɔkɩ Igyibitimaa nɩɩ Asiliyiamaa bɛyɩyɛlɩ taayɩ nwʋ mfonyini sʋ̃maa. Nɩ taayɩ ɩdɩ ɛlamɩ ɔnwʋma mɔɔ bɛva ɛyɛma anwɩ̃ bɔzʋzɔ yɩ. Bʋlɔ ɛgyɩkɩ̃ɩ̃ mɔɔ nwʋmɔ ɩdɩ namʋʋ yɛ nɩ bɛfa bowula taayɩ yi nu a. Bʋlɔ yɩ nɩ yi kezile ɩkɛyɛ kɛɛ akutu naasʋ̃ numɔ ɔlʋmɔ ɩtɛla akutu. Sɛ abiye ɩtʋʋ taayɩ yɩ a, ipigyia yɩ sa ɩkɔ sʋlɔ paa na iahyima yɩ abasa ɩahɔ ɩaɣa nkʋ̃ʋ̃, na akʋ̃ iayiaki ɛyɛma ɔkʋ̃ nu ma ɩahɔ ɩawɔ dɩka mɔɔ yɩ anyɩ ikile nɩ pɛpɛɛpɛ.
Boduduli azɩ wɔ Middle East na bɔnwʋnlɩ taayɩ sʋ̃maa mɔɔ nɩ bɛfa bɔkɔ kʋnɛ wɔ ɔwɔkɩ mmɩlɩ nu. Ɩkɛyɛ kɛɛ nɩ kʋnɛhʋnlɛmaa mɔɔ bezi taayɩ tʋ paa nɩ, bɔkʋla bɔtʋ ma sɛ nnɛ a, ankɩ sa ɩkʋla ɩkwanɩ kaalʋ po nwʋ. Nnimidimaa be bɛkã kɛɛ, nɩ taayɩ nɩ ɩkʋla ɩkɔ aɣinzi aɣinzi dɩkɛɛ agyianɩ. Ɩwɔ numɔ kɛɛ Nnimidimaa be bɛále betiã nu dɩyɛ, naasʋ̃ kezimɔ ɩkʋla idi awu yi mɛyɩ, bo munwatĩĩ bede betiã nu kɛɛ ɩ nɩɩ agyianɩ ɩdɩ pɛ.—Ndɛ. 20:16.
JANUARY 24-30
BAYƖBƲLƲ NU ANWƲNYIA | WULUTU 1-2
“Dá Ɔlɔlɛ Kanyɩɩ Ali”
w16.02 14 ¶5
Sumazuma Gyehova Yɩ Ɔhɔnwʋmmɔ
Nɩ Wulutu yɩ abusunwamaa bɛda Mowabɩ. Meti ankɩ sa ɩkʋla isia ɩkɔ bɛ pɛ na bɛahila yɩ. Nɩ izi Mowabɩmaa, ɩtɩ bɛ ɛdɩndɛlɛ, na nɩ izi bɛ amamɩlɛ sʋ̃. Nɩ Nawomi ɩlɔ́kʋla ɩkɛma Wulutu ikenyia anwʋlazʋ kɛɛ ɩkɔhʋla ɩkɔwʋwa yɩ ma ikenyia ɔhɔnwʋmmɔ wɔ Bɛtɩlɛhamɩ. Ɩádɩ ɛkɛnɩ ɛdɩndɛlɛ, na ɩanwʋ bɛ amamɩlɛ. Akʋ̃ sʋ̃, nɩ ɩyɛ Nawomi kɛɛ ebiye a, nɩ iányia ohunɛ anzɛnyɩɩ pika ɩma Wulutu. Meti mɩnla yɛ Wulutu ɩkɛyɛ a? Nawomi ɩhanlɩ ihileli Wulutu kɛɛ iziá ɩhɔ Mowabɩ. Ɔpa mɛyɩ, kɛmɔ yɛnwʋ yɩ nɩ, ‘izialɩ ɩhɔlɩ yi mmenii nɩɩ yɩ anyamɩnlɩ bɛ pɛ.’ (Wu. 1:9-15) Naasʋ̃ Wulutu ɩyɛlɩ yɩ adwɩnɩ kɛɛ ilésia ɩkɔhɔ yi mmenii nɩɩ bɛ awohwi anyamɩnlɩ nɩ bɛ pɛ.
w16.02 14 ¶6
Sumazuma Gyehova Yɩ Ɔhɔnwʋmmɔ
Ɩkɛyɛ kɛɛ Wulutu yi hũ anzɛnyɩɩ Nawomi yɛ ɩwʋwalɩ Wulutu ma ɩnwʋnlɩ Gyehova a. Wulutu ɩnwʋnlɩ kɛɛ Gyehova ɩ́dɩ kɛɛ Mowabɩmaa bɛ anyamɩnlɩ nɩ. Nɩ Wulutu ɩdɔ Gyehova, na nɩ izi kɛɛ ɩsɛ kɛɛ ɩdɔ Gyehova na ɩsʋ̃mɩ yɩ. Meti izili pɔkɔba. Ɩhanlɩ ihileli Nawomi kɛɛ: “Wʋ mmenii bɛkɛyɛ mi mmenii na wʋ Nyamɩnlɩ ɩkɛyɛ mɩ Nyamɩnlɩ.” (Wu. 1:16) Sɛ yesunzu kezimɔ nɩ Wulutu ɩdɔ Nawomi nɩ nwʋ a, ɩkã ahʋnlɩnɩ baaba. Naasʋ̃ mɔɔ ɩtɛla eyi kʋlaa yɛ lɛ kezimɔ nɩ Wulutu ɩdɔ Gyehova nɩ. Ɔlɔlɛ mɔɔ nɩ Wulutu ɩwɔ ɩma Gyehova nɩ ɩhanlɩ Bowazɩ sʋ̃ yɩ ahʋnlɩnɩ. Aɣinzi yi, Bowazɩ ɩhamvʋlɩ Wulutu kɛɛ ɩbɩbɛ banɩwɔlɛ wɔ Gyehova yɩ andɛba tʋ. (Kɩnga Wulutu 2:12.) Odwokɔ mɔɔ Bowazɩ ɩhanlɩ nɩ ɩma yɛkakɛ kezimɔ anlʋmaɣalɛ ɩpɩbɛ banɩwɔlɛ wɔ yɩ maamɩ yɩ andɛba tʋ nɩ. (Ndw. 36:7; 91:1-4) Gyehova sʋ̃ ɩwɔlɩ Wulutu nwʋ banɩ, na yi dedi ti iyilalɩ yɩ. Wulutu iánu yɩ nwʋ kyɩ̃ kɛɛ izili ɔzɔ pɔkɔ nɩ.
