Ɛbɩlawɔlɛ Nɩɩ Dasɩlɛlilɛ Dɩyɛzumanlɛ Kɛlɛta Nwʋ Awuuku Nu Ɛbɩbɛlɛ
© 2023 Watch Tower Bible and Tract Society of Pennsylvania
NOVEMBER 6-12
BAYƖBƲLƲ NU ANWƲNYIA | DWOOBU 13-14
“Sɛ Enii Wu a, Asʋ̃ Ɩkɔwʋwa Azɩ Dɔkʋ̃ a?”
w99 10/15 3 ¶1-3
Kezimɔ Adasamaa Bɩbɛ Nnwʋanlɩ Tɩndɩnlɩ
ƖWƆ numɔ kɛɛ bɛhɛlɛlɩ odwokɔ eyi kɛyɛ alʋbɔ 3,500 yɛ dɩ dɩyɛ, naasʋ̃ abiyemmɔ bɛále betiã numɔ kɛɛ enii yɩ nnwʋanlɩ dɩ sikalɛ. Mmenii anyɩ iáleli nwʋmɔ kɛɛ bɔkɔwʋwa azɩ wɔ mmɩlɩ sikalɛ nu na akʋ̃ bɛayɛ mmɩlɩɣa na bɛawuwu. Ɩzɔ ti, ɔzʋ̃mɩ ɔwɔkɩ yɛ adasamaa bɩbɛ ahʋanɩ azʋlɔtʋ mɔɔ ɩkɛma bɔkɔwʋwa azɩ bɛkɛhyɛ a.
Wɔ Dwoobu yɩ mmɩlɩ zʋ nɩ, nɩ Igyibitimaa bedi nnamɩ bɔ nwɛ mɔɔ adwɩnɩ yɛ lɛ kɛɛ ɩkɛma bɔkɔwʋwa azɩ bɛkɛhyɛ. Naasʋ̃ yi munwala mɛda nɩ ɩákɔ isi hwɩɩ. Aɣinzi yi, mmenii be wɔlɩ mmɔdɩnɩ kɛɛ bokoluwa ɔhʋanɩ be zʋ bɛkɛyɛ awudo be mɔɔ ɩkɛma enii kɔwʋwa azɩ kɛhyɛ. Nɩ ɔzɔ mmenii nɩ bo nu sʋ̃maa la bede bedi kɛɛ, sɛ bɛpɩbɛ ɔhʋanɩ be boduwa zʋ bɛdanɩ bulalɛ ma ɩba ɩyɛ goodu a, ɩkɔhʋla ɩkɛma bɔkɔwʋwa azɩ daabaa. Na sɛ bedi alɩyɛ wɔ pɩlɛtɩ mɔɔ bɛva goodu bɛyɛ sʋ̃ nu a, ɩkɛma bekenyia nnwʋanlɩ tɩndɩnlɩ. Nɩ Tʋwamaa mɔɔ bɔwɔ ɔwɔkɩ China nɩ de di kɛɛ sɛ yɛdwɩnɩndwɩnɩ nninyeni nwʋ, yɛtɩnɣɛdɩnɣɛ yɛ abɔkɔ nu na yedi alɩyɛ baaba a, ɩkɔhʋla ɩkɛzɩnza kezimɔ ye nnuno eniiwudo yi yɛ egyima nɩ na yɛawʋwa azɩ daabaa.
Benyia be mɔɔ ɩzʋ̃ Spain mɔɔ bɔfʋlɔ yɩ Juan Ponce de León mɔɔ ikyimahyima azɩlɛ yɩ zʋ ɩyɛ ɛbɩbɛlɛ nu nɩ bɩbɛlɩ nzulo be mɔɔ sɛ abiye nʋ anzɛnyɩɩ ibiyia nu a, ɩma ɩkɔ zʋlɔ ɩyɛ abɩlantɩyɛ anzɛnyɩɩ kɛdɛkɛ. Dɔkɩta be mɔɔ ɩwʋwalɩ azɩ kɛyɛ alʋbɔ 300 mɔɔ ɩɣa ɩzɩ̃ ɩhɔ nɩ hɛlɛlɩ wɔ yi buuku mɔɔ bɔfʋlɔ yɩ Hermippus Redivivus yi nu kɛɛ, bɛvá mmɩlantɩyɛ nɩɩ nɣɛdɛkɛ mɔɔ bɛdɩ amunli nɩ bogua aliyia ɛgyɩkɩ̃ɩ̃ be nu wɔ asusuwo mmɩlɩ nu na bɛvá bɛ ahʋmɩ mɔɔ bekele nɩ bogua bɔnɩyabɔ nu na bɛava bɛayɛ awudo mɔɔ ɩma abiye bʋwa azɩ kyɛ. Nɔhʋanlɛ odwokɔ yɛ lɛ kɛɛ mmɔdɩnɩwɔlɛ eyimmɔ munwala ɩákɔ isi hwɩɩ.
w15 4/15 32 ¶1-2
Asʋ̃ Owudo Mɔɔ Bodua Nɩ Kɔhʋla Kevivi Dɔkʋ̃ a?
SƐ ƐFA olivi owudo [Olea europaea] kezile mɔɔ yɩ ngyasʋwa bʋ na ɩhyɩyahyɩya tindiã Lɛbanɔnʋ sida owudo kɩnlɩma nwʋ a, wʋ anyɩ ilédeli olivi owudo yɩ nwʋ. Naasʋ̃ mɔɔ ɩyɛ nnwʋánlɩ yɛ lɛ kɛɛ, ɛpɛ mmɩlɩ nu o, asusuwo mmɩlɩ nu o, olivi owudo kʋla kyina pindinyii. Ebiyemmɔ li alʋbɔ kɛyɛ 1,000. Yi ndɩnɩ kʋla kɔ aɣinzi paa, meti sɛ owudo yɩ iwu anzɛnyɩɩ botua po a, ɩkʋla ifivi dɔkʋ̃. Mbɔmɩ sʋ̃maa mɔɔ yi ndini ilówu yi mɛyɩ, sa ɩkʋla ifivi dɔkʋ̃.
Nɩ nɔhʋanlɛvʋlɔ Dwoobu lɛ anwʋlazʋ kɛɛ sɛ iwu po a, sa ɩkʋla ɩbʋwa azɩ dɔkʋ̃. (Dwb. 14:13-15) Ebiye a, ɩvalɩ olivi owudo yi ihilehileli anwʋlazʋ mɔɔ ɩlɛ wɔ Gyehova nu kɛɛ ɩkɔhʋla ikodunwo yi ma ɩkɛɣa nnwʋanlɩ nu dɔkʋ̃ nɩ nu. Dwoobu hanlɩ kɛɛ, “Owudo po, anyɩnlɩlazʋ wɔ kɛnɩ ma yɩ.” Na “sɛ botua a, sa ifivi dɔkʋ̃.” Sɛ ɛpɛ mmɩlɩ tua numɔ na nzulo twu a, olivi owudo mɔɔ ɩnwʋnsʋ nɩ kɔhʋla kezia kevivi biyekʋ̃ na ɩayɩ “mmɛdanɩ kɛɛ owudo fʋlɔ.”—Dwb. 14:7-9.
w11 3/1 22 ¶5
“Wʋ Ɛɣɛɛlɛ Kɔlɔ Wʋ Sa Munwa Egyima”
Dwoobu yɩ odwokɔ yɩ kilehile yɛ kezimɔ Gyehova yɩ ɔlɔlɛ dɩ: Ɩ nɩɩ bɛzabɛ mɔɔ bɛdɩ kɛɛ Dwoobu mɔɔ bɛfa bɔ nwʋ bɛma yɩ ma ɩnwɩ̃ bɛ ma bɛyɛ mmenii mɔɔ ɩpɛ bo odwokɔ lɛ abusunwawɔlɛ sʋnʋnkʋ̃. (Ayɩ. 64:8) Gyehova yɩ nɔhʋanlɛ azʋ̃mɩvʋlɔ tʋ bʋlɔ ma yɩ. “Yɩ ɛɣɛɛlɛ lɔ” yɩ nɔhʋanlɛ azʋ̃mɩvʋlɔ mɔɔ bowuwu nɩ. Nnimidivʋlɔ be kile kɛɛ, Hibulu odwokɔ pɔkɔ mɔɔ bɛva behilehileli “yɩ ɛɣɛɛlɛ lɔ yi nu nɩ ɩdɩ odwokɔ pɔkɔ mɔɔ numɔ dɔ paa mɔɔ bɛfa bekilehile kezimɔ abiye pɛ kɛɛ ɩnwʋ abiye mɔɔ ɩnwʋnlɩ yɩ ahyɛ nɩ nu.” Kɛ ɛhakɛlɛ la yɛ Gyehova kakɛ yɩ azʋ̃mɩvʋlɔ a, mfomi yɩ ɛɣɛɛlɛ sʋ̃ dɔ kɛɛ ikezia ɩkɛma bɛkɛɣa nnwʋanlɩ nu.
Pɩbɛlɩ Bayɩbʋlʋ Yi Nu
it-1 191
Nzʋnɩ
Bɛfa nzʋnɩ sʋ̃ bɛkã debe mɔɔ mfasʋ íni zʋ anzɛnyɩɩ ɩádʋ bʋlɔ nɩ nwʋ odwokɔ. Kɛ ndianwʋ nɩ, Ebilehamɩ hanlɩ hileli Gyehova kɛɛ, “Mɩdɩ ndɛdɛlɛ nɩɩ nzʋnɩ.” (Gyn. 18:27; kila Ayɩ. 44:20; Dwb. 30:19 sʋ̃.) Na Dwoobu sʋ̃ valɩ ndwokɔ mɔɔ yɩ ɔhɔnwʋmmɔ bɛhanlɩ nɩ dindianlɩ “ɛɣɛlɛwulɛ mbʋanlɩ dɩkɛɛ nzʋnɩ” nwʋ.—Dwb. 13:12.
NOVEMBER 13-19
BAYƖBƲLƲ NU ANWƲNYIA | DWOOBU 15-17
“Áma Osumazuma Ɛlɩfasɩ Mmɩlɩ Mɔ Ɛkyɩkyɩɩ Abiye Yɩ Ɛɣɛɛlɛ Nɩ”
w05 9/15 26 ¶4-5
Kʋ̃ Tiyia Nzunzunlɩyɛ Tanɩ!
Mbɔmɩ asã mɔɔ Ɛlɩfasɩ dɩndɛnlɩ munwala nu nɩ, ɩlalɩ yɩ ali kɛɛ Nyamɩnlɩ pɩbɛ mɔɔ ɩbʋlʋ yɛ anwʋzɩzɩbɛ zʋ meti dɩyɛ bela mɔɔ yɛkɛyɛ nɩ, ɩázɔ yɩ anyɩ. Ɛlɩfasɩ hanlɩ hileli Dwoobu kɛɛ, “Kila! Íni dedi wɔ yɩ azʋ̃mɩvʋlɔ nu, na inyia mfʋmɩ wɔ yɩ awɔvʋlɔ sʋ̃ nwʋ.” (Dwb. 4:18, azɩ ɛkɛnɩ odwokɔ) Aɣinzi yi, Ɛlɩfasɩ hanlɩ valɩ Nyamɩnlɩ nwʋ kɛɛ: “Kila! Íni dedi wɔ yɩ nwanzanwanzamaa nu, na sʋlɔ po nwʋ ɩádɩ wɔ yɩ anyɩ zʋ.” (Dwb. 15:15) Akʋ̃ iɣizialɩ kɛɛ: “Sɛ ɛdɩ ɛdɩnɣɛlɛnii a, asʋ̃ ɩfalɩ Dɩyɛ Munwala Zʋ Tumivʋlɔ yɩ nwʋ a?” (Dwb. 22:3) Bɩlɩdadɩ nɩɩ Ɛlɩfasɩ yɛlɩ adwɩnɩ wɔ odwokɔ eyi nwʋ na yɩzayɩ sʋ̃ ɩhanlɩ kɛɛ: “Eziyanɩ iádwe na ahɔnlɔnwa sʋ̃ nwʋ ɩádɩ wɔ [Nyamɩnlɩ] yɩ anyɩ zʋ.”—Dwb. 25:5.
Ɩsɛ kɛɛ yekila bʋwɔ paa na adwɩnɩ mɔɔ ɩdɩ zɛ nɩ iányianlɩ yɛ zʋ tumi. Sa ɩkʋla ɩma yɛtɩ nɣanlɩ kɛɛ Nyamɩnlɩ pɩbɛ sʋ̃maa wɔ yɛ kɛnɩ. Adwɩnɩ mɔɔ ɩdɩ zɔ sɩkɛ yɛ nɩɩ Gyehova yɩ avinli abusunwawɔlɛ. Akʋ̃ sʋ̃, sɛ yenyia adwɩnɩ mɔɔ ɩdɩ ɔzɔ a, kɛ ɩkɛyɛ na sɛ bɛfa ɛdɩnyɩanlɛ be bɛma yɛ a, yɛale yeadiã nu a? Sɛ ɩba yɩ ɔzɔ a, kɛ ankɩ yɛzʋ̃ kãnwʋazɩ nu yekele ɛdɩnyɩanlɛ yɩ yekediã numɔ nɩ, “yɛfa Gyehova nwʋ ya wɔ yɛ ahʋnlɩnɩ nu” mfomi. (Ɛɣɛ. 19:3) Kila kezimɔ eyi kɔhʋla kɛzɩkɛ yɛ nɩɩ Gyehova avinli abusunwawɔlɛ!
w15 2/15 9 ¶16
Sumazuma Gyisɛsɩ Yɩ Kãnwʋazɩ Nɩɩ Yi Kunlumiyɩbalɛ
Ye munwa ndwokɔ mɔɔ ɩma ɛɣɛɛlɛyɩkyɩlɛ. Kunlumiyɩbalɛ kã yɛ ma yɛkyɩkyɩ “bɛzabɛ mɔɔ bɛ ɛɣɛɛlɛ wɔ nɩ” bɛ ɛɣɛɛlɛ. (1 Tɛs. 5:14) Mɩnla odwokɔ yɛ yɛkɛhã yɛkɛva yɛkɛyɩkyɩ bɛzabɛ mɔɔ bɛdɩ ɔzɔ nɩ bɛ ɛɣɛɛlɛ a? Sa yɛkʋla yɛkã kezimɔ yɛdwɩnɩ bɔ nwʋ baaba nɩ yekile bɛ yɛfa yɛhyɛ bɛ ɛzɩzɩbɛ. Sa yɛkʋla yɛkamvʋ bɛ ma bɔnwʋ adʋmɩ akyɛdɩ nɩɩ subanɩba mɔɔ bɛlɛ nɩ. Akʋ̃ sʋ̃, sa yɛkʋla yɛkakɛ bɛ kɛɛ Gyehova yɛ ɩhwɩnlɩ bɛ ɩɣalɩ yɩ Ɣa yɩ pɛ a. Meti bɔtʋ bʋlɔ bɛma yɩ baaba. (Dwɔ. 6:44) Yɛkɔhʋla yɛkɛma bekenyia anwʋlazʋ kɛɛ, Gyehova dwɩnɩ yɩ azʋ̃mɩvʋlɔ nwʋ baaba titili bɛzabɛ mɔɔ bɛ “ahʋnlɩnɩ wuwu” anzɛnyɩɩ bɛ “abɔkɔ nu golɔ” nɩ. (Ndw. 34:18) Sɛ yɛkã ndwokɔ mɔɔ ɩma mmenii bɛ ahʋnlɩnɩ tɔ bo kunlu a, ɩkɛyɩkyɩ bɛ ɛɣɛɛlɛ baaba.—Ɛɣɛ. 16:24.
Pɩbɛlɩ Bayɩbʋlʋ Yi Nu
w06 3/15 14 ¶11
Dwoobu Buuku Yi Nu Ndwokɔ Aditili
Dwoobu 7:9, 10; 10:21; 16:22—Asʋ̃ ndwokɔ eyimmɔ kile kɛɛ nɩ Dwoobu iále awudunwolɩyɛ yɩ idi a? Nɩ odwokɔ eyi falɩ mɔɔ nɩ ɩlɛ́kyɛ ɩbadʋ Dwoobu nɩ nwʋ. Nɩ mɩnla yɛ ɩpɛ kɛɛ ikile a? Mɔɔ ili bɔmʋnlɩ, ebiye a, nɩ ɩpɛɛ ikehile kɛɛ sɛ ɩba yɩ kɛɛ iwu a, yɩ ɔhɔnwʋmmɔ yɩ nu bela lɔ́nwʋ yɩ. Wɔ bɔ ɔfʋã nu nɩ, nɩ Dwoobu lésia kɛɣa yɩ awudo na ɔzɔ la sʋ̃ yɛ bɔlɔ́bɔ yi dima dɔkʋ̃ kɔbʋmɩ kɛɛ Nyamɩnlɩ yɩ eɣile mɔɔ ɩhyɛ nɩ kodwu. Akʋ̃ sʋ̃, ebiye a nɩ Dwoobu ɩpɛɛ ikehile sʋ̃ kɛɛ, sɛ bɛátunwo abiye wɔ owulo nu a, yɩzayɩ ɩlɔ́kʋla ikodunwo. Yɛkʋla yɛnwʋ awudunwolɩyɛ mɔɔ ɩkɛɣa eɣile be nwʋ anwʋlazʋ mɔɔ nɩ Dwoobu ɩlɛ nɩ petee wɔ Dwoobu 14:13-15.
NOVEMBER 20-26
BAYƖBƲLƲ NU ANWƲNYIA | DWOOBU 18-19
“Mápʋ Wʋ Ɔhɔnwʋmmɔ Dedimaa Kyɩ̃”
w22.01 16 ¶9
Mɔɔ Yɛkɔhʋla Yekozuma Wɔ Gyisɛsɩ Yi Zunɛ Yɩ Nu
Sa ɔkʋla bʋwa bɛzabɛ mɔɔ bedii aɣɛlɛbɔ nɩ. Gyisɛsɩ nɩɩ Maata nɩɩ Mɛɛlɩ wɔlɩ numɔ zunli na izia idiyeli bɛ ɩhanlɩ ɛɣɛɛlɛyɩkyɩlɛ odwokɔ ihileli bɛ. Yɛzayɛ sʋ̃, sa yɛkʋla yɛyɛ ɔzɔ yɛma bɛzabɛ mɔɔ bedii aɣɛlɛbɔ nɩ. Asafʋ nu ebani be mɔɔ bɔfʋlɔ yɩ Dan mɔɔ ɩzʋ̃ Australia nɩ hanlɩ kɛɛ: “Mɩ yɩ wuli nɩ, nɩ mihyinyia mmʋwalɩyɛ paa. Agyiahʋnlɩmaa sʋ̃maa ziyeziyeli bɔ nwʋ kɛɛ bekediye mɩ mmɩlɩ bela. Beyiakili mɩ ma milili aɣɛlɛbɔ na sɛ nɩ musũũ sʋ̃ a, nɩ ɩáyɛ bɛ anyɩnlɩdʋnlɛ. Akʋ̃ sʋ̃, sɛ nɩ ɩyɛ sɩ ɩma mɩ kɛɛ mɩkɛyɛ nninyeni be a, nɩ bɔbʋwa mɩ. Ebiye yɛ lɛ kɛɛ, nɩ bɔwʋwʋ mɩ kaalʋ yɩ nwʋ, bɔkɔ bedi kualɛ bɛma mɩ na bɛyɛ alɩyɛ sʋ̃ bɛma mɩ. Nɩ bɛta bɛ nɩɩ mɩ bɔ numɔ bɔ mpayɩ. Bɛlalɩ bɔ nwʋ ali kɛɛ bɛdɩ ɔhɔnwʋmmɔba nɩɩ mmeliyema mɔɔ ‘bɔwʋlɩ bɛ bɛmanlɩ anwʋhyɩlɩlɛ mmɩlɩ.’”—Ɛɣɛ. 17:17.
w21.09 30 ¶16
Mmɩlɩ Mɔ Abiye Mɔɔ Ɔdɔ Yɩ Nɩ Yiaki Gyehova Yɩ Ɔzʋ̃mɩnlɛ
Kɔ zʋlɔ bʋwa abusunwa yɩ nu maa mɔɔ bɛla nwʋmɔ la bɔsʋ̃mɩɩ Gyehova nɩ. Mmɩlɩ mɔ ɩdɩ ɔzɔ nu yɛ behyinyia wʋ ɛzɩzɩbɛhyɛlɛ nɩɩ wʋ ɔlɔlɛ bɛtɛla mmɩlɩ bela a. (Hib. 10:24, 25) Itwu mmɩlɩ be a, iluwa mɔɔ mmeliyema be yɛ nɩ ti, ɩma bɛzabɛ mɔɔ bodu bo busunwanii nɩ tɩ nɣanlɩ kɛɛ gyama bodu bɛzabɛ sʋ̃. Yɛábɛ kɛɛ yɛkɛma bɛkɛdɩ nɣanlɩ zɔ kyɩ̃! Nnwuakula mɔɔ bɛ awʋvʋlɔ zʋ̃ nɔhʋanlɛ yɩ nu yɩ nɩ, bɔnlʋmmɔ paa yɛ behyinyia ɛhamvʋlɛ nɩɩ ɛzɩzɩbɛhyɛlɛ kezile a. Maria mɔɔ boduli yi hũ na ohunɛ yɩ zialɩ dianlɩ abusunwa yɩ kɛnɩ nɩ hanlɩ kɛɛ: “Mʋ ɔhɔnwʋmmɔ yɩ be po ɣalɩ mɩ awudo ɣa yɛlɩ alɩyɛ manlɩ yɛ na bɛ nɩɩ yɛ wɔlɩ numɔ yɛlɩ abusunwa ɔzʋ̃mɩnlɛ. Belili mɔɔ ɩdʋlɩ mɩ nɩ nwʋ ɛyɛkɛ na bɛ nɩɩ mɩ wɔlɩ numɔ po zunli. Mmɩlɩ mɔ abiyemmɔ bedii mʋ nwʋ ndwokɔ nɩ bɛhanlɩ biye bɛmanlɩ mɩ. Bɛhyɛlɩ mɩ ɛzɩzɩbɛ paa!”—Wul. 12:13, 15.
w90 9/1 22 ¶20
Asʋ̃ Ɔbɔɔ Mmɔdɩnɩ Kɛɛ Ɛkɛɣa Ɛkɛyɛ Ehilalɛvʋlɔ a?
