Nymˇ jiˇ laꞈ kʼaˬ cehˇ ni, aˬ joˆ˗ehˇ ya jahˇ˗eu nga?

1. Nymˇ jiˇ laꞈ kʼaˬ cehˇ˗eu gʼaˇ duˬ, oeˇ mˇ baˇ dzaˬ˗eu jeˬ aˬ jeˬ miˇ neh aˇ yehˇ huiˬ˗eu nga?

Laꞈ kʼaˬ cehˇ˗eu Miˬyehˇ Yeˬhawˇbaˬ jawˇ gaˇ neh oe˗euˬ muiˬ˗eu gaˇ kawˆ tiˬ hmˬ naˇ, nymˇ jiˇ yawˬ jiˇ na luꞈ˗ahˇ laꞈ kʼaˬ bi cehˇ mawꞈ˗eu gaˇ kawˆ meh. (1 Tiˆmoˇseˬ 1:11) Nymˇ jiˇ˗ahˇ aˇ dahˬ beh˗euˬ gʼaˬ Miˬyehˇ meh. Miˇ kʼahˬ˗euˬ zahˇ kʼaˇ jaˆ˗eu loꞈ˗ehˇ laꞈ ma dehˬ˗eu heu naˇ, zaˬ deuˬ˗euˬ gʼaˇ duˬ gaˇ dahˇ tsoeˬ˗awˇ, nymˇ jiˇ laꞈ kʼoeˇ kʼawꞈ laꞈ kʼaˬ cehˇ˗eu meh. Teu miˇ neh, Ka li zaˬ deuˬ oeˇ mˇ baˇ dzaˬ ngeh laꞈ ma dehˬ˗eu loˬ meh.—Luˇkaꞈ 2:1, 4, 5-ahˇ gui˗awˬ.

Oeˇ mˇ baˇ dzaˬ˗eu jeˬ˗ahˇ, Miˬyehˇ aˬ jeˬ lehˇ noeˬ˗eu nga? Oeˇ mˇ baˇ dzaˬ dzeuˇ˗euˬ yawˬ gʼaˬ na luꞈ˗ahˇ, Yeˬhawˇbaˬ Miˬyehˇ tiˬ gʼaˬ˗ahˇ tiˬ gʼaˬ saˇ jaˇ ziꞈ˗eu laꞈ kʼoeˇ, maˬ shiˇ tiˬ ziˇ maˬ gʼawˬ iˇ ni bi dehꞈ mawꞈ˗eu meh. (Heˬbyehˇ 13:4) Kʼoꞈ dzeh˗eu jeˬ˗ahˇ, Miˬyehˇ bye dui dui˗eu meh. (Maˬlaˬkiˇ 2:16) Ka li zaˬ˗euˬ nymˇ jiˇ˗aˬ, aˬ cawˬ nehˬ˗ehˇ dehꞈ bahˬ iˇ˗euˬ maˬ ngeuˇ taꞈ naˇ, kʼoꞈ˗awˇ neh yaw shuiꞈ yuˇ paˇ˗eu maˬ za.—Maꞈtehˬ 19:3-6, 9-ahˇ gui˗awˬ.

2. Kʼaˬ dzeˇ zaˬ hawˇ˗eu zaˬ miˬ zaˬ yaw kaˬ aˬ joˆ˗ehˇ mˇ paˬ nga?

Yeˬhawˇbaˬ kʼaˬ dzeˇ zaˬ hawˇ˗eu miˬ zaˬ˗ahˇ beh˗euˬ heu naˇ, tiˬ gʼaˬ tiˇ gʼaˬ bi caw ba˗eu lehˇ meh. (Aˇdahˬbeh˗eu 2:18) Kʼaˬ dzeˇ zaˬ naˇ, nymˇ sahˇ aˬ da pyeuꞈ˗eu miˇ neh, nymˇ jiˇ laꞈ kʼoeˇ kʼaˇ loˬ˗eu jeˬ˗ahˇ, aˬ yawꞈ ya poˆ nehˬ meh. Kʼoeˇ uˬ taꞈ, Miˬyehˇ˗euˬ gaˇ kawˆ kʼawꞈ ya mehˬ nehˬ meh. Yawˬ ha˗euˬ gʼaˇ duˬ tehꞈ˗ehˇ maˬ shaˇ noeˬ ni, miˬ zaˬ˗ahˇ kʼawꞈ ya gaˬ meh. Kʼaˬ dzeˇ zaˬ hawˇ˗eu miˬ zaˬ, tiˬ gʼaˬ tiˇ gʼaˬ gaˬ˗awˇ yaw zeu ya baw meh. Nyiˬ gʼaˬ luꞈ maˬ byah kuꞈ˗eu miˇ neh lehˬ laˇ nya meh. Teu miˇ neh, nyiˬ gʼaˬ luꞈ iˬ baˇ pyehˬ nehˬ˗eu jeˬ˗ahˇ dzaw geuꞈ naˇ, nymˇ jiˇ laꞈ kʼoeˇ laꞈ kʼaˬ cehˇ meh.—Eˇpeˇsu 4:31, 32; 5:22-25, 33; 1 Beˬtuˆluˆ 3:7-ahˇ gui˗awˬ.

