21 Saˬmeuˬlaˆ
Yeˬhawˇbaˬ˗euˬ gʼaˇ duˬ kʼaˬ duˬ ni ngehˬ˗euˬ aˬ li zaˬ
Saˬmeuˬlaˆ˗euˬ dehꞈ ziˇ Yeˬpaˬtaˆ˗euˬ aˬ buˇ hawˇ˗eu Saˬsoˬ nehˬ˗ehˇ tiˬ jeˬ na duˇ leˇ˗eu meh. Aˬ yawꞈ maꞈ˗euˬ aˬ da aˬ ma neh mˇ˗euˬ jeˬ aˬ yawꞈ maꞈ˗euˬ dehꞈ ziˇ˗ahˇ gʼawˬ mya ni gaˇ dahˇ tsoeˬ˗eu meh. Yeˬpaˬtaˆ˗euˬ aˬ buˇ loꞈ˗ehˇ duˇ ni Saˬmeuˬlaˆ jiˇ Yeˬhawˇbaˬ˗euˬ gaˇ˗ahˇ tiˬ ziˇ ziˇ lah ya mˇ˗euˬ meh. (1 Saˬmeuˬlaˆ 2:11) Kʼoeˇ naˇ Saˬsoˬ loꞈ˗ehˇ aˬ yawꞈ kʼaˇ dehꞈ˗eu kʼoeˇ keuˆ ni Naˬzaˬliˇ tsawˇ haˬ ya geuꞈ˗euˬ meh. (Yaˇkʼaˬdaˇ˗eu 13:7) Kʼoeˇ uˬ taꞈ aˬ yawꞈ nyaꞈ nyiˬ gʼaˬ loꞈ˗ehˇ duˇ ni Saˬmeuˬlaˆ jiˇ kʼaˬ duˬ ni ya gʼeh˗euˬ meh.
Haˬnahˬ Yeˬhawˇbaˬ˗ahˇ saˇ jaˇ dzaˬ taˬ˗euˬ loꞈ˗ehˇ Saˬmeuˬlaˆ˗ahˇ Miˬyehˇ˗euˬ gaˇ bi mˇ˗eu gʼaˇ duˬ, Shiˇloˬ meuˬ˗ahˇ jaˆ˗eu Yeˬhawˇbaˬ˗euˬ sehˬ gʼawˆ˗ahˇ kuˇ gʼeh˗euˬ meh. Teu ngeh Saˬmeuˬlaˆ aˬ coeˇ daˇ gʼaˬ shaw˗awˇ smˇ kʼoꞈ ehˇ gʼaˬ ni byah laˇ˗euˬ gaˇ duˇ˗eu meh. Haˬnahˬ aˬ yawꞈ˗euˬ aˬ li jawˇ gaˇ tiˬ kʼoꞈ˗ahˇ tiˬ poˆ gʼa leˇ˗awˇ kʼaˇ gʼa leˇ ngeh pehˇ kʼahˬ pehˇ mahˇ mahˇ zaˬ tiˬ kahˇ guꞈ laꞈ nehˬ˗eu meh. Saˬmeuˬlaˆ aˇ kʼoꞈ kʼawˆ laˇ˗euˬ Eˇliˆ ngehˬ gʼeh˗eu laꞈ kʼoeˇ huiˬ laˇ˗euˬ meh. Kʼoeˇ naˇ sehˬ gʼawˆ laꞈ kʼoeˇ jawˇ˗eu zaˬ miˬ aˬ buˇ deuˬ jiˇ aˬ yawꞈ˗ahˇ ngehˬ gʼeh˗euˬ gaˇ duˇ˗eu meh.