Pɩbɛlɩ Bayɩbʋlʋ Yi Nu
w05 3/1 27 ¶1
Wulutu Buuku Yi Nu Ndwokɔ Aditili
1:13, 21—Asʋ̃ Gyehova yɛ ɩmanlɩ Nawomi ɩnwʋnlɩ amanɩyɛ na ɩmanlɩ yɩ ɛbɩlawɔlɛ ɩyɛlɩ ɔnlʋnlɩ a? Ɩ́dɩ ɔzɔ, na Nawomi ɩáfa ɔzʋ̃nɩ itiã Nyamɩnlɩ zʋ kɛɛ ɩyɛ tanɩ bela. Naasʋ̃, iluwa odwokɔ mɔɔ ɩdʋlɩ yɩ munwala ti, inyianlɩ adwɩnɩ kɛɛ Gyehova íni yɩ ɔfʋã. Ilili ɛyɛkɛ na yɩ abɔkɔ nu igolɔlɩ. Akʋ̃ sʋ̃ wɔ ɔzɔ mmɩlɩ nɩ, nɩ bobu awʋbɔ kɛɛ Nyamɩnlɩ yi nyilalɛ, yɛ ɔwʋlɛ mɔɔ abiye ɩáwʋ sʋ̃ kɛɛ amʋnlɩgulɩyɛ. Mmɩlɩ mɔ nɩ Nawomi íni ɛnlalɛmaa na yɩ mma mmenyia sʋ̃ bowuwu nɩ, ɩkɛyɛ kɛɛ ɩdɩlɩ nɣanlɩ kɛɛ adwɩnɩ mɔɔ inyia kɛɛ Gyehova ɩhã yɩ azɩ nɩ ɩfata.
JANUARY 31–FEBRUARY 6
BAYƖBƲLƲ NU ANWƲNYIA | WULUTU 3-4
“Nyiá Dimaba Na Bɔ́ Nwʋmɔ Banɩ”
w12 10/1 22 ¶5
“Baalɛ Baaba”
Bowazɩ ɩdɩndɛnlɩ, na kezimɔ ɩlɩlalɩ agyɩ ɩdɩndɛnlɩ nɩ ɩmanlɩ Wulutu inyianlɩ ɛɣɛɛlɛyɩkyɩlɛ. Bowazɩ ɩhanlɩ kɛɛ: “Gyehova iyila wʋ, mɩ ɣa baalɛ. Ɔlɔlɛ kezile mɔɔ ɛla yɩ ali kakɩ nɩ ɩtɛla bɔmʋnlɩ dɩyɛ nɩ, iluwakɛɛ wʋákodi mmɩlantɩyɛ bɛ mɛda, kɛ ehyinyianii anzɛnyɩɩ ozukuavʋlɔ.” (Wu. 3:10) “Bɔmʋnlɩ dɩyɛ nɩ” ɩdɩ baabayɛlɛ mɔɔ Wulutu ɩyɛlɩ mmɩlɩ mɔ ilili Nawomi yɩ mɛda ɩɣalɩ Yizilaya na ikilaa yɩ sʋ̃ nɩ. “Kakɩ” dɩyɛ yɩ sʋ̃ ɩdɩ mɔɔ izili wɔ ɔzɔ eɣile yi mɔɔ nɩ Bowazɩ igua zʋ ɩtɩndɛ nɩ. Bowazɩ ɩnwʋnlɩ kɛɛ kɛdɛkɛ mɔɔ ɩdɩ kɛɛ Wulutu mɛyɩ, abɩlantɩyɛ yɛ ɩsɛ kɛɛ ikyia yɩ a, kɛ ebiye a ɩwɔ ozukua anzɛnyɩɩ íni ebiye nɩ. Naasʋ̃, nɩ ɩpɛ kɛɛ ɩyɛ Nawomi nɩɩ Nawomi yi hũ mɔɔ iwu nɩ baaba na ama benyia nɩ yi dima iáminlinli wɔ yɩ abusunwa nu. Ɩáyɛ nnwʋánlɩ kɛɛ kezimɔ kɛdɛkɛ yɩ iduli yɩ nwʋ ɩmanlɩ nɩ, ɩhanlɩ Bowazɩ yɩ ahʋnlɩnɩ.
