Asʋ̃ Hɛɛlɩ Wɔ Kɛnɩ Amba a? Mɩnla Yɛ Bayɩbʋlʋ Yɩ Kã Wɔ Hɛɛlɩ Anzɛnyɩɩ Abɔnsamɩ Sɩnɩ Nwʋ a?
Mɔɔ Bayɩbʋlʋ yɩ kã
Bayɩbʋlʋ tʋhilelɛ azʋlɔtʋ be dɩkɛɛ King James Version yɩ valɩ odwokɔpɔkɔ “hɛɛlɩ” lili egyima wɔ nkyɩkyɛmi azʋlɔtʋ be nu. (Ndwomi 16:10; Egyima 2:27) Kɛmɔ mfonyini mɔɔ ɩwɔ odwokɔ eyi nu kile nɩ, mmenii sʋ̃maa de di kɛɛ hɛɛlɩ anzɛnyɩɩ Abɔnsamɩ sɩnɩ dɩ sɩnɩ be mɔɔ iánlu kyɩ̃ na bɔtwɩ̃ tanɩyɛlɛmaa bɛ azʋ̃ wɔ nu. Asʋ̃ ɔzɔ yɛ Bayɩbʋlʋ yɩ kilehile a?
Yekozunzu ndwokɔ eyimmɔ nwʋ wɔ ɔfʋã eyi nu
Gyisɛsɩ yɩ ndianwʋ mɔɔ ɩfalɩ ozukuavʋlɔ yɩ nɩɩ Lazʋlɔsʋ nwʋ nɩ, kɛ yɩ tʋ kile a?
Bayɩbʋlʋ nu nkyɩkyɛmi azʋlɔtʋ mɔɔ ɩfalɩ hɛɛlɩ anzɛnyɩɩ Gyantwɩ̃ nwʋ
Asʋ̃ hɛɛlɩ dɩ dɩka mɔɔ bɛyɛ mmenii ayɛkwa daabaa a?
Anhã. Bayɩbʋlʋ tʋhilelɛ azʋlɔtʋ be kile adasamaa be “Siye” (mɔɔ mbɔmɩ sʋ̃maa nɩ bɛkã wɔ Hibulu nu kɛɛ “Sheol” nɩɩ Giliki nu kɛɛ “Hades”) yɩ tʋ kɛɛ “hɛɛlɩ.” Bayɩbʋlʋ yɩ da yɩ ali kɛɛ bɛzabɛ mɔɔ bɔwɔ “Gyantwɩ̃” nɩ béni nnwʋanlɩ nu dɔkʋ̃.
Awuvʋlɔ bɛádɩ nɣanlɩ meti bɔlɔ́kʋla bɛkɛdɩ ɛyɛkɛ bela. “Egyima nɩɩ adwɩnɩ nɩɩ nɣɛlɛbɛ íni Gyantwɩ̃ mɔɔ ɔkɔɔ yɩ nu.” (Odwokɔhanlɛvʋlɔ 9:10) Hɛɛlɩ ɩ́dɩ dɩka mɔɔ mmenii nwʋ amanɩyɛ na betɩnyɩadɩnyɩa nu wɔ kɛ. Mfomi Bayɩbʋlʋ yɩ kã kɛɛ: “Ma tanɩyɛlɛmaa bɛ anyunu gua azɩ, na bɛyɛ dinyii wɔ be siye nu.”—Ndwomi 31:17; Ndwomi 115:17.
Nyamɩnlɩ hã kɛɛ tanɩ yɩ akatuwa yɛ lɛ owulo na kɛ hɛɛlɩ anzɛnyɩɩ Abɔnsamɩ sɩnɩ nu a. Nyamɩnlɩ hanlɩ hileli Adamɩ mɔɔ ɩdɩ enii mɔɔ ili bɔmʋnlɩ nɩ kɛɛ, sɛ ibulu yɩ mmɛla zʋ a, ikowu. (Gyɛnɛsɩsɩ 2:17) Ɩákã kɛɛ ɩkɛyɛ yɩ ayɛkwa wɔ sɩnɩ be nu. Aɣinzi yi mɔɔ Adamɩ yɛlɩ tanɩ na Nyamɩnlɩ ɩkãã mɔɔ ɩkɛyɛ ɩkɛva ɩkɔhwɩ̃ yɩ azʋ̃ nwʋ odwokɔ nɩ, ɩhanlɩ kɛɛ: “Ɛdɩ ndɛdɛlɛ na ndɛdɛlɛ nu yɛ ekezia ɔkɔhɔ a.” (Gyɛnɛsɩsɩ 3:19) Nɩ Adamɩ lɔ́bʋwa nnwʋanlɩ nu dɔkʋ̃. Sɛ nɩ Nyamɩnlɩ kɛva Adamɩ kɔhɔ hɛɛlɩ anzɛnyɩɩ Abɔnsamɩ sɩnɩ nu a, ankɩ sa ɩkã nwʋmɔ odwokɔ. Nyamɩnlɩ lɛ́sɩnzanlɩ akatuwa mɔɔ ɩwɔ kɛnɩ ɩma bɛzabɛ mɔɔ bokowulu yɩ mmɛla zʋ nɩ. Adamɩ yɛlɩ tanɩ mmɩlɩ tɩndɩnlɩ be mɛda nɩ, Nyamɩnlɩ manlɩ Bayɩbʋlʋ ɛhɛlɛlɛvʋlɔ be hanlɩ kɛɛ: “Tanɩ yɩ akatuwa yɛ lɛ owulo.” (Wulomimaa 6:23) Iáhyinyia kɛɛ bɔtwɩ̃ tanɩvʋlɔ be yɩ azʋ̃ dɔkʋ̃ iluwakɛɛ “mɔɔ iwu nɩ, bowuwa yɩ bɩ̃ wɔ yɩ tanɩ nwʋ.”—Wulomimaa 6:7.
