Miˬyehˇ gaˇ mˇ myahˇ laꞈ˗euˬ mehˇ nmˇ deuˬ˗ahˇ neh aˬ jeˬ ya siˬ leˬ?

Aˇ muˇ yaw myaˬ gaˇ Yeˬhawˇbaˬ˗euˬ gaˇ mˇ myahˇ laꞈ˗euˬ gʼawˬ mya gʼaˬ jawˇ˗eu meh. Aˬ dui aˬ yawꞈ maꞈ Yeˬhawˇbaˬ˗ahˇ nui ma taˬ˗euˬ gaˇ kawˆ˗ahˇ dzaw geuꞈ nya˗eu meh. Yeˬhawˇbaˬ˗euˬ aˇ maꞈ aˇ muˇ nehˬ˗ehˇ taꞈ˗euˬ gaˇ kawˆ hawˇ˗eu shaˬ˗eu zahˬ˗eu gaˇ kawˆ˗ahˇ gʼaˬ leˇ nya ni Yeˬhawˇbaˬ aˬ joˆ˗ehˇ caw ba˗eu nga lehˇ jiˇ naˇ haˬ nya˗eu meh. Aˬ dui aˬ yawꞈ maꞈ˗euˬ gaˇ kawˆ naˇ haˬ mawꞈ naˇ, aˬ dui˗euˬ nymˇ jiˇ uˬ duˬ tahˬ ngeh kuˇ nya meh.

Nawˇ Yeˬhawˇbaˬ˗euˬ gaˇ mˇ˗eu myahˇ laꞈ˗euˬ naˇ, nawˬ neh puˬ haw˗eu gaˇ kawˆ aˇ kʼoꞈ yaw nyiˇ deuˬ˗ahˇ jiˇ ja neh nya˗eu meh. Yaˬkoˆ hawˇ˗eu Yoˇsehˆ aˬ yawꞈ nyaꞈ neh puˬ haw mawˇ haw˗eu gaˇ kawˆ tsawˇ haˬ deuˬ˗ahˇ ja nehˬ˗eu meh. (Aˇdahˬbeh˗eu 48:21, 22; 50:24, 25) Kʼoeˇ naˇ Yeˬhawˇbaˬ nymˇ sahˇ aˬ da deuˬ˗ahˇ aˬ yawꞈ neh zahˬ leˇ paˬ˗ehˇ gʼeh˗eu gaˇ kawˆ nehˬ˗ehˇ taꞈ leˇ˗awˇ zaˬ deuˬ˗ahˇ bi mehˬ˗eu meh. (Dawˬmehˬmehˬ˗eu 4:9, 10; Ja ceuˬ 78:4-7) Nymˬ˗mˇ, aˬ dui˗euˬ saˇ ka˗ahˇ aˬ da aˬ ma deuˬ hawˇ˗eu aˇ muˇ laꞈ kʼoeˇ jawˇ˗eu mehˇ nmˇ deuˬ jiˇ, Yeˬhawˇbaˬ neh aˇ maꞈ aˇ muˇ˗ahˇ zahˇ leˇ paˬ˗ehˇ mˇ˗eu gaˇ kawˆ deuˬ nehˬ˗ehˇ taꞈ leˇ˗awˇ mehˇ nmˇ aˇ kʼoꞈ yaw nyiˇ deuˬ˗ahˇ jiˇ ja nehˬ nya meh.

Tsaꞈ gaˬ˗eu gaˇ˗ahˇ laˆ naˬ laˇ ngeh, nui ma tiˬ siˬ tehꞈ˗ehˇ taꞈ lehˇ ehˇ˗eu biˬdiˬoˬ haw gʼaˬ naˇ, naˇ haˬ˗eu jeˬ heu deuˬ˗ahˇ, dawˬ kʼoꞈ biꞈ.

• Awˇsaˬ˗ti li˗ya saˇ naˇ Miˬyehˇ gaˇ mˇ gaˇ laˆ naˬ˗eu miˇ kʼahˬ tiˬ kʼahˬ na˗ahˇ jawˇ˗eu mehˇ nmˇ deuˬ˗ahˇ, aˬ joˆ˗ehˇ caw ba˗eu nga?

• Miˬyehˇ gaˇ mˇ gaˇ laˆ naˬ˗eu miˇ kʼahˬ˗ahˇ jawˇ˗eu mehˇ nmˇ deuˬ˗ahˇ, nui jah ziꞈ nya ni caw ba nehˬ˗eu aˬ jeˬ nga?

• Loˬmehˬniˬ miˇ kʼahˬ˗ahˇ jawˇ˗eu mehˇ nmˇ gʼawˬ mya gʼaˬ aˬ jeˬ miˇ neh Yeˬhawˇbaˬ˗euˬ aˇ maꞈ aˇ muˇ˗ahˇ neh iˇ doˆ˗awˇ, aˇ maꞈ aˇ muˇ laꞈ kʼoeˇ aˬ joˆ˗ehˇ gʼoˆ kʼoꞈ ahˇ laˇ˗euˬ nga?

• Gaˇ kawˆ heu nawˬ˗euˬ nui jah myaˬ laˇ ni aˬ joˆ˗ehˇ caw ba˗eu nga?