w12 10/1 23 ¶1
“Baalɛ Baaba”
Kilá kezimɔ Wulutu yɩ ahʋnlɩnɩ ɩdɔlɩ yi kunlu mmɩlɩ mɔ ɩdwɩnɩndwɩnɩ mɔɔ Bowazɩ ɩhanlɩ yɩ nwʋ kɛɛ, abiyela izi kɛɛ ɩdɩ “baalɛ baaba” nɩ! Dɩyɛ bela ikile kɛɛ, kezimɔ nɩ ɩzʋ̃ yɩ ahʋnlɩnɩ nu ɩpɛ kɛɛ ɩnwʋ Gyehova na ɩsʋ̃mɩ yɩ nɩ ti yɛ ɩmanlɩ bɛhanlɩ odwokɔba bɛvalɩ yɩ nwʋ yɩ a. Akʋ̃ sʋ̃ nɩ ɩla kunlumiba ali ihile Nawomi nɩɩ yi mmenii ɩva ihile kɛɛ ɩdwɩnɩ bɔ nwʋ, na ɩwɔ ɛpɛ sʋ̃ kɛɛ ɩkɛzɩnza yɩ ahʋanɩ ikeli amamɩlɛ mɔɔ ízi nɩ mɛda. Sɛ yesumazuma Wulutu yi dedi a, yɛkɔwɔ mmɔdɩnɩ yɛkɛla owulɛ ali yekehile mmenii mvʋlɔ nɩɩ kezimɔ boduwa ɔzʋlɔ bɛyɛ bɛ nninyeni nɩɩ bɛ amamɩlɛ. Sɛ yɛyɛ ɔzɔ a, yɛzayɛ sʋ̃ mmenii bɔkɔwɔ yɛ dima wɔ ɔhʋanɩba zʋ kɛmɔ bɔvʋlɔlɩ Wulutu “baalɛ baaba” nɩ.
w12 10/1 24 ¶3
“Baalɛ Baaba”
Bowazɩ igyialɩ Wulutu. Mɛyɩ mɛda nɩ, Bayɩbʋlʋ yɩ ɩkã kɛɛ: “Gyehova ɩmanlɩ ɩɣɩnzɛlɩ na ɩwʋlɩ ɛɣalɛ benyia.” Mmaalɛ mɔɔ bɔwɔ Bɛtɩlɛhamɩ nɩ beyilalɩ Nawomi na bɛhamvʋlɩ Wulutu kɛɛ ɩtʋ bʋlɔ ɩma Nawomi ɩtɛla mmalɛ mmenyia asunwa. Yɛɣa yɛnwʋ kɛɛ Wulutu yɩ ɣa benyia yi nu yɛ Bulombunli kezile Devidi ɩzʋ̃ ɩɣalɩ a. (Wu. 4:11-22) Devidi sʋ̃ nu yɛ Gyisɛsɩ Kɩlayɩsɩ ɩzʋ̃ ɩɣalɩ a.—Mt. 1:1.
Pɩbɛlɩ Bayɩbʋlʋ Yi Nu
w05 3/1 29 ¶3
Wulutu Buuku Yi Nu Ndwokɔ Aditili
4:6—Sɛ enii mɔɔ idi agyialɛ nɩ ɩtɔ agyiapadɩ be a, nɩ sa ɩkʋla ‘ɩsɩkɛ’ yɩzayɩ yɩ agyiapadɩ. Mɩnla ɔhʋanɩ zʋ a? Mɔ ili bɔmʋnlɩ kʋlaa nɩ, sɛ mɔɔ ihyinyia yɩ nɩ ɩtɔnɩ yɩ azɩlɛ yɩ a, nɩ ɩsɛ kɛɛ agyialɛvʋlɔ be ɩfa ozukua ɩsia ɩkɔ ɩtɔ azɩlɛ yɩ. Nɩ bekyina bʋlɔ mɔɔ ɩha ansaana Fanwʋdi Ɔlʋbɔ iadwu nɩ zʋ botuwa yɩ kakɛ. (Lɛv. 25:25-27) Azɩlɛ mɔɔ agyialɛvʋlɔ be ɩkɔdɔ nɩ ɩkɛma yɩzayɩ yɩ agyiapadɩ dɩyɛ zʋ ɩkɛdɩ. Akʋ̃ sʋ̃, sɛ nɩ Wulutu ɩwʋ ɛɣalɛ benyia a, kɛ agyialɛvʋlɔ yɩ mmusunwamaa mɔɔ bebike paa yɛ agyiapadɩ mɔɔ ɩdɔ nɩ ɩkɛyɛ bɛ dɩyɛ a, mfomi ɩkɛyɛ Wulutu yɩ ɣa benyia nɩ yɩ dɩyɛ.
FEBRUARY 7-13
BAYƖBƲLƲ NU ANWƲNYIA | 1 SAMƲWƐLƖ 1-2
“Kã Wʋ Ahʋnlɩnɩ Nu Odwokɔ Munwala Kile Gyehova”
ia 55 ¶12
Ɩzʋ̃ Yɩ Ahʋnlɩnɩ Munwala Nu Ɩwɔlɩ Gyehova Mpayɩ
Hana ɩyɛlɩ mpayɩwɔlɛ nwʋ ndianwʋ ɩmanlɩ Nyamɩnlɩ yɩ azʋ̃mɩvʋlɔ munwala. Gyehova ɩzʋ̃ kulumiba nu ɩtʋ salɛ yɩ fʋlɔ yi mmenii kɛɛ bɛhã bɛ ahʋnlɩnɩ nu odwokɔ munwala behile yi, na íni kɛɛ bɔtwɩnhwɩ̃ bɛ agyia azɩ kɛɛ bɛkɛva bɛ ahyinyiadɩ bekediã yɩ anyunu kɛmɔ kuakula mɔɔ ɩwɔ yɩ awʋvʋlɔ mɔɔ bɔwɔ ɔlɔlɛ nu anwʋlazʋ ɩyɛ nɩ la. (Kɩnga Ndwomi 62:8; 1 Tɛsalonikamaa 5:17.) Nyamɩnlɩ yi sunzuma ɩhanlɩ sʋ̃mavʋlɔ Pita ma ɩhɛlɛlɩ ɛɣɛɛlɛyɩkyɩlɛ odwokɔ eyi ɩvalɩ Gyehova mɔɔ yɛkɔwɔ yɩ mpayɩ nɩ nwʋ kɛɛ: “Mʋnlʋmmɔ bɛvá bɛ adwɩnɩndwɩnɩ munwatĩĩ bogua yɩ zʋ, iluwakɛɛ ɩdwɩnɩ mʋnlʋmmɔ bɔ nwʋ.”—1 Pit. 5:7.
