Yawˬ ha˗euˬ nymˇ dahˬ, dehꞈ ziˇ˗euˬ aˇ gu pyeuꞈ

Laˬ kʼaˬ tiˬ cehˇ nymˇ dahˬ dahˬ dzaˬ nya˗eu Ka li zaˬ deuˬ, Yeˬhawˇbaˬ˗ahˇ ciˬ huiˬ ciˬ mahˇ˗awˇ, aˬ yawꞈ nyaꞈ yaw kaˬ jiˇ laˬ kʼaˬ cehˇ˗eu meh. (Maˬkuˆ 10:9) Nymˇ jiˇ laꞈ kʼoeˇ laˬ kʼaˬ cehˇ˗awˇ shaˬ zahˬ˗ahˇ kamˬ daˬ nya˗eu gʼaˇ duˬ, cawˬ maˬ shaˇ baw ngeh neh nyiˬ gʼaˬ luꞈ Jaˇliꞈ zahˇ˗ahˇ ya dehꞈ caw˗eu meh.

‘Zaˬ guˬ˗euˬ aˇ yamˬ dzeuˇ˗iˇ’˗awˇ neh tehꞈ˗ehˇ sheuˬ dahˬ dzaˬ paˬ˗ehˇ gʼeh˗eu meh. Aˬ jeˬ miˇ neh ehˇ naˇ, aˇ kʼoꞈ yaw nyiˇ ngeh yuꞈ taꞈ jawˇ taꞈ mawꞈ˗eu nui ma gʼaˬ kʼaˆ dui dui˗awˇ, noeˬ dahˇ maˬ doe ni noeˬ tsehˆ lehˬ laˇ nya˗eu meh. (1 Gawˇliˬtu 7:36, MS) Aˬ dui zaˬ guˬ˗euˬ aˇ yamˬ˗ahˇ zmˬ˗awˇ Miˬyehˇ nehˬ˗ehˇ gʼoeˇ leˇ ni maˬ ehˇ, muiˬ˗eu Ka li zaˬ tiˬ gʼaˬ pyeuꞈ laˇ nya ni maˬ ehˇ, leh jeh paˬ˗ehˇ gʼeh˗eu meh. Heu loꞈ˗ehˇ jahˇ naˇ, nymˇ dahˬ dahˬ dzaˬ ngeh laˬ kʼaˬ cehˇ˗eu yaw duˬ baw meh.

Tiˬ gʼaˬ na nehˬ˗ehˇ yuˇ˗eu lehˇ maˬ ehˇ tsehˆ mi naˆ˗ehˇ, aˬ yawꞈ˗euˬ ‘nui ma˗euˬ aˇ gʼehˇ’˗ahˇ siˬ nya˗eu gʼaˇ duˬ, aˇ yamˬ ya zmˬ˗eu meh. (1 Beˬtuˆluˆ 3:4) Gaˇ kawˆ tiˬ jeˬ na jaˆ naˇ aˬ yawꞈ nehˬ˗ehˇ ngehˬ cawˬ paˬ˗ehˇ gʼeh˗eu meh. Nymˇ dahˬ dahˬ dzaˬ ngeh muiˬ˗eu kʼaˬ dzeˇ zaˬ hawˇ˗eu muiˬ˗eu miˬ zaˬ pyeuꞈ mawꞈ naˇ, yawˬ ha za laˇ˗eu jeˬ˗ahˇ maˬ ngeuˇ˗eu, yawˬ ha paw neh biꞈ nya˗eu jeˬ˗ahˇ ya shaˇ noeˬ˗eu meh. (Piˇliˇpiˆ 2:3, 4) Aˬ dui cawˬ maˬ shaˇ baw mi naˆ˗ehˇ Jaˇliꞈ zahˇ˗ahˇ dehꞈ caw naˇ, mehˬ hu paw nymˇ dahˬ dahˬ dzaˬ ngeh˗euˬ gʼaˇ duˬ yaw muiˬ˗ehˇ lehˬ hmˬ taˬ˗eu jeˬ pyeuꞈ meh.

Cawˬ maˬ shaˇ baw mi naˆ˗ehˇ lehˬ hmˬ taˬ—Aˇ tsehˆ 3: ‘Aˇ myaˆ jiˇ leˇ nga lehˇ jeˬ hu sawˇ duˬ’ lehˇ ehˇ˗eu biˬdiˬoˬ haw gʼaˬ naˇ, naˇ haˬ˗eu jeˬ heu deuˬ˗ahˇ dawˬ kʼoꞈ biꞈ.

• Mehˇ nmˇ zaˬ miˬ aˬ buˇ heu gʼaˬ hawˇ˗eu mehˇ nmˇ Ce yaw kaˬ aˬ joˆ˗ehˇ gʼeh luꞈ˗eu nga?

• Aˬ yawꞈ nyaꞈ zaˬ kʼaˬ tiˬ kʼehˬ taˬ luꞈ ngeh, aˬ jeˬ jeˇ˗ahˇ ya mawˇ˗euˬ nga?

• Aˬ da aˬ ma gʼaˬ aˬ yawꞈ˗euˬ aˬ buˇ˗ahˇ aˬ joˆ˗ehˇ caw ba˗euˬ nga? Aˬ buˇ gʼaˬ aˬ joˆ˗ehˇ noeˬ tsehˆ˗euˬ nga?