Miˬyehˇ˗euˬ gaˇ mˇ paw bym laˇ—Jaˇliꞈ dzaw zaˬ˗ahˇ jeˬ hu lehˬ hmˬ taˬ lehˇ mehˬ

Aˬ jeˬ miˇ neh aˇ yeˇ huiˬ nga?: Jaˇliꞈ dzaw zaˬ deuˬ jeˬ hu lehˬ hmˬ taˬ naˇ, aˬ dui neh mehˬ˗eu jeˬ˗ahˇ noeˬ taˬ nya˗awˇ, gʼoˆ shaw leˇ nya˗eu meh. Aˬ yawꞈ maꞈ iˇ cuꞈ shawˇ dzeuˇ˗euˬ kʼawꞈ ni, aˬ yawꞈ maꞈ neh dzaw˗euˬ jeˬ˗ahˇ noeˬ taˬ nya˗awˇ gʼoˆ shaw nya naˇ, huiˬ laˇ mahˇ laˇ˗eu yaw kawˇ meh. Aˬ yawꞈ maꞈ “yaw beuˇ beuˇ˗ehˇ dehꞈ” nya˗eu gʼaˇ duˬ, bawˬ dzaˬ iˇ ngeh maˬ ehˇ, tsaꞈ gaˬ iˇ ngeh maˬ ehˇ, ya lehˬ hmˬ˗eu meh. (Tehˬ 25:13) Teu miˇ neh, aˬ joˆ˗ehˇ ya pyehˆ tseˇ˗eu lehˇ siˬ nya˗awˇ, pyehˆ tseˇ˗eu aˇ yamˬ yaw muiˬ˗ehˇ biˇ taˬ˗eu heu naˇ, aˬ yawꞈ˗euˬ tiˬ ziˇ gaˇ dahˇ tsoeˬ˗eu meh. Dzaw dahˬ beh ngeh neh, Jaˇliꞈ dzaw zaˬ deuˬ yaw muiˬ˗ehˇ lehˬ hmˬ nya ni aˬ dui ya caw ba nehˬ˗eu meh.

Mˇ paˬ˗ehˇ gʼeh˗eu jeˬ:

• 

  Yaw muiˬ jeˬ mˇ mehˬ nehˬ. (Maˆ 2:21) Dzaw zaˬ˗euˬ nui ma˗ahˇ ahˇ leˇ ni, dzaw zaˬ aˬ yawꞈ gʼaˬ yawꞈ˗ahˇ noeˬ keuˆ˗awˇ lehˬ hmˬ. (km˗E 11/15 3) Nawˬ neh kawˆ taˬ˗euˬ gaˇ bi haw.

• 

  Dzaw zaˬ deuˬ˗ahˇ jeˬ hu lehˬ hmˬ taˬ lehˇ gʼaˬ biꞈ. Jaˇliꞈ dzaw dahˬ beh ngeh, jeˬ hu lehˬ hmˬ taˬ˗eu heu naˇ, Jaˇliꞈ dzaw˗eu jeˬ laꞈ kʼoeˇ tiˬ jeˬ pyeuꞈ˗awˇ, aˬ joˆ˗ehˇ gaˇ dahˇ tsoeˬ nga lehˇ ehˇ mawˇ nehˬ. Kʼoeˇ naˇ, lehˬ hmˬ˗eu gʼaˇ duˬ aˇ yamˬ aˬ joˆ˗ehˇ ya biˇ˗eu lehˇ jiˇ mehˬ nehˬ. Dzaw mehˬ nehˬ˗eu tiˬ gʼaˬ na, jeˬ hu lehˬ hmˬ taˬ˗eu heu gaˇ dahˇ aˬ joˆ˗ehˇ tsoeˬ˗eu nga lehˇ dzaw zaˬ deuˬ˗ahˇ bi siˬ nya˗eu gʼaˇ duˬ, aˬ yawꞈ neh kawˆ taˬ˗euˬ paˇ dmˬ˗ahˇ bi haw˗eu meh. Dzaw zaˬ jeˬ hu lehˬ hmˬ taˬ naˇ aˬ yawꞈ˗ahˇ ja ceuˬ nehˬ.

• Aˬ joˆ˗ehˇ ya lehˬ hmˬ˗eu lehˇ mˇ mawˇ nehˬ. Dzawˬ dahˬ beh ngeh, mehˬ˗eu tiˬ gʼaˬ na, dzaw zaˬ˗ahˇ aˬ joˆ˗ehˇ ya lehˬ hmˬ˗eu lehˇ mehˬ˗eu gʼaˇ duˬ, dzaw˗eu laꞈ kʼoeˇ aˇ yamˬ zmˬ˗awˇ mˇ mehˬ nehˬ˗eu meh