OZUMALƐDƖYƐ 38
Ma Wʋ Anyɩ Ɩzɔ Nnwʋanlɩ Akyɛdɩ nɩ
Iluwa nnwʋanlɩ mɔɔ yɛlɛ nɩ ti yɛkʋla yɛyɛ nninyeni sʋ̃maa mɔɔ ɩma yɛ anyɩ ide. Sɛ yeyiyia ndwokɔzɩzɩbɛ po a, yɛ anyɩ ɩkɔhʋla ikele wɔ yɛ ɛbɩlawɔlɛ nu. Kɛ ɩkɛyɛ na yɛahile anyɩnlɩzɔlɛ yɛama nnwʋanlɩ a? Na mɩnla sianti titili ti yɛ ɩwɔ kɛɛ yɛyɛ ɔzɔ a?
1. Mɩnla ti mɔɔ ɩsɛ kɛɛ yekile anyɩnlɩzɔlɛ yɛma nnwʋanlɩ a?
Ɩsɛ kɛɛ yɛ anyɩ ɩsɔ nnwʋanlɩ iluwakɛɛ ɩdɩ akyɛdɩ mɔɔ ɩzʋ̃ Gyehova, yɛ Zɩ mɔɔ ɩwɔ ɔlɔlɛ nɩ yɩ ɛkɛnɩ. Mɛyɩ “yɩ ɛkɛnɩ yɛ nnwʋanlɩ ɩzʋ̃ a,” mɛyɩ yɛ ɩwɔlɩ nnwʋanlɩ bela a. (Ndwomi 36:9) “Mɛyɩ yɩzayɩ yɛ ɩma enii bela nnwʋanlɩ nɩɩ mmʋnlɩlelɛ nɩɩ dɩyɛ bela a.” (Egyima 17:25, 28) Gyehova ɩva dɩyɛ bela mɔɔ yehyinyia na yɛahʋla yɛawʋwa nnwʋanlɩ nu nɩ ɩma yɛ. Ɩbɔ yɛ nnwʋanlɩ nwʋ banɩ na ama yɛ anyɩ ɩahʋla iale wɔ ɛbɩlawɔlɛ nu.—Kɩnga Egyima 14:17.
2. Kɛ ɩkɛyɛ na yɛama Gyehova ɩanwʋ kɛɛ yɛ anyɩ ɩsɔ nnwʋanlɩ akyɛdɩ nɩ a?
Ɔzʋmɩ mmɩlɩ mɔ bɛɣɩnzɛlɩ wʋ la yɛ Gyehova ɩwɔlɩ yɩ tʋ kɛɛ ikilaa wʋ a. Sunzuma nɩ ɩhanlɩ Nyamɩnlɩ yɩ sʋ̃mɩvʋlɔ Devidi ma ɩhanlɩ kɛɛ: “Mmɩlɩ mɔ mɩdɩ mmegyia wɔ mɩ maamɩ kunlu nɩ ɔnwʋnlɩ mɩ.” (Ndwomi 139:16) Wʋ nnwʋanlɩ nwʋ ihyinyia Gyehova baaba. (Kɩnga Matiyu 10:29-31.) Sɛ abiye ɩhyɛ da itua abiye yɩ nnwʋanlɩ zʋ anzɛnyɩɩ yɩzayɩ nnwʋanlɩ zʋ po a, ɩma Gyehova idi ɛyɛkɛ baaba.a (Ɛkɩsadɔsʋ 20:13) Sɛ dɩyɛ be mɔɔ nwʋmɔ iáhyinyia ti yɛfa yɛ nnwʋanlɩ anzɛnyɩɩ mmenii mvʋlɔ bɔ nnwʋanlɩ yetiã asianɩ nu a, mɛyɩ sʋ̃ ɩma idi ɛyɛkɛ. Sɛ yekila yɛ nnwʋanlɩ zʋ bʋwɔ na yɛbɔ mmenii mvʋlɔ bɔ nnwʋanlɩ nwʋ banɩ a, nɩ yɛdaa yɩ ali kɛɛ yɛ anyɩ ɩsɔ nnwʋanlɩ mɔɔ ɩdɩ akyɛdɩ mɔɔ ɩyɛ nnwʋánlɩ nɩ.
SUMÁ SƲ̃MAA
Kilá ɔhʋanɩ azʋlɔtʋ mɔɔ sa ɔkʋla oduwa ɔzʋlɔ ekile kɛɛ wʋ anyɩ ɩsɔ nnwʋanlɩ akyɛdɩ nɩ.
3. Kilá wʋ pɔkɔdɩlɛ bʋwɔ
Kilisinyiamaa mɔɔ beyila bɔ nwʋ zʋ bɛma Gyehova nɩ, bɛfa bɛ nnwʋanlɩ munwatĩĩ bɔsʋ̃mɩ yɩ. Dɩkɛɛ mɔɔ bɛlɛ be eniiwudo bɔbɔ afɔlɩ bɛkɛma Nyamɩnlɩ. Kɩnga Wulomimaa 12:1, 2, na akʋ̃ bozunzú ndwokɔɣizialɛ eyimmɔ nwʋ:
Mɩnla yɛ ɩsɛ kɛɛ ɩkã wʋ ma ekila wʋ pɔkɔdɩlɛ zʋ bʋwɔ a?
