Dí Nɔhʋanlɛ Wɔ Dɩyɛ Bela Nu

Abiyela ɩpɛ ɔhɔnwʋ mɔɔ idi nɔhʋanlɛ. Ɔzɔ la yɛ Gyehova sʋ̃ ɩpɛ kɛɛ yɩ ɔhɔnwʋmmɔ bedi nɔhʋanlɛ a. Naasʋ̃ ɩáyɛ mɛlɛkɛ kɛɛ yekeli nɔhʋanlɛ wɔ oyuwadɩ mɔɔ nɔhʋanlɛlilɛ ɩzã wɔ numɔ nɩ nu. Sɛ yedi nɔhʋanlɛ wɔ dɩyɛ bela nu a, mɩnla mfasʋ yɛ yekenyia a?

1. Mɩnla ti mɔɔ nwʋmɔ ihyinyia paa kɛɛ yedi nɔhʋanlɛ a?

Sɛ yedi mmenii mvʋlɔ nɔhʋanlɛ a, nɩ yɛdaa yɩ ali kɛɛ yɛdɔ Gyehova na yebu yi sʋ̃. Mɔwʋ sunzú nwʋmɔ kila: Gyehova izi ye nzunzunlɩyɛ nɩɩ yɛ nyɛlɩyɛ munwala. (Hibulumaa 4:13) Sɛ yesi pɔkɔ kɛɛ yekeli nɔhʋanlɛ a, ɩnwʋ yɩ na yɩ anyɩ ide baaba paa. Yɩ Odwokɔ ɩkã kɛɛ: “Gyehova ikyi nnahɩlɩbɛvʋlɔ, na ɛdɩnɣɛlɛmaa yɛ bɛdɩ Yɩ ɔhɔnwʋmmɔ paa.”—Ɛɣɛlɛwulɛ 3:32.

2. Mɩnla bʋwabɩlɛ azʋlɔtʋ nu yɛ ɩsɛ kɛɛ yedi nɔhʋanlɛ a?

Gyehova ɩpɛ kɛɛ ‘yɛkã nɔhʋanlɛ yekile yɛ ɔhɔnwʋmmɔ.’ (Zakalɩya 8:16, 17) Kɛ eyi yɩ tʋ ikile a? Sɛ yɛ nɩɩ ye mmusunwamaa, yɛ ɔhɔnwʋmmɔ egyimayɛlɛmaa, ye mmeliyema Kilisinyiamaa anzɛnyɩɩ aɣanɩ mbanimbani di a, yɛálahɩlɩ bɛ mfomi yɛkã nɔhʋanlɛ yekile bɛ. Bɛzabɛ mɔɔ bedi nɔhʋanlɛ nɩ, bɛáwuwa mvʋlɔ bɛ dɩyɛ na bɛázizi bɛ sʋ̃. (Kɩnga Ɛɣɛlɛwulɛ 24:28 nɩɩ Ɛfɩsɛsɩmaa 4:28.) Na botuwa ndwuliyɛ bela sʋ̃. (Wulomimaa 13:5-7) Wɔ bʋwabɩlɛ mɔɔ ɩdɩdɩ zɔ munwala nu nɩ, “yɛfa nɔhʋanlɛlilɛ yɛbɔ yɛ ɛbɩla wɔ dɩyɛ bela nu.”—Hibulumaa 13:18.

3. Mɩnla mfasʋ yɛ ɩwɔ nɔhʋanlɛlilɛ zʋ a?

Sɛ mmenii zi yɛ kɛɛ yedi nɔhʋanlɛ a, bede yɛ bedi. Na ɩma abiyela yɩ ahʋnlɩnɩ ɩtɔ yi kunlu wɔ asafʋ yɩ nu kɛmɔ abusunwa mɔɔ ɔlɔlɛ ɩwɔ numɔ ɩdɩ nɩ. Ɩbʋwa ma yenyia ti ɔwʋwaba baaba. Dɔkʋ̃ sʋ̃, sɛ yedi nɔhʋanlɛ a, ɩkɛma mmenii ‘kɔnwʋ yɩ kɛɛ ehilehilelɛ nɩ mɔɔ ɩfalɩ Nyamɩnlɩ yɛ Nnwʋanlɩlelɛvʋlɔ nɩ nwʋ nɩ ɩdɩ baaba,’ na ɩkɛhã mmenii mvʋlɔ sʋ̃ ma bekenyia ɛpɛ kɛɛ bɛkɛɣa bɔkɔzʋ̃mɩ Gyehova.—Tayɩtɔsɩ 2:10.