Nyamɩnlɩ yɩ anyɩ iáleli nwʋmɔ kɛɛ bɛkɛyɛ abiye ayɛkwa wɔ sɩnɩ nu. (Gyɛlɩmaya 32:35) Adwɩnɩ mɔɔ mmenii lɛ kɛɛ Nyamɩnlɩ yɛ mmenii ayɛkwa wɔ sɩnɩ be nu nɩ, ɩ nɩɩ Bayɩbʋlʋ yɩ ehilehilelɛ mɔɔ ise “Nyamɩnlɩ ɩdɩ ɔlɔlɛ” nɩ iáyiyia. (1 Dwɔɔnʋ 4:8) Ɩábɛ yɩ kɛɛ yɛsʋ̃mɩ yɩ iluwakɛɛ ye kunlu tu kɛɛ bɛkɛyɛ yɛ ayɛkwa wɔ sɩnɩ nu daabaa nɩ ti a, mfomi ɩpɛ kɛɛ ɔzʋ̃mɩnlɛ mɔɔ yɛfa yɛma yɩ nɩ kyina ɔlɔlɛ zʋ.—Matiyu 22:36-38.
Mmenii baaba hɔlɩ hɛɛlɩ anzɛnyɩɩ Gyantwɩ̃. Bayɩbʋlʋ yɩ kã Gyisɛsɩ nwʋ odwokɔ kɛɛ “bɛáyiaki Kɩlayɩsɩ wɔ Gyantwɩ̃ (hɛɛlɩ) yɛɛ yɩ nnwʋnlamɩ ɩápɔtɔ wɔ kuma nu.” Eyi da ali kɛɛ nɩ Gyisɛsɩ wɔ hɛɛlɩ anzɛnyɩɩ Gyantwɩ̃ wɔ mmɩlɩ mɔ iwuli kɔbʋmɩ mmɩlɩ mɔ bodunwonli yi wɔ owulo nu nɩ. (Egyima 2:31) Ɩda ali petee kɛɛ “hɛɛlɩ” gyĩ kɛnɩ ma Gyantwɩ̃a na kɛ Abɔnsamɩ sɩnɩ a.
Gyisɛsɩ yɩ ndianwʋ mɔɔ ɩfalɩ ozukuavʋlɔ yɩ nɩɩ Lazʋlɔsʋ nwʋ nɩ, kɛ yɩ tʋ kile a?
Gyisɛsɩ yɛ ɩvalɩ ndianwʋ eyi ilili egyima a, na bɛhã nwʋmɔ wɔ Luuku 16:19-31. Bɛfa ndianwʋ bekilehile nɔhʋanlɛ odwokɔ be mɔɔ ɩfalɩ debe nwʋ na ɩma yɛnwʋ kezimɔ Nyamɩnlɩ bu nninyeni sʋ̃. Meti ndianwʋ mɔɔ ɩfalɩ ozukuavʋlɔ yɩ nɩɩ Lazʋlɔsʋ bo odwokɔ yɩ nwʋ nɩ, ɩ́dɩ debe mɔɔ izili ankasa. (Matiyu 13:34) Sɛ ɛpɛ osuma sʋ̃maa falɩ ndianwʋ eyi nwʋ a, kila odwokɔ mɔɔ ise “Sikani No Ne Lasaro—Na Wɔyɛ Henanom?”
Asʋ̃ abiye le yɩ nwʋ wɔ hɛɛlɩ anzɛnyɩɩ Gyantwɩ̃ kyɩ̃ a?
Nyɛ. Bayɩbʋlʋ kã mmenii be mɔɔ bɔhɔlɩ Gyantwɩ̃ (behile yɩ tʋ wɔ Bayɩbʋlʋ azʋlɔtʋ be nu kɛɛ Abɔnsamɩ sɩnɩ) na bezia bɛɣalɩ nnwʋanlɩ nu dɔkʋ̃ nwʋ odwokɔ.b Sɛ nɩ bezi mɔɔ ɩkɔlɩ zʋlɔ wɔ hɛɛlɩ anzɛnyɩɩ Gyantwɩ̃ a, ankɩ sa bɛkã nwʋmɔ odwokɔ mmɩlɩ mɔ bɛɣalɩ nnwʋanlɩ nu nɩ. Naasʋ̃ nnwʋánlɩ odwokɔ yɛ lɛ kɛɛ, ɔzɔ mmenii nɩ, bo nu ɔkʋ̃ po íni kɛnɩ mɔɔ ɩhanlɩ kɛɛ bɛyɛlɩ yɩ ayɛkwa anzɛnyɩɩ ɩdɩlɩ ɛyɛkɛ be. Mɩnla ti a? Kɛmɔ Bayɩbʋlʋ yɩ kilehile nɩ, bézi dɩyɛ bela, nɩ ɩdɩ kɛɛ mɔɔ “bɛla” hatɩɩ.—Dwɔɔnʋ 11:11-14; 1 Kɔlɛntɩmaa 15:3-6.
a Kila alɩka mɔɔ ise “Ndwokɔ Abɔkɔ Mɔɔ Ɩwɔ Ndɛnɩ Mɔɔ Bɛva Bɛhɛlɛlɩ Bayɩbʋlʋ Yɩ Nu.”