Mɩnla ɔhʋanɩ zʋ yɛ ɔkɔhʋla ɛkɛyɛ ɔzɔ a?
4. Kilá na wʋáyɛ dɩyɛ be mɔɔ ɩkɛma abiye ikebila anzɛnyɩɩ ikowu
Bayɩbʋlʋ ɩhyɛ yɛ ɛzɩzɩbɛ kɛɛ yɛhwɩ̃ yɛ nwʋ wɔ nyɛlɩyɛ mɔɔ asianɩ wɔ numɔ nwʋ. Yɩ́ VIDIYO nɩ na sumá nninyeni be mɔɔ sa ɔkʋla ɛyɛ ɛfa ɔbɔ wʋ nwʋ banɩ.
Kɩnga Ɛɣɛlɛwulɛ 22:3, na akʋ̃ bozunzú kezimɔ ɛ nɩɩ mmenii mvʋlɔ bɔkɔwɔ bɔ nwʋ banɩ mmɩlɩ mɔ . . .
ɔwɔ awudo.
ɛyɛɛ egyima.
edii ɛɣɛlɛ.
otwii kaalɩ, moto anzɛnyɩɩ baskɩlɩ.
5. Kuakula mɔɔ ɩla kunlumi nu nɩ, bɔ́ yɩ nnwʋanlɩ nwʋ banɩ
Devidi ihileli numɔ kɛɛ, nnwuakula mɔɔ bɛla bɛ maamɩ yɩ awʋdɩ nu nɩ, bɔ nnwʋanlɩ nɩ kezimɔ bekenyi nɩ nwʋmɔ ihyinyia Gyehova. Kɩnga Ndwomi 139:13-17, na akʋ̃ bozunzú odwokɔɣizialɛ eyi nwʋ
Ekila a, wɔ Gyehova anyɩ zʋ nɩ, abiye yɩ nnwʋanlɩ ɩbɔ yɩ tʋ wɔ mmɩlɩ mɔ bɛɣɩnzɛ yɩ anzɛnyɩɩ ɩdɩ mmɩlɩ mɔ bɔwʋ yɩ nɩ?
Gyehova yɩ mmɛla mɔɔ ɩva ɩmanlɩ tɩɩtɩɩ Yizilayamaa nɩ ɩwɔlɩ enlinlɛmaa nɩɩ bɛ mma mɔɔ bɔlɔ́wʋlɩ bɛ nɩ nwʋ banɩ. Kɩnga Ɛkɩsadɔsʋ 21:22, 23, na akʋ̃ bozunzú ndwokɔɣizialɛ eyimmɔ nwʋ:
Sɛ abiye ɩáhyɛda na ikũ kuakula mɔɔ ɩla kunlumi nu a, nɩ kɛ Gyehova ibu yi ise a?
Sɛ abiye ɩhyɛda ikũ kuakula mɔɔ ɩla kunlumi nu a, ekila a, kɛ ɩkɛdɩ nɣanlɩ ikeze a?b
Kɛ ɛtɩ nɣanlɩ ese wɔ adwɩnɩ eyi mɔɔ Gyehova ɩlɛ nɩ nwʋ?
Baalɛ po mɔɔ ibu nnwʋanlɩ kɛɛ ɩtʋ bʋlɔ nɩ ebiye a ɩkɔhʋla ɩkɛdɩ nɣanlɩ kɛɛ sɛ ɩyɩ ɛɣɩnzɛlɛ ikua a, yɛ ɩkɔwʋwa yɩ a. Kɩnga Ayɩzaya 41:10, na akʋ̃ bozunzú ndwokɔɣizialɛ eyimmɔ nwʋ:
Sɛ bɛhyɛɛ baalɛ be kɛɛ ɩyɩ́ ɛɣɩnzɛlɛ be igua a, aninyia yɛ ɩsɛ kɛɛ ɩpɩbɛ mmʋwalɩyɛ wɔ yɩ ɛkɛ a? Mɩnla ti a?
ABIYEMMƆ BƐKÃ KƐƐ: “Sɛ baalɛ be ilésiyeziyeli yɩ nwʋ kɛɛ ikilaa kuakula a, ɩkʋla ɩyɩ ɛɣɩnzɛlɛ nɩ ikua.”
Mɩnla yɛ ɩma ede edi kɛɛ enlinlɛ nɩɩ yɩ ɣa mɔɔ ɩla kunlumi nu munwala bɔ nnwʋanlɩ ɩtʋ bʋlɔ ma Gyehova a?
