Miˬyehˇ˗euˬ gaˇ mˇ paw bym laˇ—Tsaꞈ gaˬ˗eu sahˬ boꞈ boꞈ˗eu jeˬ

Aˬ jeˬ miˇ neh aˇ yeˇ huiˬ˗eu nga?: 1 Gawˇliˬtu sahˬ boꞈ heu naˇ, Pawˇluˆ neh Ka li zaˬ mehˇ nmˇ deuˬ˗ahˇ gʼaˬ biꞈ˗eu gʼaˇ duˬ, boꞈ nehˬ˗euˬ sahˬ boꞈ 14 taꞈ laꞈ kʼoeˇ neh tiˬ taꞈ pyeuꞈ˗eu meh. Sahˬ boꞈ boꞈ˗eu heu naˇ, boꞈ˗eu gʼaˬ aˬ jeˬ boꞈ˗eu lehˇ yaw muiˬ˗ehˇ shaˇ noeˬ˗eu aˇ yamˬ jaˆ˗awˇ, gui˗eu gʼaˬ jiˇ ni aˇ myaˆ poˆ kʼawꞈ gui poˆ nya˗eu meh. Kʼoeˇ naˇ, yuiꞈ nyiˇ hawˇ˗eu aˬ dui siˬ nya˗eu tsawˇ haˬ deuˬ˗ahˇ tsaꞈ gaˬ ngeh jiˇ muiˬ dui dui˗eu tiˬ jeˬ pyeuꞈ˗awˇ, aˬ dui do lehˇ maˬ ya mawˇ˗eu deuˬ˗ahˇ kʼawꞈ tsaꞈ gaˬ nya˗eu meh. Yaw jeˬ ma jeˬ, nui ma ahˇ kʼawꞈ iˇ kahˇ maˬ jawˇ˗eu deuˬ, aˬ dui˗ahˇ maˬ bi uˇ leˇ laꞈ gaˇ jawˇ˗eu deuˬ, gaˇ mahˇ kaˬ gaˇ jawˇ˗eu deuˬ, heu deuˬ pyeuꞈ meh. Aˬ dui maˬ siˬ nya˗eu tsawˇ haˬ˗ahˇ sahˬ boꞈ boꞈ nehˬ ngeh, aˬ jeˬ lehˇ saˇ tiˇ ya taˬ˗eu nga?

Jahˇ paˬ˗ehˇ gʼeh˗eu jeˬ:

• 

  Nawˇ aˬ yawꞈ maꞈ˗ahˇ ya mawˇ law nmˇ˗aˬ, aˬ jeˬ ngehˬ de lehˇ boꞈ. Nawˇ aˬ suˇ gʼaˬ pyeuꞈ˗eu lehˇ jeˬ hu ehˇ nehˬ˗awˇ, aˬ yawꞈ˗ahˇ aˬ jeˬ miˇ neh boꞈ leꞈ˗euˬ lehˇ duꞈ yawˇ ni ehˇ nehˬ. Aˬ yawꞈ siˬ nya mawꞈ paˬ˗ehˇ gʼeh˗eu gaˇ kawˆ tiˬ jeˬ na naˇ haˬ˗awˇ, aˬ dui˗euˬ gʼoeˇsaiˇ˗ahˇ uˇ leˇ lehˇ ehˇ nehˬ. Kʼoeˇ naˇ, Iˇteuꞈnehꞈ paw neh Jaˇliꞈ dzaw nya˗awˇ, iˇ kahˇ˗ahˇ bi mehˬ laˇ mawꞈ naˇ kʼawꞈ za meh lehˇ jiˇ ehˇ nehˬ. Kʼoeˇ uˬ taꞈ, aˬ dui Jaˇliꞈ mehˬ iˇ ngeh zmˬ˗eu paˇ dmˬ laꞈ kʼoeˇ˗euˬ gaˇ kawˆ uˬ dzah tiˬ hmˬ na˗ahˇ ehˇ nehˬ˗awˇ, ngehˬ cawˬ˗eu aˇ taꞈ, kuˇ gaˬ˗eu sahˬ boꞈ aˇ taꞈ, maˬ ngeuˇ naˇ, tsaꞈ gaˬ gaˇ zmˬ˗eu sahˬ boꞈ aˇ taꞈ tiˬ taꞈ na, sahˬ boꞈ teu nehˬ˗ehˇ dawˆ ahˇ caw nya meh

• Yaw nymˇ nymˇ lehˇ boꞈ. Nawˬ˗euˬ sahˬ boꞈ aˇ dzehˬ˗ehˇ mahˇ dzeuˇ naˇ, gui˗eu gʼaˬ maˬ gui jiˇ mi naˆ˗ehˇ nymˇ gawˬ gawˬ laˇ nya meh.—Sahˬ boꞈ aˬ joˆ˗ehˇ ya boꞈ˗eu lehˇ

• Boꞈ lehˬ ngaˇ laˬ, haw muiˬ ngaˇ laˬ, gui˗eu gʼaˬ˗ahˇ aˬ joˆ˗ehˇ noeˬ leˇ paˬ˗ehˇ gʼeh˗eu nga, lehˇ maˬ sha mi naˆ˗ehˇ yaw muiˬ˗ehˇ haw. Sahˬ boꞈ sha poeˬ aˇ myaˆ ni jiˇ leˇ nga lehˇ dehˬ myahˬ jiˇ