w07 3/15 16 ¶4
Kezimɔ Hana Inyianlɩ Azʋ̃nudwolɩyɛ
Mɩnla yɛ yɛkɔhʋla yekozuma wɔ eyimmɔ munwatĩĩ nu a? Sɛ yɛbɔɔ nninyeni mɔɔ idide yɛ nwʋ mpayɩ yekehile Gyehova a, yɛkɔhʋla yɛkɛma ɩkɔnwʋ kezimɔ yɛtɩ nɣanlɩ na yɛazʋ̃ yɛ ahʋnlɩnɩ nu yɛava yɛ dɩyɛzianlɛ yeadiã yɩ anyunu. Sɛ dɩyɛ bela íni ɛkɛnɩ mɔɔ yɛkɔhʋla yɛkɛyɛ yɛkɛva yekeli mɔɔ idide yɛ nɩ nwʋ egyima a, ɩsɛ kɛɛ yeyiaki yɛma Gyehova. Dɩyɛ fʋlɔ bela íni ɛkɛnɩ mɔɔ yɛkɔhʋla yɛkɛyɛ.—Ɛɣɛ. 3:5, 6.
Pɩbɛlɩ Bayɩbʋlʋ Yi Nu
w05 3/15 21 ¶5
Samʋwɛlɩ Buuku Mɔɔ Ili Bɔmʋnlɩ Yi Nu Ndwokɔ Aditili
2:10—Mɩnla ti mɔɔ Hana ɩwɔlɩ mpayɩ kɛɛ Gyehova ‘ɩva tumi ɩma yi bulombunli’ mmɩlɩ mɔ nɩ enii bela ɩ́dɩ bulombunli wɔ Yizilaya ɔzɔ mmɩlɩ nɩ a? Nɩ bɛhã bediã ɛkɛnɩ daada wɔ Mosisi yɩ Mmɛla yi nu kɛɛ bulombunli ikeli Yizilaya zʋ. (Dit. 17:14-18) Mmɩlɩ mɔ nɩ Gyekɔpʋ ɩla yi owulo mba zʋ nɩ, ɩhyɛlɩ nkɔmɩ kɛɛ: “Bulombunli panɩ [ikile tumi mɔɔ ɩwɔ kɛɛ bulombunli] nɩ ɩzʋ̃ Dwuuda yɩ sa nu ɩlɛ́yɩ.” (Gyn. 49:10) Dɔkʋ̃ sʋ̃, mɔɔ ɩfalɩ Sɛla mɔɔ ɩdɩ Yizilayamaa bɛ nlabaalɛ nwʋ nɩ, Gyehova ɩhanlɩ kɛɛ: “awulombunli bɔzʋ̃ yi nu bɛkɛɣa.” (Gyn. 17:16) Meti yɛkɛhã a, nɩ Hana ɩbɔɔ mpayɩ ɩkɛvalɩ bulombunli be mɔɔ ɩkɛɣa eɣile be nɩ nwʋ.
FEBRUARY 14-20
BAYƖBƲLƲ NU ANWƲNYIA | 1 SAMƲWƐLƖ 3-5
“Gyehova Ɩdwɩnɩ Yɛ Nwʋ”
w18.09 24 ¶3
Gyehova Ɩdɩ Dɩyɛ Munwala Zʋ Tumivʋlɔ, Naasʋ̃ Ɩdwɩnɩ Yɛ Nwʋ
Mmɩlɩ mɔ Samʋwɛlɩ ɩwɔlɩ yɩ tʋ kɛɛ “ɩsʋ̃mɩ Gyehova” wɔ ɛdamɛ aliyia yɩ nu nɩ, nɩ ɩdɩ kuakula kʋlaa. (1 Sa. 3:1) Eɣile ɔkʋ̃ nunuma mɔɔ nɩ Samʋwɛlɩ ɩdaa nɩ, nnwʋánlɩdɩyɛ be izili. (Kɩnga 1 Samʋwɛlɩ 3:2-10.) Ɩdɩlɩ kɛɛ nnɩ be ɩbɔɔ yi dima yɩ fʋlɔ yɩ. Nɩ isunzu kɛɛ Ɔsɔfʋ Ebani Ilayɩ mɔɔ ɩyɛ alɩɣa nɩ yɛ yɩ fʋlɔ yɩ a, meti Samʋwɛlɩ ɩyɛlɩ sutiye na ɩɣɛlɩ ndɛndɛ ɩhɔlɩ yɩ pɛ ɩhanlɩ kɛɛ: “Mamɩ yɛ dɩ, ɔvʋlɔlɩ mɩ.” Ilayɩ ɩhanlɩ kɛɛ ɩlɔ́fʋlɔlɩ yɩ. Mmɩlɩ mɔ Samʋwɛlɩ ɩdɩlɩ nnɩ yɩ mbɔmɩ anwɩ̃ zʋ nɩ, Ilayɩ ɩnwʋnlɩ kɛɛ ɩdɩ Nyamɩnlɩ yɛ ɩfʋlɔ Samʋwɛlɩ a. Meti ihileli Samʋwɛlɩ kezimɔ sɛ ɩtɩ nnɩ nɩ dɔkʋ̃ a, ikele zʋ, na Samʋwɛlɩ ɩyɛlɩ ɔzɔ pɛpɛɛpɛ. Mɩnla ti mɔɔ ahyɛasɩ yɩ Gyehova iáduwa bɔvʋlɔ nɩ zʋ ɩkã ikile Samʋwɛlɩ kɛɛ ɩdɩ yɩzayɩ Gyehova yɛ ɩfʋlɔ yɩ a? Bayɩbʋlʋ yɩ ɩáhã sianti. Naasʋ̃, kezimɔ odwokɔ nɩ ɩhɔlɩ nɩ, ɩma yɛnwʋ kɛɛ, ɩkɛyɛ kɛɛ sianti mɔɔ Gyehova ɩyɛlɩ ɔzɔ yɛ lɛ kɛɛ, nɩ ɩdwɩnɩ Samʋwɛlɩ mɔɔ nɩ ɩdɩ kuakula nɩ nwʋ. Kɛ ɩyɛ mɔɔ yɛnwʋ yɩ ɔzɔ a?
