Mɩnla Ti Mɔɔ Nyamɩnlɩ Ɩwɔ Ahyɩhyɛdɩ a?

1. Mɩnla ti mɔɔ Nyamɩnlɩ ɩhyɩhyɛlɩ ɔwɔkɩ Yizilaya manlɩ yɩ a?

Nyamɩnlɩ ɩhyɩhyɛlɩ Abilehamɩ ɩtʋmaa yɩ kɛɛ manlɩ na ɩmanlɩ bɛ mmɛla azʋlɔtʋ. Ɩvʋlɛlɩ ɔzɔ manlɩ yɩ nɩ “Yizilaya” na ɩyɛlɩ bɛ fapɩmɩ ɩmanlɩ nɔhʋanlɛ ɔzʋ̃mɩnlɛ nɩɩ yɩ odwokɔ. (Psalm 147:19, 20, NW) Meti iluwa Yizilaya zʋ nɩ, nɩ mmenii mɔɔ bɔzʋ̃ manlɩ azʋlɔtʋ nu munwala bekenyia nyilalɛ.​—Kɩnga Egyima 3:25.

Nyamɩnlɩ ɩyɩlɩ Yizilayamaa nɩ mɔ kɛɛ bɛyɛ yɩ dasɩvʋlɔmaa. Bɔnwʋ ndwokɔ mɔɔ ɩɣa ɩzɩ̃ ɩhɔ nɩ ɩma yɛ ndianwʋ mɔɔ ikile kezimɔ mmenii nyia nyilalɛ mmɩlɩ mɔɔ bɛyɛ sutiye bɛma Nyamɩnlɩ yɩ mmɛla nɩ. (Deuteronomy 4:6, NW) Meti, iluwa Yizilayamaa bɔzʋ̃ nɩ, mmenii bɔkɔhʋla bɔkɔnwʋ nɔhʋanlɛ Nyamɩnlɩ yɩ nɩ.​—Kɩnga Isaiah 43:10, 12, NW.

2. Mɩnla ti mɔɔ bɛhyɩhyɛ nɔhʋanlɛ Ahilisinyiamaa?

Mmɩlɩ ɩkɔ ɔzʋlɔ nɩ, Yizilayamaa bɛnɩ Nyamɩnlɩ yɩ avinli ɩzɩkɛlɩ, na Gyehova ɩvalɩ manlɩ fʋlɔ, Kilisinyiamaa asafʋ nɩ iziyeli bɛagyia nu. (Matiyu 21:43; 23:37, 38) Nnɛ, nɔhʋanlɛ Ahilisinyiamaa yɛɛ bɛɣa bɛyɛ Gyehova yɩ dasɩvʋlɔmaa, na bɛɣa beziye Yizilayamaa yɩ nɩ bɛagyia nu.​—Kɩnga Egyima 15:14, 17.

Gyisɛsɩ ɩhyɩhyɛlɩ yɩ adʋwavʋlɔ nɩ mɔ kɛɛ behilehile na bɛyɛ́ mmenii mɔɔ bɔwɔ amanlɩ munwatĩĩ yɩ adʋwavʋlɔ. (Matiyu 10:7, 11; 24:14; 28:19, 20, NW) Ɔzɔ egyima eyi igua ɔzʋlɔ ɩba yɩ awielɩyɛ wɔ oyuwadɩ eyi mɔɔ ɩbaa awielɩyɛ nɩ nu. Wɔ mmɩlɩ mɔɔ ili bɔmʋnlɩ wɔ enii yɩ azɩwʋwalɛ nu nɩ, Gyehova ikohunwa mmenii mbɩmmbɩɩ mɔɔ bɔzʋ̃ oyuwadɩ yɩ dɩka bela bo munwa ɩba nɔhʋanlɛ ɔzʋ̃mɩnlɛ nu. (Yikile 7:9, 10) Bɛhyɩhyɛ nɔhʋanlɛ Ahilisinyiamaa kɛɛ okuwu na bɛahʋla bɛawʋwa na bɛahyɩhyɛ bɔnwʋ bɔnwʋ ɛzɩzɩbɛ. Wɔ oyuwadɩ yɩ dɩka bela nɩ, benyia Bayɩbʋlʋ nu ehilehilelɛ ɔkʋ̃ nɩ la wɔ bɛ ayiyialɩyɛ bela tʋ.​—Kɩnga Hibulumaa 10:24, 25.