Teu ngeh sehˬ gʼawˆ laꞈ kʼoeˇ maˬ muiˬ maˬ jaˬ˗eu jeˬ mˇ˗eu tsawˇ haˬ deuˬ jawˇ˗eu meh. Ehˇ kʼawꞈ Eˇliˆ mˇ paˬ˗ehˇ gʼeh˗eu jeˬ kʼaˇ gʼeh nya gaˇ neh maˬ mˇ˗aˬ. Aˬ yawꞈ˗euˬ aˬ li Hawˇpaˬniˇ hawˇ˗eu Piˇnaˬhaˇ aˬ nyaꞈ doeˇ dui dui˗eu meh. Aˬ yawꞈ nyaꞈ sehˬ gʼawˆ laꞈ kʼoeˇ jawˇ˗eu zaˬ miˬ aˬ buˇ deuˬ nehˬ˗eh dehꞈ bahˬ dehꞈ muˆ˗awˇ Yeˬhawˇbaˬ˗euˬ gʼaˇ duˬ lawˇ nehˬ˗eu jeˬ˗ahˇ jiˇ yaw zeu maˬ baw˗a. Aˬ yawꞈ nyaꞈ tsawˇ haˬ deuˬ Yeˬhawˇbaˬ˗euˬ gʼaˇ duˬ lawˇ nehˬ shehˇ nehˬ laˇ ngeh, Yeˬhawˇbaˬ˗ahˇ maˬ lawˇ nehˬ mi naˆ˗ehˇ kʼaˇ muiˬ˗eu jeˬ˗ahˇ bi lu geuꞈ laꞈ˗iˇ˗eu meh. Eˇliˆ gaˇ kawˆ heu˗ahˇ siˬ nya kʼawꞈ ui cuiˆ na ehˇ˗eu tehꞈ meh. Aˬ yawꞈ maꞈ jiˇ Eˇliˆ ehˇ gaˇ maˬ naˇ haˬ˗a. Saˬmeuˬlaˆ toˆ˗ehˇ gʼeh˗eu jawˇ duˬ˗ahˇ ya huiˬ laˇ˗euˬ kʼawꞈ, Yeˬhawˇbaˬ nehˬ˗ehˇ gʼoeˇ˗eu meh. Tsawˇ haˬ deuˬ jiˇ aˬ yawꞈ˗ahˇ gaˬ˗eu meh. Tiˬ nah Shiˇloˬ meuˬ˗ahˇ pyeuꞈ luꞈ˗eu jeˬ˗ahˇ yaˇ kʼaˬ daˇ˗eu aˇ yamˬ keuˆ le˗euˬ meh. Teu ngeh Yeˬhawˇbaˬ aˬ yawꞈ˗euˬ gʼaˇ duˬ bi ngehˬ dah˗eu lehˇ Saˬmeuˬlaˆ˗ahˇ tseˇ˗euˬ meh.
Tiˬ miˇ Saˬmeuˬlaˆ aˬ yawꞈ˗ahˇ kuˇ˗eu teˇ saˇ ya gaˬ˗awˇ noeˬ laˇ˗euˬ meh. Teu naˇ Yeˬhawˇbaˬ kuˇ luꞈ˗eu jeˬ pyeuꞈ meh. Ehˇ kʼawꞈ aˬ yawꞈ Eˇliˆ kuˇ nga lehˇ noeˬ˗awˇ Eˇliˆ jawˇ gaˇ cehˆ gʼeh˗awˇ aˬ jeˬ loˬ nya lehˇ naˇ haˬ˗iˇ˗euˬ meh. Teu ngeh aˇ kʼoꞈ kʼawˆ laˇ˗awˇ myaˆ nuiˆ yaw kʼaˆ˗ehˇ maˬ paˇ mawˇ nya˗euˬ Eˇliˆ, ngaˇ nawˬ˗ahˇ maˬ kuˇ˗aˬ lehˇ ehˇ˗awˇ paˇ bi yuꞈ˗iˇ˗euˬ meh. Teu loꞈ˗ehˇ nyiˬ poˆ paˇ pyeuꞈ laˇ˗euˬ meh. Aˇ saˬ saˬ leˇ ngeh Eˇliˆ Yeˬhawˇbaˬ kuˇ luꞈ˗eu lehˇ noeˬ siˬ˗awˇ Saˬmeuˬlaˆ˗ahˇ paˇ bi yuꞈ˗iˇ˗euˬ meh. Eˇliˆ Saˬmeuˬlaˆ˗ahˇ heu poˆ paˇ kuˇ laˇ naˇ “Sahˬpaˬ Miˬyehˇ˗oˇ, nawˬ˗euˬ dawˬ˗ahˇ nawˬ˗euˬ zaˬ kʼaˆ naˇ haˬ luꞈ ma” lehˇ ehˇ kʼoꞈ nehˬ˗awˬ lehˇ ehˇ nehˬ˗euˬ meh.