w18.09 24 ¶4
Gyehova Ɩdɩ Dɩyɛ Munwala Zʋ Tumivʋlɔ, Naasʋ̃ Ɩdwɩnɩ Yɛ Nwʋ
Kɩnga 1 Samʋwɛlɩ 3:11-18. Gyehova yɩ Mmɛla ɩvalɩ ahyɛdɩ ɩmanlɩ nnwuakula kɛɛ, bowu mmenii mɔɔ bɛ alʋbɔ ɩhɔ anyunumi, titili mmenii mɔɔ bɔwɔ tumi. (Ɛkɩ. 22:28; Lɛv. 19:32) Mɔwʋ tua nwʋmɔ mfonyini kila kɛɛ, Samʋwɛlɩ ɩkɔɔ Ilayɩ yɩ pɛ nwɔnɩ ɩkɔhɔ ɩkɛla Nyamɩnlɩ yɩ ndɛnɩwuwalɛ mɔɔ numɔ ɩyɛ sɩ eyi ali petee ikehile yi. Ekila a, ɩkɛyɛ mɛlɛkɛ a? Nɩ ɩlɛ́yɛ mɛlɛkɛ kʋlaa! Nɔhʋanlɛ nu nɩ, Bayɩbʋlʋ yɩ ɩkã kɛɛ, “nɩ Samʋwɛlɩ ikunlu itu kɛɛ ɩkɛhã anyɩnlɩzʋdɩyɛnwʋnlɛ nɩ ikehile Ilayɩ.” Naasʋ̃, Nyamɩnlɩ ɩmanlɩ Ilayɩ ɩnwʋnlɩ yɩ petee kɛɛ, ɩdɩ mɛyɩ Gyehova yɛ nɩ ɩfʋlɔɔ Samʋwɛlɩ a. Meti, Ilayɩ ɩhanlɩ ihileli Samʋwɛlɩ kɛɛ ɩhã dɩyɛ bela ihile yi. Ɩhyɛlɩ yɩ kɛɛ, “[Áma ɛfa] odwokɔ mɔɔ ɩhanlɩ ihileli wʋ nɩ numɔ ɔkʋ̃ po esiye mɩ.” Meti Samʋwɛlɩ ɩzʋ̃ sutiye nu “ɩhanlɩ yi munwatĩĩ ihileli yi.”
Pɩbɛlɩ Bayɩbʋlʋ Yi Nu
w05 3/15 21 ¶6
Samʋwɛlɩ Buuku Mɔɔ Ili Bɔmʋnlɩ Yi Nu Ndwokɔ Aditili
3:3—Asʋ̃ Samʋwɛlɩ ɩlalɩ Nwanzanwanza Nu Nwanzanwanza Dɩka ɛkɛnɩ ankasa a? Anhã, ɩáda ɛkɛnɩ. Nɩ Samʋwɛlɩ ɩdɩ Levinii mɔɔ ɩzʋ̃ Kohatɩ abusunwa mɔɔ bɛáli ɔsɔfʋ nɩ nu. (1 Mm. 6:33-38) Ɔzɔ ti, nɩ íni ɔnwʋmɔ ɔhʋanɩ kɛɛ ‘ɩba nu na ɩba ɩnwʋ nninyeni nwanzanwanza’ nɩ. (Nɔ. 4:17-20) Nɩ ɛdamɛ aliyia yi punwuanu ɛkɛnɩ nkʋ̃tɩnyɩɩ la yɛ ɩwɔ ɔnwʋmɔ ɔhʋanɩ kɛɛ ɩkɔ a. Ɩkɛyɛ kɛɛ ɛkɛnɩ yɛ ɩlalɩ a. Ɩda ali kɛɛ ɛdamɛ aliyia yɩ punwuanu ɛkɛnɩ dɩka be yɛ Ilayɩ sʋ̃ ɩlalɩ a. Ɩda ali kɛɛ odwokɔ “dɩka mɔɔ nɩ Nyamɩnlɩ yɩ nhyɩhyɛlɩyɛ alɩka yɩ ɩwɔ nɩ,” ikile dɩka mɔɔ ɛdamɛ aliyia nɩ iziye.
FEBRUARY 21-27
BAYƖBƲLƲ NU ANWƲNYIA | 1 SAMƲWƐLƖ 6-8
“Aninyia Yɛ Ɩdɩ Wu Bulombunli a?”