Ɩsɛ kɛɛ asafʋ̃ nu mbanimbani okuwu yi nwʋ yɩ kɛɛ, sɛ ɔnwʋmɔ ɔhʋanɩ mɔɔ abiye ɩlɛ yɩ kɛɛ asafʋ nu ebani anzɛnyɩɩ sʋ̃mɩvʋlɔ nɩ fi yɩ sa a, ɩkɔhʋla ɩkɛma adwɩnɩndwɩnɩ kɛhyɛ yɩ zʋ. Sa eyi po kʋla si, mmɩlɩ mɔ yɩzayɩ ɩva ɔzɔ nwʋmɔ ɔhʋanɩ yɩ idiã kɛnɩ nɩ. Sɛ bɛátu yi na asafʋ nu mbanimbani yi nwʋ yɩ kɛɛ adwɩnɩndwɩnɩ hyɛ eliyema yɩ zʋ a, ɩsɛ kɛɛ bɔzʋ̃ ɔlɔlɛ nu bɛfa sunzuma ɔfʋã nu mmʋwalɩyɛ bɛma yɩ. (1 Tɛs. 5:14) Ɩsɛ kɛɛ bɔbʋwa yɩ ma ɩnwʋ kɛɛ yɩ nwʋ hyinyia wɔ asafʋ yɩ nu. Sɛ bohwili yɩ anyunu po a, ebiye a, ɩlɛ́kyɛ na benyia mɔɔ ɩkã yɩ nwʋ azɩ na yɩ anyɩ sɔ ɛdɩnɣɛlɛ mɔɔ bɛva bɛmanlɩ yɩ nɩ yɩ sa ɩahã ɔzʋ̃mɩnlɛ nu ɔnwʋmɔ ɔhʋanɩ fʋlɔ wɔ asafʋ yɩ nu.
Pɩbɛlɩ Bayɩbʋlʋ Yi Nu
w94 10/1 32
Tumi Mɔɔ Ɩwɔ Odwokɔ Mɔɔ Bɔzʋ̃ Kunlumiba Nu Bɛkã Yi Nu
Naasʋ̃ mmɩlɩ mɔ nɩ Dwoobu yɩzayɩ ihyinyia ɛzɩzɩbɛhyɛlɛ nɩ, Ɛlɩfasɩ nɩɩ yɩ ɔhɔnwʋmmɔ yɩ bɛákã ndwokɔ mɔɔ ɩkɛma Dwoobu yɩ ahʋnlɩnɩ kɔdɔ yi kunlu bekile yi. Bɛvalɩ Dwoobu yɩ ɔhawʋ yɩ nwʋ ɔzʋnɩ bedianlɩ yɩ zʋ. Mɔɔ nɩ eyi kile lɛ kɛɛ ebiye a, nɩ Dwoobu ili tanɩ be iziye. (Dwb. 4:8) The Interpreter’s Bible yɩ hanlɩ kɛɛ: “Mɔɔ nɩ Dwoobu hyinyia yɛ lɛ nwɔkɛnwʋnlɛ mɔɔ ɩzʋ̃ enii yɩ ahʋnlɩnɩ nu. Naasʋ̃ mɔɔ inyianlɩ yɛ lɛ ɔzʋ̃mɩnlɛ nɩɩ ɛbɩlawɔlɛ ndwokɔ mɔɔ ɩáhyɛ ɛzɩzɩbɛ mɔɔ bɛkã yɩ wɔ ɔhʋanɩ be zʋ ma ɩyɛ dɩkɛɛ mɔɔ ɩdɩ ‘nɔhʋanlɛ’ na ɩyɛ fɛ nɩ.” Ɛlɩfasɩ nɩɩ yɩ ɔhɔnwʋmmɔ yɩ bo odwokɔ yɩ mɔɔ Dwoobu dɩlɩ nɩ manlɩ yɩ adwɩnɩ duli vʋlalɩ na ɩhyɛlɩ yɩ zʋ nkʋ̃ʋ̃ ma idinyianlɩ numɔ kɛɛ: “Bɛkɛdɩdɩ mɩ ɛkɛla bɔkɔhɔ bɔkɔbʋmɩ eɣile sina na bɛkɛva bo munwa ndwokɔ bokowuwu mɩ bɔkɔhɔ bɔkɔbʋmɩ eɣile sina a?”—Dwb. 19:2.
Íni kɛɛ ɩba yɩ kyɩ̃ kɛɛ yɛkɛma yɛ ɔhɔnwʋ dedinii be zʋ̃ ɛyɛkɛ nu kozũ kɔvʋlɔ Gyehova iluwa ndwokɔ mɔɔ yɛádwɩnɩ nwʋmɔ mɔɔ yɛhã yehileli yi nɩ ti. (Fá tindiã Dit. 24:15 nwʋ.) Bayɩbʋlʋ nu ɛɣɛlɛwulɛ be bɔ kɔkɔ kɛɛ: “Mɔɔ ɛkɛhã nɩ kɔhʋla kɛma abiye kɔhɔ zʋlɔ kɔwʋwa nnwʋanlɩ nu anzɛnyɩɩ yɩ nnwʋanlɩ kevi yɩ sa; meti ɩsɛ kɛɛ ede ɔzʋnɩ mɔɔ ɩzʋ̃ wu munwa ndwokɔ nu ɩkɛɣa nɩ etiã nu.”—Ɛɣɛ. 18:21, TEV.
NOVEMBER 27–DECEMBER 3
BAYƖBƲLƲ NU ANWƲNYIA | DWOOBU 20-21
“Sɛ Abiye Wɔ Anwʋnyiadɩ a, Mɛyɩ Iáhile Kɛɛ Ɩdɩ Ɛdɩnɣɛlɛnii”
w07 8/1 29 ¶12
Asʋ̃ ‘Okunwahunwa Wʋ Anwʋnyiadɩ Munwa Wɔ Nyamɩnlɩ Anyunu a’?
Wɔ Gyisɛsɩ yɩ odwokɔ yɩ nu nɩ, ɩhanlɩ kɛɛ sɛ abiye kunwahunwa yɩ anwʋnyiadɩ munwa wɔ Nyamɩnlɩ anyunu a, iáhunwahunwa anwʋnyiadɩ ɩma yɩzayɩ yɩ nwʋ. Mɔɔ nɩ Gyisɛsɩ ɩkãã yɛ lɛ kɛɛ, íni kɛɛ yɛma nninyeni mɔɔ yekunwahunwa wɔ yɛ ɛbɩlawɔlɛ nu nɩɩ nninyeni mɔɔ yɛkɛva yekelile yɛ anyɩ nɩ bayɛ yɛ ahyinyiadɩ titili. Mfomi ɩsɛ kɛɛ yɛfa yɛ anwʋnyiadɩ yedi egyima wɔ ɔhʋanɩ be zʋ mɔɔ ɩkɛhyɛ yɛ nɩɩ Gyehova avinli abusunwawɔlɛ yɩ nu ɛzɩzɩbɛ. Sɛ yɛyɛ ɔzɔ a, ɔhʋanɩ bela zʋ, yekenyia yɛ nwʋ wɔ Nyamɩnlɩ anyunu. Mɩnla ti a? Iluwakɛɛ ɩkɛma yekenyia Gyehova yɩ nyilalɛ sʋ̃maa. Bayɩbʋlʋ yɩ kã kile yɛɛ kɛɛ: “Gyehova yɩ nyilalɛ yɛ ɩma desanii nyia yɩ nwʋ a, na ɩáva ɛyɛkɛ bela ɩkɩnla nwʋ.”—Ɛɣɛ. 10:22.
Pɩbɛlɩ Bayɩbʋlʋ Yi Nu
w95 1/1 9 ¶19
Setanɩ Nɩɩ Yɩ Egyima Zʋ Nkunimi Mɔɔ Yekeli
Nɩ ɩsɛ kɛɛ Nyamɩnlɩ yɩ sʋ̃mɩvʋlɔ Dwoobu kyina “adwɩnɩndwɩnɩ” mɔɔ Setanɩ luwalɩ Ɛlɩfasɩ nɩɩ Zofa zʋ manlɩ ɩɣa ɩdɔlɩ yɩ zʋ nɩ yi munwa. (Dwb. 4:13-18; 20:2, 3) Nninyeni “yɛlɛ yɛlɛ” mɔɔ nɩ idide Dwoobu yɩ adwɩnɩ manlɩ ɩnwʋnlɩ “amanɩyɛ,” eyi ti nɩ ɩma yɩ ‘ndwokɔ wʋwɔ.’ (Dwb. 6:2-4; 30:15, 16) Ilayɩhu yɛlɩ dinyii diyeli Dwoobu na ɩzʋ̃ yɩ ahʋnlɩnɩ nu ɩwʋwalɩ yɩ ma ɩnwʋnlɩ Gyehova yɩ nɣɛlɛbɛ mɔɔ ɩtɛla ebiyela wɔ odwokɔ nwʋ nɩ. Ɔzɔ sʋ̃ la yɛ nnɛ asafʋ nu mbanimbani mɔɔ bɔwɔ ntɩyasɩ nɩ da yɩ ali kɛɛ bɔdwɩnɩ bɛzabɛ mɔɔ bedii ɛyɛkɛ nɩ nwʋ, iluwa “adɩsʋwa” mvʋlɔ mɔɔ bɛáva betiã bɔ zʋ nɩ. Mfomi dɩkɛɛ Ilayɩhu nɩ, bɔzʋ̃ abʋtalɩ nu betiye bɛ na bɛfa Nyamɩnlɩ yi Odwokɔ mɔɔ ɩdɩ kɛɛ ngɔlɔ mɔɔ bɛfa bɔfɔ abiye ma yɩ nwʋ tɔ yɩ nɩ bɔfɔ bɛ. (Dwb. 33:1-3, 7; Gye. 5:13-15) Meti abiyela mɔɔ adwɩnɩndwɩnɩ hyɛ yɩ zʋ anzɛnyɩɩ ɩyɛ basaa iluwa odwokɔ be mɔɔ ɩdʋ yɩ anzɛnyɩɩ isunzuu kɛɛ ɩkɔdʋ yɩ anzɛnyɩɩ kɛ ‘ɛlalɩyɛ nɩɩ anyɩnlɩzʋdɩyɛnwʋnlɛ wunlawunla’ yɩ dɩkɛɛ Dwoobu nɩ, ɩkɔhʋla ikenyia ɛɣɛɛlɛyɩkyɩlɛ mɔɔ ɩwɔ Ɛhɛlɛlɛ Odwokɔ yi nu mɔɔ ɩma enii yɩ ahʋnlɩnɩ tɔ yi kunlu wɔ asafʋ yɩ nu.—Dwb. 7:14; Gye. 4:7.