Yeˬhawˇbaˬ “Saˬmeuˬlaˆ˗oˇ, Saˬmeuˬlaˆ˗oˇ” lehˇ oeˬ poˆ aˬ yawꞈ poˆ paˇ kuˇ˗euˬ meh. Saˬmeuˬlaˆ jiˇ “Nawˬ˗euˬ dawˬ˗ahˇ nawˬ˗euˬ zaˬ kʼaˆ naˇ haˬ luꞈ ma” lehˇ ehˇ kʼoꞈ nehˬ˗euˬ meh. Yeˬhawˇbaˬ Saˬmeuˬlaˆ˗ahˇ Shiˇloˬ meuˬ˗ahˇ pyeuꞈ luꞈ˗eu jeˬ˗ahˇ yaˇ kʼaˬ daˇ ma lehˇ ehˇ nehˬ˗euˬ meh. Eˇliˆ aˬ yawꞈ˗euˬ aˬ li deuˬ˗ahˇ yaw muiˬ˗ehˇ maˬ mehˬ maˬ tsoˆ˗eu miˇ neh, yaˇ kʼaˬ bi daˇ˗awˇ aˬ yawꞈ˗euˬ aˬ li deuˬ hawˇ˗eu nymˇ jiˇ laꞈ kʼoeˇ˗euˬ deuˬ˗ahˇ jiˇ yaˇ kʼaˬ daˇ ma lehˇ ehˇ nehˬ˗euˬ meh. Saˬmeuˬlaˆ gaˇ kawˆ heu dawˬ tawˆ luꞈ Eˇliˆ˗ahˇ ya ehˇ nehˬ˗eu meh.
Saˬmeuˬlaˆ tiˬ poˆ paˇ yuꞈ˗euˬ meh. Ehˇ kʼawꞈ yuꞈ kʼaˆ byoˆ maˬ yuꞈ kʼaˆ byoˆ˗euˬ nmˇ Jaˇliꞈ laꞈ kʼoeˇ maˬ ehˇ taˬ˗aˬ. Uˬ bya bya laˇ ngeh aˬ yawꞈ sehˬ gʼawˆ˗euˬ gʼoˆ kʼehˬ pah˗euˬ meh. Teu ngeh ‘Yaw sahˇ laꞈ kʼoeˇ aˬ yawꞈ ya siˬ ya mawˇ˗euˬ je, Eˇliˆ˗ahˇ maˬ dzawˇ nehˬ peuˬ˗a.’ Eˇliˆ aˬ yawꞈ˗ahˇ kuˇ˗awˇ Miˬyehˇ aˬ jeˬ ehˇ˗a lehˇ naˇ haˬ˗euˬ meh. Eˇliˆ Saˬmeuˬlaˆ guˆ gaˇ haw siˬ˗euˬ miˇ neh “Tiˬ jeˬ˗iˬ maˬ zaꞈ taˬ ni ngaˬ˗ahˇ dzawˇ mehˬ nehˬ laꞈ sheˇ” lehˇ paˇ ehˇ nehˬ˗euˬ meh.
Saˬmeuˬlaˆ zaˬ zaˬ tehꞈ kʼawꞈ Yeˬhawˇbaˬ yaˇ kʼaˬ daˇ˗eu gaˇ kawˆ Piˇ ma yaw huiˬ gʼaˬ pyeuꞈ˗eu Eˇliˆ˗ahˇ ehˇ nehˬ
Teu ngeh Saˬmeuˬlaˆ shaˬ zahˬ naꞈ dui dui˗eu yaw duˬ baw meh. Aˬ yawꞈ Eˇliˆ˗ahˇ yawˬ ha˗euˬ aˬ bawˇ tiˬ gʼaˬ loꞈ˗ehˇ gaˬ˗awˇ yaw zeu baw ngaˬ˗aˇ laˬ? Aˬ dui maˬ ya siˬ˗a. Ehˇ kʼawꞈ Iˇsaˬleˬlaˆ tsawˇ jeuˬ˗euˬ piˇ ma yaw huiˬ gʼaˬ pyeuꞈ˗eu miˇ neh, yaw zeu baw˗eu nmˇ yaw duˬ baw meh. Toˆ˗ehˇ gʼeh kʼawꞈ kʼaˬ duˬ ni “Sahˬpaˬ Miˬyehˇ neh kʼaˇ ehˇ nehˬ˗euˬ jeˬ dawˬ tawˆ luꞈ tiˬ jeˬ˗iˬ maˬ zaꞈ taˬ ni, Eˇliˆ˗ahˇ Saˬmeuˬlaˆ dzawˇ nehˬ jiˇ˗euˬ meh.” Eˇliˆ gʼawˬ myahˇ maˬ gʼeh˗ehˇ yaˇ kʼaˬ bi daˇ ngaˇ lehˇ ya siˬ˗euˬ meh. Teu ngeh aˬ yawꞈ˗euˬ aˬ li deuˬ˗ahˇ yaw muiˬ˗ehˇ mehˬ nehˬ tsoˆ nehˬ ngaˇ˗a laˬ? Teu loꞈ˗ehˇ jahˇ˗euˬ lehˇ Jaˇliꞈ laꞈ kʼoeˇ maˬ ehˇ taˬ˗aˬ.
