Nawˇ siˬ nya ma loˇ?

Yuˇdaˆ tsawˇ haˬ deuˬ˗euˬ bawˬ dzaˬ duˬ aˬ joˆ˗ehˇ dahˬ beh laꞈ˗euˬ nga?

“Yuˇdaˆ deuˬ˗euˬ bawˬ dzaˬ duˬ” lehˇ ehˇ˗eu heu dawˬ, “bawˬ dzaˬ˗eu” maˬ ngeuˇ naˇ “uiˬ laˇ˗eu” lehˇ Gaˬliˇ dawˬ˗ahˇ neh oe˗euˬ meh. Tsawˇ myahˇ heu naˇ tsaˬ leˇ dui dui˗eu meh. Aˬ jeˬ miˇ neh ehˇ naˇ, jawˇ duˬ teu˗ahˇ Yuˇdaˆ deuˬ Miˬyehˇ dawˬ kawˬ naˇ haˬ le˗eu gʼaˇ duˬ hawˇ˗eu Miˬyehˇ˗ahˇ uˬ duˬ tahˬ˗eu gʼaˇ duˬ, uiˬ le˗eu jawˇ duˬ pyeuꞈ˗eu miˇ neh meh. Teu naˇ gaˇ hu ba neh jaˆ ka leꞈ˗euˬ meh. Heˬbyehˇ Jaˇliꞈ laꞈ kʼoeˇ Yuˇdaˆ deuˬ˗euˬ bawˬ dzaˬ duˬ˗euˬ gaˇ kawˆ˗ahˇ maˬ ngehˬ keuˆ taˬ˗aˬ. Ehˇ kʼawꞈ Gaˬliˇ Ka li zaˬ Jaˇliꞈ laꞈ kʼoeˇ Yuˇdaˆ deuˬ˗euˬ bawˬ dzaˬ duˬ dahˬ beh˗eu Ka li zaˬ˗euˬ saˇ ka˗ahˇ jaˆ ngaˇ lehˇ maˇ jawˆ ni siˬ laˇ˗eu meh.

Nui gahˇ ahˇ˗eu deuˬ myaˬ tiˬ paˆ Yuˇdaˆ deuˬ˗euˬ bawˬ dzaˬ duˬ heu naˇ, Yuˇdaˆ tsawˇ haˬ deuˬ Baˬbuˇloˬ˗ahˇ bi nyehꞈ gʼeh ngeh neh naˇ dahˬ beh laˇ nga lehˇ ehˇ˗eu meh. Juˬdeˇkaꞈ lehˇ kuˇ˗eu dawˬ tsuiꞈ puiˇ kʼawˬ˗eu paˇ dmˬ tiˬ dmˬ˗ahˇ “Yuˇdaˆ tsawˇ haˬ deuˬ uˬ duˬ tahˬ nymˇ nehˬ˗ehˇ gaˇ mahˇ kaˬ gaˇ bi nyehꞈ gʼeh˗awˇ, aˬ cawˬ˗euˬ tsawˇ jeuˬ deuˬ nehˬ˗ehˇ ya jawˇ˗eu miˇ neh, aˬ yawꞈ maꞈ˗euˬ shaˬ zahˬ˗ahˇ bi ngehˬ gʼeh˗eu gʼaˇ duˬ, aˬ yawꞈ maꞈ tiˬ kʼehˬ maˬ taˬ uiˬ leˇ˗awˇ, Jaˇliꞈ gui˗eu meh. Teu nah naˇ jawˇ nah ngeh nah pyeuꞈ gaˇ duˇ˗eu meh.” Aˬ yawꞈ maꞈ Baˬbuˇloˬ˗ahˇ neh ya gʼoꞈ laˇ˗euˬ kʼawꞈ, aˬ yawꞈ maꞈ guiˬ lahˬ shaˇ˗awˇ Jaˇliꞈ gui˗eu gʼaˇ duˬ, uiˬ leˇ˗awˇ bawˬ dzaˬ luꞈ gaˇ duˇ nga siˬ. Kʼoeˇ naˇ aˬ yawꞈ maꞈ kʼaˇ jawˇ˗iˇ gaˇ bawˬ dzaˬ duˬ teu tsoˆ˗eu meh.

