Yeˬhawˇbaˬ˗ahˇ nui ma taˬ nya ni caw ba nehˬ˗eu smˇ jeˬ

Daˬbiˇ Yeˬhawˇbaˬ˗ahˇ gʼoe˗eu miˇ neh Gawˇliˇyaˆ˗ahˇ deuˆ gʼaˬ nya˗euˬ meh. (1 Saˬmeuˬlaˆ 17:45) Yeˬhawˇbaˬ aˬ yawꞈ˗euˬ baoˬ˗ahˇ zmˬ˗awˇ, aˬ yawꞈ˗euˬ tsawˇ haˬ deuˬ˗ahˇ caw ba nehˬ mawꞈ˗eu meh. (2 Laˬsaˬbaˬ 16:9) Aˬ dui yawˬ ha bym˗eu byehˆ˗eu jeˬ hawˇ˗eu yawˬ ha neh puˬ haw mawˇ haw laꞈ˗euˬ jeˬ˗ahˇ maˬ gʼoe ni, Yeˬhawˇbaˬ˗ahˇ aˬ joˆ˗ehˇ gʼoe nya˗eu nga? Heu loꞈ˗ehˇ jahˇ˗eu smˇ jeˬ neh gʼoe nya˗eu meh.

• Tiˬ kʼehˬ maˬ taˬ guiˬ lahˬ shaˇ. Aˬ dui mˇ bahˬ˗awˇ tehꞈ˗ehˇ iˬ baˇ pyehˬ nehˬ laꞈ lehˇ shaˇ˗eu maˬ ngeuˇ ni, lawˬ haw laˇ˗eu jeˬ˗ahˇ gʼaˬ leˇ nya ni caw ba nehˬ laꞈ lehˇ ya shaˇ˗eu meh. (Maꞈtehˬ 6:12, 13) Aˬ dui noeˬ tsehˆ dzeuˇ˗awˇ neh guiˬ lahˬ biꞈ nehˬ laꞈ lehˇ maˬ shaˇ ni, maˬ noeˬ tsehˆ mi naˆ˗ehˇ zaˬ siˬ nui gahˇ biꞈ nehˬ laꞈ, sheuˬ gʼeh nehˬ laꞈ lehˇ ya shaˇ˗eu meh.—Yaˬkoˆ 1:5

• Aˬ myah luꞈ Jaˇliꞈ˗ahˇ gui˗awˇ Jaˇliꞈ˗ahˇ pyehˆ tseˇ. Yawˬ nah na luꞈ Jaˇliꞈ gui. (Ja ceuˬ 1:2) Jaˇliꞈ laꞈ kʼoeˇ˗euˬ gaˇ kawˆ deuˬ˗ahˇ shaˇ noeˬ shaˇ sawˇ˗awˇ, yawˬ ha neh ya siˬ˗euˬ jeˬ˗ahˇ dehꞈ caw. (Yaˬkoˆ 1:23-25) Yawˬ ha neh puˬ haw mawˇ haw laꞈ˗euˬ jeˬ˗ahˇ maˬ gʼoe ni, tsaꞈ gaˬ˗eu gʼaˇ duˬ yaw muiˬ˗ehˇ lehˬ hmˬ. Mehˬ bawˬ˗ahˇ neh tiˬ byah tiˬ loꞈ gaˇ dahˇ tsoeˬ˗eu jeˬ za˗eu gʼaˇ duˬ, jeˬ hu lehˬ hmˬ taˬ

• Yeˬhawˇbaˬ˗euˬ aˇ maꞈ aˇ muˇ˗euˬ ehˇ dawˬ naˇ haˬ. Aˇ maꞈ aˇ muˇ˗ahˇ neh laˇ˗euˬ nui noeˬ nui duˇ yaw shuiꞈ jeˬ˗ahˇ teh miˇ˗awˇ, teu˗ahˇ taˆ lehˇ mˇ caw. (Bawˇtsahˬ 9:17) Kʼoeˇ naˇ, aˇ muˇ˗ahˇ sheuˬ gʼeh˗eu deuˬ neh mehˬ nehˬ laꞈ˗euˬ jeˬ˗ahˇ mˇ caw.—Heˬbyehˇ 13:17

Kʼehˬ laˇ kʼaˆ laˇ˗eu jeˬ˗ahˇ guˆ˗eu maˬ loˬ˗a lehˇ ehˇ˗eu biˬdiˬoˬ˗ahˇ haw gʼaˬ naˇ, naˇ haˬ˗eu jeˬ heu deuˬ˗ahˇ dawˬ kʼoꞈ biꞈ.

• Mehˇ nmˇ heu deuˬ guˆ laˇ paˬ˗ehˇ gʼeh˗eu aˬ geu jeˬ˗ahˇ ya tahˬ puˬ˗euˬ nga?

• Guˆ˗eu nui ma˗ahˇ gʼaˬ leˇ nya ni, aˬ yawꞈ maꞈ˗ahˇ caw ba nehˬ˗eu aˬ geu jeˬ nga?