3. Kɛ ɩyɛlɩ mɔɔ nnɛ mmɩlɩ nu Gyehova Dasɩvʋlɔmaa bɛahyɩhyɛdɩ nɩ ɩwɔlɩ ɩtʋ a?

Wɔ ɔlʋbɔ 1870 nu nɩ, Bayɩbʋlʋ zumanlɛmaa okuwu ɛgyɩkɩ̃ɩ̃ be bɔwɔlɩ ɩtʋ kɛɛ bɛpɩbɛ Bayɩbʋlʋ nu nɔhʋanlɛ odwokɔ mɔɔ nɩ iminli alʋbɔ sʋ̃maa nɩ. Nɩ bezi kɛɛ, Gyisɛsɩ ɩhyɩhyɛ Kilisinyiamaa asafʋ kɛɛ behilehile, meti bɔwɔlɩ ɩtʋ kɛɛ bɔbɔ Nyamɩnlɩ yɩ Bulombunlililɛ yɩ nwʋ ɛlawulo wɔ amanlɩamanlɩ nu. Wɔ ɔlʋbɔ 1931 nɩ, bɛvalɩ dima Gyehova Dasɩvʋlɔmaa bedianlɩ bɔzʋ.​—Kɩnga Egyima 1:8; 2:1, 4; 5:42.

4. Mɩnla ɔhʋanɩ zʋ yɛɛ bɛhyɩhyɛ Gyehova Dasɩvʋlɔmaa a?

Wɔ adʋwavʋlɔ bɛ mmɩlɩ zʋ nɩ, Kilisinyiamaa asafʋ mɔɔ nɩ bɔwɔ amanlɩ azʋlɔtʋ nu munwatĩĩ benyianlɩ mfasʋ wɔ ɔhʋanɩhilelɛ okuwu mɔɔ nɩ bede betiã numɔ kɛɛ Gyisɛsɩ yɛɛ ɩdɩ asafʋ yɩ ti nɩ bɛ ɛkɛnɩ. (Egyima 15:2) Ɩdɩ kɛɛ nnɛ la sʋ̃, Gyehova Dasɩvʋlɔmaa mɔɔ bɔwɔ oyuwadɩ yɩ dɩka bela benyia mfasʋ wɔ Ɔhʋanɩhilelɛ Okuwu mɔɔ bɛdɩ asafʋ nu mbanimbani mɔɔ bɔnwʋ ɩwʋkʋa nɩ bɛ ɛkɛnɩ. Bekila Gyehova Dasɩvʋlɔmaa bɛ egyimayɛlɛnnɩka mɔɔ bekile ɛdɩndɛlɛ tʋ, bɛtindimii, na bɛkyɩhyɛ awuuku mɔɔ bɛfa bosuma Bayɩbʋlʋ wɔ ɛdɩndɛlɛ mɔɔ ɩbʋ 600 nu nɩ zʋ. Ɔzɔ ti, Ɔhʋanɩhilelɛ Okuwu nɩ ɩkʋla ɩfa Bayɩbʋlʋ nu ɛzɩzɩbɛhyɛlɛ nɩɩ ɔhʋanɩhilelɛ ɩma asafʋ azʋlɔtʋ mɔɔ bɔbʋ 100,000 mɔɔ bɔwɔ oyuwadɩ yɩ afʋã bela nɩ. Wɔ asafʋ bela nu nɩ, mmenyia mɔɔ bɛfata nɩ bɔsʋ̃mɩ kɛɛ asafʋ yɩ nu mbanimbani. Ɔzɔ mmenyia eyi bɔzʋ̃ ɔlɔlɛ nu bekila Nyamɩnlɩ yɩ mmuwanɩ yɩ nɩ.​—Kɩnga 1 Pita 5:2, 3.

Bɛhyɩhyɛ Gyehova Dasɩvʋlɔmaa wɔ ɔhʋanɩ be zʋ mɔɔ ɩma bɔbɔ odwokɔba nɩ nwʋ ɛlawulo na bɛyɛ mmenii adʋwavʋlɔ. Dɩkɛ asʋ̃mavʋlɔ yɩ nɩ, Gyehova Dasɩvʋlɔmaa bɛkã odwokɔba nɩ wɔ abika abika nu. (Egyima 20:20) Akʋ̃ sʋ̃ yɛzʋ̃ yɛ ahʋnlɩnɩ nu yɛnɩ mmenii mɔɔ bɔdɔ nɔhʋanlɛ yɩ nɩ suma Bayɩbʋlʋ yɩ. Naasʋ̃ Gyehova Dasɩvʋlɔmaa bɛ́dɩ ahyɩhyɛdɩ be zʋzɔ. Yɛdɩ abusunwa mɔɔ yɛwɔ Ɛzɩlɛ mɔɔ ɩwɔ ɔlɔlɛ. Yɛdɩ mmeliyema mmenyia nɩɩ mmaalɛ mɔɔ yɛdwɩnɩ abiyela nwʋ nkʋ̃kʋ̃ nkʋ̃kʋ̃. (2 Tɛsalonikamaa 1:3) Iluwakɛɛ bɛhyɩhyɛ Gyehova yɩ mmenii kɛɛ bɔzɔ ɩanyɩ na bɔwʋwa mvʋlɔ nɩ yɩ ti, bɛba bɛyɛ abusunwa mɔɔ bɔwɔ anyɩnlɩlelɛ baaba wɔ azɩlɛ yɩ zʋ.​—Kɩnga 1 Pita 2:9; Egyima 20:35.