Ɛbɩlawɔlɛ Nɩɩ Dasɩlɛlilɛ Dɩyɛzumanlɛ Kɛlɛta Nwʋ Awuuku Nu Ɛbɩbɛlɛ
MAY 2-8
BAYƖBƲLƲ NU ANWƲNYIA | 1 SAMƲWƐLƖ 27-29
“Devidi Yɩ Kʋnɛlilɛ Nwʋ Nhyɩhyɛlɩyɛ”
it-1 41
Ekɩhyɩ
Mbɔmɩ anwɩ̃ mɔɔ nɩ Devidi iɣiandii Sɔɔlʋ nɩ, inyianlɩ banɩwɔlɛ wɔ Bulombunli Ekɩhyɩ yɩ pɛ. Mɔɔ ili bɔmʋnlɩ yi nu nɩ, mmɩlɩ mɔ nɩ bosunzu kɛɛ Devidi ɩdɩ bɛ tamvʋlɔ nɩ, ɩyɛlɩ yɩ nwʋ kɛɛ bɔdamvʋlɔ, na eyi ɩmanlɩ Ekɩhyɩ iyiakili yi, iluwakɛɛ ɩnwʋnlɩ kɛɛ ɩlɔ́kʋla ɩkɛyɛ hwɩɩ bɛ. (1 Sa. 21:10-15; Ndw. 34:yɩ odwokɔtile; 56:yɩ odwokɔtile) Mɔɔ ɩtɔ ɔzʋlɔ anwɩ̃ nu mɔɔ Devidi ɩhɔlɩ Ekɩhyɩ yɩ ɛkɛnɩ nɩ, ɩ nɩɩ yɩ azogyiamaa 600 nɩɩ bo mmusunwamaa yɛ bɔhɔlɩ a. Na Ekɩhyɩ ɩmanlɩ dɩka bɛ ma bɔwʋwalɩ wɔ Zɩkɩlagɩ. Ɔlʋbɔ ɔkʋ̃ nɩɩ eziyianɩ anla mɔɔ Devidi ɩwʋwalɩ ɛkɛnɩ munwala nɩ, nɩ Ekɩhyɩ isunzu kɛɛ Dwuuda ahwonwa yɛ Devidi nɩɩ yɩ mmenyia yɩ bɔkɔ bɔtʋ bɛhyɛ bɔ zʋ a. Naasʋ̃ nɩ Gɛhyɛmaa, Gɛzayɩmaa, nɩɩ Amalɩkɩmaa mfomi yɛ nɩ Devidi nɩɩ yɩ mmenyia yɩ bɔtʋ bɛhyɛ bɔ zʋ a. (1 Sa. 27:1-12) Ekɩhyɩ ileli Devidi yɩ nnahɩlɩbɛ yɩ ilili nkʋ̃ʋ̃ ma ɩyɩlɩ Devidi kɛɛ yɩ ɔwɩɛnɩnlɛvʋlɔ ebani wɔ mmɩlɩ mɔ Fɩlɩsɩtiyiamaa bɛhyɩhyɛɛ bɔ nwʋ bɔkɔdʋ bɛkɛhyɛ Bulombunli Sɔɔlʋ zʋ nɩ. Naasʋ̃ mmɩlɩ mɔ ɩka ɛgyɩkɩ̃ɩ̃ ma mmɩlɩ itwu ma bɔkɔ kʋnɛ yɩ mɔɔ “Fɩlɩsɩtiyia awulombunli” nɣɩlalɩyɛ yɩ bɛhanlɩ ɛzɩzɩbɛ ɛzɩzɩbɛ kɛɛ bɛlɛ́ma Devidi nɩɩ yɩ mmenyia yɩ bɔkɔhɔ kʋnɛ yɩ be nɩ, yɛ bɛmanlɩ bezialɩ bɔhɔlɩ Zɩkɩlagɩ a. (1 Sa. 28:2; 29:1-11) Mmɩlɩ mɔ Devidi ɩɣa ɩyɛlɩ bulombunli na ɩhʋnlɩ idiyialɩ Gaatɩ nɩ, ɩda ali kɛɛ iákũ Ekɩhyɩ. Mmɩlɩ mɔ nɩ Sɔlɔmɔnʋ idii dɩyɛ munwala, nɩ Ekɩhyɩ ɩda azɩ.—1 Aw. 2:39-41.
w21.03 4 ¶8
Mmɩlantɩyɛ—Mɩnla Yɛ Bɛkɛyɛ Na Asafʋ Yɩ Ianyia Bo Nu Anwʋlazʋ a?
Bɛmá yehila odwokɔ ɛzɩzɩbɛ fʋlɔ mɔɔ Devidi iyiyialɩ. Mmɩlɩ mɔ bɔvɔlɩ ngɔlɔ yɩ kɛɛ bulombunli nɩ, nɩ ɩsɛ kɛɛ ɩdɩkɛ alʋbɔ sʋ̃maa ansaana bɛava yɩ bɛaziye dɩyɛ zʋ kɛɛ Dwuuda bulombunli. (1 Sa. 16:13; 2 Sa. 2:3, 4) Mmɩlɩ mɔ nɩ ɩdɩkɛɛ wɔ ɔzɔ alʋbɔ yɩ munwala nu nɩ, mɩnla yɛ ɩwʋwalɩ yɩ ma izili abʋtalɩ ɩlɩkɛlɩ a? Kɛ ankɩ Devidi ɩkɛma yɩ padi ikogolɔ nɩ, ɩáyɛ ɔzɔ, mfomi ɩvalɩ yɩ adwɩnɩ iziyeli mɔɔ nɩ ɩkɔhʋla ɩkɛyɛ zʋ. Kɛ ndianwʋ nɩ, mmɩlɩ mɔ Devidi iɣiandinli ɩhɔ ɩwʋwalɩ Fɩlɩsitiyiamaa bɛ azɩlɛ zʋ nɩ, ɩvalɩ ɔnwʋmɔ ɔhʋanɩ yɩ ɩ nɩɩ Yizilaya adamvʋlɔ bɔhʋnlɩ. Ɩyɛlɩ ɔzɔ ɩva ɩwɔlɩ Dwuuda azɩlɛ yɩ yɩ ɛyɩlɛ nwʋ banɩ.—1 Sa. 27:1-12.
Pɩbɛlɩ Bayɩbʋlʋ Yi Nu
w10 1/1 20 ¶5-6
Asʋ̃ Awuvʋlɔ Bɔkɔhʋla Bɔkɔwʋwa Bɛzabɛ Mɔɔ Bɛda Azɩ Yɩ a?
Dwɩnɩ eyi nwʋ. Bayɩbʋlʋ yɩ ɩkã kɛɛ, sɛ abiye iwu a, “isia ɩkɔ ndɛdɛlɛ nu” na “yi nzunzunlɩyɛ munwatĩĩ iminli.” (Ndw. 146:4) Nɩ Sɔɔlʋ nɩɩ Samʋwɛlɩ munwala bezi kɛɛ Nyamɩnlɩ ikyi ahɔmɩnlɩ mɔɔ bɔkɔhɔ bɛkɛbɩbɛ mmʋwalɩyɛ wɔ bɛ ɛkɛnɩ. Mɔɔ ɩdɩ yɛ lɛ kɛɛ, nɩ Sɔɔlʋ ili anyunumi ma bodu bɛzabɛ mɔɔ bedi azunzuma ndwokɔ munwatĩĩ wɔ azɩlɛ yɩ zʋ!—Lɛv. 19:31.
Mɔwʋ sunzu odwokɔ yɩ nwʋ kila. Sɛ nɩ nɔhʋanlɛvʋlɔ Samʋwɛlɩ ɩla nwʋmɔ la ɩda azɩ kɛɛ sunzuma a, asʋ̃ ankɩ ikowuli Nyamɩnlɩ yɩ mmɛla zʋ na iadiye kɔmɩnlɩ be kɛmɔ ɩkɛyɛ a ɩ nɩɩ Sɔɔlʋ keyiyia a? Nɩ Gyehova nɩɩ Sɔɔlʋ ɩádɩndɛ ebiyekʋ̃. Asʋ̃ nɩ kɔmɩnlɩ be ɩkɔhʋla ɩkɛhyɛ Dɩyɛ Munwala Zʋ Tumivʋlɔ Nyamɩnlɩ nɩ ma ikoluwa Samʋwɛlɩ mɔɔ nɩ iwu nɩ zʋ ɩ nɩɩ Sɔɔlʋ ɩkɛdɩndɛ a? Anhã. Ɩda ali petee kɛɛ, nɩ ɔzɔ “Samʋwɛlɩ” eyi, ɩ́dɩ Nyamɩnlɩ yɩ nkɔmɩhyɛnii nɔhʋanlɛvʋlɔ wɔ ɔhʋanɩ bela zʋ. Nɩ ɩdɩ sunzuma tanɩ be mɔɔ ɩhyɛda ɩyɛ yɩ nwʋ kɛɛ ɩdɩ Samʋwɛlɩ mɔɔ iwu nɩ.
MAY 9-15
BAYƖBƲLƲ NU ANWƲNYIA | 1 SAMƲWƐLƖ 30-31
“Pɩbɛ Anwʋzɩzɩbɛ Wɔ Gyehova Wʋ Nyamɩnlɩ Yɩ Ɛkɛnɩ”
w06 8/1 28 ¶12
Ma Wu Kunlu Iduli Gyehova Nwʋ Na Nyia Anyɩnlɩlelɛ!
Iluwakɛɛ nɩ Devidi ɩwɔ Gyehova nwʋ bɔlɔ ti, kɛ tanɩ nkʋ̃ la yɛ ɩáyɛ a. Mfomi ɩhyɛlɩ yɩ ɛzɩzɩbɛ ma izili pɔkɔba, na ɩyɛlɩ yɩ dɩyɛ nɣɛlɛbɛ nu wɔ bʋwabɩlɛ mɔɔ ɩyɛ sɩ po nu. Devidi nɩɩ yɩ mmenyia yɩ beɣiandinli Sɔɔlʋ bɔhɔ bɔwʋwalɩ Fɩlɩsɩtiyiamaa bo twonwa Zɩkɩlagɩ nu ɔlʋbɔ ɔkʋ̃ nɩɩ aziyianɩ anla. (1 Sa. 27:5-7) Mmɩlɩ be mɔ nɩ mmenyia yɩ béni ɛkɛnɩ nɩ, Amalɩkɩmaa nɩ bɛɣa bɛyɩbalɩ twonwa yɩ, bɛzɩzalɩ bɛ yɩmmɔ, bo nnwuakula nɩɩ bɛ nnamɩ bɔhɔlɩ. Mmɩlɩ mɔ Devidi nɩɩ yɩ mmenyia yɩ bezia bɛɣalɩ na bɔnwʋnlɩ mɔɔ izi nɩ, bozunli. Ɩákyɛ yɛ Devidi yi mmenyia yɩ bɛ ɛyɛkɛlilɛ ɩlanɩnlɩ ɛyavalɛ a, na bɛhanlɩ po kɛɛ sa besi Devidi awʋlɔ. Ɩwɔ numɔ kɛɛ nɩ Devidi yɩ adwɩnɩ idu ɩvʋla dɩyɛ, naasʋ̃ yɩ padi iákolɔ. (Ɛɣɛ. 24:10) Nyamɩnlɩ nwʋ bɔlɔ mɔɔ nɩ ɩwɔ ɩhanlɩ yɩ ma ɩhɔlɩ Gyehova yɩ pɛ “ɩhɔ ɩbɩbɛlɩ anwʋzɩzɩbɛ.” Nyamɩnlɩ ɩwʋwalɩ Devidi nɩɩ yɩ mmenyia yɩ ma belili Amalɩkɩmaa nɩ zʋ nkunimi, na bɛ sa ɩhanlɩ dɩyɛ bela.—1 Sa. 30:1-20.
w12 4/15 30 ¶14
Gyehova Ikila Yɛ Zʋ Ɩkɔ Nnwʋanlɩlelɛ Nu
Devidi iyiyialɩ ndwokɔ ɛzɩzɩbɛ nɩɩ amanɩyɛnwʋnlɛ sʋ̃maa wɔ yɩ ɛbɩlawɔlɛ nu. (1 Sa. 30:3-6) Bayɩbʋlʋ ɩma yɛnwʋ kɛɛ, nɩ Gyehova izi kezimɔ nɩ Devidi ɩtɩ nɣanlɩ. (Kɩnga Ndwomi 34:18; 56:8.) Nyamɩnlɩ izi kezimɔ yɛzayɛ sʋ̃ yɛtɩ nɣanlɩ. Sɛ yɛ ‘ahʋnlɩnɩ ibubu’ anzɛnyɩɩ ye ‘padi ikolɔ’ a, ɩtwɩ̃ ibike yɛ. Ɔzɔ nɔhʋanlɛ odwokɔ eyi ɩkɔhʋla ɩkɛma yɛ ɛɣɛɛlɛ ɩkɛyɩkyɩ dɩkɛɛ Devidi. Ɩdʋlɩ ndwomi kɛɛ: “Wʋ ɔlɔlɛ kanyɩɩ ti mikeli fɛlɛkʋ̃ sʋ̃maa, iluwakɛɛ ɔnwʋ mɩ ɛyɛkɛlilɛ; na ezi mɩ atɩɩtɩɩ sʋ̃maa mɔɔ muluwa numɔ nɩ.” (Ndw. 31:7) Naasʋ̃, kɛ yɛ amanɩyɛnwʋnlɛ nkʋ̃ la yɛ Gyehova ɩnwʋ yɩ a, mfomi ɩkyɩkyɩ yɛ ɛɣɛɛlɛ na ɩhyɛ yɛ ɛzɩzɩbɛ na ama yɛahʋla yeagyina yi munwa. Ɔhʋanɩ ɔkʋ̃ mɔɔ iduwa ɔzʋlɔ ɩyɛ ɔzɔ yɛ lɛ Kilisiyianɩ ayiyialɩyɛ azʋlɔtʋ.
Pɩbɛlɩ Bayɩbʋlʋ Yi Nu
w05 3/15 24 ¶8
Samʋwɛlɩ Buuku Mɔɔ Ili Bɔmʋnlɩ Yi Nu Ndwokɔ Aditili
30:23, 24. Pɔkɔ mɔɔ begyinanlɩ Nɔmɛsɩ 31:27 zʋ bezili nɩ ikile kɛɛ, bɛzabɛ mɔɔ bɛyɛ egyima azʋlɔtʋ bɔbʋwa bɛzabɛ mɔɔ beli asafʋ yɩ anyunu nɩ, bɔtʋ bʋlɔ bɛma Gyehova. Ɔzɔ ti, dɩyɛ bela mɔɔ yɛyɛɛ nɩ, ‘yɛvá ahʋnlɩnɩ baaba yɛyɛ, kɛɛ gyama yɛyɛ yɛkɛma Gyehova na yɛlɛ́yɛ yɛkɛma mmenii.’—Kol. 3:23.
MAY 16-22
BAYƖBƲLƲ NU ANWƲNYIA | 2 SAMƲWƐLƖ 1-3
“Mɩnla Yɛ Yesuma Wɔ “Agyianɩ Yɩ” Nu a?”
w00 6/15 13 ¶9
Bɛvá Annidi Bɛma Bɛzabɛ Mɔɔ Bɛma Bedi Bɔ Zʋ Tumi Nɩ
Mmɩlɩ mɔ nɩ bɛtɩɩdɩɩ Devidi nɩ, asʋ̃ ilileli yi a? Devidi izunli ɩvʋlɔlɩ Gyehova kɛɛ “Atinuzɩzɩbɛmaa bɛpɩbɛɛ mɩ bokohũ mɩ.” (Ndw. 54:3) Ɩzʋ̃ yɩ ahʋnlɩnɩ nu izunli ɩvʋlɔlɩ Gyehova kɛɛ: “O mɩ Nyamɩnlɩ, dé mɩ wɔ mɩ adamvʋlɔ be sa nu . . . O Gyehova anwʋzɩzɩbɛmaa bɔtʋ bɛhyɛ mʋ zʋ, naasʋ̃ mɩlɛ́yɛlɩ dɩyɛ bela anzɛnyɩɩ tanɩ bela bɛ. Milédili mfʋmɩ bela, naasʋ̃ bɛyɛ ndɛndɛ bokunwa hunwa bo munwa kɛɛ bɛbadʋ bɛkɛhyɛ mʋ zʋ. Sɛ mʋfʋlɔ wʋ a, twodwu na tuá wʋ anyɩ bɛahila mɩ.” (Ndw. 59:1-4) Asʋ̃ eyiyia bʋwabɩlɛ eyi be kyɩ̃ a?—Abiye mɔɔ ɩlɛ tumi wɔ wʋ zʋ, idu yi anyɩ iziye wʋ nwʋ mmɩlɩ mɔ ɛlɛ́yɛlɩ tanɩ bela yɩ. Devidi iábu Sɔɔlʋ animitiyia kyɩ̃. Mmɩlɩ mɔ Sɔɔlʋ iwuli nɩ, kɛ ankɩ Devidi ikeli fɛlɛkʋ̃ nɩ, ɩhyɩhyɛlɩ aɣɛɛlɛbɔ ndwomi mfomi ɩvalɩ Sɔɔlʋ nwʋ kɛɛ: “Sɔɔlʋ nɩɩ Dwonatanɩ, mʋnlʋmmɔ mɔɔ nɩ mmenii pɛ bo odwokɔ na bɔdɔ bɛ mmɩlɩ mɔ nɩ bɛda azɩ nɩ . . . Bɔ nwʋ ɩyɛ ndɛ ɩtɛla ɔhɔlɩyɛ, na bɔ nwʋ ɩyɛ sɩ ɩtɛla anwɩnadɩ. O Yizilaya yɩ mma mmaalɛ, bozũ Sɔɔlʋ.” (2 Sa. 1:23, 24) Kilá ndianwʋ baaba mɔɔ Devidi ɩyɛlɩ! Ɩlalɩ annidi ali ihileli enii mɔɔ bɔvɔ ngɔlɔ yɩ ɩávalɩ nwʋmɔ kɛɛ nɩ Sɔɔlʋ ɩyɛ tanɩ idiyia yɩ nɩ.
w12 4/15 10 ¶8
Mmenii Mɔɔ Bɛkɛyɩ Bɔ Nwʋ Bɛkɛma—Ɩdɩ Awielɩyɛ Yɩ Nwʋ Sɛnkyɩlɛdɩ!