it-2 163 ¶1
Nyamɩnlɩ Yɩ Bulombunlililɛ
Bɛhanlɩ Kɛɛ Bɛpɛɛ Bulombunli. Yizilayamaa bɔzʋ̃ Igyibiti bɛyɩlɩ bɔ nwʋ kɛyɛ alʋbɔ 400 nɩɩ mmɩlɩ mɔ Nyamɩnlɩ ɩ nɩɩ Abilehamɩ ɩyɛlɩ nhyɩhyɛlɩyɛ alʋbɔ 800 nɩɩ yɩ mɛda nɩ, bɛhanlɩ kɛɛ bɛpɛɛ bulombunli ma ikeli bɔ zʋ kɛmɔ amanlɩ azʋlɔtʋ nɩ bɔwɔ bo bulombunli nɩ la. Enii mɔɔ nɩ bɛpɛ kɛɛ idi bɔ zʋ kɛɛ bulombunli nɩ ikile kɛɛ, nɩ bɔpʋʋ Gyehova kɛɛ bo bulombunli. (1Sa. 8:4-8) Nɔhʋanlɛ nu nɩ, iluwa anʋhʋba mɔɔ Nyamɩnlɩ ɩva ɩwɔ Abilehamɩ nɩɩ Gyekɔpʋ mɔɔ bɛhã nwʋmɔ odwokɔ daada nɩ ti, nɩ mmenii yi bekilaa ɔhʋanɩ kɛɛ Nyamɩnlɩ ikebigyia bulombunli be sʋlɔ. Dɩyɛ fʋlɔ mɔɔ begyinanlɩ ɔzʋlɔ behilalɩ ɔzɔ bulombunli nɩ ɔhʋanɩ yɛ lɛ nkɔmɩ mɔɔ Gyekɔpʋ ɩhyɛlɩ ɩvalɩ Dwuuda nwʋ mmɩlɩ mɔ ɩla yɩ owulo mba zʋ (Gyn. 49:8-10), Gyehova yɩ odwokɔ mɔɔ ɩhanlɩ ihileli Yizilayamaa mmɩlɩ mɔ bɔzʋ̃ Igyibiti bɛyɩlɩ bɔ nwʋ mɛda (Ɛkɩ. 19:3-6), ndwokɔ mɔɔ ɩwɔ Mmɛla nhyɩhyɛlɩyɛ nɩ nu (Dit. 17:14, 15), nɩɩ ndwokɔ be mɔɔ ɩwɔ mɔɔ Gyehova ɩhanlɩ nkɔmɩhyɛnii Baalamɩ ma ɩhanlɩ nɩ nu (Nɔ. 24:2-7, 17). Samʋwɛlɩ yɩ maamɩ nɔhʋanlɛvʋlɔ Hana ɩhanlɩ anyɩnlɩlazʋ eyi nwʋ odwokɔ wɔ yɩ mpayɩwɔlɛ nu. (1Sa. 2:7-10) Naasʋ̃, nɩ Gyehova ɩlɛ́dalɩ yɩ “ɛɣɩntanlɛ odwokɔ nwanzanwanza” munwala mɔɔ ɩfalɩ yi Bulombunlililɛ nɩɩ mmɩlɩ mɔ ɩkɛva ikeziye ɛkɛnɩ nɩ nwʋ ali. Na nɩ ɩlɛ́kanlɩ kezimɔ ɔzɔ Bulombunlililɛ nɩ ɩkɛyɛ nɩɩ dɩka mɔɔ ikeli tumi, kɛ ɩdɩ sʋlɔ anzɛnyɩɩ azɩlɛ yɩ zʋ. Meti sikalɛyɩ, sɛ mmenii yi bɛkãã kɛɛ bɛpɛ bulombunli wɔ mmɩlɩ mɔ yɩ mmɩlɩ ilótwuli a, nɩ ikile kɛɛ bepigyiabigyia bɔ nwʋ sʋlɔ.
w11 1/1 27 ¶1
Igyinanlɩ Pindinyii Ɩávalɩ Nwʋmɔ Kɛɛ Bɛmanlɩ Yɩ Sa Iziyeli Azɩ
Mmɩlɩ mɔ Samʋwɛlɩ ɩvalɩ odwokɔ nɩ ɩhɔ idianlɩ Gyehova anyunu wɔ mpayɩwɔlɛ nu nɩ, tiye munwalɩyɛ mɔɔ Gyehova ɩva ɩmanlɩ yɩ: “Tiyé mɔɔ mmenii yi bɛkãã bekehile wʋ nɩ munwala iluwakɛɛ, kɛ mɔwʋ yɛ bɔbʋ wʋ a, mfomi mamɩ yɛ bɔbʋ mɩ kɛɛ bo bulombunli a.” Kila kezimɔ Samʋwɛlɩ yɩ ahʋnlɩnɩ ɩkɔdɔ yi kunlu, naasʋ̃ kila kezimɔ ɩkɛyɛ ɔwʋdʋlɛ ɩkɛma Dɩyɛ Munwala Zʋ Tumivʋlɔ nɩ! Gyehova ɩhanlɩ ihileli yɩ nkɔmɩhyɛnii kɛɛ ɩwɔ́ Yizilayamaa kɔkɔ wɔ amanɩyɛ mɔɔ bɔkɔnwʋ yɩ wɔ enii mɔɔ bɛkɛma ikeli bɔ zʋ bulombunli nɩ nwʋ. Mmɩlɩ mɔ Samʋwɛlɩ ɩhanlɩ ihileli bɛ nɩ, bɔhɔlɩ ɔzʋlɔ bɛhanlɩ kɛɛ: “Anhã, bulombunli la yɛ yɛpɛ kɛɛ idi yɛ zʋ a.” Iluwakɛɛ nɩ Samʋwɛlɩ ɩyɛ sutiye ɩma yɩ Nyamɩnlɩ mmɩlɩ munwala ti, ɩhɔ ɩvɔlɩ bulombunli mɔɔ nɩ Gyehova ɩyɩ yɩ nɩ ngɔlɔ.—1 Sa. 8:7-19.
w10 1/15 30 ¶9
Ɩla Ali Kɛɛ Gyehova Yɛ Ɩfata Kɛɛ Idi Enii Zʋ a!
