Aˇ kʼoꞈ kʼawˆ laˇ˗euˬ mehˇ nmˇ deuˬ aˇ muˇ˗euˬ gʼaˇ duˬ aˇ poeˬ baw dui dui

Nawˇ tawˇ neh, aˇ kʼoꞈ kʼawˆ laˇ˗euˬ miˇ neh teu gʼaˬ loꞈ˗ehˇ noeˬ miˇ˗a loˇ? Aˬ dui uˬ taꞈ gʼawˬ mya kʼoꞈ Miˬyehˇ˗euˬ gaˇ mˇ laꞈ˗euˬ kʼawꞈ, nymˬ˗mˇ naˇ yaw beh loꞈ˗ehˇ maˬ paˇ mˇ nya˗euˬ miˇ neh, nui ma gʼaˬ baˬ laˇ nya meh. Teu loꞈ˗ehˇ noeˬ naˇ, laˬ kʼaˬ tiˬ cehˇ mˇ daˆ leꞈ nya˗eu gʼaˇ duˬ aˬ jeˬ jahˇ nya˗eu nga?

Yeˬhawˇbaˬ nawˬ˗ahˇ aˬ jeˬ noeˬ tmˬ˗eu nga?

‘Ngaˬ˗euˬ laꞈ kʼoeˇ Yeˬhawˇbaˬ aˬ jeˬ noeˬ tmˬ˗eu nga?’ lehˇ yawˬ ha˗ahˇ naˇ haˬ haw. Dawˬmehˬmehˬ˗eu 6:5-ahˇ ‘Naw˗euˬ nui ma dawˬ tawˆ luꞈ, naw˗euˬ saꞈ laˇ dawˬ tawˆ luꞈ hawˇ˗eu, naw˗euˬ gʼaˬ dawˬ tawˆ luꞈ, naw˗euˬ Miˬyehˇ pyeuꞈ˗eu Sahˬpaˬ Miˬyehˇ˗ahˇ gaˬ˗awˬ’ lehˇ ehˇ taˬ˗euˬ gaˇ ya gui˗eu heu naˇ, gʼaˬ ahˇ dui dui laˇ˗eu meh.

Jaˇliꞈ heu deuˆ˗ahˇ haw ngeh, aˬ dui aˬ geu jeˬ˗ahˇ ya puˬ luꞈ kʼawꞈ, nui ma dawˬ tawˆ luꞈ, saꞈ laˇ dawˬ tawˆ luꞈ, gʼaˬ dawˬ tawˆ luꞈ, aˬ yawꞈ˗ahˇ biꞈ nehˬ gaˇ Yeˬhawˇbaˬ noeˬ tmˬ˗eu lehˇ siˬ laˇ˗eu meh. Heu naˇ aˬ dui˗ahˇ yawˬ ha˗ahˇ aˬ cawˬ nehˬ˗ehˇ maˬ sheu cehˆ ni maˬ ehˇ, zaˬ guˬ ngeh mˇ nya˗euˬ jeˬ hawˇ˗eu nymˬ˗mˇ mˇ luꞈ˗eu jeˬ˗ahˇ maˬ sheu cehˆ ni maˬ ehˇ, caw ba nehˬ˗eu meh.

Nawˇ zaˬ guˬ ngeh aˬ geu jeˬ lehˇ gʼeh˗eu gaˇ kawˆ˗ahˇ ya puˬ kʼawꞈ, Yeˬhawˇbaˬ˗ahˇ kʼaˇ muiˬ˗eu jeˬ biꞈ nehˬ˗euˬ tehꞈ˗a. Ehˇ kʼawꞈ, nymˬ˗mˇ naˇ nawˬ˗euˬ dehꞈ ziˇ poˆ laˇ paˇ laˇ˗euˬ miˇ neh, aˬ yawꞈ gaˇ yawꞈ haw haw˗ehˇ Yeˬhawˇbaˬ˗ahˇ ya biꞈ meh. Nawˇ zaˬ guˬ ngeh loꞈ˗ehˇ Yeˬhawˇbaˬ˗ahˇ maˬ paˇ biꞈ nehˬ nya˗euˬ kʼawꞈ, nymˬ˗mˇ yawˬ ha mˇ nya˗eu jeˬ kʼaˇ gʼeh nya gaˇ neh leh jeh˗awˇ mˇ naˇ, teu jiˇ Yeˬhawˇbaˬ˗ahˇ kʼaˇ muiˬ˗eu jeˬ biꞈ nehˬ luꞈ˗eu jeˬ pyeuꞈ meh.