Mmenii sʋ̃maa wɔ ɛkɛnɩ mɔɔ Bayɩbʋlʋ ɩkã kɛɛ belili nɔhʋanlɛ. Bɛmá yezunzu bo nu anwɩ̃ nwʋ na yehila mɔɔ yɛkɔhʋla yekozuma wɔ bɛ ɛkɛnɩ. Má yeli bɔmʋnlɩ yehila benyia be mɔɔ ilili Devidi nɔhʋanlɛ. Nɩ ankɩ Bulombunli Sɔɔlʋ yɩ ɣa benyia ebani Dwonatanɩ yɛ ikeli yɩ papa yɩ dɩyɛ kɛɛ Yizilaya bulombunli a, naasʋ̃ Gyehova ɩyɩlɩ Devidi kɛɛ mɛyɩ yɛ ikeli dɩyɛ wɔ Sɔɔlʋ mɛda a. Dwonatanɩ ɩhanlɩ yɩ nwʋ azɩ ileli mɔɔ Nyamɩnlɩ ɩhanlɩ nɩ idianlɩ numɔ, mɔɔ yɩ anyɩ ɩábʋlʋ Devidi. Dwonatanɩ “ɩlɔlɩ Devidi kɛɛ yɩzayɩ yɩ nwʋ,” na ɩwɔlɩ Devidi anʋhʋba kɛɛ ikeli yi nɔhʋanlɛ. Dwonatanɩ ɩvalɩ yɩ atalɩ, yɩ afɩna, yɩ agyianɩ nɩɩ yɩ bɛlɛtɩ po ɩmanlɩ Devidi ɩva ihileli kɛɛ ibu yi kɛɛ dɩhɩlɛ. (1 Sa. 18:1-4) Dwonatanɩ ɩyɛlɩ mɔɔ ɩkɔhʋla bela ‘ɩwʋwalɩ Devidi ma inyianlɩ anwʋzɩzɩbɛ’ na ɩvalɩ yɩ nnwʋanlɩ idianlɩ asianɩ nu po ɩva ileli Devidi wɔ Sɔɔlʋ yɩ sa nu. Nɔhʋanlɛvʋlɔ Dwonatanɩ ɩhã ihileli Devidi kɛɛ: “Mɔwʋ yɛ ekeli Yizilaya zʋ bulombunli a, na mɩkɛyɛ wʋ abediakyi.” (1 Sa. 20:30-34; 23:16, 17) Eyimmɔ munwala ɩma yɛnwʋ kɛɛ, nɩ Devidi ɩdɔ Dwonatanɩ baaba paa, mɛyɩ ti mɔɔ mmɩlɩ mɔ Dwonatanɩ iwuli nɩ, Devidi ɩhyɩhyɛlɩ aɣɛlɛbɔ ndwomi ɩmanlɩ yɩ a.—2 Sa. 1:17, 26.
Pɩbɛlɩ Bayɩbʋlʋ Yi Nu
it-1 369 ¶2
Eliyema
Bɛfa odwokɔ pɔkɔ “eliyema” sʋ̃ bedi egyima bɛma mmenii be mɔɔ bɛlɛ bʋtayɩ nɩɩ tile nu pɔkɔ ɔkʋ̃ na bɔbɔ nu bedi dɩyɛ be nwʋ egyima. Kɛ ndianwʋ nɩ, nɩ ɩ́dɩ kɛɛ Tayɩ Bulombunli Hayɩlamɩ ɩ nɩɩ Bulombunli Sɔlɔmɔnʋ bɛlɛ dibilɛ ɔkʋ̃ ti mɔɔ ɩvʋlɔlɩ yɩ kɛɛ yɩ anlima a, mfomi nɩ Bulombunli Hayɩlamɩ ɩpɛ yɩ odwokɔ na nɩ yɩ anyɩ ideli asɔlɩ pika yɩ nwʋ egyima mɔɔ nɩ Bulombunli Sɔlɔmɔnʋ ɩyɛɛ nɩ nwʋ. Meti ɩvalɩ nnuno nɩɩ nninyeni mvʋlɔ ɩhɔ ɩwʋwalɩ yɩ. (1 Aw. 9:13; 5:1-12) Devidi ɩhɛlɛlɩ kɛɛ, “Kila! Kezimɔ ɩdɩ baaba na ɩyɛ kɩnlɩma kɛɛ mmeliyema bɔkɔwɔ numɔ bɔkɔwʋwa wɔ ɔkʋ̃yɛlɛ nu!” mɔɔ ikile kɛɛ, sɛ azʋ̃nudwolɩyɛ nɩɩ ɔkʋ̃yɛlɛ ɩkɛɣa mmeliyema be avinli a, ígyĩ mmegyia ɔkʋ̃ mɔɔ bɔzʋ̃ numɔ nkʋ̃ la zʋ. (Ndw. 133:1) Meti yɛkɛhã a, ɔlɔlɛ nɩɩ ɛbɛlɛ mɔɔ nɩ Devidi ɩpɛ Dwonatanɩ yɩ odwokɔ yɛ ɩhanlɩ yɩ ma ɩvʋlɔlɩ yɩ kɛɛ yɩ anlima a. Na nɩ nwʋmɔ iáhyinyia kɛɛ bɛkɛyɛ nnwuakula mɔɔ bɔzʋ̃ eminlɛ ɔkʋ̃ nu ansaana bɛanwʋ bɔ nwʋ kɛɛ bɛdɩ mmenlima. (2 Sa. 1:26) Ɔhɔnwʋmmɔ mɔɔ bɛda nyɛlɩyɛ nɩɩ subanɩ tanɩ ali po nɩ, bɔkʋla bɔfʋlɔ bɛ kɛɛ mmenlima ma ɩyɛ bʋwɔ.—Ɛɣɛ. 18:9.
MAY 23-29
BAYƖBƲLƲ NU ANWƲNYIA | 2 SAMƲWƐLƖ 4-6
“Má Wu Kunlu Idu Kɛɛ Okowuli Gyehova Yɩ Mmɛla Zʋ”
w05 5/15 17 ¶8
Samʋwɛlɩ Buuku Mɔɔ Ɩtɔ Ɔzʋlɔ Anwɩ̃ Yi Nu Ndwokɔ Aditili
6:1-7. Ɩwɔ numɔ kɛɛ nɩ Devidi ɩwɔ adwɩnɩba dɩyɛ, naasʋ̃ mmɔdɩnɩ mɔɔ ɩwɔlɩ kɛɛ ɩkɛva Alɩka yɩ ikeziye pɔnkɔ hwiili zʋ nɩ ɩdʋlɩ Nyamɩnlɩ yɩ mmɛla, ɔzɔ ti ilili nkugu. (Ɛkɩ. 25:13, 14; Nɔ. 4:15, 19; 7:7-9) Dɔkʋ̃ sʋ̃, Alɩka yɩ mɔɔ Ɔza ɩzɔlɩ numɔ mɔɔ ɩkɛyɛ na ɩádɔlɩ azɩ nɩ ikile kɛɛ adwɩnɩba mɔɔ abiye ɩwɔ nɩ, ɩázɩnza mɔɔ Nyamɩnlɩ ikilaa ɔhʋanɩ kɛɛ yɛkɛyɛ nɩ.
w05 2/1 27 ¶20
Gyehova Ɩyɛ Mɔɔ Ɩtɩnɣɛ Eɣile Bela
Kakɛ kɛɛ nɩ ankɩ ɩsɛ kɛɛ Ɔza ɩnwʋ Alɩka yɩ nwʋ mmɛla yɩ bʋwɔ. Nɩ Alɩka yɩ ɩdɩ dasɩlɛ mɔɔ ikile kɛɛ Gyehova ɩwɔ bɛ avinli. Mmɛla yɩ nɩ ɩlalɩ yɩ ali petee kɛɛ, íni kɛɛ bɛzabɛ mɔɔ béni ɔnwʋmɔ ɔhʋanɩ nɩ bɛfa bɛ sa bɛkã Alɩka yɩ, na bɛvalɩ kɔkɔwɔlɛ bɛmanlɩ petee kɛɛ, abiyela mɔɔ ikowuli mmɛla yɩ zʋ nɩ, sa bokũ yi. (Nɔ. 4:18-20; 7:89) Meti, Alɩka yɩ mɔɔ ɩdɩ dɩyɛ nwanzanwanza mɔɔ nɩ bɛlɛ bɔkɔɔ dɩka fʋlɔ nɩ, nɩ ɩsɛ kɛɛ bɛfa yɩ anyɩnlɩbʋlʋ. Ɩda ali kɛɛ nɩ Ɔza ɩdɩ Levinii (ɩwɔ numɔ kɛɛ nɩ ɩ́dɩ ɔsɔfʋ dɩyɛ), naasʋ̃ nɩ ɩsɛ kɛɛ ɩnwʋ mmɛla yɩ nu bʋwɔ paa. Akʋ̃ sʋ̃, nɩ Alɩka yɩ iziye yɩ papa yɩ awudo alʋbɔ sʋ̃maa mɔɔ bɛzabɛ yɛ nɩ bekila ɔzʋlɔ a. (1 Sa. 6:20–7:1) Bɛmanlɩ Alɩka yɩ iziyeli ɛkɛnɩ kɛyɛ alʋbɔ 70 ansaana Devidi ɩyɛlɩ kɛɛ ɩkɛyɩ yɩ wɔ ɛkɛnɩ. Meti ɩda ali kɛɛ, ɔzʋmɩ Ɔza yɩ nnwuakula nu nɩ, nɩ izi Alɩka yɩ nwʋ mmɛla yɩ munwala.