Ndwokɔ mɔɔ izizili nɩ ɩmanlɩ ɩlalɩ ali kɛɛ Gyehova yɩ kɔkɔwɔlɛ nɩ ɩɣalɩ numɔ. Mmenii mɔɔ Yizilayamaa bɛmanlɩ belili bɔ zʋ bulombunli nɩ bɛvalɩ atɩɩtɩɩ sʋ̃maa bɛɣalɩ bɔ zʋ, yi titili mmɩlɩ mɔ bulombunli yɩ iádi nɔhʋanlɛ nɩ. Mmɩlɩ mɔ Yizilayamaa bo odwokɔ yɩ ɩwɔ yɛ adwɩnɩ nu nɩ, ɩáyɛ nnwʋánlɩ kɛɛ wɔ abakɔsɛmɩ munwala nu nɩ, awulombunli mɔɔ bézi Gyehova nɩ bɔlɔ́kʋlalɩ bɛlɛ́yɛlɩ dɩyɛ baaba bela mɔɔ ɩwʋwa mmenii kyɩ̃. Nɔhʋanlɛ nu nɩ, manlɩwulɛmaa be beziã Nyamɩnlɩ kɛɛ iyilá mmɔdɩnɩ mɔɔ bɔbɔɔ kɛɛ bekenyia azʋ̃nudwolɩyɛ nɩɩ banɩwɔlɛ nɩ zʋ dɩyɛ, naasʋ̃ kɛ ɩkɛyɛ na Nyamɩnlɩ ɩahʋla iayila mmenii mɔɔ bɛáhã bɔ nwʋ azɩ bowula yɩ tumililɛ tʋ nɩ a?—Ndw. 2:10-12.
Pɩbɛlɩ Bayɩbʋlʋ Yi Nu
w02 4/1 12 ¶13
Mɩnla Ti Mɔɔ Ɩsɛ Kɛɛ Onuma a?
Ɩsɛ kɛɛ abiye ɩsɩnza yɩ adwɩnɩ ansaana ianluma kɛɛ Gyehova Dasɩvʋlɔ. Adwɩnɩzɩnzanlɛ ɩdɩ dɩyɛ mɔɔ abiye ɩzʋ̃ yɩ pɛ nu ɩyɛ ɩfa ikile kɛɛ ɩzʋ̃ yɩ ahʋnlɩnɩ munwala nu izi pɔkɔ kɛɛ ikeli Gyisɛsɩ Kɩlayɩsɩ yɩ mɛda. Mmenii mɔɔ bɛdɩ ɔzɔ nɩ bɔpʋ ɛbɩlawɔlɛ mɔɔ nɩ bɔwɔ numɔ daada nɩ na besi bɛ kɛnɣa kɛɛ bɛkɛyɛ mɔɔ ɩtɩnɣɛ wɔ Nyamɩnlɩ anyɩ zʋ. Wɔ Ɛhɛlɛlɛ Odwokɔ yɩ nu nɩ, Hibulu nɩɩ Giliki dɩyɛlɛ odwokɔ mɔɔ bɛfa bedi egyima bɛma adwɩnɩzɩnzanlɛ nɩ wɔ adwɩnɩ mɔɔ mɛyɩ yɛ lɛ kɛɛ abiye ikezialɩ yɩ mɛda, ɩkɛlanɩ yɩ nwʋ. Ɔzɔ dɩyɛlɛ odwokɔ eyi ikile kɛɛ abiye ɩkɛlanɩ yɩ nwʋ wɔ ɔhʋanɩ tanɩ nwʋ na ɩaɣa Nyamɩnlɩ pɛ. (1 Aw. 8:33, 34) Adwɩnɩzɩnzanlɛ eyi ɩpɩbɛ kɛɛ abiye ‘ɩkɔwɔ ɛbɩla mɔɔ ikile kɛɛ inlu yɩ nwʋ.’ (Egy. 26:20) Ɩpɩbɛ kɛɛ yɛkɔbʋ awohwi ɔzʋ̃mɩnlɛ, yɛkɛyɛ yɛ dɩyɛ ma ɩ nɩɩ Nyamɩnlɩ yɩ mmɛla ikeyiyia, na yɛazʋ̃mɩ Gyehova yɩzayɩ nkʋ̃tɩnyɩɩ. (Dit. 30:2, 8-10; 1 Sa. 7:3) Adwɩnɩzɩnzanlɛ ɩma yɛsɩnza yɛ nzunzunlɩyɛ, yɛ bʋtayɩ azʋlɔtʋ, nɩɩ ye subanɩ. (Izi. 18:31) Abiye ‘isialɩ’ yɩ mɛda mmɩlɩ mɔ ɩma subanɩ fʋlɔ ɩba isiye dadampɔ yɩ mɔɔ ɩávata yɩ agyia nu.—Egy. 3:19; Ɛfɩ. 4:20-24; Kol. 3:5-14.
FEBRUARY 28–MARCH 6
BAYƖBƲLƲ NU ANWƲNYIA | 1 SAMƲWƐLƖ 9-11
“Nɩ Sɔɔlʋ Ɩkã Yɩ Nwʋ Azɩ Ahyɛasɩ Nɩ”
w20.08 10 ¶11
Kã Wʋ Nwʋ Azɩ Na Ɛ Nɩɩ Wʋ Nyamɩnlɩ Boluwa
Bɛmá yezunzu mɔɔ ɩdʋlɩ Bulombunli Sɔɔlʋ nwʋ. Mmɩlɩ mɔ nɩ ɩdɩ abɩlantɩyɛ nɩ, nɩ ɩkã yɩ nwʋ azɩ, na nɩ izi sʋ̃ kɛɛ kɛ dɩyɛ bela yɛ ɩkɔhʋla ɩkɛyɛ a. Mmɩlɩ be po mɔɔ nɩ bɛlɛ dibilɛ bɛma yɩ nɩ, ɩhwɩhwɩnlɩ yɩ nwʋ. (1 Sa. 9:21; 10:20-22) Naasʋ̃ mmɩlɩ ɩkɔ ɔzʋlɔ nɩ, ɩɣa ɩyɛlɩ ahantanɩ. Ɩyɛlɩ Bulombunli nɩ, ɩákyɛ yɛ ɩlalɩ subanɩ eyi ali a. Mmɩlɩ be, iányia abʋtalɩ ɩdɩkɛ nkɔmɩhyɛnii Samʋwɛlɩ. Kɛ ankɩ Sɔɔlʋ ɩkɛhã yɩ nwʋ azɩ na ianyia Gyehova nu anwʋlazʋ kɛɛ ikele yi mmenii nɩ, yɩzayɩ ɩwɔlɩ ɛyɩbalɛ afɔlɩ mɔɔ nɩ íni nwʋmɔ ɔhʋanɩ kɛɛ ɩkɔwɔ. Mɔɔ Sɔɔlʋ ɩyɛlɩ nɩ ti, iányia Gyehova yɩ anyunu ɔnlʋmɩnlɛ na awielɩyɛ kʋlaa nɩ, bulombunlililɛ nɩ ivili yɩ sa. (1 Sa. 13:8-14) Nɣɛlɛbɛ wɔ nu kɛɛ yekozuma dɩyɛ be wɔ mɔɔ ɩdʋlɩ Bulombunli Sɔɔlʋ yi nu na yɛáyɛlɩ dɩyɛ be mɔɔ yéni nwʋmɔ ɔhʋanɩ kɛɛ yɛkɛyɛ nɩ.