3. Nymˇ jiˇ laꞈ kʼoeˇ gaˇ kawˆ doˆ laˇ naˇ, gʼawˬ˗eu tsaˬ ngaˇ loˇ?

Nymˇ jiˇ laꞈ kʼoeˇ gaˇ kawˆ doˆ laˇ ngeh jawˇ, nyiˬ dzeˇ zaˬ luꞈ gʼoeˇ˗eu gaˬ˗eu laꞈ kʼoeˇ nui ma jeˇ lo ni taˬ˗awˇ, ya ja sawˇ geuꞈ˗eu meh. (1 Gawˇliˬtu 13:4, 5) Nymˇ jiˇ laꞈ kʼoeˇ doˆ laˇ˗euˬ gaˇ kawˆ deuˬ˗ahˇ dehˬ lehꞈ˗awˇ gʼawˬ iˇ gaˇ, Miˬyehˇ gʼaˬ maˬ biꞈ˗a.—1 Gawˇliˬtu 7:10-13-ahˇ gui˗awˬ.

4. Zaˬ deuˬ˗oˇ Miˬyehˇ naw maꞈ˗ahˇ, aˬ joˆ˗ehˇ bi dehꞈ mawꞈ˗eu nga?

Yeˬhawˇbaˬ zaˬ deuˬ˗ahˇ, laꞈ kʼaˬ tiˬ cehˇ bi dehꞈ mawꞈ˗eu meh. Teu miˇ neh, zaˬ guˬ guˬ ngeh, laꞈ kʼaˬ tiˬ cehˇ bi dehꞈ˗eu gʼaˇ duˬ, muiˬ dzehˬ˗eu jeˬ˗ahˇ mehˬ nehˬ˗eu meh. Kʼoeˇ naˇ, aˬ da aˬ ma deuˬ˗euˬ zaˬ siˬ nui gahˇ hawˇ˗eu dehꞈ jeˬ dehꞈ kawˆ˗ahˇ neh jiˇ, bi dzaw geuꞈ mawꞈ˗eu meh. (Gawˇlawˇsehˇ 3:20) Nawˬ˗ahˇ Beh˗euˬ Yeˬhawˇbaˬ hawˇ˗eu Yeˬsuˇ˗euˬ nui ma tsaˬ˗eu jeˬ˗ahˇ mˇ˗eu heu gaˇ neh, nui saˇ bi oꞈ mawꞈ˗eu meh.—Dawˬtsoˆtsoˆ˗eu 11:9–12:1; Maꞈtehˬ 19:13-15; 21:15, 16-ahˇ gui˗awˬ.

5. Aˬ da aˬ ma deuˬ, zaˬ laꞈ kʼaˬ cehˇ ni, aˬ joˆ˗ehˇ jahˇ paˬ nga?

Aˬ da aˬ ma deuˬ, zaˬ dzaˬ˗eu, dm˗eu, jawˇ˗eu gʼaˇ duˬ, gaˇ mˇ˗eu ya leh jeh˗eu meh. (1 Tiˆmoˇseˬ 5:8) Kʼoeˇ tehꞈ˗ehˇ maˬ gʼaˬ ni, zaˬ deuˬ laꞈ kʼaˬ bi cehˇ˗eu gʼaˇ duˬ, Miˬyehˇ˗ahˇ gaˬ˗awˇ aˬ yawꞈ˗euˬ zaˬ siˬ nui gahˇ˗ahˇ dzaw geuꞈ nya ni ya mehˬ nehˬ˗eu meh. (Eˇpeˇsu 6:4) Nawˇ Miˬyehˇ˗ahˇ gaˬ˗eu jeˬ, zaˬ deuˬ˗ahˇ mˇ mawˇ nehˬ ngeh, zaˬ deuˬ kʼawꞈ mˇ caw mawꞈ laˇ˗eu meh. Nawˇ Jaˇliꞈ˗ahˇ gʼoe˗awˇ neh zaˬ˗ahˇ mehˬ ngeh, zaˬ˗euˬ nui ma laꞈ kʼoeˇ yaw tsaˬ yaw dawˇ jeˬ˗ahˇ siˬ nya laˇ˗eu meh.—Dawˬmehˬmehˬ˗eu 6:4-7; Dawˬdaˬ 22:6-ahˇ gui˗awˬ.

Zaˬ deuˬ˗ahˇ ja ceuˬ˗awˇ gʼaˬ biꞈ nehˬ˗eu heu naˇ, zaˬ˗ahˇ gaˇ dahˇ tsoeˬ meh. Kʼoeˇ naˇ, zaˬ deuˬ˗ahˇ mehˬ nehˬ˗awˇ laˆ tsaˬ nehˬ˗eu loˬ meh. Mehˬ nehˬ tsoˆ nehˬ˗eu heu naˇ, zaˬ deuˬ˗euˬ laꞈ kʼaˬ cehˇ˗eu jeˬ˗ahˇ maˬ bi cawˆ iˇ ni, laˆ piˇ nehˬ˗eu jeˬ pyeuꞈ meh. (Dawˬdaˬ 22:15) Ehˇ kʼawꞈ ni zaˬ˗ahˇ mehˬ ngeh jawˇ, aˇ dzehˬ dzeuˇ ni taˬ jahˇ.—Gawˇlawˇsehˇ 3:21-ahˇ gui˗awˬ.

Aˬ da aˬ ma hawˇ˗eu zaˬ deuˬ˗ahˇ caw ba nehˬ˗eu gʼaˇ duˬ, Jaˇliꞈ˗ahˇ gʼoe˗awˇ Yeˬhawˇbaˬ Saˇ kiˇ deuˬ neh yuˇ doˆ taˬ˗euˬ paˇ dmˬ yaw myaˬ jeˬ jaˆ ma.—Ja ceuˬ 19:7, 11-ahˇ gui˗awˬ.