Nawˇ siˬ nya ma loˇ?
Aˬ cawˬ˗euˬ tsawˇ jeuˬ Daˬbiˇ˗euˬ yehˇ aˬ jeˬ miˇ neh geuꞈ˗eu nga?
Daˬbiˇ˗euˬ guiˇ maꞈ laꞈ kʼoeˇ aˬ cawˬ˗euˬ tsawˇ jeuˬ pyeuꞈ˗eu yehˇ yaw myaˬ gʼaˬ jawˇ˗eu meh. Yaw jeˬ ma jeˬ Aˬmoˬ meuˬ˗ahˇ jawˇ˗eu Zeˬlehˆ, Heˬtaˆ tsawˇ jeuˬ pyeuꞈ˗eu Uˇliˇyaˆ, Mawˇbaˆ meuˬ˗ahˇ jawˇ˗eu Iˇdaˬmahˇ meh.a (1 Laˬsaˬbaˬ 11:39, 41, 46) Kʼoeˇ naˇ Daˬbiˇ˗euˬ yehˇ deuˬ laꞈ kʼoeˇ Sheˬleˬdiˇ, Peˬlehˆ, Gaˬdaˇ tsawˇ haˬ heu deuˬ jiˇ jawˇ˗eu meh. (2 Saˬmeuˬlaˆ 15:18, Miˇ shuiꞈ dawˬ paˇ Jaˇliꞈ) Sheˬleˬdiˇ hawˇ˗eu Peˬlehˆ heu nyiˬ pehˬ naˇ, Piˇliˇtiˆ pehˬ nehˬ˗ehˇ gʼoeˇ gaˇ duˇ˗eu meh. (Yeˬsaˬgeˬlaˇ 25:16) Gaˬdaˇ meuˬ zaˬ deuˬ jiˇ Piˇliˇtiˆ meuˬ˗ahˇ neh oe˗euˬ meh.—Yawˇshuˆ 13:2, 3; 1 Saˬmeuˬlaˆ 6:17, 18.
Daˬbiˇ aˬ jeˬ miˇ neh aˬ yawꞈ˗euˬ yehˇ deuˬ laꞈ kʼoeˇ aˬ cawˬ˗euˬ tsawˇ jeuˬ bi jawˇ˗eu nga? Aˬ jeˬ miˇ neh ehˇ naˇ, aˬ yawꞈ maꞈ aˬ yawꞈ˗ahˇ tehꞈ˗ehˇ maˬ ngeuˇ˗eu Yeˬhawˇbaˬ˗ahˇ jiˇ saˇ jaˇ ziꞈ meh lehˇ jah ziꞈ˗eu miˇ neh meh. Yaw jeˬ ma jeˬ, Jaˇliꞈ dawˬ tsuiꞈ puiˇ kʼawˬ˗eu paˇ dmˬ tiˬ dmˬ˗ahˇ Sheˬleˬdiˇ hawˇ˗eu Peˬlehˆ deuˬ˗euˬ gaˇ kawˆ˗ahˇ ngehˬ keuˆ taˬ˗euˬ meh. Teu gaˇ “Aˬ yawꞈ maꞈ Daˬbiˇ shaˬ dui dui˗eu aˇ yamˬ˗ahˇ jawˇ luꞈ ngeh saˇ jaˇ ziꞈ˗euˬ meh” lehˇ ehˇ taˬ˗euˬ meh. Aˬ yawꞈ maꞈ teu loꞈ˗ehˇ aˬ joˆ˗ehˇ jahˇ˗euˬ nga? Iˇsaˬleˬlaˆ tsawˇ haˬ deuˬ yawˬ gʼaˬ na luꞈ Daˬbiˇ˗ahˇ gʼaˬ maˬ paˇ biꞈ ni “aˬ dzawˬ aˇ gah tiˬ gʼaˬ” pyeuꞈ˗eu Sheˬba˗ahˇ gʼaˬ biꞈ˗iˇ ngeh, Sheˬleˬdiˇ hawˇ˗eu Peˬlehˆ deuˬ Daˬbiˇ˗ahˇ saˇ jaˇ ziꞈ˗awˇ, puiˬ˗eu leh jeh˗eu Sheˬba˗ahˇ laˆ dzeh nehˬ˗euˬ meh. (2 Saˬmeuˬlaˆ 20:1, 2, 7) Daˬbiˇ˗euˬ aˬ li Aˬdawˇniˇyaˆ Daˬbiˇ˗euˬ nuiˇ mahˬ˗ahˇ nuiˇ laˇ ngeh jiˇ Sheˬleˬdiˇ hawˇ˗eu Peˬlehˆ heu nyiˬ pehˬ Daˬbiˇ˗ahˇ saˇ jaˇ ziꞈ˗euˬ meh. Kʼoeˇ naˇ Daˬbiˇ˗euˬ dah zaˇ Yeˬhawˇbaˬ neh tseˇ˗euˬ Sawˇlaˬmoˬ sahˬ paˬ geuꞈ laˇ nya ni jiˇ caw ba nehˬ˗euˬ meh.—1 Sahˬpaˬ 1:24-27, 38, 39.