w14 3/15 9 ¶8
‘Twɩ́ Wʋ Nwʋ Wɔ Oyuwadɩ Akɔnɔ Nwʋ’
Sɛ yɛpɛ kɛɛ yɛyɩ angʋmidi wɔ ye nu na yɛtwɩ̃ yɛ nwʋ wɔ oyuwadɩ akɔnɔ nwʋ a, mɛyɩ yɛkɔhʋla yekozuma dɩyɛ be wɔ Bulombunli Sɔɔlʋ yɩ odwokɔ yi nu. Mmɩlɩ mɔ Sɔɔlʋ ɩwɔlɩ yɩ bulombunlililɛ yɩ tʋ nɩ, nɩ ɩkã yɩ nwʋ azɩ. (1 Sa. 9:21) Mmɩlɩ be po, Yizilayamaa be bɛdɩndɛnlɩ bediyianlɩ yɩ bulombunlililɛ nɩ. Sɛ ɩpɛ a, ankɩ sa ɩkʋla ɩtwɩ̃ bɛ azʋ̃ iluwakɛɛ Nyamɩnlɩ yɛ nɩ ɩyɩ yɩ a, naasʋ̃ ɩáyɛ ɔzɔ. (1 Sa. 10:27) Mmɩlɩ be, nɩ Yizilayamaa nɩɩ Amɔnʋmaa bɔkɔhʋ̃ na Bulombunli Sɔɔlʋ ɩmanlɩ Nyamɩnlɩ yɩ Sunzuma yɩ ihileli ɔhʋanɩ yɩ ma ilili nkunimi. Kʋnɛ yɩ mɛda nɩ, ɩvalɩ animinyiamɩ yɩ munwala ɩmanlɩ Gyehova.—1 Sa. 11:6, 11-13.
w95 12/15 10 ¶1
Amɔnʋmaa—Mmenii Mɔɔ Bɛvalɩ Ɛdanɩnlɛ Boduwalɩ Baabayɛlɛ Zʋ Kakɛ
Amɔnʋmaa bɛvalɩ ɛdanɩnlɛ boduwalɩ Gyehova yɩ baabayɛlɛ zʋ kakɛ ebiyekʋ̃. Gyehova iábu yɩ anyɩ ikua onwunlanwunlalɛ mɔɔ numɔ ɩyɛ sɩ eyi zʋ. “Nyamɩnlɩ yɩ Sunzuma ɩɣalɩ Sɔɔlʋ zʋ mmɩlɩ mɔ ɩdɩlɩ ndwokɔ eyimmɔ [Nehahyɩ yɩ ndwokɔ yɩ] nɩ, na ɩvalɩ ɛya ɛzɩzɩbɛ ɛzɩzɩbɛ.” Iluwa Gyehova yi sunzuma nɩ yɩ ɔhʋanɩhilelɛ zʋ nɩ, Sɔɔlʋ ihunwa hunwanlɩ kʋnɛmaa 330,000 munwa ma bɛbɩndɩnlɩ Amɔnʋmaa mɔɔ “bo nu anwɩ̃ po ɩáka wɔ dɩka ɔkʋ̃.”—1 Sa. 11:6, 11.
Pɩbɛlɩ Bayɩbʋlʋ Yi Nu
w05 3/15 22 ¶8
Samʋwɛlɩ Buuku Mɔɔ Ili Bɔmʋnlɩ Yi Nu Ndwokɔ Aditili
9:9—“Abiye mɔɔ bɔfʋlɔ yɩ nkɔmɩhyɛnii wɔ nnɛ nɩ, bɔmʋnlɩ yɩ, nɩ bɔfʋlɔ yɩ dɩyɛnwʋnlɛvʋlɔ.” Mɩnla yɛ ndwokɔ eyimmɔ ikile ankasa a? Ebiye a, mɔɔ ikile yɛ lɛ kɛɛ, mmɩlɩ mɔ nkɔmɩhyɛmaa bɛɣa beleli dima paa wɔ Samʋwɛlɩ yɩ mmɩlɩ zʋ nɩɩ Yizilaya awulombunli bɛ mmɩlɩ zʋ nɩ, yɛ bɛvalɩ odwokɔ pɔkɔ “dɩyɛnwʋnlɛvʋlɔ” beziyeli “nkɔmɩhyɛnii” yɩ agyia nu a. Bowuli Samʋwɛlɩ kɛɛ mɛyɩ yɛ ɩdɩ nkɔmɩhyɛmaa nɩ bo nu mɔɔ ili bɔmʋnlɩ a.—Egy. 3:24.