Aˬ cawˬ˗ahˇ gʼaˬ biꞈ˗awˇ caw ba nehˬ nya

Yawˬ ha maˬ paˇ mˇ nya˗euˬ jeˬ˗ahˇ tehꞈ˗ehˇ shaˇ noeˬ shaˇ noeˬ˗ehˇ maˬ jawˇ ni, nymˬ˗mˇ yawˬ ha aˬ jeˬ paˇ mˇ nya nga siˬ lehˇ shaˇ noeˬ. Yaw nyiˇ ngeh maˬ ngeuˇ˗eu aˇ kʼoꞈ kʼawˆ laˇ˗awˇ nehˬ tehꞈ˗ehˇ mˇ nya˗eu jeˬ lehˇ jaˆ meh. Yaw jeˬ ma jeˬ, laꞈ oˆ paw˗euˬ gaˇ kawˆ heu deuˬ˗ahˇ haw.

Aˬ cawˬ deuˬ˗ahˇ nawˬ neh puˬ haw mawˇ haw laꞈ˗euˬ jeˬ ja nehˬ. Laꞈ oˆ paw˗euˬ gaˇ kawˆ heu deuˬ˗ahˇ shaˇ sawˇ haw.

Sahˬ paˬ Daˬbiˇ: “Ngaˬ˗euˬ tiˬ ziˇ dehꞈ mawˬ laꞈ˗euˬ tsawˇ muiˬ˗ahˇ Sahˬpaˬ Miˬyehˇ neh byehˇ dzeh nehˬ˗euˬ maˬ ya mawˇ˗ehˇ, aˬ yawꞈ maꞈ˗euˬ zaˬ deuˬ uˆ deuˬ, hawˬ shaˇ shaˇ˗eu maˬ mawˇ haw˗aˬ.”—Ja ceuˬ 37:25.

Yawˇshuˆ: “Nymˬ˗mˇ ngaˇ ziˇ jiˇ le luꞈ miˇ˗a. Naw maꞈ˗euˬ Miˬyehˇ pyeuꞈ˗eu Sahˬpaˬ Miˬyehˇ˗aˬ, aˬ yawꞈ neh saˇ jaˇ dzaˬ taˬ˗euˬ yaw muiˬ jeˬ dawˬ tawˆ luꞈ tiˬ jeˬ˗iˬ maˬ bi dzeuˇ˗iˇ ni biꞈ laꞈ˗euˬ gaˇ, naw maꞈ yawˬ gʼaˬ na luꞈ nui ma laꞈ kʼoeˇ keuˆ ni siˬ luꞈ meh.”—Yawˇshuˆ 23:14.

Nawˇ jiˇ Daˬbiˇ hawˇ˗eu Yawˇshuˆ loꞈ˗ehˇ ngehˬ haw˗euˬ paˬ. Aˬ yawꞈ nyaꞈ yawˬ ha neh ya puˬ ya mawˇ˗euˬ jeˬ˗ahˇ ngehˬ keuˆ luꞈ˗eu meh. Daˬbiˇ hawˇ˗eu Yawˇshuˆ Miˬyehˇ˗euˬ gaˇ˗ahˇ gʼawˬ mya kʼoꞈ saˇ jaˇ ziꞈ˗awˇ mˇ luꞈ ngeh, yaw myaˬ jeˬ ya puˬ ya mawˇ ya siˬ˗euˬ meh. Teu miˇ neh aˬ yawꞈ nyaꞈ˗euˬ dawˬ naꞈ suiˇ ni gʼeh˗eu meh.

