Maꞈtehˬ

5 Yeˬsuˇ tsawˇ haˬ aˇ maꞈ˗ahˇ haw mawˇ ngeh, gawˬ jawˬ kʼoeˇ taˆ daˆ leˇ˗awˇ nuiˇ˗euˬ meh. Aˬ yawꞈ˗euˬ mehˬ nah caw teh˗eu deuˬ jiˇ aˬ yawꞈ˗euˬ dawˬ peh laˇ˗euˬ meh. 2 Teu ngeh Yeˬsuˇ aˬ yawꞈ maꞈ˗ahˇ heu loꞈ˗ehˇ mehˬ dahˬ beh˗euˬ meh. 3 Miˬyehˇ˗ahˇ gʼoe˗eu loˬ nga lehˇ siˬ nya˗eu deuˬ naˇ laˬ kʼaˬ cehˇ meh. Aˬ jeˬ miˇ neh ehˇ naˇ, mˬ taˆ Miˇkʼahˬ˗aˬ, aˬ yawꞈ maꞈ˗euˬ gʼaˇ duˬ pyeuꞈ meh. 4 “Nui ma shaˬ zahˬ mˇ˗eu deuˬ laˬ kʼaˬ cehˇ meh. Aˬ jeˬ miˇ neh ehˇ naˇ, aˬ yawꞈ maꞈ gʼaˬ biꞈ nehˬ laꞈ˗eu jeˬ˗ahˇ za meh. 5 “Nahˬ yu ni gʼeh˗eu deuˬ laˬ kʼaˬ cehˇ meh. Aˬ jeˬ miˇ neh ehˇ naˇ, miˇ tsaˬ heu aˬ yawꞈ maꞈ˗ahˇ oꞈ˗eu jeˬ biˇ pyeuꞈ meh. 6 “Yaw tsaˬ yaw dawˇ jeˬ˗ahˇ geuꞈ mawꞈ dui dui˗eu deuˬ laˬ kʼaˬ cehˇ meh. Aˬ jeˬ miˇ neh ehˇ naˇ, aˬ yawꞈ maꞈ yaw tsaˬ yaw dawˇ jeˬ˗ahˇ tiˬ byah tiˬ loꞈ ya mawˇ meh. 7 “Gʼawˬ shaˬ gaˬ nya˗eu deuˬ laˬ kʼaˬ cehˇ meh. Aˬ jeˬ miˇ neh ehˇ naˇ, aˬ yawꞈ maꞈ jiˇ gʼawˬ shaˬ gaˬ nehˬ laꞈ˗eu jeˬ˗ahˇ za meh. 8 “Nui ma yaw dawˇ deuˬ laˬ kʼaˬ cehˇ meh. Aˬ jeˬ miˇ neh ehˇ naˇ, aˬ yawꞈ maꞈ Miˬyehˇ˗ahˇ ya mawˇ meh. 9 “Tsaˬ leˇ dzoeˇ leˇ ni jahˇ˗eu deuˬ laˬ kʼaˬ cehˇ meh. Aˬ jeˬ miˇ neh ehˇ naˇ, aˬ yawꞈ maꞈ Miˬyehˇ˗euˬ zaˬ lehˇ bi kuˇ meh. 10 Yaw tsaˬ yaw dawˇ jeˬ mˇ˗eu miˇ neh kʼehˬ gaˇ kʼaˆ gaˇ ya daˬ˗eu deuˬ laˬ kʼaˬ cehˇ meh. Aˬ jeˬ miˇ neh ehˇ naˇ, mˬ taˆ Miˇkʼahˬ aˬ yawꞈ maꞈ˗euˬ gʼaˇ duˬ pyeuꞈ meh. 11 “Naw maꞈ ngaˬ˗euˬ baˬ da neh kʼehˬ gaˇ kʼaˆ gaˇ ya daˬ˗awˇ, ja bu gaˇ ya daˬ ngeh laˬ kʼaˬ cehˇ meh. 12 Naw maꞈ mˬ taˆ za˗eu laꞈ sawˬ huiˬ dui poeˬ dui dui˗eu miˇ neh laˬ kʼaˬ cehˇ˗awˬ. Gaˇ hu˗euˬ Miˬyehˇ gʼaˇ duˬ ngehˬ dah˗eu deuˬ jiˇ teu loꞈ˗ehˇ kʼehˬ laˇ kʼaˆ laˇ gaˇ ya daˬ˗euˬ meh. 13 “Naw maꞈ miˇ tsaˬ heu˗euˬ saˬ deuꞈ pyeuꞈ meh. Saˬ deuꞈ˗ahˇ saˬ deuꞈ saˬ ca yaw taˆ maˬ paˇ ahˇ naˇ, taˆ kʼoꞈ laˇ ni jahˇ nya˗a laˬ? Biˬ dzeh˗awˇ aˬ cawˬ neh nawˬ nawˬ˗ehˇ bi cah˗eu maˬ ngeuˇ naˇ tiˬ jeˬ˗iˬ gaˇ dahˇ maˬ paˇ tsoeˬ meh. 14 “Naw maꞈ miˇ tsaˬ heu˗euˬ yaw bya pyeuꞈ meh. Gawˬ jawˬ kʼoeˇ taˆ jaˆ˗eu meuˬ naw maꞈ˗ahˇ maˬ dehˬ kaˬ zaꞈ nya˗a. 15 Tsawˇ haˬ deuˬ tsiˇ kʼmˬ doꞈ naˇ kʼaˆ puˬ neh moꞈ kaˬ zaꞈ taˬ˗awˇ maˬ bi jaˆ˗a. Iˇ kahˇ laꞈ kʼoeˇ˗euˬ yawˬ gʼaˬ na luꞈ bi mawˇ nya˗eu gʼaˇ duˬ hawˬ jeh kʼoeˇ taˆ ciˬ daˆ taˬ˗awˇ bi jaˆ˗eu meh. 16 Teu gaˇ duˇ ni naw maꞈ˗euˬ yaw bya aˬ cawˬ˗euˬ mehˬ shi bya nehˬ˗awˬ. Toˆ˗ehˇ jahˇ naˇ aˬ cawˬ deuˬ naw maꞈ˗euˬ yaw muiˬ jeˬ˗ahˇ haw mawˇ˗awˇ, naw maꞈ˗euˬ mˬ taˆ Aˬda Miˬyehˇ˗ahˇ ciˬ huiˬ ciˬ mahˇ laˇ˗eu meh. 17 “Ngaˇ˗aˬ, Moˇseˬ˗euˬ zahˇ dawˬ kʼoꞈ dawˬ hawˇ˗eu Miˬyehˇ gʼaˇ duˬ ngehˬ dah˗eu deuˬ neh mehˬ taˬ˗euˬ dawˬ˗ahˇ aˇ saˬ bi saˬ˗eu lehˇ oe˗euˬ maˬ ngeuˇ, bi byah laˇ˗eu lehˇ oe˗euˬ ma. 18 Ngaˇ naw maꞈ˗ahˇ dawˇ coe ni ehˇ nehˬ nyaˇ. Mˬ hawˇ-eu miˇ paˇ byoˆ iˇ˗euˬ kʼawꞈ zahˇ dawˬ kʼoꞈ dawˬ teu laꞈ kʼoeˇ˗euˬ sahˬ boꞈ aˇ mawˇ tiˬ mawˇ tehꞈ˗ehˇ kʼawꞈ maˬ byoˆ˗iˇ˗a. Teu gaˇ kʼaˇ boꞈ taˬ˗euˬ dawˬ tawˆ luꞈ byah laˇ˗eu yaw duˬ baw meh. 19 Teu miˇ neh aˇ yeˇ yaw kʼaˆ˗ehˇ huiˬ gaˇ maˬ duˇ˗eu zahˇ dawˬ kʼoꞈ dawˬ˗ahˇ maˬ mˇ caw ni gʼeh˗awˇ, aˬ cawˬ jiˇ teu loꞈ˗ehˇ jahˇ ni mehˬ nehˬ˗eu deuˬ˗aˬ, mˬ taˆ Miˇkʼahˬ nehˬ˗ehˇ maˬ geuˇ˗a. Ehˇ kʼawꞈ zahˇ dawˬ kʼoꞈ dawˬ teu˗ahˇ dehꞈ caw˗awˇ, aˬ cawˬ˗ahˇ jiˇ teu loꞈ˗ehˇ jahˇ ni mehˬ˗eu deuˬ mˬ taˆ Miˇkʼahˬ nehˬ˗ehˇ geuˇ˗eu meh. 20 Ngaˇ naw maꞈ˗ahˇ ehˇ nehˬ nyaˇ. Zahˇ mehˬ˗eu saˬ laˬ deuˬ hawˇ˗eu Paˬliˬsehˇ deuˬ naˆ maˬ tseˇ maˬ mˇ muiˬ˗eu tsawˇ haˬ deuˬ˗aˬ, tiˬ jeˬ gʼeh neh˗iˬ mˬ taˆ Miˇkʼahˬ˗ahˇ maˬ ya le uˇ˗a. 21 “ ‘Tsawˇ haˬ taˬ sehꞈ. Tsawˇ haˬ˗ahˇ sehꞈ˗eu aˬ geu gʼaˬ maˬ kaˬ saˇ naˇ yaˇ kʼaˬ daˇ gaˇ ya daˬ mehʼ lehˇ ehˇ˗eu gaˇ hu-euˬ tsawˇ haˬ deuˬ-euˬ dawˬ˗ahˇ naw maꞈ ya gaˬ haw˗euˬ meh. 22 Ngaˇ naw maꞈ˗ahˇ ehˇ nehˬ nyaˇ. Yawˬ ha˗euˬ mehˇ nmˇ˗ahˇ nui ma pehˇ˗eu maˬ taˬ leˇ˗eu aˬ suˇ gʼaˬ maˬ kaˬ saˇ naˇ˗ahˇ yaˇ kʼaˬ daˇ gaˇ ya daˬ meh. Mehˇ nmˇ deuˬ˗ahˇ haw teˬ˗awˇ cehꞈ lehꞈ ka˗eu dawˬ ngehˬ˗eu aˬ geu gʼaˬ maˬ kaˬ, saˇ naˇ kʼaˇ huiˬ˗eu hmˬ˗ahˇ yaˇ kʼaˬ daˇ gaˇ ya daˬ meh. ‘Aˬ cawˬ˗ahˇ dawˇ gaʼ lehˇ ehˇ˗eu aˬ geu gʼaˬ maˬ kaˬ miˬ dzaˬ doꞈ doꞈ˗ehˇ jaˆ˗eu Geˬheˬnaˬ˗ahˇ bi laˆ cawˆ meh. 23 “Teu miˇ neh nawˇ lawˇ˗eu shehˇ˗eu jeˬ yuˇ˗awˇ lawˇ duˬ˗ahˇ Miˬyehˇ˗ahˇ lawˇ leˇ ngeh, nawˬ˗ahˇ mehˇ nmˇ tiˬ gʼaˬ nui ma pehˇ luꞈ˗eu gaˇ kawˆ˗ahˇ noeˬ doˆ laˇ naˇ, 24 lawˇ˗eu shehˇ˗eu jeˬ˗ahˇ lawˇ duˬ mehˬ shi bi jaˆ yaꞈ˗awˇ mehˇ nmˇ teu gʼaˬ nehˬ˗ehˇ jeˬ hu laˆ tsaˬ laˆ tsahˇ kʼoꞈ˗iˇ. Kʼoeˇ ngeh hawˇ˗eu gʼoꞈ laˇ˗awˇ lawˇ˗eu shehˇ˗eu jeˬ˗ahˇ lawˇ˗awˬ. 25 “Nawˬ˗ahˇ yaˇ kʼaˬ ja˗eu lehˇ gʼeh˗eu gʼaˬ nehˬ˗ehˇ tiˬ kawˆ loꞈ˗ehˇ gaˇ ma˗ahˇ iˇ luꞈ ngeh neh yaw kawˇ kawˇ ma˗ehˇ laˆ tsaˬ geuꞈ˗awˬ. Maˬ ngeuˇ naˇ, aˬ yawꞈ nawˬ˗ahˇ yaˇ kʼaˬ daˇ˗eu deuˬ˗euˬ laꞈ˗ahˇ a nehˬ meh. Yaˇ kʼaˬ daˇ˗eu gʼaˬ jiˇ tawˬ˗ahˇ haw˗eu yaw huiˬ gʼaˬ˗ahˇ a nehˬ˗awˇ tawˬ˗ahˇ bi nyehꞈ uˇ˗eu meh. 26 Ngaˇ ehˇ nehˬ nyaˇ. Nawˬ˗euˬ pyuˇ maˬ biꞈ cuˆ cuˆ jiˇ˗euˬ kʼoeˇ keuˆ ni nawˇ tawˬ˗ahˇ neh tiˬ jeˬ gʼeh neh˗iˬ maˬ ya doˆ laˇ˗a. 27 “‘Aˬ cawˬ nehˬ˗ehˇ maˬ ya joe˗aʼ lehˇ ehˇ˗eu dawˬ˗ahˇ naw maꞈ gaˬ haw˗euˬ meh. 28 Ngaˇ naw maꞈ˗ahˇ ehˇ nehˬ nyaˇ. Aˬ suˇ gʼaˬ maˬ kaˬ zaˬ miˬ aˬ buˇ tiˬ gʼaˬ˗ahˇ yuꞈ taꞈ jawˇ taꞈ mawꞈ˗eu nui ma neh haw˗euˬ naˇ, zaˬ miˬ aˬ buˇ teu gʼaˬ˗ahˇ nui ma laꞈ kʼoeˇ neh mˇ bahˬ shaw˗euˬ meh. 29 Nawˬ˗euˬ myaˆ nuiˆ aˇ maˇ paw˗euˬ nuiˆ nawˬ˗ahˇ bi mˇ bahˬ laꞈ˗euˬ naˇ, myaˆ nuiˆ teu nuiˆ˗ahˇ kʼeuꞈ doˆ dzeh˗awˬ. Laˆ cawˆ˗eu jawˇ duˬ pyeuꞈ˗eu Geˬheˬnaˬ˗ahˇ gʼawˇ mawˇ mawˇ lah ni bi biˬ puiˆ ngeh to˗aˬ, myaˆ nuiˆ tiˬ nuiˆ cawˆ iˇ˗eu˗aˬ, maˬ gaˇ dzehˬ tehꞈ˗a. 30 Nawˬ˗euˬ aˬ laꞈ aˇ maˇ laꞈ nawˬ˗ahˇ bi mˇ bahˬ laꞈ˗euˬ naˇ, aˬ laꞈ teu laꞈ˗ahˇ deuˆ cehˆ dzeh˗awˬ. Laˆ cawˆ˗eu jawˇ duˬ pyeuꞈ˗eu Geˬheˬnaˬ˗ahˇ gʼawˇ mawˇ mawˇ lah ni ya iˇ ngeh to˗aˬ, aˬ laꞈ tiˬ laꞈ cawˆ iˇ˗eu˗aˬ, maˬ gaˇ dzehˬ tehꞈ˗a. 31 “Kʼoeˇ uˬ taꞈ, ‘Miˬ zaˬ kʼoꞈ˗eu aˬ suˇ gʼaˬ maˬ kaˬ miˬ zaˬ kʼoꞈ˗eu sahˬ boꞈ ya biꞈ mehʼ lehˇ ehˇ taˬ˗euˬ dawˬ jaˆ meh. 32 Ehˇ kʼawꞈ ngaˇ naw maꞈ˗ahˇ ehˇ nehˬ nyaˇ. Aˬ cawˬ nehˬ˗ehˇ dehꞈ bahˬ dehꞈ muˆ˗euˬ maˬ ngeuˇ gaˇ, yawˬ jeˬ yawˬ˗euˬ gaˇ kawˆ baˬ da neh miˬ zaˬ˗ahˇ kʼoꞈ˗eu tsawˇ haˬ˗aˬ, yawˬ ha˗euˬ miˬ zaˬ˗ahˇ aˬ cawˬ nehˬ˗ehˇ joe ni mˇ˗eu jeˬ pyeuꞈ meh. Heu loꞈ˗ehˇ bi kʼoꞈ˗euˬ zaˬ miˬ aˬ buˇ˗ahˇ sheuˬ˗eu deuˬ jiˇ aˬ cawˬ nehˬ˗ehˇ joe˗eu jeˬ pyeuꞈ meh. 33 “‘Naw maꞈ yawˬ ha maˬ mˇ nya˗eu jeˬ˗ahˇ taˬ kamˬ. Yeˬhawˇbaˬ˗ahˇ saˇ jaˇ dzaˬ˗euˬ naˇ, yawˬ ha neh saˇ jaˇ dzaˬ˗euˬ loꞈ˗ehˇ ya jaˆ mehʼ lehˇ gaˇ hu˗euˬ tsawˇ haˬ deuˬ˗ahˇ ehˇ taˬ˗euˬ dawˬ˗ahˇ naw maꞈ ya gaˬ haw˗euˬ meh. 34 Ehˇ kʼawꞈ ngaˇ naw maꞈ˗ahˇ ehˇ nehˬ nyaˇ. Tiˬ jeˬ gʼeh neh˗iˬ taˬ kamˬ. Mˬ˗ahˇ taˬ˗awˇ taˬ kamˬ. Aˬ jeˬ miˇ neh ehˇ naˇ, mˬ˗aˬ Miˬyehˇ˗euˬ nuiˇ mahˬ meh. 35 Miˇ tsaˬ˗ahˇ taˬ˗awˇ taˬ kamˬ. Aˬ jeˬ miˇ neh ehˇ naˇ, miˇ tsaˬ˗aˬ Miˬyehˇ˗euˬ aˬ kuiˇ cawˬ taˬ duˬ meh. Yeˬluˇsaˬlehˬ meuˬ˗ahˇ taˬ˗awˇ taˬ kamˬ. Aˬ jeˬ miˇ neh ehˇ naˇ, meuˬ teu meuˬ˗aˬ huiˬ dui dui˗eu Sahˬpaˬ˗euˬ meuˬ pyeuꞈ meh. 36 Yawˬ ha˗euˬ uˬ duˬ˗ahˇ taˬ˗awˇ neh taˬ kamˬ. Naw maꞈ yawˬ ha˗euˬ uˬ duˬ tsehˇ kahˇ tiˬ kahˇ kʼawꞈ pyuˇ laˇ ni, naˆ˗iˇ ni maˬ jahˇ nya˗a. 37 Teu miˇ neh ngeuˇ naˇ “Ngeuˇ ma”, maˬ ngeuˇ naˇ m”Maˬ ngeuˇ” lehˇ ehˇ naˇ gʼaˬ meh. Teu taꞈ˗ehˇ dzehˬ˗eu dawˬ˗aˬ, yaw haiˬ gʼaˬ˗ahˇ neh laˇ˗euˬ jeˬ pyeuꞈ meh. 38 “Naw maꞈ ‘Myaˆ nuiˆ˗euˬ dah zaˇ myaˆ nuiˆ, seuˬ˗euˬ dah zaˇ seuˬʼ lehˇ ehˇ˗eu dawˬ˗ahˇ ya gaˬ haw˗euˬ meh. 39 Ehˇ kʼawꞈ ngaˇ naw maꞈ˗ahˇ ehˇ nehˬ nyaˇ. Haiˬ˗eu tsawˇ haˬ deuˬ nehˬ˗ehˇ taˬ ceh. Aˬ yawꞈ maꞈ nawˬ˗euˬ baˬ ba aˇ maˇ pyawˬ˗ahˇ tehˆ laˇ naˇ, aˇ caˇ paw pyawˬ jiˇ ciˬ daˬ nehˬ˗awˬ. 40 Tiˬ gʼaˬ paˬ nawˬ˗euˬ pehˇ kʼahˬ laꞈ kʼoeˇ paw˗euˬ kahˇ˗ahˇ geuꞈ mawꞈ˗eu miˇ neh saˇ naˇ˗ahˇ yaˇ kʼaˬ ja˗iˇ mawꞈ naˇ, nawˬ˗euˬ pehˇ kʼahˬ laꞈ nyiˇ paw˗euˬ kahˇ jiˇ lehˆ nehˬ˗awˬ 41 Baoˬ jaˆ˗eu tiˬ gʼaˬ nawˬ˗ahˇ kʼehˇ dzaˬ mawꞈ˗eu miˇ neh tiˬ laˇ kaˬ gaˇ kuˇ gʼeh naˇ, aˬ yawꞈ nehˬ˗ehˇ nyiˬ laˇ kaˬ gaˇ iˇ gʼeh nehˬ˗awˬ. 42 Nawˬ˗ahˇ shaˇ laˇ˗eu deuˬ˗ahˇ biꞈ nehˬ˗awˬ. Nawˬ˗ahˇ ngaˬ laˇ˗eu deuˬ˗ahˇ dawˬ maˬ tmˇ ni ngaˬ nehˬ˗awˬ. 43 “Naw maꞈ ‘Nymˇ kaˬ taꞈ˗eu deuˬ˗ahˇ gaˬ˗awˬ. Muiˇ˗eu deuˬ˗ahˇ bye˗awˬʼ lehˇ ehˇ˗eu dawˬ˗ahˇ ya gaˬ haw˗euˬ meh. 44 Ehˇ kʼawꞈ ngaˇ naw maꞈ˗ahˇ ehˇ nehˬ nyaˇ. Nawˬ˗ahˇ muiˇ˗eu tsawˇ haˬ˗ahˇ aˬ myah luꞈ gaˬ˗awˬ. Nawˬ˗ahˇ kʼehˬ laˇ kʼaˆ laˇ˗eu deuˬ˗euˬ gʼaˇ duˬ aˬ myah luꞈ guiˬ lahˬ shaˇ nehˬ˗awˬ. 45 Toˆ˗ehˇ jahˇ naˇ naw maꞈ mˬ taˆ jawˇ˗eu Aˬda Miˬyehˇ˗euˬ zaˬ deuˬ pyeuꞈ˗eu lehˇ mˇ mawˇ˗eu jeˬ pyeuꞈ meh. Miˬyehˇ naˇ tsawˇ muiˬ kʼoeˇ taˆ maˬ ehˇ, tsawˇ doeˇ kʼoeˇ taˆ maˬ ehˇ, nahˇ ma bi doˆ laˇ˗eu meh. Yaw tsaˬ yaw dawˇ deuˬ˗ahˇ maˬ ehˇ, maˬ tsaˬ maˬ dawˇ˗eu deuˬ˗ahˇ maˬ ehˇ, uˬ yehˇ biꞈ˗eu meh. 46 Nawˇ yawˬ ha˗ahˇ gaˬ˗eu deuˬ˗ahˇ tehꞈ˗ehˇ gaˬ naˇ aˬ cawˬ nehˬ˗ehˇ aˬ jeˬ paˇ beu gaˇ˗eu. Kawˬ taꞈ˗eu deuˬ kʼawꞈ ni teu naˆ ni˗aˬ mˇ luꞈ˗eu maˬ ngeuˇ˗a loˇ? 47 Nawˇ yawˬ ha˗euˬ mehˇ nmˇ deuˬ˗ahˇ tehꞈ˗ehˇ dawˬ cawˬ puˬ naˇ, aˬ cawˬ nehˬ˗ehˇ aˬ jeˬ paˇ beu gaˇ˗eu nga? Miˬyehˇ˗ahˇ uˬ duˬ maˬ tahˬ˗eu deuˬ kʼawꞈ teu loꞈ˗ehˇ jahˇ luꞈ meh. 48 Naw maꞈ jiˇ naw maꞈ˗euˬ mˬ taˆ Aˬda loꞈ˗ehˇ byah kuꞈ˗eu nui gaˬ ya mˇ mawˇ meh.