Nawˇ siˬ nya ma loˇ?

Yeˬsuˇ aˬ jeˬ miˇ neh Yeˬluˇsaˬlehˬ meuˬ˗euˬ uˬ duˬ tahˬ nymˇ laꞈ kʼoeˇ jeˬ zaˬ ahˬ taꞈ zeuˇ taꞈ˗eu deuˬ˗ahˇ “smˇ kʼoeˬ” lehˇ kuˇ˗eu nga?

Maꞈtehˬ˗euˬ guiˬ lahˬ dawˬ sahˬ boꞈ˗ahˇ heu loꞈ˗ehˇ boꞈ taˬ˗euˬ meh. “Uˬ duˬ tahˬ nymˇ nymˇ ma laꞈ kʼoeˇ Yeˬsuˇ uˇ leˇ˗awˇ ahˬ taꞈ zeuˇ taꞈ luꞈ˗eu tsawˇ haˬ dawˬ tawˆ luꞈ˗ahˇ teh doˆ˗euˬ meh. Pyuˇ dawˬ paˇ˗eu tsawˇ haˬ deuˬ˗euˬ hawˬ jeh hawˇ˗eu lawˇ˗eu shehˇ˗eu yaˇ miˇ kʼaˬ kʼoeˬ ahˬ˗eu tsawˇ haˬ deuˬ˗euˬ nuiˇ mahˬ deuˬ aˬ yawꞈ ngawˬ dzeh nehˬ˗euˬ meh. Tsawˇ haˬ kʼoeˇ deuˬ˗ahˇ aˬ yawꞈ ehˇ nehˬ˗eu “Ngaˬ˗euˬ Uˬ duˬ tahˬ nymˇ nymˇ ma˗ahˇ guiˬ lahˬ shaˇ˗eu nymˇ lehˇ kuˇ tehꞈ˗a” lehˇ Miˬyehˇ neh ehˇ taˬ˗euˬ gaˇ kawˆ Jaˇliꞈ laꞈ kʼoeˇ boꞈ taˬ˗euˬ meh. Ehˇ kʼawꞈ uˬ duˬ tahˬ nymˇ nymˇ ma heu smˇ kʼoeˬ tahˇ joe˗euˬ baˇ shmˇ duˬ pyeuꞈ˗iˇ ni naw maꞈ jahˇ luꞈ˗eu ngaˇ.”—Maꞈtehˬ 21:12, 13.

Gaˇ hu˗euˬ gaˇ kawˆ˗ahˇ haw ngeh uˬ duˬ tahˬ nymˇ laꞈ kʼoeˇ ahˬ taꞈ zeuˇ taꞈ˗eu deuˬ aˇ poeˬ aˇ dzehˬ˗ehˇ sawˇ kʼaˆ dzeuˇ˗eu miˇ neh maˬ tsaˬ maˬ dawˇ nga lehˇ siˬ laˇ˗eu meh. Yaw jeˬ ma jeˬ kʼaˬ kʼoeˬ aˇ poeˬ tiˬ pawˬ˗iˬ maˬ kʼaˆ˗a lawˇ˗eu gʼaˬ duˬ iˇ shaˬ zaˬ deuˬ jiˇ zeuˇ nya meh. Ehˇ kʼawꞈ A.D. 100 kʼoꞈ heu kaˬ˗ahˇ kʼaˬ kʼoeˬ nyiˬ mawˇ zeuˇ˗eu gʼaˇ duˬ shuiˇ maˇ byaˆ tiˬ byaˆ ya biꞈ˗eu meh lehˇ Yuˇdaˆ tsawˇ haˬ˗euˬ gaˇ kawˆ˗ahˇ boꞈ˗eu deuˬ ehˇ˗eu meh. Pyuˇ heu myaˆ ni za˗eu gʼaˇ duˬ gaˇ mˇ zaˬ tiˬ gʼaˬ 25 nah ya mˇ˗eu meh. Kʼaˬ kʼoeˬ aˬ dzehˬ˗ehˇ poeˬ˗eu miˇ neh iˇ shaˬ zaˬ deuˬ maˬ zeuˇ nya˗a. (Uˬduˬtahˬ˗eu 1:14; 5:7; 12:6-8) Teu miˇ neh saˬ laˬ Siˇmiˬawˬ beˬ Kaꞈmeˇli˗aˬ gaˇ kawˆ heu˗ahˇ nui ma pehˇ dui dui˗awˇ Yuˇdaˬ tsawˇ haˬ deuˬ ya lawˇ˗eu jeˬ laˆ cuiˆ nehˬ˗euˬ meh. Teu ngeh kʼaˬ kʼoeˬ nyiˬ mawˇ˗euˬ aˇ poeˬ shuiˇ maˇ byaˆ tiˬ byaˆ˗ahˇ gʼoeˬ tseˇ gʼoeˬ bymˇ ga le˗euˬ meh.

Aˬ dui heu gaˇ haw ngeh uˬ duˬ tahˬ nymˇ˗ahˇ ahˬ taꞈ zeuˇ taꞈ˗eu deuˬ nui kʼahˇ huiˬ˗awˇ zeuˇ˗eu deuˬ˗ahˇ neh jiˇ jeuˬ poˆ gaˇ ya mawˇ˗euˬ ma. Teu miˇ neh Yeˬsuˇ aˬ yawꞈ maꞈ˗ahˇ “smˇ kʼoeˬ” lehˇ kuˇ˗eu meh.