Kɛ Ɩkɛyɛ Na Wʋ Abusunwa Bɛanyɩ Ale a?

1. Mɩnla ti mɔɔ mmɛla ɔhʋanɩ zʋ agyiahʋnlɩ ihyinyia na ama wʋ abusunwa bɛanyia anyɩnlɩlelɛ a?

Odwokɔba nɩ ɩzʋ̃ Gyehova, anyɩnlɩlelɛ Nyamɩnlɩ nɩ mɔɔ ɩpɛyɩ kɛɛ mmusunwa munwala bɛanyɩ ide nɩ yɩ ɛkɛnɩ. (1 Timoti 1:11, NW) Mɛyɩ yɛɛ ɩhyɩhyɛlɩ agyiahʋnlɩ a. Mmɛla ɔhʋanɩ zʋ agyiahʋnlɩ ihyinyia na ama wʋ abusunwa bɛanyia anyɩnlɩlelɛ iluwakɛɛ, ɩma bʋwabɩlɛ baaba mɔɔ ɔkɔhʋla ɛkɛdɩdɩ wʋ nnwuakula. Ɩsɛ kɛɛ Ahilisinyiamaa bobu aɣanɩ yɩ mmɛla mɔɔ ɩfalɩ agyiahʋnlɩ mɔɔ bɛkɛva bokowula mmɛla tʋ nɩ.​—Kɩnga Luuku 2:1, 4, 5.

Kɛ Nyamɩnlɩ ibu agyiahʋnlɩ ise a? Ɩpɛyɩ kɛɛ agyiahʋnlɩ ɔkʋ̃yɛlɛ mɔɔ ɩwɔ benyia nɩɩ baalɛ bɛ avinli nɩ ɩbʋwa ɛkɛnɩ eɣile bela. Gyehova ɩpɛyɩ kɛɛ ohunɛ nɩɩ ɛyɩlɛ bedi bɔnwʋ bɔnwʋ nɔhʋanlɛ. (Hibulumaa 13:4) Ikyi oholɛwɔlɛ (Malachi 2:16, NW) Naasʋ̃ ɩma Ahilisinyiamaa ɔnwʋmɔ ɔhʋanɩ kɛɛ bɔwɔ oholɛ na begyia fʋlɔ mmɩlɩ mɔɔ bonu ɔkʋ̃ ɩwɔ adwomanlɩ nɩ.​—Kɩnga Matiyu 19:3-6, 9.

2. Mɩnla ɔhʋanɩ zʋ yɛɛ ɩsɛ kɛɛ ohunɛ nɩɩ ɛyɩlɛ bɛnɩ bɔnwʋ di a?

Gyehova ɩwɔlɩ benyia nɩɩ baalɛ kɛɛ bɔwʋwa bɔnwʋ bɔnwʋ wɔ agyiahʋnlɩ nu. (Matiyu 19:4, 5) Kɛ abusunwa yi ti nɩ, ɩsɛ kɛɛ ohunɛ idi anyunumi wɔ yɩ abunsunwa mɔɔ ɩkɛma bɛ nnwʋnlamɩ fʋã nu nninyeni nɩɩ ehilelɛ mɔɔ ikehilehile bɛ Nyamɩnlɩ yɩ nwʋ dɩyɛ nɩ nu. Ɩsɛ kɛɛ ɩzʋ̃ yɩ ahʋnlɩnɩ nu munwala ɩdɔ yɩ yɩ. Ɩsɛ kɛɛ ohunɛ nɩɩ ɛyɩlɛ bɔdɔ na bobu bɔnwʋ bɔnwʋ. Iluwakɛɛ ohunɛmaa nɩɩ ɛyɩlɛmaa munwala bɛáli munli nɩ ti, ozumanlɛ mɔɔ bokozuma kɛɛ bɛkɛva tanɩ bɛkɛhyɩhyɛ bɔnwʋ nɩ yɛɛ ɩkɛma bekenyia anyɩnlɩlelɛ wɔ bɛ agyiahʋnlɩ nu a.​—Kɩnga Ɛfɩsɛsɩmaa 4:31, 32; 5:22-25, 33; 1 Pita 3:7.