Yeˬhawˇbaˬ kʼaˬ duˬ ni gʼeh˗eu Saˬmeuˬlaˆ˗ahˇ guiˬ lahˬ gʼawˬ mya ni biꞈ˗euˬ meh. Jaˇliꞈ˗ahˇ ‘Sahˬpaˬ Miˬyehˇ aˬ yawꞈ nehˬ˗ehˇ jawˇ˗euˬ meh’ lehˇ ehˇ taˬ˗euˬ meh. Kʼoeˇ naˇ aˬ yawꞈ Miˬyehˇ gʼaˇ duˬ ngehˬ dah˗eu gʼaˬ ya pyeuꞈ laˇ˗awˇ, Miˬyehˇ “aˬ yawꞈ neh kʼaˇ ehˇ˗euˬ jeˬ bi pyeuꞈ laˇ˗euˬ meh.” Eˇliˆ hawˇ˗eu aˬ yawꞈ˗euˬ aˬ li deuˬ nehˬ˗ehˇ taꞈ leˇ˗awˇ Saˬmeuˬlaˆ neh kʼaˇ ehˇ˗euˬ jeˬ pyeuꞈ laˇ˗euˬ meh. Teu gaˇ neh gʼawˬ mya kʼoꞈ naˇ Yeˬhawˇbaˬ Saˬmeuˬlaˆ˗ahˇ zmˬ˗awˇ aˬ yawꞈ˗euˬ tsawˇ haˬ deuˬ˗ahˇ sheuˬ gʼeh˗euˬ meh. Kʼoeˇ naˇ Saˬmeuˬlaˆ Yeˬhawˇbaˬ˗ahˇ saˇ jaˇ ziꞈ˗eu laꞈ kʼoeˇ bawˇlawˇpeh hawˇ˗eu yaˇ kʼaˬ daˇ˗eu gʼaˬ gʼawˬ mya kʼoꞈ geuꞈ˗euˬ meh. Saˬmeuˬlaˆ nyiˇ ngeh neh kʼaˬ duˬ ni ya gʼeh nga lehˇ ya siˬ˗awˇ, tiˬ ziˇ ziˇ lah ni jiˇ kʼaˬ duˬ ni Miˬyehˇ˗euˬ gaˇ mˇ˗euˬ meh.
Jaˇliꞈ aˇ deuˆ heu deuˬ˗ahˇ gui:
1 Saˬmeuˬlaˆ 1:9-11, 24-28; 2:12-36; 3:1-21; 25:1
Heˬbyehˇ 11:32
Ja sawˇ˗eu gʼaˇ duˬ:
Saˬmeuˬlaˆ kʼaˬ duˬ ni gʼeh˗eu lehˇ aˬ joˇ joˆ˗ehˇ mˇ mawˇ˗euˬ nga?