DECEMBER 4-10
BAYƖBƲLƲ NU ANWƲNYIA | DWOOBU 22-24
“Asʋ̃ Enii Zʋ Wɔ Mfasʋ Ma Nyamɩnlɩ a?”
w05 9/15 27 ¶1-3
Kʋ̃ Tiyia Nzunzunlɩyɛ Tanɩ!
Mmenii lɛ adwɩnɩ kɛɛ Nyamɩnlɩ pɩbɛɛ kɛɛ yɛkɛyɛ nninyeni mɔɔ ɩbʋlʋ yɛ anwʋzɩzɩbɛ zʋ na eyi ɩ nɩɩ adwɩnɩ fʋlɔ mɔɔ mmenii lɛ kɛɛ Nyamɩnlɩ bu mmenii kɛɛ bɔ zʋ íni mfasʋ nɩ di nsɛ. Wɔ Ɛlɩfasɩ yɩ odwokɔ mɔɔ ɩtɔ ɔzʋlɔ asã yɩ nu nɩ, iɣizialɩ kɛɛ: “Asʋ̃ enii zʋ wɔ mfasʋ ma Nyamɩnlɩ a, na abiye mɔɔ ɩwɔ dɩyɛnunwʋnlɛ yɩ zʋ wɔ mfasʋ ma yɩ a?” (Dwb. 22:2) Nɩ Ɛlɩfasɩ ɩpɛɛ ikehile kɛɛ enii zʋ íni mfasʋ ma Nyamɩnlɩ. Ɔzɔ adwɩnɩ yɩ la yɛ Bɩlɩdadɩ va hanlɩ kɛɛ: “Kɛ ɩkɛyɛ na enii desanii ɩayɛ ɛdɩnɣɛlɛnii wɔ Nyamɩnlɩ anyunu a, anzɛnyɩɩ kɛ ɩkɛyɛ na enii mɔɔ baalɛ yɛ ɩwʋlɩ yɩ nɩ ɩahã kɛɛ odwokɔ bela íni yɩ nwʋ a?” (Dwb. 25:4) Mɔɔ nɩ ɔzɔ odwokɔ yɩ kile yɛ lɛ kɛɛ, kɛ ɩkɛyɛ na Dwoobu mɔɔ ɩdɩ desanii nɩ ɩahʋla ɩahã kɛɛ ɩdɩ ɛdɩnɣɛlɛnii wɔ Nyamɩnlɩ anyunu a?
Nnɛ mmenii sʋ̃maa tɩ nɣanlɩ kɛɛ mfasʋ íni bɔ zʋ. Ebiye a, kezimɔ bɛdɩdɩlɩ bɛ, atɩɩtɩɩ mɔɔ beyiyiaa wɔ bɛ ɛbɩlawɔlɛ nu nɩɩ mmenii nu nyiyimi yɛ ɩma bɛtɩ nɣanlɩ zɔ a. Naasʋ̃ Setanɩ nɩɩ yɩ azunzuma evinli yi bɛ anyɩ deli nwʋmɔ kɛɛ bokonwunlanwunla abiye. Sɛ bɔkʋla bɛma abiye tɩ nɣanlɩ kɛɛ dɩyɛ bela íni ɛkɛnɩ mɔɔ ɩyɛ a, ɩkɔzɔ Dɩyɛ Munwala Zʋ Tumivʋlɔ nɩ yɩ anyɩ a, mɛyɩ ɩlɛ́yɛ sɩ kʋlaa kɛɛ enii kʋ̃ nɩ yɩ abɔkɔ nu kogolɔ. Mmɩlɩ kɔɔ zʋlɔ nɩ, enii mɔɔ ɩdɩ ɔzɔ nɩ ɩkʋla ɩfʋakɩ anzɛnyɩɩ ɩtwɩ̃ yɩ nwʋ wɔ Nyamɩnlɩ tɩyasɩvʋlɔ yɩ nwʋ.—Hib. 2:1; 3:12.
Ebaniyɛlɛ nɩɩ adimakɛlɛ ɩáma yɛkʋla yɛyɛ sʋ̃maa. Sɛ yɛfa mɔɔ yɛkʋla yɛyɛ wɔ Gyehova yɩ ɔzʋ̃mɩnlɛ nu sikalɛ yɩ yetindiã mmɩlɩ mɔ nɩ yɛ dɩ mmɩlantɩyɛ nɩɩ nɣɛdɛkɛ nɩɩ mmɩlɩ mɔ nɩ yɛlɛ anwʋzɩzɩbɛ yɩ nwʋ a, ebiye a, yɛnwʋ yɩ kɛɛ mɔɔ yɛyɛ yɩ sikalɛ yɩ nɩ dɩ ɛgyɩkɩ̃ɩ̃ kʋlaa. Ihyinyia paa kɛɛ yɛkɔnwʋ yɩ kɛɛ Setanɩ nɩɩ yɩ azunzuma evinli yi pɛ kɛɛ yɛtɩ nɣanlɩ kɛɛ mɔɔ yɛyɛ yɩ sikalɛ yɩ ɩázɔ Nyamɩnlɩ anyɩ! Ɩsɛ kɛɛ yɛkʋ̃ yetiyia nzunzunlɩyɛ mɔɔ ɩdɩ zɔ.
w95 2/15 27 ¶6
Ozumalɛdɩyɛ Mɔɔ Ɩbʋwa Ma Bedi Ɔhawʋ Azʋlɔtʋ Nwʋ Egyima Kezimɔ Bedi Ndwokɔ Ɛzɩzɩbɛ Nwʋ Egyima Nwʋ Ozumalɛdɩyɛ
Kɛ ankɩ Dwoobu yɩ ɔhɔnwʋmmɔ asã yɩ kɛla Nyamɩnlɩ yɩ nɣɛlɛbɛ ali nɩ, bɛlalɩ bɛzabɛ bo nzunzunlɩyɛ azʋlɔtʋ ali na eyi wuwuli Dwoobu. Ɛlɩfasɩ yɩ ndwokɔ hɩhanlɛ yɩ hɔlɩ aɣinzi nkʋ̃ʋ̃ ma ɩhanlɩ po kɛɛ ‘Nyamɩnlɩ íni dedi wɔ yɩ azʋ̃mɩvʋlɔ nu’ na sɛ Dwoobu di nɔhʋanlɛ ma Nyamɩnlɩ anzɛnyɩɩ iádi yi nɔhʋanlɛ po a, ɩávalɩ Nyamɩnlɩ nwʋ. (Dwb. 4:18; 22:2, 3) Kila kezimɔ odwokɔ eyi ɩáyɛ nɔhʋanlɛ na ikolɔ abɔkɔ sʋ̃. Ɩkɔhʋla ɩkɛyɛ sɩ kɛɛ abiye kenyia adwɩnɩ mɔɔ ɩdɩ ɔzɔ! Ɩáyɛ nnwʋánlɩ kɛɛ aɣinzi yi Gyehova hanlɩ Ɛlɩfasɩ nɩɩ yɩ ɔhɔnwʋmmɔ asã yɩ bɛ anyunu wɔ mmuzulo odwokɔ mɔɔ bɛhanlɩ nɩ nwʋ. Ɩhanlɩ kɛɛ: “Bɛákã nɔhʋanlɛ odwokɔ bɛfalɩ mʋ nwʋ. (Dwb. 42:7) Naasʋ̃ nɩ banzɛmɔ bɛbahɩnhã ndwokɔ mɔɔ ɩdɩbɛ kʋlaa a.
w03 4/15 14-15 ¶10-12
Mmɩlantɩyɛ Nɩɩ Nɣɛdɛkɛ Mɔɔ Bɛma Gyehova Yɩ Anyɩ De
Kɛmɔ bɛla yɩ ali wɔ Bayɩbʋlʋ yɩ nu nɩ, kɛ Dwoobu yɩzayɩ nkʋ̃ yɩ nɔhʋanlɛlilɛ yɛ Setanɩ manlɩ odwokɔ ɣalɩ nwʋmɔ a, na mfomi abiyela mɔɔ ɩsʋ̃mɩɩ Gyehova mɔɔ wʋzawʋ sʋ̃ ɛkɩnla nwʋmɔ nɩ. Nɔhʋanlɛ odwokɔ yɛ lɛ kɛɛ, mmɩlɩ mɔ Setanɩ ɩkãã adasamaa munwatĩĩ nwʋ odwokɔ nɩ, ɩhanlɩ ihileli Gyehova kɛɛ: “Enii [kɛ Dwoobu yɩzayɩ nkʋ̃ a, mfomi abiyela] kɛva dɩyɛ bela mɔɔ ɩwɔ nɩ ɩkɛma ɩkɛva ɩkɛbɩlɩ yɩ nnwʋanlɩ.” (Dwb. 2:4) Asʋ̃ ɔnwʋ wʋ nwʋ wɔ odwokɔ mɔɔ ihyinyia eyi nu a? Kɛmɔ bɛla yɩ ali wɔ Ɛɣɛlɛwulɛ 27:11 nɩ, Gyehova ɩkãã kɛɛ debe wɔ kɛnɩ mɔɔ ɔkɔhʋla kɛyɛ kɛva kɛma yɩ. Debe mɔɔ ɩkɔhʋla ikegyina zʋlɔ ikowuwa Setanɩ mɔɔ ɩtɩndɛ itiyia yɩ nɩ. Sunzu nwʋmɔ kila, Amansɔnɩ Bulombunli nɩ ɩtʋʋ salɛ ɩfʋlɔ wʋ kɛɛ bɩla bɛawʋwa yɩ ma beli odwokɔ kezile mɔɔ ɩtɛla ebiyela nɩ nwʋ egyima. Kila ɔnwʋmɔ ɔhʋanɩ sʋnʋnkʋ̃ nɩɩ asɛdɩ kezile kʋ̃ mɔɔ enyia! Asʋ̃ ɔkɔhʋla keli mɔɔ Gyehova ɩpɩbɛɛ wɔ wʋ ɛkɛnɩ nɩ nwʋ egyima a? Dwoobu yɛlɩ ɔzɔ. (Dwb. 2:9, 10) Ɔzɔ la yɛ Gyisɛsɩ nɩɩ mmenii sʋ̃maa mɔɔ mmɩlantɩyɛ nɩɩ nɣɛdɛkɛ kɩnla nwʋmɔ nɩ bɛyɛ wɔ abakɔsɛmɩ munwala nu a. (Fɩl. 2:8; Yik. 6:9) Wʋzawʋ sʋ̃ ɔkɔhʋla ɛkɛyɛ ɔzɔ la. Naasʋ̃ dɩyɛ ɔkʋ̃ yɛ lɛ kɛɛ, mɔ ɩdɩ bela nɩ, ɩsɛ kɛɛ ekyina ɔfʋã be wɔ odwokɔ yɩ nu. Duwa wʋ nyɛlɩyɛ zʋ kile kɛɛ egyĩ Setanɩ mɛda anzɛnyɩɩ ɛmaa Gyehova kenyia debe kegyina zʋlɔ kowuwa Setanɩ. Aninyia yɩ ɔfʋã yɛ ekegyina a?
Gyehova Dwɩnɩ Wʋ Nwʋ!
Asʋ̃ ɔfʋã mɔɔ ekezi pɔkɔ kɛɛ ekegyina nɩ nwʋ hyinyia Gyehova a? Asʋ̃ mmenii sʋ̃maa belédili nɔhʋanlɛ bɛlɛ́manlɩ yɩ ma ilényianlɩ munwalɩyɛ mɔɔ ɩfata ɩlɛ́manlɩ Setanɩ a? Ɩdɩ nɔhʋanlɛ, Abɔnsamɩ hanlɩ kɛɛ abiyela íni kɛnɩ mɔɔ ɩzʋ̃ ɔlɔlɛ nu ɩsʋ̃mɩ Gyehova. Naasʋ̃ eyi dɩ odwokɔ mɔɔ bɛla iali daada kɛɛ ɩ́dɩ nɔhʋanlɛ. Eyi munwala nu nɩ, Gyehova pɛ kɛɛ ekyina yɩ ɔfʋã wɔ odwokɔ mɔɔ ɩfalɩ yi tumililɛ nwʋ nɩ, iluwakɛɛ kɛ mmenii nkʋ̃ nkʋ̃ nɩ, Gyehova ɩdwɩnɩ ye nu ɔkʋ̃ bela nwʋ. Gyisɛsɩ hanlɩ kɛɛ: “Bɛ Zɩ mɔɔ ɩwɔ sʋlɔ nɩ ɩlɛ́pɛ kɛɛ mmenii mɔɔ bede mɩ bedi kɛɛ nnwuakula nɩ bo nu ɔkʋ̃ po ikeminli.”—Mt. 18:14.
Ɩda ali petee kɛɛ, ɔfʋã mɔɔ ekezi pɔkɔ kɛɛ ekegyina nɩ nwʋ hyinyia Gyehova paa. Mɔɔ ɩtɛla eyi nɩ, pɔkɔzilɛ mɔɔ ɩdɩ zɔ nɩ ɩkã yɩ paa. Bayɩbʋlʋ yɩ da yɩ ali kɛɛ, Gyehova wɔ nɣanlɩdɩlɛ mɔɔ ɩkɔ aɣinzi, na nninyeniba anzɛnyɩɩ tanɩ mɔɔ enii yɛ nɩ kã yɩ. Kɛ ndianwʋ nɩ, mmɩlɩ mɔ Yizilayamaa hɔlɩ zʋlɔ dɩlɩ atunwa nɩ, Gyehova lili “ɛyɛkɛ.” (Ndw. 78:40, 41) Ansaana nzuloyilɛ mɔɔ izili wɔ Nowa yɩ mmɩlɩ yɩ zʋ ɩbaa nɩ, mmɩlɩ mɔ nɩ “enii yɩ amumuyɛ hyɛ azɩlɛ yɩ zʋ manlɩ” nɩ, Gyehova “lili ɛyɛkɛ wɔ yɩ ahʋnlɩnɩ nu.” (Gyn. 6:5, 6) Sunzu mɔɔ eyi kile nɩ nwʋ kila. Ɔhʋanɩ tanɩ mɔɔ okoluwa zʋlɔ nɩ kɔhʋla kɛma Gyehova keli ɛyɛkɛ. Eyi iáhile kɛɛ Nyamɩnlɩ yɛ mɛlɛkɛ anzɛnyɩɩ ɩma yɩ nɣanlɩdɩlɛ nyia yɩ zʋ tumi. Mfomi ɩdɔ wʋ na ɩdwɩnɩ wʋ bʋwɔyɛlɛ nwʋ. Naasʋ̃ sɛ ɛyɛ mɔɔ ɩtɩnɣɛ a, Gyehova di fɛlɛkʋ̃ wɔ yɩ ahʋnlɩnɩ nu. Kɛ odwokɔ fʋlɔ mɔɔ ikenyia ikowuwa Setanɩ nkʋ̃ la ti yɛ ɩma yɩ anyɩ de a, mfomi ɩma inyia nwʋmɔ ɔhʋanɩ mɔɔ ɩkɛva ikoduwa kakɛ wʋ sʋ̃. Na ɩdɩ debe mɔɔ ɩpɛ kɛɛ ɩyɛ. (Hib. 11:6) Amba Gyehova dɩ Ɛzɩlɛ mɔɔ ɩwɔ ɔlɔlɛ. Kila ɔnwʋmɔ ɔhʋanɩ kezile mɔɔ enyia kɛɛ ɩdɩ wʋ zɩ!
Pɩbɛlɩ Bayɩbʋlʋ Yi Nu
w04 7/15 21-22
Fá Sunzuma Ɔfʋã Nu Bʋtayɩ Azʋlɔtʋ Hyɛ Wʋ Wɔlɛvʋlɔ Yɩ Animinyiamɩ
Sunzu kezimɔ Gyehova wɔlɩ amansɔnɩ yɩ nɩ nwʋ. Gyehova luwalɩ ndwokɔ “na awulohyɩnlɩ na awulo dwoli” yɩ zʋ ɩhyɩhyɛlɩ mmɩlɩ azʋlɔtʋ mɔɔ ɩkɛva ɩkɔwɔ dɩyɛ nɩ. (Gyn. 1:5, 8, 13, 19, 23, 31) Ansaana dɩyɛwɔlɛ mmɩlɩ bela kodwu nɩ, nɩ izi dɩyɛ mɔɔ ɩkɛyɛ wɔ ɔzɔ eɣile yi nɩ. Na Nyamɩnlɩ lili yi tile nu pɔkɔ mɔɔ mɛyɩ yɛ lɛ kɛɛ ɩkɔwɔ nninyeni nɩ nwʋ egyima. (Yik. 4:11) Nɔhʋanlɛvʋlɔ Dwoobu hanlɩ kɛɛ sɛ “[Gyehova ] si pɔkɔ kɛɛ ɩkɛyɛ debe a, ɩyɛ.” (Dwb. 23:13) Kila kezimɔ Gyehova yɩ ahʋnlɩnɩ dɔlɩ yi kunlu mmɩlɩ mɔ ɩnwʋnlɩ “dɩyɛ bela mɔɔ ɩwɔ nɩ” na ɩhanlɩ kɛɛ “ɩdɩ baaba”!—Gyn. 1:31.
Sɛ bʋtayɩ mɔɔ yɛva yeziye yɛ anyɩ zʋ nɩ kɔhʋla kɛɣa nu a, ɩsɛ kɛɛ yenyia ɛpɛ kezile paa kɛɛ yekodwu nwʋmɔ. Mɩnla yɛ ɩkɔwʋwa yɛ ma yekenyia ɛpɛ kezile mɔɔ ɩdɩ zɔ a? Mmɩlɩ po mɔɔ nɩ dɩyɛ bela íni azɩlɛ yɩ zʋ mɔɔ ɩla kɛnɩ mbʋanlɩ nɩ, Gyehova hʋlalɩ nwʋnlɩ kezimɔ azɩlɛ yɩ kɛyɛ sɛ ɩbɔ dɩyɛ bela iwie a. Ɩnwʋnlɩ yɩ kɛɛ agudi pɩkɛ pɩkɛ be mɔɔ ɩkɛva animinyiamɩ nɩɩ nnililɛ ɩkɛɣɩlɛ yɩ. Ɔzɔ la sʋ̃ yɛ sɛ yɛpɛ kɛɛ yenyia ɛpɛ mɔɔ ɩkɛma yekodwu yɛ bʋtayɩ nwʋ a, ɩsɛ kɛɛ yesunzu mɔɔ ɩzʋ̃ numɔ ɩkɛɣa nɩɩ mfasʋ mɔɔ yekenyia mmɩlɩ mɔ yedwu ɔzɔ bʋtayɩ yɩ nwʋ nɩ. Na eliyema benyia mɔɔ ili alʋbɔ 19 mɔɔ bɔfʋlɔ yɩ Tony yɩ ozumalɛnwʋnlɛ yɩ nɩ di eyi nwʋ dasɩlɛ. Yɩ ɛɣɛɛlɛ iáfi anyɩnlɩlelɛ mɔɔ inyianlɩ mmɩlɩ mɔ ɩhɔ igyelalɩ Gyehova Dasɩvʋlɔmaa be egyimayɛlɛdɩka mɔɔ ɩwɔ Europe yɩ Adɔlɩyɛ Ɔfʋã nu nɩ. Ɔzʋ̃mɩ ɔzɔ mmɩlɩ yɩ nɩ, odwokɔɣizialɛ mɔɔ nɩ Tony ta dwɩnɩndwɩnɩ nwʋ yɛ lɛ, ‘Sɛ ɛda dɩka mɔɔ ɩdɩ zɔ na ɔsʋ̃mɩɩ a, kɛ ɛkɛdɩ nɣanlɩ keze a?’ Tony hɔlɩ zʋlɔ dwɩnɩndwɩnɩnlɩ ɔnwʋmɔ ɔhʋanɩ mɔɔ ɩkɔhʋla ikenyia ɩkɔhɔ ɩkɔzʋ̃mɩ wɔ ɛkɛnɩ nɩ nwʋ na ɩwɔlɩ mmɔdɩnɩ idwuli ɔzɔ bʋtayɩ yɩ nwʋ. Kila kezimɔ yɩ anyɩ leli mmɩlɩ mɔ alʋbɔ sʋ̃maa mɛda nɩ bɔdʋlɩ salɛ bɔvʋlɔ yɩ kɛɛ ɩhɔ ɩzʋ̃mɩ wɔ ɔzɔ Bɛtɩlɩ yɩ nɩ!