w05 2/1 27 ¶21
Gyehova Ɩyɛ Mɔɔ Ɩtɩnɣɛ Eɣile Bela
Kɛmɔ yeli bɔmʋnlɩ yɛhã nɩ, Gyehova izi mɔɔ ɩwɔ yɛ ahʋnlɩnɩ nu. Iluwakɛɛ Bayɩbʋlʋ ɩkã kɛɛ, mɔɔ Ɔza ɩyɛlɩ nɩ ɩdɩ “aninyiammɔnwʋ” ti, ɩkɛyɛ kɛɛ Gyehova ɩnwʋnlɩ adwɩnɩ be mɔɔ ɩávata wɔ Ɔza nwʋ mɔɔ bɛákã nwʋmɔ odwokɔ wɔ Bayɩbʋlʋ yɩ nu. Asʋ̃ ebiye a nɩ ɩdɩ ahantanɩvʋlɔ mɔɔ nninyeni mɔɔ íni ɔnwʋmɔ ɔhʋanɩ kɛɛ ɩkɛyɛ nkʋ̃ la yɛ ɩyɛ a? (Ɛɣɛ. 11:2) Asʋ̃ Alɩka yɩ mɔɔ yɩ abusunwa behila ɔzʋlɔ mɔɔ sikalɛyɩ ili anyunumi wɔ bagua nu mmɩlɩ mɔ bɛlɛ bɔkɔ nɩ yɛ ɩmanlɩ ɩyɛlɩ ahantanɩ yɩ a? (Ɛɣɛ. 8:13) Asʋ̃ nɩ Ɔza íni dedi kʋlaa ma meti, izunzunli kɛɛ Gyehova ɩlɔ́kʋla ɩkɔwɔ Alɩka yɩ mɔɔ ɩdɩ dɩyɛ nwanzanwanza, mɔɔ nɩ ɩdɩ dasɩlɛ mɔɔ ikile kɛɛ Gyehova ɩwɔ bɛ avinli nɩ nwʋ banɩ a? Mɔɔ ɩdɩ bela nɩ, yɛkɔhʋla yekenyia anwʋlazʋ kɛɛ Gyehova ɩyɛlɩ mɔɔ ɩtɩnɣɛ. Ɩda ali kɛɛ Gyehova ɩnwʋnlɩ dɩyɛ be wɔ Ɔza yɩ ahʋnlɩnɩ nu, mɛyɩ ti mɔɔ iwuwalɩ yɩ ndɛnɩ ndɛndɛ zʋ zɛyɩ a.—Ɛɣɛ. 21:2.
Pɩbɛlɩ Bayɩbʋlʋ Yi Nu
w96 4/1 29 ¶1
Fá Wʋ Adɩsʋwa Tiã Gyehova Zʋ Mmɩlɩ Munwala
Kɛ bulombunli nɩ, nɩ ɩsɛ kɛɛ eyi nwʋ ɔzʋnɩ ɩba Devidi zʋ. Mɔɔ ɩyɛlɩ nɩ ikile kɛɛ, itwu mmɩlɩ be a, bɛzabɛ mɔɔ bɛ nɩɩ Gyehova wɔ abusunwawɔlɛ baaba po nɩ, bɔkɔhʋla bɛkɛyɛ nyɛlɩyɛ mɔɔ ɩávata wɔ bʋwabɩlɛ mɔɔ numɔ ɩyɛ ɛzɩzɩbɛ nu. Ahyɛasɩ yɩ, Devidi ɩvalɩ ɛya, na akʋ̃ yi kunlu iduli. (2 Sa. 6:8, 9) Bodweli ɩ nɩɩ Gyehova avinli abusunwawɔlɛ nɩɩ anwʋlazʋ mɔɔ ɩwɔ wɔ yi nu nɩ behilalɩ ɛzɩzɩbɛ ɛzɩzɩbɛ. Nɩ eyi ɩdɩ mmɩlɩ mɔ ɩdɩ kɛɛ mɔɔ ɩáfa yɩ adɩsʋwa itiã Gyehova zʋ mmɩlɩ mɔ iádidili yɩ ahyɛdɩ zʋ nɩ. Asʋ̃ ɩyɛ a, eyi be ɩkɔhʋla ɩkɔdʋ yɛ a? Sɛ yɛátiye Gyehova yɩ ɔhʋanɩhilelɛ, na yeyiyiaa nwʋmɔ ndwokɔ ɛzɩzɩbɛ a, asʋ̃ yɛfa nwʋmɔ ɔzʋnɩ yetiã Gyehova zʋ a?—Ɛɣɛ. 19:3.
MAY 30–JUNE 5
BAYƖBƲLƲ NU ANWƲNYIA | 2 SAMƲWƐLƖ 7-8
“Gyehova Ɩ Nɩɩ Devidi Yɛlɩ Nhyɩhyɛlɩyɛ”
w10 4/1 20 ¶3
“Wu Bulombunlililɛ Ikedimi”
Mɔɔ Devidi izunzunli nwʋmɔ wɔ yɩ ahʋnlɩnɩ nu nɩ ɩzɔlɩ Gyehova anyɩ. Meti mmɩlɩ mɔ Nyamɩnlɩ ɩyɛɛ Devidi yɩ nwʋ mɔɔ iduli ɩmanlɩ nɩ nwʋ dɩyɛ be ma ɩ nɩɩ yɩ nkɔmɩhyɛlɛ ikeyiyia nɩ, Ɩ nɩɩ Devidi yɛlɩ nhyɩhyɛlɩyɛ kɛɛ ɩkɛma abiye mɔɔ ikeli Devidi yɩ dɩyɛ daabaa nɩ ikevinde wɔ alɩhɩlɛ abusunwa nu. Neetanɩ ɩhanlɩ kezimɔ Nyamɩnlɩ ɩzʋ̃ yɩ ahʋnlɩnɩ nu ɩwɔlɩ anʋhʋba yɩ nwʋ odwokɔ ihileli Devidi kɛɛ: “Wu pika nɩɩ wu bulombunlililɛ ikedimi wɔ wʋ anyunu daabaa; na wʋ abulongua sʋ̃ ikedimi daabaa.” (Nkyɩkyɛmi 16) Aninyia yɛ lɛ Agyialɛvʋlɔ mɔɔ bɛhã yɩ nwʋ odwokɔ wɔ nhyɩhyɛlɩyɛ eyi nu kɛɛ Ikeli dɩyɛ daabaa yɩ a?—Ndw. 89:20, 29, 34-36.
w10 4/1 20 ¶4
“Wu Bulombunlililɛ Ikedimi”
Nɩ Gyisɛsɩ mɔɔ ɩzʋ̃ Nazɩlɛtɩ nɩ ɩdɩ Devidi yɩ tʋ enii. Mmɩlɩ mɔ bɔvʋlɔ be ɩkãã Gyisɛsɩ yɩ awʋbɔ nwʋ odwokɔ nɩ, ɩhanlɩ kɛɛ: “Niibenyia Nyamɩnlɩ ɩkɛva yɩ Zɩ Devidi yɩ abulongua nɩ ɩkɛma yɩ. Ikeli bulombunli wɔ Gyekɔpʋ yɩ awudo mmɩlɩ mɔ íni awielɩyɛ, na yi bulombunlililɛ ɩlɛ́ba awielɩyɛ kyɩ̃!” (Lk. 1:32, 33) Meti nhyɩhyɛlɩyɛ mɔɔ Nyamɩnlɩ nɩɩ Devidi yɛlɩ nɩ, ɩɣalɩ numɔ wɔ Gyisɛsɩ Kɩlayɩsɩ zʋ. Yɩ zɔ ti, anʋhʋba mɔɔ Nyamɩnlɩ ɩzʋ̃ yɩ ahʋnlɩnɩ nu ɩwɔlɩ nɩ yɛ ɩmanlɩ Gyisɛsɩ inyianlɩ ɔnwʋmɔ ɔhʋanɩ kɛɛ ikeli dɩyɛ daabaa, na kɛ enii yɛ ɩyɩlɩ yɩ kɛɛ bulombunli a. Ɩsɛ kɛɛ yɛma ɩbʋwa yɛ adwɩnɩ nu kɛɛ Nyamɩnlɩ yɩ anʋhʋba ɩkɛɣa numɔ mmɩlɩ munwala.—Ayɩ. 55:10, 11.
w14 10/15 10 ¶14
Fa Wʋ Ɛɣɛɛlɛ Wula Bulombunlililɛ Yi Nu Pindinyii
Gyehova ɩwɔlɩ ɔwɔkɩ Yizilaya Bulombunli Devidi anʋhʋba be. Bɔfʋlɔ ɔzɔ anʋhʋba yɩ kɛɛ Devidi nhyɩhyɛlɩyɛ. (Kɩnga 2 Samʋwɛlɩ 7:12, 16.) Gyehova ɩwɔlɩ anʋhʋba kɛɛ Mɛzaya yɩ nɩ ɩzʋ̃ Devidi yɩ tʋ maa bo nu yɛ ɩkɛɣa a. (Lk. 1:30-33) Akʋ̃ dɩyɛ nɩ Gyehova ibukoo nninyeni zʋ ngyɩkɩ̃ɩ̃ ngyɩkɩ̃ɩ̃ ma enii kɔnwʋ abusunwa mɔɔ Mɛzaya yɩ ɩzʋ̃ numɔ ɩkɛɣa. Gyehova ɩhanlɩ kɛɛ Devidi yɩ tʋ enii eyi yɛ “ɩdɩ yɩ dɩyɛ” kɛɛ ikeli Mɛzaya Bulombunlililɛ yɩ zʋ bulombunli a. (Izi. 21:25-27) Iluwa Gyisɛsɩ zʋ nɩ, Devidi yi bulombunlililɛ yɩ “ikedimi daabaa.” Nɔhʋanlɛ nu nɩ, Devidi yɩ tʋ enii eyi “ikedimi daabaa; na yɩ abulongua ɩkɛhyɛ dɩkɛɛ oyuwa.” (Ndw. 89:34-37) Yɛkɔhʋla yekenyia anwʋlazʋ kɛɛ, evinli bela ɩlɛ́ba Mɛzaya yɩ tumililɛ nwʋ kyɩ̃, na ɩkɛva nyilalɛ mɔɔ íni awielɩyɛ ɩkɛɣa!