YƖ DƆKƆWƆLƐ
Nnwʋanlɩ ɩdɩ akyɛdɩ mɔɔ Gyehova ɩva ɩma yɛ, Bayɩbʋlʋ ikilehile yɛ kɛɛ yɛlɔ́ nnwʋanlɩ, yewú yi kɛɛ ɩtʋ bʋlɔ na yɛwɔ́ nwʋmɔ banɩ. Eyi ɩfalɩ yɛzayɛ nɩɩ mmenii mvʋlɔ bɔ nnwʋanlɩ nwʋ.
Kɛ Okowuwa Ekeze a?
Mɩnla ti mɔɔ enii nnwʋanlɩ ɩtʋ bʋlɔ ɩma Gyehova a?
Sɛ abiye ɩhyɛ da ide enii fʋlɔ yɩ nnwʋanlɩ wɔ yɩ sa nu a, kɛ Gyehova ɩtɩ nɣanlɩ wɔ nwʋmɔ ise a?
Mɩnla ti mɔɔ nnwʋanlɩ akyɛdɩ nɩ ɩtʋ bʋlɔ ɩma wʋ a?
PƖBƐ́ SƲ̃MAA
Mɩnla ɔhʋanɩ zʋ yɛ yɛkɔhʋla yekehile anyɩnlɩzɔlɛ yɛkɛma nnwʋanlɩ akyɛdɩ nɩ a?
Asʋ̃ Gyehova ɩkɛva baalɛ mɔɔ ɩyɩ ɛɣɩnzɛlɛ igua yɩ tanɩ ɩkɛhyɛ yɩ a? Pɩbɛ́ odwokɔɣizialɛ eyi nwʋ munwalɩyɛ.
“Mɩnla Yɛ Bayɩbʋlʋ Ɩka Ɩfalɩ Ɛɣɩnzɛlɛ Mɔɔ Bɛyɩ Bokua Nɩ Nwʋ a?” (Ndwokɔ mɔɔ ɩwɔ jw.org zʋ)
Sumá kezimɔ ɩsɛ kɛɛ Nyamɩnlɩ yɩ adwɩnɩ mɔɔ ɩwɔ wɔ nnwʋanlɩ nwʋ nɩ ɩkã nninyeni mɔɔ yɛfa yede yɛ anyɩ nɩ.
“‘Ɛɣɛlɛlilɛ Mɔɔ Asianɩ Wɔ Nu’—Asʋ̃ Ɩsɛ Kɛɛ Mɩfa Mʋ Nwʋ Muwula Nu a?” (Awake!, October 8, 2000)
Sɛ abiye inyia adwɩnɩ kɛɛ ihũ yɩ nwʋ sʋ̃ ɛ? Kilá kezimɔ Bayɩbʋlʋ ɩkɔhʋla ɩkɔwʋwa yɩ.
a Gyehova ɩdwɩnɩ bɛzabɛ mɔɔ bɛ ahʋnlɩnɩ iwuwu nɩ nwʋ bʋwɔ baaba. (Ndwomi 34:18) Ɛyɛkɛ kezile mɔɔ abiyemmɔ di mɔɔ ɩma benyia adwɩnɩ kɛɛ bohũ bɔ nwʋ nɩ, ɩtɩ yɩ tʋ na ɩpɛ kɛɛ ɩbʋwa bɛ. Sɛ ɛpɛ kɛɛ ɔnwʋ kezimɔ mmʋwalɩyɛ mɔɔ ɩfa ɩma nɩ ɩkʋla ɩbʋwa mmenii mɔɔ bɛpɛ kɛɛ botua bɔ nnwʋanlɩ zʋ nɩ ma bɛsɩnza bɛ adwɩnɩ a, kɩnga odwokɔ mɔɔ ɩwɔ Pɩbɛ Sʋ̃maa ɔfʋã ɛkɛnɩ mɔɔ ɩwɔ ozumalɛdɩyɛ eyi nu mɔɔ yɩ odwokɔtile ise “Mɩpɛ Kɛɛ Muwu—Sɛ Mɩpɛ Kɛɛ Mukũ Mʋ Nwʋ a, Asʋ̃ Sa Bayɩbʋlʋ Ɩkʋla Ɩbʋwa Mɩ Ma Mɩsɩnza Mɩ Adwɩnɩ a?”
b Bɛzabɛ mɔɔ bɛyɩ nnwuakula bogua kyɩ̃ nɩ íni kɛɛ bɛma nwʋmɔ ɔfɔlilɛ ɩhyɛ bɔ zʋ sʋ̃maa, iluwakɛɛ Gyehova ɩkɔhʋla ɩkɛva bɛ tanɩ ɩkɛhyɛ bɛ. Sɛ ɛpɛ kɛɛ ɔnwʋ eyi nwʋ ndwokɔ sʋ̃maa a, kilá odwokɔtile mɔɔ ise “Mɩnla Yɛ Bayɩbʋlʋ Ɩkã Ɩfalɩ Ɛɣɩnzɛlɛ Mɔɔ Botu Bokua Nwʋ a?” mɔɔ ɩwɔ Pɩbɛ Sʋ̃maa ɔfʋã ɛkɛnɩ wɔ dɩyɛzumanlɛ eyi nu nɩ.