DECEMBER 11-17
BAYƖBƲLƲ NU ANWƲNYIA | DWOOBU 25-27
“Iáhyinyia Kɛɛ Yekeli Munli Ansaana Yɛali Gyehova Nɔhʋanlɛ”
it-1 1210 ¶4
Nɔhʋanlɛlilɛ
Dwoobu. Dwoobu wʋwalɩ azɩ wɔ Dwosefi yi owulo mɛda naasʋ̃ ɩwʋwalɩ azɩ ansaana Mosisi ibali Yizilayamaa bɛ anyunu. Na bɛhanlɩ yɩ nwʋ ndwokɔ kɛɛ ɩdɩ “ɛdɩnɣɛlɛnii [Heb., tam] na idi nɔhʋanlɛ, yi kunlu tuli Nyamɩnlɩ nwʋ na ɩtwɩ̃ yɩ nwʋ wɔ tanɩ nwʋ sʋ̃.” (Dwb. 1:1) Sɛ yekila ndwokɔ mɔɔ Nyamɩnlɩ ɣizialɩ Setanɩ valɩ Dwoobu nwʋ mmɩlɩ mɔ Setanɩ vʋlalɩ sʋlɔ awɔvʋlɔ yi nu ɣalɩ Nyamɩnlɩ anyunu nɩ a, ɩda ali petee kɛɛ nɔhʋanlɛ mɔɔ enii keli kɛma Nyamɩnlɩ nɩ nwʋ hyinyia paa wɔ odwokɔ mɔɔ ɩla Nyamɩnlɩ nɩɩ Setanɩ bɛ avinli nɩ. Setanɩ valɩ ɔzʋnɩ dianlɩ Dwoobu zʋ kɛɛ, kɛ nɔhʋanlɛlilɛ nu yɛ Dwoobu sʋ̃mɩ Nyamɩnlɩ mfomi mɔɔ ikenyia wɔ Gyehova yɩ ɛkɛnɩ ti mɔɔ ɩsʋ̃mɩ yɩ a. Nɩ eyi kile kɛɛ, nɩ Setanɩ ɩkãã kɛɛ kɛ adwɩnɩba yɛ Dwoobu ɩlɛ ɩsʋ̃mɩɩ Nyamɩnlɩ a. Eyi manlɩ odwokɔ ɣalɩ nɔhʋanlɛ mɔɔ Dwoobu idi ɩma Nyamɩnlɩ nɩ nwʋ. Naasʋ̃ mmɩlɩ mɔ bɛvalɩ nwʋmɔ ɔhʋanɩ bɛmanlɩ Setanɩ kɛɛ ɩva yɩ sa ɩhã Dwoobu yɩ anwʋnyiadɩ nɩɩ yɩ nnwuakula po nɩ, Setanɩ ɩákʋla ɩsɩkɛ Dwoobu yɩ nɔhʋanlɛlilɛ. (Dwb. 1:6–2:3) Akʋ̃ sʋ̃, Setanɩ hanlɩ kɛɛ sa Dwoobu kʋla kyina yɩ mma nɩ yɩ agyiapadɩ mɔɔ bevi yɩ sa nɩ yɩ munwa mmɩlɩ tɩndɩnlɩ mɔɔ bɛlɛ́falɩ bɛsa bɛlɛ́kanlɩ yɩ nnwʋnlamɩ nɩ. (Dwb. 2:4, 5) Setanɩ manlɩ adimakɛlɛ be mɔɔ ɩyɛ ɛyɛkɛ wɔlɩ Dwoobu, yɩ yɩ wɔlɩ mmɔdɩnɩ kɛɛ ɩkɛzɩnza yɩ adwɩnɩ na yɩ ɔhɔnwʋmmɔ mɔɔ bɛákã Gyehova nwʋ nɔhʋanlɛ ndwokɔ nɩ sʋ̃ dɩndɛlɩ diyialɩ yɩ na bowuli yɩ animitiyia. (Dwb. 2:6-13; 22:1, 5-11) Naasʋ̃ mɛyɩ munwala nu nɩ, Dwoobu hɔlɩ zʋ lili nɔhʋanlɛ, na ɩhanlɩ po kɛɛ “kɔbʋmɩ kɛɛ mukowu nɩ, miléyiaki mʋ nɔhʋanlɛlilɛ nu kyɩ̃! Mʋkɔhɔ zʋlɔ mʋkɔzɔ mɩ ɛdɩnɣɛlɛ nu na miléyiaki numɔ kyɩ̃, mɩ ahʋnlɩnɩ lóbuwa mɩ fɔ mmɩlɩ tɩndɩnlɩ mɔɔ mɩda nnwʋanlɩ nu nɩ.” (Dwb. 27:5, 6) Nɔhʋanlɛ mɔɔ Dwoobu hɔlɩ zʋlɔ lili nɩ manlɩ ɩlalɩ yɩ ali kɛɛ Nyamɩnlɩ yɩ Tamvʋlɔ Setanɩ dɩ awohwivʋlɔ.
w19.02 3 ¶4-5
Sɔ Wʋ Munlililɛ Nu!
Asʋ̃ ɩsɛ kɛɛ yenyia adwɩnɩ kɛɛ ɩsɛ kɛɛ yedi munli ansaana yɛahʋla yɛali nɔhʋanlɛ a? Ebiye a, yekenyia adwɩnɩ kɛɛ yɛtɔ sini paa anzɛnyɩɩ yeli mfʋmɩ sʋ̃maa zɛ. Bɛma yehila sianti anwɩ̃ ti mɔɔ íni kɛɛ yenyia adwɩnɩ mɔɔ ɩdɩ zɔ. Mɔɔ ili bɔmʋnlɩ, Gyehova ɩáva yɩ adwɩnɩ isiye yɛ mfʋmɩ zʋ. Yɩ odwokɔ kã kile yɛ kɛɛ: “O Gyaa, sɛ mfʋmɩ yɛ ekila a, O Gyehova, ankɩ aninyia yɛ ɩkɔhʋla ikegyina wʋ anyunu a?” (Ndw. 130:3) Izi kɛɛ yɛtɔ sini na tanɩ wɔ yɛ nwʋ sʋ̃, meti ɩyɩ yi kunlu ɩfa yɛ tanɩ ɩkyɛ yɛ. (Ndw. 86:5) Mɔɔ ɩtɔ zʋlɔ anwɩ̃, Gyehova zi mɔɔ yɛkɔhʋla yɛkɛyɛ nɩɩ mɔɔ yɛlɔ́kʋla yɛkɛyɛ meti yɛábɩbɛ mɔɔ ɩbʋlʋ yɛ anwʋzɩzɩbɛ zʋ wɔ yɛ ɛkɛnɩ. (Kɩnga Ndwomi 103:12-14.) Mɛyɩ nɩ mɩnla yɛ ikehile kɛɛ yedi munli anzɛnyɩɩ odwokɔ bela íni yɛ nwʋ wɔ Gyehova yɩ anyɩ zʋ̃ a?
Wɔ Gyehova yɩ azʋ̃mɩvʋlɔ bo ɔfʋã nu mɛyɩ, ɔlɔlɛ nwʋ hyinyia baaba na ama bɛahʋla bɛazɔ bo munlililɛ nu. Ɔlɔlɛ mɔɔ yɛwɔ yɛma Nyamɩnlɩ nɩɩ yɛ nwʋ mɔɔ yɛva yɛma yɛ sʋlɔ Ɛzɩlɛ nɩ kʋlaa nɩ, ɩsɛ kɛɛ ɩyɛ mɔɔ idi munli na evinli anzɛnyɩɩ odwokɔ bela íni nwʋmɔ. Sɛ yɛkɔ zʋlɔ yɛma yɛ ɔlɔlɛ yɛ zɔ mmɩlɩ po mɔɔ botwee yɛ bekila a, nɩ ikile kɛɛ yɛlɛ ye munlililɛ nu. (1 Mm. 28:9; Mt. 22:37) Bɛma yehila Dasɩvʋlɔmaa asã mɔɔ yɛhanlɩ bɔ nwʋ odwokɔ wɔ ahyɛasɩ nɩ. Mɩnla ti mɔɔ bɛyɛlɩ bɛ dɩyɛ wɔ ɔzɔ ɔhʋanɩ yɩ zʋ a? Asʋ̃ kuakula baalɛ nɩ ɩábɛ kɛɛ ide yɩ anyɩ wɔ sukuulu a, anzɛnyɩɩ abɩlantɩyɛ nɩ ɩábɛ kɛɛ ikua yɩ anyunu azɩ wɔ abika abika nu dasɩlɛlilɛ nu, anzɛnyɩɩ asʋ̃ benyia nɩ mɔɔ ɩwɔ abusunwa nɩ pɛ kɛɛ yɩ egyima fi yɩ sa a? Ɩ́dɩ ɔzɔ kʋlaa a. Mfomi bezi kɛɛ Gyehova yɩ ɔhʋanɩhilelɛ tɩnɣɛ na bezi bɛ adwɩnɩ pi kɛɛ bɔkɔzɔ bɔ sʋlɔ Ɛzɩlɛ nɩ yɩ anyɩ. Iluwakɛɛ bɔdɔ Gyehova ti, ansaana bekezi pɔkɔ be nɩ, bedi bɔmʋnlɩ bosunzu nwʋmɔ mmɩlɩ munwatĩĩ. Ɔzɔ mɔɔ bɛyɛ nɩ kile kɛɛ bɛlɛ bo munlililɛ nu.