Daˬbiˇ˗ahˇ aˬ myah luꞈ saˇ jaˇ ziꞈ˗eu dzaˇ˗iˬ tiˬ gʼaˬ naˇ, Gaˬdaˇ meuˬ zaˬ Iˇtehˇ pyeuꞈ meh. Daˬbiˇ˗euˬ aˬ li Aˬbaˇsaˬloˬ Daˬbiˇ˗ahˇ puiˬ˗awˇ, Iˇsaˬleˬlaˆ tsawˇ haˬ deuˬ aˬ yawꞈ˗ahˇ ya leˇ ni mehˇ shuiˇ shuiˇ ngeh Iˇtehˆ hawˇ˗eu yehˇ 600 gʼaˬ Daˬbiˇ˗ahˇ caw ba nehˬ˗euˬ meh. Dahˬ beh ngeh Daˬbiˇ Iˇtehˆ˗ahˇ nawˇ aˬ cawˬ˗euˬ tsawˇ jeuˬ pyeuꞈ˗eu miˇ neh ngaˬ˗euˬ gʼaˇ duˬ deuˆ˗eu maˬ loˬ˗a lehˇ ehˇ nehˬ˗euˬ meh. Ehˇ kʼawꞈ Iˇtehˆ “Sahˬ paˬ˗oˇ, nawˇ kʼaˇ iˇ gaˇ nawˬ˗euˬ mehˬ nah ngaˇ aˬ myah luꞈ caw teh ma lehˇ, Sahˬpaˬ Miˬyehˇ˗euˬ tsawˇ myahˇ uˬ moˆ ngaˇ saˇ jaˇ dzaˬ˗eu ma. Shiˇ˗eu jeˬ keuˆ le kʼawꞈ ehˬ ngeuˇ luꞈ˗uˇ” lehˇ ehˇ˗eu meh.—2 Saˬmeuˬlaˆ 15:6, 18-21.
Iˇtehˆ Yeˬhawˇbaˬ neh tseˇ˗euˬ sahˬ paˬ Daˬbiˇ˗ahˇ saˇ jaˇ ziꞈ
Sheˬleˬdiˇ, Peˬlehˆ, Gaˬdaˇ meuˬ zaˬ heu deuˬ aˬ cawˬ˗euˬ tsawˇ jeuˬ pyeuꞈ kʼawꞈ, aˬ yawꞈ maꞈ Yeˬhawˇbaˬ naˇ maˇ maˇ ni gʼeh˗eu Miˬyehˇ pyeuꞈ˗eu lehˇ siˬ nya˗awˇ, Daˬbiˇ naˇ Yeˬhawˇbaˬ neh tseˇ˗euˬ sahˬ paˬ pyeuꞈ˗eu lehˇ siˬ nya˗eu meh. Daˬbiˇ heu loꞈ˗ehˇ gʼeh˗eu saˇ jaˇ ziꞈ˗eu deuˬ aˬ yawꞈ paw jawˇ˗eu miˇ neh guiˬ lahˬ huiˬ dui dui˗eu yaw duˬ baw meh.
a Dawˬmehˬmehˬ˗eu 23:3-6-ahˇ boꞈ ahˇ taˬ˗euˬ Miˬyehˇ˗euˬ zahˇ dawˬ˗ahˇ Aˬmoˬ tsawˇ haˬ hawˇ˗eu Mawˇbaˆ tsawˇ haˬ taˬ bi pyeuꞈ laˇ lehˇ ehˇ taˬ˗euˬ meh. Zahˇ dawˬ heu hmˬ aˬ cawˬ˗euˬ tsawˇ jeuˬ˗ahˇ Iˇsaˬleˬlaˆ˗euˬ tsawˇ haˬ taˬ bi pyeuꞈ laˇ lehˇ ehˇ gaˇ duˇ˗eu meh. Aˬ yawꞈ maꞈ nehˬ˗ehˇ cawˬ taˬ cawˬ, miˇ kʼahˬ˗ahˇ taˬ bi jawˇ le lehˇ ehˇ mawꞈ˗eu maˬ ngeuˇ˗a. Jaˇliꞈ˗ahˇ naꞈ suiˇ ni haw ahˇ leꞈ˗eu lehˇ ehˇ˗eu paˇ dmˬ˗ahˇ haw. Dahˬ beh˗eu dmˬ, myaˆ pyawˬ 95. (Gaˬ laˬ pyuˇ dawˬ)