Naꞈ suiˇ ni poˆ tseˇ
1. Yeˬhawˇbaˬ˗euˬ sehˬ gʼawˆ jaˆ˗eu Shiˇloˬ meuˬ aˬ joˇ joˆ˗ehˇ gʼeh˗eu nga? (w92-SI 11/1 8-9) (Aˇ baˇ 1)
Todd Bolen/BiblePlaces.com
Aˇ baˇ 1: Gaˇ hu Shiˇloˬ meuˬ jaˆ˗euˬ jawˇ duˬ
2. Sehˬ gʼawˆ˗ahˇ jawˇ ngeh Saˬmeuˬlaˆ˗euˬ dehꞈ ziˇ aˬ joˆ˗ehˇ gʼeh˗euˬ nga? (ia˗SI 70-71 ¶9-13) (Aˇ baˇ 2)
Aˇ baˇ 2
3. “Sahˬpaˬ Miˬyehˇ˗ahˇ Saˬmeuˬlaˆ maˬ siˬ nya˗a siˬ” lehˇ ehˇ˗eu heu naˇ aˬ jeˬ˗ahˇ ehˇ mawꞈ nga? (1 Saˬmeuˬlaˆ 3:7; w02-SI 12/15 8 ¶5-6)
4. Eˇliˆ˗euˬ nymˇ jiˇ nehˬ˗ehˇ taꞈ˗eu maˬ keuˆ laˇ miˇ ehˇ taˬ˗euˬ dawˬ aˬ joˆ˗ehˇ byah laˇ˗euˬ nga? (it “Eˇliˆ, 1” ¶5-7-wcgr˗SI)
Aˬ joˆ˗ehˇ zmˬ iˇ nya nga lehˇ shaˇ noeˬ
Zaˬ hawˇ˗eu zaˬ guˬ deuˬ laꞈ oˆ ngehˬ keuˆ taˬ˗euˬ gaˇ kawˆ nehˬ˗ehˇ taꞈ leˇ˗awˇ Saˬmeuˬlaˆ˗ahˇ aˬ joˆ˗ehˇ dzaw geuꞈ nya nga?
Ehˇ dawˬ naˇ haˬ˗eu (1 Saˬmeuˬlaˆ 3:5)
Nahˬ yu ni gʼeh˗eu, yaw zeu baw˗eu (1 Saˬmeuˬlaˆ 3:6-10)
Yawˬ ha˗ahˇ doˇ˗eu gaˇ mˇ˗eu (1 Saˬmeuˬlaˆ 3:15) (Aˇ baˇ 3)
Aˇ baˇ 3
Zaˬ hawˇ˗eu zaˬ guˬ deuˬ aˬ geu ngeh kʼaˬ duˬ ni ya ngehˬ nga? Saˬmeuˬlaˆ˗euˬ gaˇ kawˆ aˬ joˆ˗ehˇ caw ba nehˬ nya nga?
Saˬmeuˬlaˆ˗euˬ kʼaˬ duˬ ni gʼeh˗eu jeˬ˗ahˇ aˬ joˆ˗ehˇ dzaw geuꞈ nya nga siˬ?
Naꞈ suiˇ ni shaˇ noeˬ
Gaˇ kawˆ heu Yeˬhawˇbaˬ nehˬ˗ehˇ taꞈ leˇ˗awˇ ngaˬ˗ahˇ aˬ jeˬ bi siˬ laꞈ nga?
Gaˇ kawˆ heu miˇ shuiꞈ˗ahˇ Yeˬhawˇbaˬ neh saˇ jaˇ dzaˬ taˬ˗euˬ jeˬ nehˬ˗ehˇ aˬ joˆ˗ehˇ taꞈ nga?
Saˬmeuˬlaˆ gʼoꞈ dehꞈ laˇ ngeh ngaˇ aˬ jeˬ naˇ haˬ paˬ nga?
Haw lahˬ
Zaˬ guˬ hawˇ˗eu tsawˇ kʼaˆ deuˬ aˬ geu ngeh tsaˬ˗eu jeˬ˗ahˇ kʼaˬ duˬ ni ya mˇ˗eu nga?
Saˬmeuˬlaˆ aˬ yawꞈ˗euˬ tiˬ jawˬ jawˇ˗eu tsawˇ haˬ deuˬ Miˬyehˇ˗ahˇ yaw zeu maˬ baw kʼawꞈ tsaˬ˗eu jeˬ mˇ.
“Saˬmeuˬlaˆ Yeˬhawˇbaˬ˗euˬ gaˇ mˇ˗eu lehˇ tseˇ” (ijwis˗SI gaˇ kawˆ 15)