Nawˇ Yeˬhawˇbaˬ˗ahˇ uˬ duˬ tahˬ laꞈ˗euˬ gʼawˬ mya kʼoꞈ byah laˇ˗euˬ naˇ, nawˬ˗euˬ dehꞈ ziˇ laꞈ kʼoeˇ ya puˬ ya mawˇ˗euˬ Miˬyehˇ neh guiˬ lahˬ biꞈ nehˬ laꞈ˗euˬ gaˇ kawˆ aˬ cawˬ deuˬ˗ahˇ dzawˇ nehˬ nya meh. Miˬyehˇ aˬ yawꞈ˗euˬ gaˇ mˇ zaˬ deuˬ˗ahˇ caw ba nehˬ gaˇ ya mawˇ haw maˬ laˬ? Ya mawˇ˗euˬ naˇ aˬ cawˬ deuˬ˗ahˇ ja nehˬ˗awˬ. Teu nawˬ˗ahˇ gʼaˬ bi ahˇ laˇ˗eu loꞈ˗ehˇ, aˬ cawˬ deuˬ˗ahˇ jiˇ gʼaˬ ahˇ leˇ˗eu meh. Nawˬ neh Yeˬhawˇbaˬ˗euˬ gaˇ mˇ˗euˬ gaˇ kawˆ aˬ cawˬ deuˬ˗ahˇ ja nehˬ naˇ, aˬ yawꞈ maꞈ˗ahˇ gʼaˬ ahˇ leˇ˗eu yaw duˬ baw meh.—Loˇmaˆ 1:11, 12.

Gʼeh nya naˇ, yawˬ ha˗euˬ mawˇ do mehˬ bawˬ˗ahˇ iˇ keuˆ. Heu loꞈ˗ehˇ jahˇ naˇ, mehˇ nmˇ deuˬ˗ahˇ gʼaˬ biꞈ˗awˇ caw ba nehˬ nya meh. Mehˇ nmˇ Kawˇniˬ heu loꞈ˗ehˇ ehˇ˗eu meh. “Mehˬ bawˬ˗ahˇ iˇ˗eu heu naˇ, ngaˬ˗ahˇ nui ma gʼaˬ maˬ baˬ ni caw ba nehˬ laꞈ nya. Mehˬ bawˬ˗ahˇ iˇ naˇ, mehˇ nmˇ deuˬ˗euˬ nui gaˬ za˗eu miˇ neh, nui ma maˬ paˇ nyiˇ maˬ paˇ cawˆ miˇ˗a. Mehˇ nmˇ deuˬ ngaˬ˗ahˇ nui gaˬ mˇ mawˇ nehˬ laꞈ˗euˬ gaˇ guiˬ lahˬ kʼoꞈ˗eu gʼaˇ duˬ, ngaˇ jiˇ mehˇ nmˇ deuˬ˗ahˇ laꞈ sawˬ lawˬ muˇ ui cuiˆ na biꞈ nehˬ˗eu ma. Heu loꞈ˗ehˇ jahˇ jahˇ˗ehˇ ngaˇ aˬ yawꞈ maꞈ˗ahˇ gʼaˬ biꞈ daˆ leꞈ mawꞈ miˇ˗a.”