Pɩbɛlɩ Bayɩbʋlʋ Yi Nu
it-2 206 ¶2
Awielɩyɛ Mmɩlɩ
Balamɩ Yɩ Nkɔmɩhyɛlɛ. Ansaana Yizilayamaa nɩ bɛbahɔ Anʋhʋba Azɩlɛ yɩ zʋ nɩ, yɛ nkɔmɩhyɛnii Balamɩ ɩhã ihileli Mowabɩ Bulombunli Balakɩ kɛɛ: “Bɩlá na mihile wʋ mɔɔ mmenii eyi [Yizilaya] bɛkɛva bɛkɛyɛ wʋ mmenii eɣile be. . . . Ɔhɔnlɔnwa be ɩzʋ̃ Gyekɔpʋ nu ikevinde, na Bulombunli panɩ be ikodwodwu wɔ Yizilaya nu. Na mɔɔ ɩdɩ bela nɩ ikowuwu Mowabɩ yɩ bʋma, na iabukobuko yɩ mma mmenyia mɔɔ bɛyɛ dede nɩ be ti awa.” (Nɔ. 24:14-17) Wɔ nkɔmɩhyɛlɛ yɩ numɔɣalɛ mɔɔ ili bɔmʋnlɩ yɩ nu nɩ, “ɔhɔnlɔnwa” yɩ igyĩ ɛkɛnɩ ɩma Bulombunli Devidi mɔɔ ilili Mowabɩmaa bɔ zʋ nkunimi nɩ. (2 Sa. 8:2) Meti yɛkɛhã a, “eɣile be” mɔɔ ɩwɔ nkɔmɩhyɛlɛ eyi nu sʋ̃ ɩwɔlɩ yɩ tʋ mmɩlɩ mɔ Devidi ɩɣa ɩyɛlɩ bulombunli nɩ. Na iluwakɛɛ Devidi igyĩ ɛkɛnɩ ɩma Gyisɛsɩ kɛɛ Mɛzaya Tumililɛ yɩ zʋ bulombunli nɩ ti, yɛkɔhʋla yɛkɛhã kɛɛ nkɔmɩhyɛlɛ eyi sʋ̃ ɩfalɩ Gyisɛsɩ nwʋ wɔ mmɩlɩ mɔ ikeli yɩ adamvʋlɔ zʋ nkunimi nɩ.—Ayɩ. 9:7; Ndw. 2:8, 9.
JUNE 6-12
BAYƖBƲLƲ NU ANWƲNYIA | 2 SAMƲWƐLƖ 9-10
“Devidi Ɩlalɩ Ɔlɔlɛ Kanyɩɩ Ali”
w06 6/15 14 ¶6
Ɔkɔhʋla Ekenyia Anyɩnlɩlelɛ
Devidi ɩhɛlɛlɩ kɛɛ: “Anyɩnlɩlelɛ yɛ lɛ enii mɔɔ ɩdwɩnɩ mɔɔ íni ebiye nɩ nwʋ.” Na ɩdʋwalɩ ɔzʋlɔ kɛɛ: “Gyehova ikele yi wɔ anwʋhyɩlɩlɛ mmɩlɩ nu. Gyehova ɩkɔwɔ yɩ nwʋ banɩ, na ɩama ɩawʋwa nnwʋanlɩ nu. Bɔkɔvʋlɛ yɩ kɛɛ abiye mɔɔ ɩwɔ anyɩnlɩlelɛ.” (Ndw. 41:1, 2) Ngokɛnwʋnlɛ mɔɔ Devidi ɩlalɩ yɩ ali ihileli Dwonatanɩ yɩ ɣa benyia Mɛfɩbohyɛtɩ mɔɔ nɩ ɩdɩ nnamvʋlɔ nɩ ɩma yɛnwʋ kezimɔ mɔɔ ɩsɛ kɛɛ yɛ nɩɩ bɛzabɛ mɔɔ béni ebiye nɩ di.—2 Sa. 9:1-13.
w05 5/15 17 ¶12
Samʋwɛlɩ Buuku Mɔɔ Ɩtɔ Ɔzʋlɔ Anwɩ̃ Yi Nu Ndwokɔ Aditili
9:1, 6, 7. Devidi ilili yɩ anʋhʋba zʋ. Meti ɩsɛ kɛɛ amɩyɛ sʋ̃ yɛbɔ mmɔdɩnɩ yedidili yɛ anʋhʋba zʋ.
w02 2/15 14 ¶10
Begyinanlɩ Ɛyɛkɛ Mɔɔ Nɩ Bɛtɩɩ Wɔ Bɔ Nnwʋnlamɩ Nu Nɩ Yi Munwa
Alʋbɔ be mɛda nɩ, Bulombunli Devidi iluwalɩ ɔlɔlɛ kezile mɔɔ nɩ ɩwɔ ɩma Dwonatanɩ nɩ zʋ ɩlalɩ kunlumiba ali ihileli Mɛfɩbohyɛtɩ. Devidi ɩlanɩnlɩ Sɔɔlʋ yɩ azɩlɛ yɩ munwala ɩmanlɩ Mɛfɩbohyɛtɩ, na ɩmanlɩ Sɔɔlʋ yɩ sʋ̃mɩvʋlɔ Zayɩba ihilalɩ azɩlɛ yɩ zʋ ɩmanlɩ yɩ. Devidi ɩhanlɩ ihileli Mɛfɩbohyɛtɩ kɛɛ: “Ekeli alɩyɛ wɔ mʋ ɔbʋnlɩ zʋ daabaa.” (2 Sa. 9:6-10) Pɩlazunɛ bela íni nwʋmɔ kɛɛ, ngokɛnwʋnlɛ mɔɔ Devidi ɩlalɩ yɩ ali ihileli Mɛfɩbohyɛtɩ nɩ, ɩmanlɩ ɛyɛkɛ mɔɔ nɩ Mɛfɩbohyɛtɩ ɩtɩ iluwakɛɛ ɩdɩ nnamvʋlɔ nɩ ɩhanlɩ azɩ. Kilá ozumalɛdɩyɛ kezile ɔkʋ̃! Ɩsɛ kɛɛ amɩyɛ sʋ̃, yɛda kunlumiba ali yekile bɛzabɛ mɔɔ bɛtɩɩ ɛyɛkɛ wɔ bɔ nnwʋnlamɩ nu nɩ.
Pɩbɛlɩ Bayɩbʋlʋ Yi Nu
it-1 266
Abɔdwɩ
Wɔ ɔwɔkɩ nɩ, bɛzabɛ mɔɔ nɩ bɛda Sɛnzɛnɩ Avindelɩyɛ ɔfʋã nu mɔɔ nɩ Yizilayamaa kɩnla nwʋmɔ nɩ, nɩ bobu benyia mɔɔ ɩlɛ abɔdwɩ nɩ kɛɛ ɩwɔ animinyiamɩ. Wɔ Nyamɩnlɩ yɩ mmɛla mɔɔ ɩva ɩmanlɩ Yizilayamaa yɩ nu nɩ, ɩhã ihileli bɛ kɛɛ áma bɛyɩ “bɛ azʋ̃ nwʋ eɣinli,” kile kɛɛ eɣinli mɔɔ ɩwɔ bɛ azʋ̃ nɩɩ bɛ anyɩ avinli nɩ. Na áma botudua bɛ abɔdwɩ sʋ̃ zʋ. (Lɛv. 19:27; 21:5) Pɩlazunɛ bela íni nwʋmɔ kɛɛ, nɩ ɩdɩ dɩyɛ mɔɔ awʋzʋmɩzʋ̃mɩnlɛmaa be bɛyɛ wɔ bɔ ɔzʋ̃mɩnlɛ nu.
JUNE 13-19
BAYƖBƲLƲ NU ANWƲNYIA | 2 SAMƲWƐLƖ 11-12
“Áma Ɛma Akɔnɔ Tanɩ Ɩhyɛ Wʋ Zʋ”
w21.06 17 ¶10
Sa Ɔkʋla Ede Wʋ Nwʋ Wɔ Setanɩ Yɩ Ɛhanɩ Nu!