Pɩbɛlɩ Bayɩbʋlʋ Yi Nu
w16.11 9 ¶3
Nyamɩnlɩ Yɩ Odwokɔ Yɩ Ma Yenyia Nhyɩhyɛlɩyɛ Baaba
Abɔdɩ ma yɛnwʋ yɩ kɛɛ Nyamɩnlɩ yɛ ɩyɛ Nhyɩhyɛlɩyɛ baaba ɩtɛla abiyela a. Bayɩbʋlʋ kã kɛɛ: “Nɣɛlɛbɛ yɛ Gyehova va dʋlɩ azɩlɛ yɩ fapɩmɩ a, na dɩyɛnunwʋnlɛ zʋ yɛ iluwalɩ ɩvalɩ sʋlɔ idiminli kɛ a.” (Ɛɣɛ. 3:19) Yezi “[Nyamɩnlɩ] yɩ egyima nɩ mmɔ numɔ ɛgyɩkɩ̃ɩ̃ bela,” na “ɩ nwʋ ndwokɔ ɛgyɩkɩ̃ɩ̃ bela yɛ idua yɛ azʋ̃ nu a.” (Dwb. 26:14) Naasʋ̃ nninyeni ɛgyɩkɩ̃ɩ̃ mɔɔ yezi yɛfalɩ pɩlanɛtɩ, ahɔnlɔnwa nɩɩ ahɔnlɔnwa okuwu nwʋ nɩ ɩma yɛnwʋ yɩ kɛɛ bɛhyɩhyɛ abɔdɩ mɔɔ bɔwɔ oyumi nɩ bʋwɔ baaba. (Ndw. 8:3, 4) Sɛ yekila ahɔnlɔnwa okuwu yi a, ahɔnlɔnwa abʋmɩ abʋmɩ sʋ̃maa zɛ yɛ bɔwɔ numɔ a. Na bɔwɔ oyumi mɔɔ bɛábʋmɩbʋmɩ bɔ nwʋ. Ahɔnlɔnwa okuwu mɔɔ bɔwɔ yɛ Solar System yɩ nu nɩ, bo munwatĩĩ botua oyuwa yɩ nwʋ beyiyia. Na bo munwatĩĩ boduwa bɔ ɔhʋanɩ nu pɛpɛɛpɛ dɩkɛɛ mɔɔ bedii kaalʋ hanlɛ nwʋ mmɛla be zʋ! Nɔhʋanlɛ nu nɩ, kezimɔ dɩyɛ bela kɔlɩ ɔzʋlɔ pɛpɛɛpɛ wɔ amansɔnɩ yɩ nu nɩ, ɩyɛ nnwʋánlɩ baaba na ɩma yɛnwʋ kɛɛ Gyehova mɔɔ ɩvalɩ nɣɛlɛbɛ ɩyɛlɩ sʋlɔ nɩɩ azɩlɛ nɩ ɩfata kɛɛ yɛyɩ yɩ ayɛlɛ, yedi yɩ nɔhʋanlɛ na yɛsʋ̃mɩ yɩ.—Ndw. 136:1, 5-9.
DECEMBER 18-24
BAYƖBƲLƲ NU ANWƲNYIA | DWOOBU 28-29
“Asʋ̃ Ɔwɔ Dimaba Dɩkɛɛ Dwoobu a?”
w02 5/15 22 ¶19
Da Ɔlɔlɛ Kanyɩɩ Ali Kile Bɛzabɛ Mɔɔ Béni Biye Nɩ
Bayɩbʋlʋ nu ndwokɔ mɔɔ yezunzu nwʋmɔ nɩ si zʋlɔ owudo kɛɛ, ɩsɛ kɛɛ yɛda ɔlɔlɛ kanyɩɩ ali yekile bɛzabɛ mɔɔ bɛlɛ ahyinyiadɩ be mɔɔ bɛzabɛ bɔlɔ́kʋla bekeli nwʋmɔ egyima nɩ. Nɩ Abilehamɩ kehyinyia Bɛtʋwɛlɩ yɩ mmʋwalɩyɛ na ama ɩahʋla ɩawʋwa yɩ ma yɩ abusunwa sandɩnlɩ yɩ ɩadʋwa zʋ. Nɩ Gyekɔpʋ kehyinyia Dwosefi yɩ mmʋwalɩyɛ na ama bɛahʋla bɛava yi funli bɛahɔ Keenanɩ. Na sɛ Nawomi sʋ̃ kenyia yɩ tʋ nii a, nɩ ikehyinyia Wulutu yɩ mmʋwalɩyɛ. Meti nɩ Abilehamɩ, Gyekɔpʋ nɩɩ Nawomi bo nu bela íni kɛnɩ mɔɔ ɩkɔhʋla ikeli ahyinyiadɩ eyimmɔ nwʋ egyima mɔɔ iléhyinyia abiye yɩ mmʋwalɩyɛ. Ɔzɔ sʋ̃ la yɛ nnɛ, ɩsɛ kɛɛ yɛda ɔlɔlɛ kanyɩɩ ali yekile bɛzabɛ mɔɔ behyinyia mmʋwalɩyɛ nɩ. (Ɛɣɛ. 19:17) Ɩsɛ kɛɛ yesumazuma nɔhʋanlɛvʋlɔ Dwoobu mɔɔ ɩwʋwalɩ “ehyinyianii mɔɔ isũũ ɩpɩbɛɛ mmʋwalɩyɛ, aɣinsamaa nɩɩ abiyela mɔɔ íni bʋwavʋlɔ nɩ.” Akʋ̃ sʋ̃, ɩwʋwalɩ “abiyela mɔɔ ɩyɛɛ ikowu nɩ.” Izialɩ sʋ̃ ɩmanlɩ ‘kunavʋlɔ yɩ ahʋnlɩnɩ lili fɛlɛkʋ̃’ na ɩɣa ɩyɛlɩ ‘anyɩnlɩ ɩmanlɩ anyɩnlɩsunliɣamaa nɩɩ agyiakɛ ɩmanlɩ abubuwamaa.’—Dwb. 29:12-15.
it-1 655 ¶10
Atalɩ
Bɛta bɛfa atalɩ bekyina kɛnɩ bɛma nninyeni sʋ̃maa. Kɛmɔ abiye wula atalɩ pɔkyɩɩ be a, ɩda yɩ ali kɛɛ ɩkɩnla ahyɩhyɛdɩ be nwʋ anzɛnyɩɩ ɩwɔ okuwu be nu nɩ, ɔzɔ la sʋ̃ yɛ sɛ bɛfa atalɩwulalɛ bedi egyima wɔ Bayɩbʋlʋ yɩ nu wɔ sɛnkyɩlɛdɩ ɔhʋanɩ zʋ a, nɩ bɛkãã ɔfʋã mɔɔ abiye gyĩ nɩ nwʋ ndwokɔ nɩɩ mɔɔ ɩyɛ ɩfa ikile zɔ. Kɛmɔ yɛnwʋ yɩ wɔ Gyisɛsɩ yɩ ndianwʋ mɔɔ ɩfalɩ ayɩfʋlɔ atalɩ nwʋ nɩ. (Mt. 22:11, 12) Wɔ Yikile 16:14, 15 nɩ, ye diibenyia Gyisɛsɩ Kɩlayɩsɩ bɔ yɛ kɔkɔ kɛɛ yehilá bʋwɔ na yɛálalɩ wɔ sunzuma ɔfʋã nu, iluwakɛɛ sɛ yɛyɛ zɔ a, ɩkɛma bɛkɛyɩ ɔnwʋmɔ ɔhʋanɩ mɔɔ yɛlɛ kɛɛ Nɔhʋanlɛ Nyamɩnlɩ nɩ yɩ azʋ̃mɩvʋlɔ nɩ wɔ yɛ nwʋ. Na eyi kɔhʋla kɛyɛ asianɩ kezile mmɩlɩ mɔ dɩyɛ mɔɔ ɩdɩ zɔ nɩ dʋ yɛ mmɩlɩ ɛgyɩkɩ̃ɩ̃ ansaana ‘bɛahʋ̃ wɔ eɣile nɩ mɔɔ Nyamɩnlɩ kowuwa mmenii ndɛnɩ nɩ.’
w09 2/1 15 ¶3-4
Mɩnla Yɛ Ɩwɔ Dima Nu a?
Ye nu bela íni kɛnɩ mɔɔ ɩkɔhʋla ikehile dima mɔɔ bɛvá bɔvʋlɔ yɩ mmɩlɩ mɔ bɔwʋ yɩ nɩ. Naasʋ̃ amɩyɛzayɛ la yɛ yɛkɔhʋla yekehile dima mɔɔ yɛkɔhʋla yekenyia a. (Ɛɣɛ. 20:11) Meti bizia wʋ nwʋ kɛɛ: ‘Sɛ bɛkã kɛɛ Gyisɛsɩ anzɛnyɩɩ yɩ adʋwavʋlɔ nɩ bɛma dima mɩ a, mɩnla dima yɛ bɛkɛva bɛkɛma mɩ a? Sɛ bekilaa mɩ subanɩ anzɛnyɩɩ dima mɔɔ mɩlɛ a, ankɩ mɩnla dima yɛ ɩkɛvata mɩ a?’
Eyi ɩdɩ odwokɔɣizialɛ mɔɔ ɩsɛ kɛɛ yɛfa anyɩnlɩbʋlʋ yesunzu nwʋmɔ paa. Mɩnla ti a? Bulombunli Sɔlɔmɔnʋ mɔɔ nɩ izi nɣɛlɛbɛ paa nɩ hɛlɛlɩ kɛɛ: “Pɩbɛ dimaba na kɛ anwʋnyiadɩ a.” (Ɛɣɛ. 22:1) Nɔhʋanlɛ nu nɩ, sɛ yenyia dimaba wɔ dɩka mɔɔ yɛda nɩ a, mɛyɩ nɩ yenyia anwʋnyiadɩ mɔɔ ɩtʋ bʋlɔ paa. Mɔɔ ɩtɛla ebiyela nɩ, sɛ yenyia dimaba wɔ Nyamɩnlɩ yɩ anyunu a, sa yenyia agyiapadɩ kezile be mɔɔ ɩázɩkɛ kyɩ̃. Mɩnla ɔhʋanɩ zʋ a? Nyamɩnlɩ bɔ anʋhʋba kɛɛ ɩkɛhɛlɛ bɛzabɛ mɔɔ bo kunlu tuli yɩ nwʋ nɩ be dima wɔ yɩ “ɛhakɛlɛ buuku nu” na ɩama bɛanyia nnwʋanlɩ mɔɔ íni awielɩyɛ.—Mal. 3:16; Yik. 3:5; 20:12-15.