SUMÁ SƲ̃MAA

4. Gyehova yɩ anyɩ ideli nɔhʋanlɛlilɛ nwʋ

Kɩnga Ndwomi 44:21 nɩɩ Malaki 3:16, na akʋ̃ bozunzú ndwokɔɣizialɛ eyimmɔ nwʋ:

• Osunzu kɛɛ mɩnla ti mɔɔ íni kɛɛ yenyia adwɩnɩ kɛɛ yɛkɔhʋla yɛkɛva dɩyɛ be yekeziye Gyehova a?

• Ekila a, sɛ yesi pɔkɔ kɛɛ yɛkɛhã nɔhʋanlɛ mmɩlɩ mɔ ɩyɛ sɩ po a, kɛ Gyehova ɩkɛdɩ nɣanlɩ ikeze a?

5. Dí nɔhʋanlɛ eɣile bela

VIDIYO: Mɩnla Yɛ Ɩfa Anyɩnlɩlelɛ Ɩba a?—Tile Ɔwʋwaba Baaba (2:32)

Kɩnga Hibulumaa 13:18, na akʋ̃ bozunzú kezimɔ yekeli nɔhʋanlɛ wɔ  . . .

• yɛ abusunwa nu.

• egyima anzɛnyɩɩ sukuulu nu.

• bʋwabɩlɛ mvʋlɔ nu.

6. Yenyia nɔhʋanlɛlilɛ zʋ mfasʋ

Ebiye a ɛkɛhã kɛɛ sɛ ɛkã nɔhʋanlɛ a, ɩkɛma wʋ nwʋ ɩkɛhyɩlɩ wʋ. Naasʋ̃ awielɩyɛ kʋlaa nɩ, ɔkɔnwʋ yɩ kɛɛ ɩdɩ baaba paa kɛɛ ɛhanlɩ nɔhʋanlɛ yɩ. Kɩnga Ndwomi 34:12-16, na akʋ̃ bozunzú odwokɔɣizialɛ eyi nwʋ:

• Mɩnla ɔhʋanɩ zʋ yɛ nɔhʋanlɛlilɛ ɩma wʋ ɛbɩlawɔlɛ itu mpʋnɩ a?

1. A. Agyiahʋnlɩmaa mɔɔ bedi nɔhʋanlɛ nɩ, bɛhyɛ bɛ agyiahʋnlɩ nu ɛzɩzɩbɛ

2. B. Egyimayɛlɛmaa mɔɔ bedi nɔhʋanlɛ nɩ, be egyima diibenyia de bɛ di

3. D. Manlɩmaa mɔɔ bedi nɔhʋanlɛ nɩ, benyia manlɩ mbanimbani bɛ anyunu ɔnlʋmɩnlɛ

YƖ DƆKƆWƆLƐ

Gyehova ɩpɛ kɛɛ yɩ ɔhɔnwʋmmɔ bedi nɔhʋanlɛ wɔ mɔɔ bɛkã nɩɩ mɔɔ bɛyɛ munwala nu.

Kɛ Okowuwa Ekeze a?

• Mɩnla bʋwabɩlɛ azʋlɔtʋ nu yɛ ɩsɛ kɛɛ yedi nɔhʋanlɛ a?

• Mɩnla ti mɔɔ íni kɛɛ yenyia adwɩnɩ kɛɛ yɛkɔhʋla yɛkɛva dɩyɛ be yekeziye Gyehova a?

• Mɩnla ti mɔɔ ɛpɛ kɛɛ edi nɔhʋanlɛ eɣile bela a?

PƖBƐ́ SƲ̃MAA

Mɩnla ɔhʋanɩ zʋ yɛ awʋvʋlɔ bɔkɔhʋla bekehilehile bo nnwuakula ma bekeli nɔhʋanlɛ a?

Kã Nɔhʋanlɛ (1:44)

Sɛ yedidi yɛ anʋhʋba zʋ a, mɩnla mfasʋ yɛ ɩwɔ zʋ a?

Dí Wʋ Anʋhʋba Zʋ, Na Ekenyia Nyilalɛ (9:09)

Sɛ bɛáva ndwuliyɛ bedi egyima bʋwɔ a, asʋ̃ ɩsɛ kɛɛ yɛkɔ ɔzʋlɔ yetuwa a?

“Ndwuliyɛ—Asʋ̃ Ɩsɛ Kɛɛ Otuwa a?” (Ɔwɩɛnɩlɛ Aɣanɩ, October 1, 2011)

Mɩnla yɛ ɩhanlɩ benyia be mɔɔ nɩ iáli nɔhʋanlɛ ma ɩɣa ɩyɛlɩ nɔhʋanlɛvʋlɔ a?

“Mɩɣa Mʋnwʋnlɩ Yɩ Kɛɛ Gyehova Ɩdɩ Ngokɛnwʋnlɛvʋlɔ Na Ɩfa Tanɩ Ɩkyɛ” (Ɔwɩɛnɩlɛ Aɣanɩ, May 1, 2015)