Anyɩnlɩbʋlʋ ɩmanlɩ Bulombunli Devidi yɩ ɛɣɛɛlɛ ivili mɔɔ Gyehova ɩyɛ ɩma yɩ nɩ. Na nɩ Gyehova ɩwʋwa yɩ ma ili yɩ adamvʋlɔ sʋ̃maa zʋ nkunimi, ɩma inyia anwʋnyiadɩ nɩɩ animinyiamɩ. Devidi yɩ anyɩ ɩzɔlɩ mɔɔ Nyamɩnlɩ ɩyɛlɩ ɩmanlɩ yɩ nɩ na ɩhanlɩ nwʋmɔ odwokɔ po kɛɛ, “bɔzʋnɩ sʋ̃maa mɔɔ mʋlɔ́kʋla mikedinyia.” (Ndw. 40:5) Naasʋ̃ mmɩlɩ be, Devidi yɩ ɛɣɛɛlɛ ivili mɔɔ Gyehova ɩyɛ ɩma yɩ nɩ. Yɩ anyɩ ɩásɔ mɔɔ nɩ ɩwɔ nɩ. Nɩ ɩpɛɛ ebiye ɩkɛhɩnla nwʋ. Ɩwɔ numɔ kɛɛ nɩ Devidi yɩ yɩ mmɔ zʋnɩ dɩyɛ, naasʋ̃ inyianlɩ benyia fʋlɔ yɩ yɩ nwʋ akɔnɔ tanɩ wɔ yɩ ahʋnlɩnɩ nu. Bɔfʋlɔ baalɛ yɩ Baatɩ-hyiiba na yi hũ sʋ̃ yɛ lɛ Yulaya mɔɔ ɩdɩ Hɛtɩnii nɩ. Angʋmidi ti, Devidi nɩɩ Baatɩ-hyiiba lalɩ ma ɩɣɩnzɛlɩ. Kɛ agyiahʋnlɩ nkʋ̃ la yɛ bɛzɩkɛlɩ o, mfomi Devidi ɩyɛlɩ nhyɩhyɛlɩyɛ ma bohunli Yulaya! (2 Sa. 11:2-15) Devidi yɩzayɩ, kɛ nɩ yɩ adwɩnɩ ise yi a? Asʋ̃ nɩ yɩ adwɩnɩ ɩyɛ yɩ kɛɛ Gyehova ɩlɔ́nwʋ yɩ a? Gyehova yɩ sʋ̃mɩvʋlɔ nɔhʋanlɛvʋlɔ eyi ɩmanlɩ angʋmidi nɩɩ anyɩnlɩbʋlʋ inyianlɩ yɩ zʋ tumi na idualɩ ɔzʋlɔ mma ɛyɛkɛ ɛyɛkɛ. Naasʋ̃ anyɩnlɩlelɛ odwokɔ yɛ lɛ kɛɛ mmɩlɩ be mɛda nɩ, Devidi ileli yɩ mfʋmɩ idianlɩ nu na inlunli yɩ nwʋ. Mɔwʋ dɩyɛ kila kezimɔ yɩ anyɩ ikele mmɩlɩ mɔ Gyehova ɩvalɩ yɩ tanɩ ɩhyɛlɩ yɩ nɩ!—2 Sa. 12:7-13.
w19.09 17 ¶15
Mɩnla Ti Mɔɔ Yɛzʋ̃ Yɛ Ahʋnlɩnɩ Nu Yɛfa Yɛ Nwʋ Yewula Gyehova Yɩ Tʋ a, Na Kɛ Yɛyɛ Yɩ Yese a?
Gyehova ɩyɩlɩ Devidi kɛɛ ɩyɛ́ yɩ abusunwa yi ti, na izia ɩyɩlɩ yɩ sʋ̃ kɛɛ Yizilaya manlɩ yɩ munwala bɛ anyunulilɛvʋlɔ. Iluwakɛɛ nɩ Devidi ɩdɩ bulombunli ti, nɩ ɩwɔ tumi paa. Itwu mmɩlɩ be a, nɩ ɩáva yi tumi idi egyima bʋwɔ na ɩmanlɩ ɩyɛlɩ tanɩ mɔɔ numɔ ɩyɛ ɔnlʋmɔ. (2 Sa. 11:14, 15) Naasʋ̃ ɩhanlɩ yɩ nwʋ azɩ iwulalɩ Gyehova yɩ tʋ na ileli ɛdɩnyɩanlɛ mɔɔ ɩva ɩmanlɩ yɩ nɩ idianlɩ numɔ. Ɩwɔlɩ Gyehova mpayɩ na ɩhanlɩ yɩ ahʋnlɩnɩ nu odwokɔ ihileli yi. Akʋ̃ sʋ̃, ɩyɛlɩ mɔɔ ɩkɔhʋla bela kɛɛ ikediye Gyehova yɩ fʋlɔdulɛ. (Ndw. 51: 1-4) Dɔkʋ̃ sʋ̃, ɩhanlɩ yɩ nwʋ azɩ idiyeli fʋlɔdulɛba mɔɔ mmenyia bɛva bɛmanlɩ yɩ nɩ, na idiyeli mmaalɛ bɛ dɩyɛ sʋ̃. (1 Sa. 19:11, 12; 25:32, 33) Devidi izumanlɩ dɩyɛ be wɔ mfʋmɩ mɔɔ ilili yi nu, na ɩvalɩ Gyehova yɩ ɔzʋ̃mɩnlɛ ilili bɔmʋnlɩ wɔ yɩ ɛbɩlawɔlɛ nu.
w18.06 17 ¶7
Má Nyamɩnlɩ Yɩ Mmɛla Nɩɩ Yi Egyinalɛzʋ-Ndwokɔ Nɩ Ɩdɩdɩ Wʋ Ti Ɔwʋwaba
Iáhyinyia kɛɛ yebuli Nyamɩnlɩ yɩ mmɛla zʋ na yɛnwʋ amanɩyɛ ansaana yɛazuma dɩyɛ be wɔ nu. Abiyemmɔ belili mfʋmɩ ma bɛhɛlɛlɩ nwʋmɔ odwokɔ wɔ Bayɩbʋlʋ yi nu na sa yɛkʋla yesuma dɩyɛ be wɔ nu. Ɛɣɛlɛwulɛ 1:5 ɩkã kɛɛ: “Nɣɛlɛbɛvʋlɔ itiye na inyia ɔhʋanɩhilelɛ sʋ̃maa.” Nɔhʋanlɛ nu nɩ, sɛ yɛkɩnga ndwokɔ mɔɔ izizili mɔɔ bɛhɛlɛ nwʋmɔ odwokɔ wɔ Bayɩbʋlʋ yɩ nu na yɛdwɩnɩndwɩnɩ nwʋ a, yekenyia ɔhʋanɩhilelɛ mɔɔ ɩtɛla ebiyela wɔ Nyamɩnlɩ ɛkɛnɩ. Yɛvá Bulombunli Devidi kɛɛ ndianwʋ. Mmɩlɩ mɔ iwuli yɩ anyɩ igualɩ Gyehova yɩ ahyɛdɩ zʋ na ɩ nɩɩ Baatɩ-hyiiba bɛzɩkɛlɩ agyiahʋnlɩ nɩ, kila ɛyɛkɛ mɔɔ ɩdɩlɩ. (2 Sa. 12:7-14) Sɛ yɛkɩnga ɔzɔ odwokɔ eyi na yɛdwɩnɩndwɩnɩ nwʋ a, ebiye a yekeɣizia yɛ nwʋ kɛɛ: ‘Mɩnla yɛ ankɩ Bulombunli Devidi ɩkɔhʋla ɩkɛyɛ na ɩ nɩɩ Baatɩ-hyiiba bɛázɩkɛlɩ agyiahʋnlɩ na ama ɩádɩlɩ ɛyɛkɛ sʋ̃maa a? Sɛ dɩyɛ be ɔzɔ itwee mɩ ikehila a, asʋ̃ mikenyia akɛnɣazɩzɩbɛ mʋkɔhwɩ̃ mʋ nwʋ wɔ nwʋ a? Mikenɣiandi kɛmɔ Dwosefi inɣiandinli anzɛnyɩɩ mikeyiaki yiaki mʋ nwʋ kɛmɔ Devidi ɩyɛlɩ yɩ a?’ (Gyn. 39:11-15) Sɛ yɛdwɩnɩndwɩnɩ atɩɩtɩɩ nɩɩ amanɩyɛnwʋnlɛ mɔɔ tanɩ ɩfa ɩba nwʋ a, ɩkɔhʋla ɩkɛma yekezi yɛ adwɩnɩ pi na ‘yeahyi tanɩ.’
Pɩbɛlɩ Bayɩbʋlʋ Yi Nu
it-1 590 ¶1
Devidi
Nɩ Gyehova yɩ anyɩ iduwa yɩ, na ɩmanlɩ tanɩ mɔɔ izili nɩ munwala ɩlalɩ ali. Sɛ Gyehova ɩmanlɩ ɔhʋanɩ kɛɛ enii igyiná Mosisi yɩ Mmɛla yɩ zʋ iwuwa Devidi nɩɩ Baatɩ-hyiiba ndɛnɩ a, mɛyɩ ankɩ sa bokũ bɛzabɛ anwɩ̃ yɩ munwala. Na pɩlazunɛ bela íni nwʋmɔ kɛɛ, kuakula mɔɔ nɩ bɛɣɩnzɛɛ yɩ sʋ̃, ankɩ sa bokũ yi bɛkɩnla yɩ maamɩ nwʋ. (Dit. 5:18; 22:22) Naasʋ̃, Gyehova yɩzayɩ ilili odwokɔ yɩ nwʋ egyima, na ɩlalɩ ngokɛnwʋnlɛ ali ihileli Devidi iluwa Bulombunlililɛ yɩ nwʋ nhyɩhyɛlɩyɛ yɩ ti. (2 Sa. 7:11-16) Pɩlazunɛ bela íni nwʋmɔ kɛɛ nɩ Devidi yɩzayɩ ankasa sʋ̃ ɩda ngokɛnwʋnlɛ ali ikile mmenii mvʋlɔ (1 Sa. 24:4-7; fá tindiã Gye. 2:13 nwʋ.) Akʋ̃ sʋ̃, Nyamɩnlɩ ɩnwʋnlɩ bɛ ngokɛ iluwakɛɛ nɩ bonlu bɔ nwʋ wɔ bɛ tanɩ nwʋ. (Ndw. 51:1-4) Naasʋ̃ ɩáma bɛfa bɔ nwʋ bedi wɔ bɛ tanɩ yɩ nwʋ azʋ̃nlɩhwɩnlɛ munwala nwʋ. Meti, Gyehova iluwa nkɔmɩhyɛnii Neetanɩ zʋ ɩhanlɩ kɛɛ: “Mɩkɛma mmuzulo mɔɔ ɩzʋ̃ wʋzawʋ wʋ awudo ɩkɛɣa wʋ zʋ.”—2 Sa. 12:1-12.