3. Sɛ anyɩnlɩlelɛ íni wʋ agyiahʋnlɩ nu a, asʋ̃ ɩsɛ kɛɛ eyiaki a?

Sɛ beyiyiaa ndwokɔ ɛzɩzɩbɛ wɔ bɛ agyiahʋnlɩ nu a, ɩsɛ kɛɛ bɛzabɛ anwɩ̃ munwala boduwa ɔlɔlɛ zʋ bedi ɔnwʋmɔ egyima. (1 Kɔlɛntɩmaa 13:4, 5) Nyamɩnlɩ yɩ Odwokɔ ɩánhyɛ ɔnwʋmɔ ɛzɩzɩbɛ kɛɛ bɛkɛdɩdɩ agyiahʋnlɩ nu mɔɔ sianti yɛ lɛ kɛɛ bɛlɛ besiyeziye ndwokɔ ɛzɩzɩbɛ mɔɔ ɩtaa isizi wɔ agyiahʋnlɩ nu nɩ.​—Kɩnga Maakɩ 10:9.

4. Nnwuakula, mɩnla yɛɛ Nyamɩnlɩ ɩpɛyɩ kɛɛ benyia a?

Gyehova ɩpɛyɩ kɛɛ bɛanyɩ ide. Ɩma fʋlɔdʋlɛ baaba wɔ ɔhʋanɩ ba mɔɔ ɩkɛma bekenyia anyɩnlɩlelɛ wɔ bɛ mbavʋlɔ anzɛnyɩɩ bɛ nɣɛdɛkɛ mmɩlɩ nu. Ɩpɛyɩ kɛɛ benyia mfasʋ wɔ nɣɛlɛbɛ nɩɩ ozumanlɛwʋnlɛ mɔɔ bɛ awʋvʋlɔ bɔwɔ yɩ nɩ zʋ. (Kolosiyiamaa 3:20) Gyehova ɩpɛyɩ kɛɛ benyia anyɩnlɩlelɛ wɔ yɩ apɛdɩ mɔɔ bɛkɛyɛ bɛkɛma bɛ Wɔlɛvʋlɔ nɩɩ yɩ Ɣa nɩ nu.​—Kɩnga Matiyu 19:13-15; 21:15, 16.

5. Awʋvʋlɔ, kɛ ɩkɛyɛ na bo nnwuakula bɛanyia anyɩnlɩlelɛ a?

Ɩsɛ kɛɛ bɛyɛ egyima ɛzɩzɩbɛ na bɛama bo nnwuakula alɩyɛ, dɩka mɔɔ bɛkɛla, nɩɩ mɔɔ bokowula. (1 Timoti 5:8) Naasʋ̃ sɛ bo nnwuakula bekenyia anyɩnlɩlelɛ a, ɩsɛ kɛɛ bekihile bɛ ma bɔdɔ Nyamɩnlɩ na bosumazuma yɩ. (Ɛfɩsɛsɩmaa 6:4) Bɛ ndianwʋ mɔɔ bekɛva bekehile kɛɛ bɔdɔ Gyehova nɩ ɩkɔhʋla ikenyia tumi wɔ bɛ mma ahʋnlɩnɩ zʋ. Sɛ bekyina Nyamɩnlɩ yɩ Odwokɔ zʋ bɛtɩdɩ bɛ mma a, sa ɩkʋla isiyeziye bɛ adwɩnɩ wɔ ɔhʋanɩ ba zʋ. Bayɩbʋlʋ ɩkã kɛɛ, “Tɩdɩ kuakula wɔ ɔhʋanɩ ba zʋ; na sɛ inyii po a, ɩlɔ́twɩ̃ ɩnwʋ wɔ ɔnwʋmɔ.”—Proverbs 22:6, NW.​—Kɩnga 2 Timoti 3:15.

Nnwuakula nyia mfasʋ sʋ̃maa mmɩlɩ mɔɔ ɛhyɛ bɛ ɛzɩzɩbɛ na ɛkamvʋ bɛ nɩ. Behyinyia ɛdɩnɣɛlɛ nɩɩ ɛdɩnyɩanlɛ. Ɔzɔ ɛdɩdɩlɛ nɩ ɩkɔwɔ bɔnwʋ banɩ wɔ nyɛlɩyɛ mɔɔ ɩkɛzɩkɛ bɛ anyɩnlɩlelɛ nwʋ. (Hibulumaa 12:11) Naasʋ̃ íni kɛɛ ɛdɩnyɩanlɛ nɩ ɩyɛ hihe hihe anzɛnyɩɩ atinuzɩzɩbɛ ɔhʋanɩ zʋ kyɩ̃.​—Kɩnga Kolosiyiamaa 3:21.

Gyehova Dasɩvʋlɔmaa wɔ awuuku sʋ̃maa mɔɔ bɛhɛlɛ yɩ pɔkyɩ̃ɩ̃ bɛma awʋvʋlɔ nɩɩ nnwuakula kɛɛ ɩwʋwa bɛ. Ɔzɔ awuuku nɩ igyĩ Bayɩbʋlʋ yɩ zʋ.​—Kɩnga 2 Timoti 3:16.