Hawˇdaˬ neh noeˬ taˬ˗euˬ jeˬ pyeuꞈ leˇ

Dzeuˇ yaꞈ˗euˬ myaˆ kʼoꞈ˗ahˇ nawˇ Eˬdoˬniˇshaˬ miˇ kʼahˬ Sehˇgeuˬ Beˬsaˬ iˇ jaw lah˗ahˇ iˇ naˇ, zawˇ˗ehˇ gaˬ laˇ paˬ˗ehˇ gʼeh˗eu mehˇ nmˇ zaˬ miˬ aˬ buˇ 3 gʼaˬ˗ahˇ ya mawˇ˗eu kʼawꞈ pyeuꞈ nya meh. Teu gaˇ˗euˬ tsawˇ haˬ deuˬ aˬ yawꞈ maꞈ˗ahˇ Jaˇliꞈ˗ahˇ gʼoˆ shaw nya laˇ ni caw ba nehˬ˗eu deuˬ lehˇ siˬ nya˗eu meh. Ehˇ kʼawꞈ nawˇ aˬ yawꞈ maꞈ˗ahˇ ya mawˇ ngeh, aˬ yawꞈ maꞈ tsaꞈ gaˬ˗eu gaˇ maˬ ngeuˇ˗eu gaˇ yawˬ jeˬ yawˬ mˇ luꞈ gaˇ ya mawˇ˗eu meh.

Zaˬ miˬ aˬ buˇ teu deuˬ iˇ cuꞈ laꞈ kʼoeˇ ahˇ˗eu kʼaˬ lo yaw huiˬ deuˬ baˬ doˆ luꞈ˗eu meh. Kʼaˬ lo tiˬ deuˬ na˗aˬ, baw duiˇ huiˬ ni huiˬ˗eu meh. Aˬ yawꞈ maꞈ nuiˇ boˆ˗ahˇ nuiˇ˗awˇ, kʼaˬ lo deuˬ˗ahˇ diˬ puˬ neh ya uˆ hui ni tehꞈ˗ehˇ deh pyeuꞈ˗eu meh. Kʼoeˇ naˇ aˬ yawꞈ maꞈ kʼaˬ lo teu deuˬ˗ahˇ boˇ naˬ˗ahˇ dawˆ ahˇ˗awˇ gʼeu kʼoꞈ gʼeh˗awˇ, pehˇ zeuˇ zeuˇ ma˗ahˇ shehˆ ahˇ˗awˇ, gaˇ ma kʼawˬ gaˇ zmˬ˗eu gʼaˇ duˬ lawˬ liˬ˗ahˇ baꞈ daˆ nehˬ˗eu meh.

Mehˇ nmˇ zaˬ miˬ aˬ buˇ heu 3 gʼaˬ laꞈ kʼoeˇ neh tiˬ gʼaˬ naˇ Hawˇdaˬ meh. Aˬ yawꞈ˗aˬ, yawˬ deuˬ yawꞈ naˆ maˬ tseˇ gaˇ heu˗ahˇ aˇ yamˬ biꞈ nya dzehˬ˗awˇ, gaˇ heu˗ahˇ neh za˗euˬ pyuˇ dawˬ tawˆ luꞈ nymˇ jiˇ˗euˬ gʼaˇ duˬ loˬ gaˇ zmˬ˗eu meh. Ehˇ kʼawꞈ nymˬ˗mˇ naˇ JW Laiˇbaˬliˬ ehˆ zmˬ nya˗eu tehˇbeˬ˗leꞈ tiˬ hmˬ aˬ yawꞈ geuꞈ mawꞈ˗eu meh. Tehˇbeˬ˗leꞈ teu naˇ Jaˇliꞈ pyehˆ tsehˇ ngeh maˬ ehˇ, aˬ cawˬ˗ahˇ tsaꞈ gaˬ ngeh maˬ ehˇ, ehˆ teu laꞈ kʼoeˇ jaˆ˗eu biˬdiˬoˬ deuˬ hawˇ˗eu paˇ dmˬ deuˬ gaˇ dahˇ tsoeˬ dui dui nga lehˇ siˬ nya˗eu miˇ neh meh.

Hawˇdaˬ yawˬ shawˬ na luꞈ kʼaˬ lo deh˗awˇ lawˬ liˬ˗ahˇ baꞈ daˆ˗eu gaˇ heu tiˬ nah naˬ liˬ 2 laꞈ mˇ˗euˬ meh. Aˬ yawꞈ gaˇ heu ba la tiˬ siˬ taꞈ tiˬ paˆ mˇ gʼaˬ ngeh jawˇ, tehˇbeˬ˗leꞈ zeuˇ nya˗euˬ meh.

“Kʼaˬ lo ya deh˗eu miˇ neh gʼaˬ doeˇ doeˇ kʼawꞈ, gʼawˇ mawˇ lawˬ muˇ naˇ kʼawꞈ tehˇbeˬ˗leꞈ yaw shuiꞈ baꞈ˗awˇ ya zmˬ˗eu miˇ neh gʼawˇ mawˇ lawˬ muˇ naˇ˗eu jiˇ ngehˇ miˬ˗a. Tehˇbeˬ˗leꞈ jaˆ laˇ˗euˬ miˇ neh tsaꞈ gaˬ gaˇ jiˇ aˬ cawˬ˗ahˇ yaw muiˬ˗ehˇ mehˬ nya laˇ˗awˇ, mehˬ bawˬ˗euˬ gʼaˇ duˬ jiˇ yaw awˬ˗ehˇ lehˬ hmˬ nya laˇ miˬ˗a” lehˇ Hawˇdaˬ ehˇ˗eu meh. Yaw jaw naˇ gawˇ doˆ laˇ˗euˬ miˇ neh mehˬ bawˬ hawˇ˗eu tsaꞈ gaˬ˗eu gaˇ yawˬ jeˬ na luꞈ naˬ gaˬ paw neh ya jahˇ kʼawꞈ, tehˇbeˬ˗leꞈ jaˆ˗eu miˇ neh yaw muiˬ˗ehˇ jahˇ nya˗euˬ ma lehˇ jiˇ aˬ yawꞈ ehˇ˗eu meh. Hawˇdaˬ neh noeˬ taˬ˗euˬ jeˬ pyeuꞈ leˇ˗euˬ miˇ neh aˬ dui˗ahˇ jiˇ laˬ kʼaˬ cehˇ dui dui miˇ˗a.