JUNE 20-26
BAYƖBƲLƲ NU ANWƲNYIA | 2 SAMƲWƐLƖ 13-14
“Amʋnɔnʋ Yɩ Angʋmidi Yi Ɩvalɩ Atɩɩtɩɩ Ɩɣalɩ”
it-1 32
Absɔlɔmɩ
Mɔɔ Ihunli Amʋnɔnʋ. Absɔlɔmɩ yɩ anlima baalɛ Teemalɩ yɩ anwʋpɩkɛ ti, yɩ anlima benyia ebani Amʋnɔnʋ mɔɔ ɩsʋnɩ yɩ maamɩ nɩ inyianlɩ yɩ nwʋ akɔnɔ. Amʋnɔnʋ ɩyɛlɩ yɩ nwʋ kɛɛ mɔɔ yɩ nwʋ ɩbayɩ, na ɩmanlɩ bɔvʋlɔlɩ Teemalɩ ma ɩɣalɩ yɩ awudo kɛɛ ɩɣa ɩyɛ alɩyɛ ɩma yɩ, na ɩhyɛlɩ yɩ ɩ nɩɩ yɩ lalɩ. Ɔlɔlɛ mɔɔ nɩ Amʋnɔnʋ ise ɩwɔ ɩma Teemalɩ nɩ, ɩlanɩnlɩ ɛdanɩnlɛ mɔɔ numɔ ɩyɛ ɛzɩzɩbɛ ɛzɩzɩbɛ paa ma iduduli yi kɛɛ ɩhɔ́ po. Teemalɩ ɩvalɩ nzʋnɩ igualɩ yi ti zʋ na izuanɩnlɩ yɩ atalɩ mɔɔ nɩ ɩma ɩda ndwɩ kɛɛ bulombunli yɩ ɣa baalɛ amunli yɩ nɩ nu, na Absɔlɔmɩ ɩɣa iyiyialɩ yɩ. Ndɛndɛ la yɛ Absɔlɔmɩ ɩnwʋnlɩ kɛɛ, yɩ anlima Amʋnɔnʋ yɩ nwʋ wɔ odwokɔ yi nu, iluwakɛɛ nɩ ɩla ɔzɔ akɔnɔ tanɩ yɩ nwʋ nyɛlɩyɛ nɩ be ali kyɩ̃. Absɔlɔmɩ ɩhã ihileli yɩ anlima baalɛ yɩ kɛɛ ɩhã yi munwa idiã nu, na ɩmanlɩ dɩka yɩ ma ɩlalɩ wɔ yɩ awudo.—2 Sa. 13:1-20.
w17.09 5 ¶11
Hyɛ́ Wʋ Nwʋ Zʋ
Bayɩbʋlʋ yɩ ɩma yɛnwʋ mmenii mɔɔ bɛákʋla bɛhyɛ bɔ nwʋ zʋ wɔ adwomanlɩwɔlɛ nwʋ na eyi ɩdɩ kɔkɔwɔlɛ ɩma yɛ. Isiá sʋ̃ ɩma yɛnwʋ kɛɛ, sɛ abiye ɩáhyɛ yɩ nwʋ zʋ wɔ adwomanlɩwɔlɛ nwʋ a, mɔɔ ɩzʋ̃ numɔ ɩba nɩ ɩdɩbɛ donwuu. Ɛɣɛlɛwulɛ yi ti 7 ɩkã abɩlantɩyɛ be mɔɔ ízi nɣɛlɛbɛ nwʋ odwokɔ. Sɛ abiye iyiyia ndwokɔ ɛzɩzɩbɛ mɔɔ Kim iyiyialɩ nɩ be a, ɩsɛ kɛɛ ɩdwɩnɩndwɩnɩ abɩlantɩyɛ yɩ odwokɔ nwʋ paa. Akʋ̃ sʋ̃, dwɩnɩndwɩnɩ mɔɔ Amʋnɔnʋ ɩyɛlɩ nɩɩ ndwokɔ ɛzɩzɩbɛ mɔɔ ɩzʋ̃ mɔɔ ɩyɛlɩ nu ɩɣalɩ yɩ nwʋ. (2 Sa. 13:1, 2, 10-15, 28-32) Awʋvʋlɔ, sɛ bɛyɛɛ abusunwa ɔzʋ̃mɩnlɛ a, bɔkɔhʋla bokozunzu Bayɩbʋlʋ nu ndwokɔ mɔɔ yɛhã nwʋmɔ odwokɔ eyi nwʋ. Eyi ɩkɔwʋwa bo nnwuakula ma bɔkɔnwʋ mɔɔ ɩsɛ kɛɛ bɛyɛ wɔ baalɛ nɩɩ benyia bɔ ɔhɔnwʋvalɛ nwʋ na ama bɛahʋla bɛahyɛ bɔ nwʋ zʋ.
it-1 33 ¶1
Absɔlɔmɩ
Alʋbɔ anwɩ̃ mɛda nɩ, awuwalilɛ mmɩlɩ nɩɩ mmɩlɩ mɔ botuduwa Mmunwuanɩ nwʋ eɣinli idwuli, na Absɔlɔmɩ ɩdʋlɩ ɔbʋnlɩ kezile wɔ Baalɩ-heezɔ, kɛyɛ kilomita 22 (mayɛlɩ 14) wɔ Gyelusalamɩ Manlɩ Tisʋlɔ ɔfʋã nu. Ɩdʋlɩ salɛ ɩvʋlɔlɩ bulombunli yɩ mma mmenyia yɩ nɩɩ Devidi yɩzayɩ sʋ̃. Mmɩlɩ mɔ yɩ papa (Devidi) ɩhanlɩ kɛɛ ɩlɔ́kʋla ɩkɛɣa ɔbʋnlɩdʋlɛ yɩ tʋ nɩ, Absɔlɔmɩ ɩhɔlɩ ɔzʋlɔ ɩhyɛlɩ yɩ kɛɛ ɩmá yɩ abakanɩ Amʋnɔnʋ ɩɣɩla mfomi. (Ɛɣɛ. 10:18) Mmɩlɩ mɔ ɔbʋnlɩdʋlɛ yɩ ɩkɔlɩɩ ɔzʋlɔ mɔɔ “nwanyɩ ɩma (Amʋnɔnʋ) idii fɛlɛkʋ̃ wɔ yɩ ahʋnlɩnɩ nu nɩ,” Absɔlɔmɩ ɩhyɛlɩ yɩ azʋ̃mɩvʋlɔ yɩ kɛɛ bohũ yi. Meti, bulombunli yɩ mma mmenyia mɔɔ nɩ bɛha nɩ beɣiandinli bɛɣalɩ Gyelusalamɩ, na Absɔlɔmɩ ɩ nɩɩ yɩ nlabenyia mɔɔ ɩzʋ̃ Siliya nɩ beɣiandinli bɔhɔlɩ Gɛhyɛ bulombunli manlɩ nu wɔ Galilii Ngyemvile yi Sɛnzɛnɩ ɔfʋã nu. (2 Sa. 13:23-38) “Afɩna” mɔɔ nkɔmɩhyɛnii Neetanɩ ɩhanlɩ kɛɛ ɩkɛɣa Devidi yɩ “awudo” nɩ yɛ ɩɣa yɩ a, na nɩ ɩkɔdʋwa ɔzʋlɔ yɩ nnwʋanlɩ eɣile yi munwala.—2 Sa. 12:10.
Pɩbɛlɩ Bayɩbʋlʋ Yi Nu
g04 12/22 8-9
Mɔɔ Ɩma Abiye Yɩ Nwʋ Ɩyɛ Pɩkɛ Ankasa
Yɛvá Devidi yedindiã yɩ ɣa Absɔlɔmɩ nwʋ. Ɩwɔ numɔ kɛɛ nɩ yɩ nwʋ ɩyɛ pɩkɛ dɩyɛ, naasʋ̃ nɩ yɩ subanɩ ɩáyɛ pɩkɛ kʋlaa. Bayɩbʋlʋ ɩkã yɩ nwʋ odwokɔ kɛɛ: “Wɔ Yizilaya munwala nɩ, nɩ benyia bela íni ɛkɛ mɔɔ iluwa yɩ anwʋpɩkɛ ti bɛkamvʋ yɩ bɛtɛla Absɔlɔmɩ. Ɔzʋmɩ yɩ agyia tʋ kɔbʋmɩ yi ti avinli nɩ, nɩ mfʋmɩ bela íni yɩ nwʋ.” (2 Sa. 14:25) Naasʋ̃ akɔnɔ tanɩ ibinyia binyianlɩ Absɔlɔmɩ ma ɩdɩlɩ yɩzayɩ yɩ papa zʋ atunwa mɔɔ ɩkɛyɛ na iale yɩ bulombunlililɛ wɔ yɩ sa nu. Ɩ nɩɩ yɩ papa yɩ nwɩwɩmaa po lɩlalɩ. Eyi ti, Nyamɩnlɩ ɩvalɩ yɩ nwʋ ɛya na iwuli owulo ɛyɛkɛ ɛyɛkɛ.—2 Sa. 15:10-14; 16:13-22; 17:14; 18:9, 15.
