Gaˇ kawˆ 4
Nga maꞈ aˬ jeˬ miˇ neh Miˇ Shuiꞈ Dawˬ paˇ Jaˇliꞈ jahˇ doˆ˗euˬ nga?
Kahˇgoˬ (Kiˬshaˇsaˬ)
Laˬgʼawˇdaˬ
Smˬ yaˇ oeˬ yaˇ kʼoꞈ heu yaw kaˬ˗ahˇ, Siˬmaˬkuˇ Jaˇliꞈ aˇ tsehˆ tiˬ tsehˆ laꞈ kʼoeˇ ahˇ˗eu, Miˬyehˇ˗euˬ tsawˇ myahˇ. Ja ceuˬ 69:31
Yeˬhawˇbaˬ˗euˬ Saˇ kiˇ deuˬ, Jaˇliꞈ paˇ dmˬ yaw myaˬ jeˬ˗ahˇ, gʼawˬ mya kʼoꞈ zmˬ˗awˇ neh aˬ cawˬ˗ahˇ kʼawꞈ biˇ kʼawˬ nehˬ˗euˬ ma. Ehˇ kʼawꞈ myahˇ laˇ ngeh jawˇ, “[‘aˬ diˇ aˬ maˇ,’ MS] yaw tsaˬ yaw dawˇ jeˬ˗ahˇ” tsawˇ haˬ zaˬ deuˬ bi siˬ nya˗eu gʼaˇ duˬ, Jaˇliꞈ yaw shuiꞈ yuˇ doˆ˗eu loˬ nga lehˇ haw siˬ˗euˬ ma. Heu˗aˬ, yawˬ gʼaˬ na luꞈ˗euˬ gʼaˇ duˬ, Miˬyehˇ neh noeˬ taˬ˗euˬ jeˬ pyeuꞈ meh. (1 Tiˆmoˇseˬ 2:3, 4) Kʼoeˇ miˇ neh 1950 kʼoꞈ˗ahˇ neh dahˬ beh˗awˇ, nymˇ saˇ ka˗ahˇ zmˬ˗eu dawˬ deuˬ neh, Miˇ Shuiꞈ Dawˬ paˇ Jaˇliꞈ yuˇ doˆ˗euˬ ma. Jaˇliꞈ heu dmˬ tsawˇ jeuˬ˗euˬ dawˬ 130 jeˬ dzehˬ ni, yaw duˬ duˬ lehˇ paˇ yuˇ doˆ kʼoꞈ taˬ˗euˬ ma.
Yaw awˬ awˬ˗ehˇ gʼoˆ shaw nya˗eu Jaˇliꞈ loˬ˗eu meh. Saˇ ka paˇ laˇ˗eu loꞈ˗ehˇ, dawˬ deuˬ kʼawꞈ paˇ laˇ˗euˬ meh. Jaˇliꞈ myaˬ tiˬ paˆ nymˇ saˇ ka˗ahˇ maˬ zmˬ˗eu gaˇ hu˗euˬ dawˬ oeˇ deuˬ neh boꞈ taˬ˗euˬ miˇ neh, gʼoˆ shaw˗eu yaw shaˬ meh. Kʼoeˇ tehꞈ˗ehˇ maˬ gʼaˬ ni, aˇ dahˬ beh˗euˬ Jaˇliꞈ yaw oeˇ dmˬ nehˬ˗ehˇ duˇ leˇ˗eu laꞈ zaˇ˗ahˇ paˇ poˆ mawˇ˗euˬ miˇ neh, Heˬbyehˇ dawˬ, Aˬlaˬmaˬya dawˬ, Heˬlaˬsaˇ (Gaˬ˗liˇ) dawˬ heu deuˬ˗ahˇ, paˇ gʼoˆ shaw dzehˬ laˇ˗euˬ meh.
Miˬyehˇ˗euˬ dawˬ˗ahˇ dawˇ coe ni yuˇ doˆ˗eu loˬ meh. Jaˇliꞈ dawˬ yuˇ paˇ˗eu deuˬ, Miˬyehˇ neh bi noeˬ doˆ˗awˇ boꞈ taˬ˗euˬ Jaˇliꞈ dawˬ kawˬ˗ahˇ, maˬ laˆ paˇ ni aˬ yawꞈ yaw oeˇ loꞈ˗ehˇ dawˇ coe ni yuˇ paˇ˗eu tsaˬ meh. Ehˇ kʼawꞈ, dawˬ yuˇ paˇ taˬ˗euˬ Jaˇliꞈ myaˬ tiˬ paˆ, Yeˬhawˇbaˬ lehˇ kuˇ˗eu Miˬyehˇ˗euˬ tsawˇ myahˇ heu hmˬ˗ahˇ, yuˇ doˆ dzeh taˬ˗euˬ meh.
Noeˬ doˆ˗euˬ yaw sahˇ gʼaˬ˗ahˇ, ciˬ huiˬ ciˬ mahˇ˗eu Jaˇliꞈ loˬ meh. (2 Saˬmeuˬlaˆ 23:2) Miˇ Shuiꞈ Dawˬ paˇ Jaˇliꞈ laꞈ kʼoeˇ, Yeˬhawˇbaˬ Miˬyehˇ˗euˬ tsawˇ myahˇ 7,000 poˆ aˬ yawꞈ yaw oeˇ loꞈ˗ehˇ, dawˆ ahˇ kʼoꞈ taˬ˗euˬ ma. Oeˇ dzehˬ dzehˬ˗eu Jaˇliꞈ paˇ dmˬ, laꞈ oˆ paw jaˆ˗eu aˇ baˇ. (Doˆ˗iˇ˗eu 4:13) Aˇ kʼoꞈ aˇ la˗ahˇ neh leh jeh dui dui˗awˇ, poˆ tseˇ doˆ taˬ˗euˬ Jaˇliꞈ paˇ dmˬ heu hmˬ naˇ, Miˬyehˇ˗euˬ nui noeˬ nui duˇ˗ahˇ shawˇ jehˆ ni bi mawˇ shawˇ laˇ˗awˇ, gui˗eu kʼawꞈ yaw˗awˬ meh. Yawˬ ha˗euˬ tsawˇ jeuˬ dawˬ neh boꞈ doˆ taˬ˗euˬ, Miˇ Shuiꞈ Dawˬ paˇ Jaˇliꞈ maˬ jaˆ kʼawꞈ ni, Yeˬhawˇbaˬ˗euˬ dawˬ kawˬ˗ahˇ, yawˬ nah na luꞈ leh jeh˗awˇ gui˗awˬ lehˇ gʼaˬ biꞈ˗eu ma.—Yawˇshuˆ 1:8; Ja ceuˬ 1:2, 3.
Miˇ shuiꞈ dawˬ paˇ Jaˇliꞈ˗ahˇ jahˇ doˆ˗eu gʼaˇ duˬ, nga maꞈ aˬ jeˬ miˇ neh noeˬ tsehˆ˗euˬ nga?
Miˬyehˇ˗euˬ nui noeˬ˗ahˇ siˬ nya˗eu gʼaˇ duˬ yawˬ nah na luꞈ, aˬ jeˬ ya jahˇ˗eu nga?