Dahˬ beh˗euˬ Ka li zaˬ deuˬ˗euˬ saˇ ka˗ahˇ oe keuˆ ngeh, Yuˇdaˆ deuˬ˗euˬ bawˬ dzaˬ duˬ, Yuˇdaˆ zahˇ˗euˬ hawˇ˗eu Gahˇ ceh˗euˬ iˬ ma laˆ shaˆ˗euˬ nahˇ ma doˆ kʼehˬ paw jawˇ˗eu Yuˇdaˆ tsawˇ haˬ deuˬ uˬ taꞈ, Iˇsaˬleˬlaˆ miˇ kʼahˬ˗ahˇ jawˇ˗eu Yuˇdaˆ deuˬ˗euˬ uiˬ laˇ˗eu duˬ pyeuꞈ laˇ˗euˬ meh. Yeˬluˇsaˬlehˬ meuˬ˗euˬ huiˬ˗eu dzaw nymˇ˗euˬ nui gahˇ ahˇ˗eu Li Leˬgʼoiˇ lehˇ kuˇ˗eu tiˬ gʼaˬ “Yuˇdaˆ˗euˬ bawˬ dzaˬ duˬ heu naˇ, poˆ tseˇ˗eu pyehˆ tseˇ˗eu gʼaˇ duˬ maˬ ehˇ, zahˇ paw taꞈ˗eu dzaˇ gʼaˇ duˬ maˬ ehˇ, gaˇ kawˆ deuˬ˗ahˇ laˆ piˇ˗eu gʼaˇ duˬ maˬ ehˇ, pu˗euˬ jeˬ taꞈ jeˬ ka hawˇ˗eu uˆ lahˇ˗eu gaˇ kawˆ gʼaˇ duˬ maˬ ehˇ, heu deuˬ˗euˬ gʼaˇ duˬ pyeuꞈ meh” lehˇ ehˇ˗eu meh. Heu gaˇ haw ngeh Yeˬsuˇ Yuˇdaˆ deuˬ˗euˬ bawˬ dzaˬ duˬ˗ahˇ aˬ jeˬ miˇ neh iˇ˗eu lehˇ siˬ laˇ˗eu meh. (Maˬkuˆ 1:21; 6:2; Luˇkaꞈ 4:16) Yeˬsuˇ teu gaˇ iˇ˗eu teu naˇ, bawˬ dzaˬ laˇ˗euˬ deuˬ˗ahˇ mehˬ˗awˇ, gʼaˬ biꞈ˗eu gʼaˇ duˬ meh. Ka li zaˬ aˇ muˇ jaˆ laˇ˗euˬ miˇ tsa, kuiˇ laꞈ Pawˇluˆ kʼawꞈ Yuˇdaˆ deuˬ˗euˬ bawˬ dzaˬ duˬ˗ahˇ tiˬ kʼehˬ maˬ kaˬ tsaꞈ gaˬ iˇ˗eu meh. Teu gaˇ iˇ˗eu deuˬ naˇ Miˬyehˇ nehˬ˗ehˇ gʼoeˇ mawꞈ˗eu miˇ neh meh. Teu miˇ neh Pawˇluˆ meuˬ tiˬ meuˬ˗ahˇ kʼaˇ iˇ ngeh, Yuˇdaˆ deuˬ˗euˬ bawˬ dzaˬ duˬ˗ahˇ jeˬ hu ahˇ iˇ˗awˇ teu gaˇ tsaꞈ gaˬ˗eu meh.—Gʼaˬkʼehˇ 17:1, 2; 18:4.