Yeˬhawˇbaˬ nawˬ neh leh jeh˗euˬ jeˬ˗ahˇ aˇ poeˬ taˬ baw

Aˇ kʼoꞈ yaw nyiˇ ngeh loꞈ˗ehˇ kʼaˇ muiˬ˗eu jeˬ maˬ biꞈ nehˬ nya˗eu deuˬ˗ahˇ Yeˬhawˇbaˬ gaˬ˗eu gaˇ kawˆ bi siˬ laꞈ˗eu Jaˇliꞈ laꞈ kʼoeˇ˗euˬ gaˇ kawˆ deuˬ jaˆ˗eu meh. Yaw jeˬ ma jeˬ, Yeˬsuˇ dehꞈ le ngeh yamˬ˗ahˇ jawˇ˗eu aˇ kʼoꞈ kʼawˆ laˇ˗euˬ Iˇsaˬleˬlaˆ tsawˇ haˬ pyeuꞈ˗eu Suˇmoˬ˗euˬ gaˇ kawˆ˗ahˇ shaˇ noeˬ haw sheˇ. Aˬ yawꞈ uˬ duˬ tahˬ nymˇ nymˇ ma˗ahˇ le keuˆ ngeh aˬ yawꞈ taꞈ˗ehˇ aˇ kʼoꞈ nyiˇ dzehˬ˗eu deuˬ huiˬ˗eu gaˇ deuˬ˗ahˇ mˇ luꞈ gaˇ ya mawˇ˗euˬ tehꞈ˗aˬ. Teu ngeh Suˇmoˬ˗ahˇ aˬ joˆ˗ehˇ gʼeh leˇ paˬ nga? Aˬ yawꞈ˗ahˇ gʼaˬ kʼaˆ˗eu zaˬ guˬ deuˬ loꞈ˗ehˇ maˬ paˇ mˇ maˬ paˇ shaˇ nya˗euˬ miˇ neh Miˬyehˇ˗euˬ mehˬ shi aˇ poeˬ yaw kʼaˆ˗ehˇ maˬ baw nya lehˇ noeˬ leˇ nya˗eu meh. Ehˇ kʼawꞈ Suˇmoˬ˗ahˇ Yeˬhawˇbaˬ ‘Miˬyehˇ˗ahˇ guˆ˗eu tsawˇ muiˬʼ tiˬ gʼaˬ pyeuꞈ˗eu lehˇ haw˗eu meh. Yeˬsuˇ naˇ, Meˬsiˇya pyeuꞈ laˇ meh lehˇ ehˇ˗eu maˬ keuˆ laˇ miˇ ehˇ taˬ˗euˬ dawˬ˗ahˇ tsaꞈ gaˬ˗eu gʼaˇ duˬ, Yeˬhawˇbaˬ aˇ kʼoꞈ kʼawˆ laˇ˗euˬ Suˇmoˬ˗ahˇ zmˬ˗euˬ meh. (Luˇkaꞈ 2:25-35) Yeˬhawˇbaˬ Suˇmoˬ˗ahˇ ‘muiˬ˗eu shawˇ˗eu yaw sahˇ neh bi sheuˬ gʼeh˗euˬ gʼaˬʼ, nui jah ziꞈ˗eu tiˬ gʼaˬ lehˇ haw˗eu lehˇ maˇ jawˆ ni siˬ laˇ˗eu meh.

Nawˇ mˇ nya˗eu jeˬ dui dui baw kʼawꞈ ni saˇ jaˇ ziꞈ˗eu laꞈ kʼoeˇ Yeˬhawˇbaˬ˗ahˇ uˬ duˬ tahˬ gaˇ aˬ yawꞈ aˇ poeˬ taˬ baw˗eu yaw duˬ baw meh lehˇ jah ziꞈ nya meh. Yeˬhawˇbaˬ aˬ dui ‘kʼaˇ gʼeh nya˗eu loꞈ˗ehˇ damˬ˗euˬ gaˇ ha geuꞈ nehˬ laꞈ tehꞈ˗a. Maˬ gʼeh nya gaˇ keuˆ ni damˬ˗awˬ lehˇ maˬ ehˇ˗a.’—2 Gawˇliˬtu 8:12.

Teu miˇ neh yawˬ ha aˬ jeˬ mˇ nya˗eu nga lehˇ tehꞈ˗ehˇ haw tsoˆ taˬ˗awˬ. Yaw jeˬ ma jeˬ, nawˇ aˇ yamˬ ui cuiˆ tehꞈ˗ehˇ biꞈ nehˬ nya˗eu tehꞈ kʼawꞈ, tsaꞈ gaˬ˗eu gaˇ˗ahˇ aˬ joˇ joˆ˗ehˇ tsaꞈ gaˬ nya˗eu nga lehˇ shaˇ noeˬ haw. Naˬ gaˬ neh maˬ ehˇ, sahˬ boꞈ boꞈ boꞈ˗ehˇ maˬ ehˇ, aˬ cawˬ˗ahˇ gʼaˬ biꞈ nehˬ nya ma laˬ? Nawˇ loꞈ˗ehˇ Yeˬhawˇbaˬ˗euˬ gaˇ˗ahˇ saˇ jaˇ ziꞈ˗eu laꞈ kʼoeˇ gʼawˬ mya kʼoꞈ mˇ laꞈ˗euˬ deuˬ jawˇ gaˇ neh gʼaˬ biꞈ˗eu dawˬ ya gaˬ ngeh, mehˇ nmˇ deuˬ˗ahˇ gʼaˬ ahˇ leˇ˗eu yaw duˬ baw meh.