Asʋ̃ wʋ anyɩ ideli Absɔlɔmɩ yɩ subanɩ yɩ nwʋ a? Anhã. Sɛ osunzu subanɩ mɔɔ ɩlalɩ yɩ ali munwala nwʋ a, ɛlɛ́pɛ yɩ kɛɛ ekeɣike yi. Ɩwɔ numɔ kɛɛ nɩ yɩ nwʋ ɩyɛ pɩkɛ dɩyɛ, naasʋ̃ ibigyia bigyialɩ yɩ nwʋ sʋlɔ, iádi nɔhʋanlɛ na ɩhɔ iwieli ɛzɩkɛlɛ nu. Naasʋ̃ ndianwʋ sʋ̃maa wɔ Bayɩbʋlʋ yi nu mɔɔ ɩfalɩ mmenii mɔɔ bɛdɩ nɣɛlɛbɛmaa na bɔ nwʋ ɩyɛ pɩkɛ nwʋ, naasʋ̃ bɛákã bɛ anwʋpɩkɛ nwʋ odwokɔ. Eyi ɩda ali petee kɛɛ, mɔɔ ihyinyia paa yɛ lɛ subanɩba mɔɔ ɩma abiye yɩ nwʋ ɩyɛ pɩkɛ ankasa nɩ.
JUNE 27–JULY 3
BAYƖBƲLƲ NU ANWƲNYIA | 2 SAMƲWƐLƖ 15-17
“Ahantanɩ Ti Absɔlɔmɩ Ɩdɩlɩ Atunwa”
it-1 860
Bɔmʋnlɩlilɛvʋlɔ
Sɛ nɩ abiye mɔɔ ɩdɩ dɩhɩlɛ ɩkɔɔ dɩka be a, nɩ bɛta bɛma abiyemmɔ bedi yɩ pɔnkɔ hwiili yɩ anyunu bɔmʋnlɩ, na bɔkɔ bɔbɔ yɩ ɛɣalɩyɛ nɩ nwʋ ɛlawulo, besiyeziye ɔhʋanɩ nu na bɔbʋwa yɩ sʋ̃ wɔ ahʋanɩ azʋlɔtʋ nu. (1 Sa. 8:11) Mmɩlɩ mɔ Absɔlɔmɩ nɩɩ Adonayɩgya bɛdɩlɩ atunwa nɩ, iluwakɛɛ nɩ bɛpɛ kɛɛ bɛhyɛ bɔ nwʋ animinyiamɩ na mmenii mvʋlɔ bu bɛ nɩ ti, bɛmanlɩ mmenii 50 duli ndɔlɔnwa lili bɛ awɔnkɔ hwiili yi anyunu.—2 Sa. 15:1; 1 Aw. 1:5.
w12 7/15 13 ¶5
Sʋ̃mɩ Nyamɩnlɩ Mɔɔ Ɩma Fanwʋdi Nɩ
Mmenii sʋ̃maa wɔ Bayɩbʋlʋ yi nu mɔɔ benyianlɩ mmenii mvʋlɔ bɔ zʋ tumi wɔ ɔhʋanɩ tanɩ zʋ. Bo nu ɔkʋ̃ yɛ lɛ Bulombunli Devidi yɩ ɣa Absɔlɔmɩ. Nɩ Absɔlɔmɩ ɩdɩ benyia mɔɔ yɩ nwʋ ɩyɛ pɩkɛ baaba. Naasʋ̃ aɣinzi yi, ɩyɛlɩ yɩ dɩyɛ kɛɛ Setanɩ. Ɩmanlɩ anyɩnlɩbʋlʋ ilili yɩ ahʋnlɩnɩ nu na ɩyɛlɩ mɔɔ ɩkɔhʋla bela kɛɛ yɩ sa ɩkɛhã yɩ papa yɩ abulongua nɩ. Nɩ íni nwʋmɔ ɔhʋanɩ po kɛɛ ikeli dɩyɛ. Naasʋ̃ iluwakɛɛ nɩ Absɔlɔmɩ ɩpɛ kɛɛ idi bulombunli nɩ ti, ɩhyɛlɩda ɩyɛlɩ yɩ nwʋ kɛɛ ɩpɛ yɩ ɔhɔnwʋmmɔ Yizilayamaa bo odwokɔ. Na ɩlahɩlɩlɩ mmenii yi ma benyianlɩ adwɩnɩ kɛɛ bulombunli Devidi ɩáva bo odwokɔ ɩyɛ hwɩɩ. Mɔɔ Abɔnsamɩ ɩyɛlɩ wɔ Ɛdɩnɩ yi be la yɛ Absɔlɔmɩ ɩyɛlɩ a. Ɩyɛlɩ yɩ nwʋ kɛɛ ɩdwɩnɩ mmenii nwʋ, naasʋ̃ mmɩlɩ ɔkʋ̃ yɩ la nɩ ɩsɩkɛɛ yɩ papa yi dima.—2 Sa. 15:1-5.
it-1 1083-1084
Hibʋlɔnʋ
Alʋbɔ sʋ̃maa mɛda nɩ, Devidi yɩ ɣa Absɔlɔmɩ ɩza ɩɣalɩ Hibʋlɔnʋ, na ɛkɛnɩ yɛ iduli pɔkɔ mɔɔ nɩ izi kɛɛ ikoluwa ɔhʋanɩ tanɩ zʋ ikele yɩ papa yɩ bulombunlililɛ wɔ yɩ sa nu nɩ nwʋ agyiakɛ a. (2 Sa. 15:7-10) Ebiye a sianti mɔɔ Absɔlɔmɩ ɩhɔlɩ ɛkɛnɩ yɛ lɛ kɛɛ nɩ bezi wɔ abakɔsɛmɩ nu kɛɛ nɩ Hibʋlɔnʋ ɩdɩ Dwuuda twonwa kezile, na nɩ ɩdɩ Absɔlɔmɩ yɩ twonwa zʋ sʋ̃. Meti mɔɔ mmɩlɩ mɔ Absɔlɔmɩ ɩpɩɩ ikele yɩ papa yɩ Bulombunlililɛ yɩ wɔ yɩ sa nu nɩ, ɩwɔlɩ yɩ tʋ wɔ ɛkɛnɩ yɩ a. Aɣinzi yi, Devidi yɩ nla, Bulombunli Ɣɩlɛhobʋwamɩ izia ɩyɩkyɩlɩ Hibʋlɔnʋ. (2 Mm. 11:5-10) Mmɩlɩ mɔ Babilɔnʋmaa bɛɣa bɛzɩkɛlɩ Dwuuda na Dwuumaa nɩ bɔzʋ̃ akɛlɛzʋ̃mɩnlɛ nu bɛɣalɩ yɩ mɛda nɩ, bo nu be bezia bɛɣa bɔwʋwalɩ Hibʋlɔnʋ (Kɩlɩyatɩ-aba).—Ne. 11:25.
Pɩbɛlɩ Bayɩbʋlʋ Yi Nu
w18.08 6 ¶11
Asʋ̃ Ezi Nɔhʋanlɛ Mɔɔ Ɩwɔ Nu a?
Yɛzayɛ sʋ̃, sɛ mmenii kã yɛ nwʋ odwokɔ mɔɔ ɩáyɛ nɔhʋanlɛ ankasa a, ebiye a yɛkɛdɩ nɣanlɩ kɛɛ bɛ nɩɩ yɛ iádi yi bʋwɔ. Yehilá Bulombunli Devidi nɩɩ Mɛfɩbohyɛtɩ bo odwokɔ yɩ. Devidi ɩlalɩ kunlumiba ali ihileli Mɛfɩbohyɛtɩ na izia ɩvalɩ yɩ nlabenyia Sɔɔlʋ yɩ azɩlɛ munwatĩĩ ɩmanlɩ yɩ. (2 Sa. 9:6, 7) Naasʋ̃ aɣinzi yi, Devidi ɩdɩlɩ odwokɔ be ɩvalɩlɩ Mɛfɩbohyɛtɩ nwʋ mɔɔ nɩ ɩ́dɩ nɔhʋanlɛ. Ɩápɩbɛlɩ odwokɔ yi nu yɛ ileli Mɛfɩbohyɛtɩ yɩ azɩlɛ munwala wɔ yɩ sa nu a. (2 Sa. 16:1-4) Aɣinzi yi mɔɔ ɩ nɩɩ Mɛfɩbohyɛtɩ dɩndɛnlɩ nɩ, Devidi ɩnwʋnlɩ kɛɛ ili mfʋmɩ meti izia ɩvalɩ Mɛfɩbohyɛtɩ yɩ azɩlɛ yɩ ɔfʋã be ɩmanlɩ yɩ. (2 Sa. 19:24-29) Sɛ Devidi inyianlɩ abʋtalɩ ɩbɩbɛlɩ nɔhʋanlɛ mɔɔ ɩwɔ odwokɔ yi nu yɛɛ ɩápɩlɩ yɩ nwʋ ikyina awohwi odwokɔ zʋ isi pɔkɔ a, ankɩ iábu ɔzɔ ndɛnɩhyɩyɩalɛ yɩ.