Pɩbɛlɩ Bayɩbʋlʋ Yi Nu
g00 7/8 11 ¶3
Ɛzɩlɩkɛ Dɩ Baaba Ma Wʋ!
Asʋ̃ mfasʋ wɔ ɛzɩlɩkɛ zʋ a? Asʋ̃ ɛkakɛ mmɩlɩ be mɔ abiye yɩ ɛzɩlɩkɛ manlɩ wʋ ahʋnlɩnɩ dɔlɩ wʋ kunlu a? Anzɛnyɩɩ iluwakɛɛ abiye munlanlɩ yɩ anyunu hileli wʋ ti, ɩmanlɩ wʋ ɛɣɛɛlɛ wɔlɩ na ɛyɛlɩ basaa nɩ a? Amba, ɛzɩlɩkɛ nwʋ hyinyia paa. Inyia enii mɔɔ ɩsɩlɩɩ nɩɩ enii mɔɔ bɛsɩlɩɩ bekilee yi zʋ tumi kezile. Bayɩbʋlʋ yɩ kã kɛɛ Dwoobu hanlɩ valɩ yɩ adamvʋlɔ yɩ nwʋ kɛɛ: “Mɩsɩlɩ mikile bɛ a, ɩyɛ bɔ nnwʋánlɩ, mɩtɩ mɩ anyunu mikile bɛ a, nɩ bɛ ahʋnlɩnɩ dɔ bo kunlu.” (Dwb. 29:24) Ebiye a, nɩ Dwoobu ‘yɩ anyunu mɔɔ ɩtɩ’ nɩ kile anyɩnlɩlelɛ mɔɔ nɩ ɩlɛ nɩ.
DECEMBER 25-31
BAYƖBƲLƲ NU ANWƲNYIA | DWOOBU 30-31
“Kezimɔ Dwoobu Manlɩ Yɩ Ɛbɩlawɔlɛ Nwʋ Dɩlɩ”
w08 9/1 11 ¶4
Sunzu “Mɔɔ Ɩzʋ̃ Numɔ Ɩkɛɣa” Nɩ Nwʋ
Ansaana okodu wʋ agyia ekeziye ɔhʋanɩ mɔɔ ɩdɩ zɔ zʋ nɩ, bizia wʋ nwʋ kɛɛ, ‘Ɛhɩnlafʋã yɛ ɩ nɩɩ mɩ kɔhɔ a?’ Mmɩlɩ ɛgyɩkɩ̃ɩ̃ mɔɔ ekele kozunzu “mɔɔ ɩzʋ̃ numɔ ɩkɛɣa” nwʋ nɩ, ɩlɛ́ma ekezi pɔkɔ be mɔɔ ɩkɔhʋla ɩkɛva ɔhawʋ nɣezile ɩkɛɣa wʋ zʋ. Bɛzabɛ mɔɔ bɔpʋ kɔkɔwɔlɛ mɔɔ ɩdɩ zɔ nɩ kʋla nyia nna nu adimakɛlɛ be dɩkɛɛ AIDS, ɛɣɩnzɛlɛ mɔɔ bɛáhila yɩ ɔhʋanɩ, ɛɣɩnzɛlɛ mɔɔ bɛyɩ bokua, agyiahʋnlɩzɩkɛlɛ na sa ɩkʋla sʋ̃ ɩma abiye yi ti ɔwʋwaba bu yɩ ɔfɔ. Sʋ̃mavʋlɔ Pɔɔlʋ hanlɩ mɔɔ ɩkɔzʋ̃ ɛbɩla tanɩ nu ɩkɛɣa nɩ petee. Ɩhanlɩ kɛɛ: “Bɔlɔ́kɔ Nyamɩnlɩ yi Bulombunli manlɩ nɩ nu.”—1 Kɔl. 6:9, 10.
w10 11/15 5-6 ¶15-16
Mmɩlantɩyɛ Nɩɩ Nɣɛdɛkɛ—Bɛmá Nyamɩnlɩ Yɩ Odwokɔ Yɩ Ihile Ɔhʋanɩ Bɛ
Ekila a, mɩnla mmɩlɩ yɛ bɔkɔhʋla bokodwe wʋ nɔhʋanlɛlilɛ ma Nyamɩnlɩ nɩ bekehila paa a? Asʋ̃ ɩdɩ mmɩlɩ mɔ ɔwɔ mmenii nu anzɛnyɩɩ ɩha wʋzawʋ nkʋ̃ nɩ a? Nɔhʋanlɛ nu nɩ, sɛ ɔwɔ sukuulu anzɛnyɩɩ egyima nu a, ɩda ali kɛɛ ɛma wʋ anyɩ da kɛnɩ wɔ dɩyɛ bela mɔɔ ɩkɔhʋla ɩkɛzɩkɛ ɛ nɩɩ Gyehova bɛ avinli nɩ. Meti ɩdɩ mmɩlɩ mɔ okũũ wʋ mʋnlɩ anzɛnyɩɩ wʋ anyɩ íni wʋ nwʋ zʋ nɩ yɛ eyiyia odwohilalɛ kɛɛ ɛyɛ tanɩ a.
Mɩnla ti mɔɔ ɩsɛ kɛɛ ɛyɛ sutiye ma Gyehova mmɩlɩ mɔ wʋzawʋ nkʋ̃ po ɔwɔ dɩka be nɩ a? Kakɛ eyi: Ɔkɔhʋla ɛkɛma Gyehova keli ɛyɛkɛ anzɛnyɩɩ ɛkɛma yɩ ahʋnlɩnɩ keli fɛlɛkʋ̃. (Gyn. 6:5, 6; Ɛɣɛ. 27:11) Wʋ nyɛlɩyɛ kã Gyehova iluwakɛɛ “ɩdwɩnɩ wʋ nwʋ.” (1 Pit. 5:7) Ɩpɛ kɛɛ ɛyɛ sutiye ma yɩ na ama iazi wʋ bʋwɔ. (Ayɩ. 48:17, 18) Mmɩlɩ mɔ Gyehova yɩ azʋ̃mɩvʋlɔ mɔɔ nɩ bɔwɔ ɔwɔkɩ Yizilaya bʋlɩ yɩ fʋlɔdulɛ nɩ, ili ɛyɛkɛ paa. (Ndw. 78:40, 41) Naasʋ̃ Gyehova nyianlɩ ɔlɔlɛ kezile manlɩ nkɔmɩhyɛnii Danɩyɛlɩ, yɩ bɔvʋlɔ be po vʋlɔlɩ yɩ “benyia mɔɔ ɩtʋ bʋlɔ.” (Da. 10:11) Mɩnla ti a? Iluwakɛɛ Danɩyɛlɩ hɔlɩ zʋlɔ lili nɔhʋanlɛ manlɩ Gyehova mmɩlɩ mɔ ɩwɔ mmenii nu nɩɩ mmɩlɩ mɔ ɩwɔ ɛɣɩntanlɛ nu nɩ.—Kɩnga Danɩyɛlɩ 6:10.
Pɩbɛlɩ Bayɩbʋlʋ Yi Nu
w05 11/15 11 ¶3
Ɔlɔlɛ Nu Mɔɔ Yɛzʋ̃ Yetiye Odwokɔ
Ɩáyɛ bʋwɔ kʋlaa nɩ, benyia Dwoobu yɩ ɔhɔnwʋmmɔ yɩ dɩlɩ yɩ ndwokɔ mɔɔ ɩhanlɩ nɩ numɔ bunlu. Naasʋ̃, Dwoobu diyianlɩ numɔ kɛɛ: “Sɛ mikenyia abiye ma ikediye mɩ a!” (Dwb. 31:35) Mɩnla ti a? Iluwakɛɛ iányia ɛɣɛɛlɛyɩkyɩlɛ bela wɔ ediyelɛ mɔɔ bediyeli yi nu. Bɛádwɩnɩ Dwoobu nwʋ na bɛábɔ mmɔdɩnɩ sʋ̃ kɛɛ bɛkɛdɩ yɩ nɣanlɩdɩlɛ yɩ nɩ tʋ. Pɩlazunɛ bela íni nwʋmɔ kɛɛ, mmɩlɩ mɔ betiyee yi nɩ, bɛáda yɩ ali kɛɛ mmenii mɔɔ bɔwɔ nwɔkɛnwʋnlɛ. Naasʋ̃ sʋ̃mavʋlɔ Pɔɔlʋ tu yɛ fʋlɔ kɛɛ: “Mʋnlʋmmɔ bo munwala bɛ adwɩnɩ ɩyɛ ɔkʋ̃; mʋnlʋmmɔ bɔnwʋnwʋ bɔ nwʋ ngokɛ. Bɔlʋlɔ́ bɔ nwʋ nkʋ̃kʋ̃ nkʋ̃kʋ̃ kɛɛ mmeliyema mɔɔ bɔdʋdɔ bɔ nwʋ. Bɛyɛ́ baaba bɛma bɔ nwʋ nkʋ̃kʋ̃ nkʋ̃kʋ̃ na bɛhã bɔ nwʋ azɩ.” (1 Pit. 3:8) Kɛ ɩkɛyɛ na yɛanwʋ yɛ nwʋ nwɔkɛ a? Ɔhʋanɩ ɔkʋ̃ yɛ lɛ kɛɛ, yɛkɛma kezimɔ mmenii tɩ nɣanlɩ nɩ kehyinyia yɛ na yɛawɔ mmɔdɩnɩ kɛɛ yɛkɛdɩ bɔ tʋ. Sɛ bɛtɩndɛɛ bekehile yɛ a, sa yɛkʋla yɛkã odwokɔ be dɩkɛɛ “nɩ eyi kɛma ekeli ɛyɛkɛ paa” anzɛnyɩɩ “mide midi kɛɛ eyi manlɩ ɛdɩlɩ nɣanlɩ kɛɛ bɛátɩ wʋ tʋ” na yɛava yɛahile kɛɛ yɛdwɩnɩ bɔ nwʋ. Ɔhʋanɩ fʋlɔ sʋ̃ yɛ lɛ kɛɛ ɛkɛva wʋzawʋ wʋ ndwokɔ kɛhã mɔɔ ɩhanlɩ nɩ, na wʋava wʋala yɩ ali kɛɛ ɛdɩlɩ mɔɔ ɩhanlɩ nɩ tʋ. Ɔlɔlɛ nu mɔɔ yɛzʋ̃ yekediye abiye nɩ iáhile kɛɛ yekediye ndwokɔ mɔɔ ɩkãã nɩ la mfomi yɛkɛma yɛ adwɩnɩ kɔhɔ nɣanlɩdɩlɛ mɔɔ ɩlɛ ɩkãã odwokɔ yɩ nɩ zʋ sʋ̃.