Gʼawˇ mawˇ gʼaˬ baˬ kʼawꞈ, nawˇ Yeˬhawˇbaˬ˗euˬ gʼaˇ duˬ yaw myaˬ jeˬ lehˇ mˇ nya meh. “Jaˇliꞈ aˬ yawꞈ˗euˬ dehꞈ ziˇ˗ahˇ maˇ diˇ caw ba nehˬ nya” lehˇ ehˇ˗eu oeˬ coeˇ oeˬ bawˬ˗ahˇ Ehˇpa˗li kaˆ nahˇ ma doˆ kʼehˬ paw jawˇ˗eu mehˇ nmˇ tiˬ gʼaˬ neh puˬ haw mawˇ haw˗euˬ gaˇ kawˆ˗ahˇ haw.

Nawˇ uˬ taꞈ gʼawˬ mya kʼoꞈ Yeˬhawˇbaˬ˗ahˇ saˇ jaˇ ziꞈ˗eu laꞈ kʼoeˇ uˬ duˬ tahˬ˗eu heu naˇ aˬ cawˬ˗ahˇ gʼaˬ biꞈ˗eu jeˬ pyeuꞈ˗awˇ, aˬ cawˬ˗euˬ gʼaˇ duˬ dzaw geuꞈ dui dui paˬ˗ehˇ gʼeh˗eu jeˬ pyeuꞈ˗eu lehˇ maˬ ya ngehˇ˗a. “Miˬyehˇ˗aˬ, dawˇ coe ni yaˇ kʼaˬ daˇ˗eu gʼaˬ meh. Naw maꞈ neh mˇ˗euˬ gaˇ deuˬ˗ahˇ aˬ yawꞈ maˬ ngehˇ˗a. . . . Aˬ yawꞈ˗euˬ gʼoeˇ˗eu gaˬ˗eu jeˬ aˬ cawˬ mawˇ nya ni naw maꞈ neh mˇ˗euˬ jeˬ˗ahˇ maˬ ngehˇ˗a” lehˇ jah ziꞈ nya meh.—Heˬbyehˇ 6:10.

Aˬ cawˬ˗ahˇ caw ba gaˇ leh jeh

Aˬ cawˬ˗ahˇ caw ba˗eu aˇ kʼoꞈ kʼawˆ laˇ˗euˬ deuˬ naˇ, yaw muiˬ˗ehˇ shaˇ noeˬ nya˗awˇ yaw muiˬ jawˇ saˇ doˆ˗eu uˬ taꞈ, ziˇ baw nga lehˇ pyehˆ tseˇ˗eu deuˬ ehˇ˗eu meh.

Aˬ cawˬ˗ahˇ caw ba˗eu leh jeh kʼawꞈ ni, tsawˇ mawˬ deuˬ laꞈ kʼoeˇ ya puˬ˗eu shaˬ zahˬ jaˆ luꞈ˗a siˬ. Miˬyehˇ Miˇkʼahˬ tehꞈ˗ehˇ Aˬdaˬ˗ahˇ neh za˗euˬ jeˬ biˇ pyeuꞈ˗eu iˬ baˇ hawˇ˗eu maˬ byah kuꞈ˗eu jeˬ uˬ taꞈ, shiˇ˗eu jeˬ˗ahˇ yuˇ dzeh nehˬ nya meh.—Loˇmaˆ 5:12.

Nawˇ aˬ cawˬ deuˬ˗ahˇ Yeˬhawˇbaˬ˗ahˇ siˬ nya laˇ ni caw ba nehˬ˗eu maˬ ehˇ, Yeˬhawˇbaˬ˗euˬ gaˇ mˇ˗eu maˬ ehˇ, heu naˇ nawˬ˗euˬ noeˬ tmˬ˗eu jeˬ shawˇ jehˆ ni jaˆ ni caw ba nehˬ˗awˇ, yaw muiˬ jawˇ saˇ doˆ laˇ ni jiˇ caw ba nehˬ meh. Yeˬhawˇbaˬ nawˇ aˬ yawꞈ˗euˬ gʼaˇ duˬ mˇ nehˬ˗eu jeˬ˗ahˇ aˇ poeˬ taˬ baw meh lehˇ jah ziꞈ˗awˇ, aˇ muˇ laꞈ kʼoeˇ˗euˬ mehˇ nmˇ deuˬ jiˇ nawˬ˗euˬ saˇ jaˇ ziꞈ˗eu jeˬ˗ahˇ aˇ poeˬ taˬ baw meh lehˇ jah ziꞈ luꞈ˗uˇ.