Muiˬ˗eu gaˇ kawˆ maˇ maˇ ni, Miˬyehˇ jawˇ gaˇ neh oe˗euˬ ngaˇ loˇ?

1. Jaˇliꞈ dawˬ kawˬ heu, aˬ suˇ gʼaˬ˗euˬ nui noeˬ nga?

Tsawˇ haˬ zaˬ miˇ tsaˬ kʼoeˇ taˆ, mˬ maˬ maˬ byaˆ zaˇ ziˇ ya dehꞈ meh lehˇ, muiˬ˗eu gaˇ kawˆ Jaˇliꞈ laꞈ kʼoeˇ boꞈ ahˇ taˬ˗euˬ meh. (Ja ceuˬ 37:29) Jaˇliꞈ˗aˬ, sahˬ boꞈ paˇ dmˬ yaw nyiˇ 66 dmˬ yuˇ dzoeˇ taˬ˗euˬ meh. Miˬyehˇ Jaˇliꞈ heu boꞈ˗eu gʼaˇ duˬ, saˇ jaˇ ziꞈ˗eu tsawˇ haˬ 40 gʼaˬ dawˬ peh zmˬ˗euˬ meh. Jaˇliꞈ boꞈ dahˬ beh˗euˬ ngaˬ dmˬ˗aˬ, dzeuˇ yaꞈ˗euˬ 3,500 kʼoꞈ˗ahˇ, Moˇseˬ neh boꞈ taˬ yaꞈ˗euˬ meh. Boꞈ saˬ saˬ˗euˬ paˇ dmˬ nga lehˇ ngeuˇ naˇ, dzeuˇ yaꞈ˗euˬ 1,900 kʼoꞈ˗ahˇ, kuiˇ laꞈ Yoˇhaˬ neh boꞈ taˬ yaꞈ˗euˬ meh. Jaˇliꞈ boꞈ˗euˬ deuˬ, aˬ suˇ gʼaˬ˗euˬ nui noeˬ boꞈ˗euˬ nga? Miˬyehˇ˗euˬ muiˬ˗eu shawˇ˗eu yaw sahˇ neh, aˬ yawꞈ maꞈ˗ahˇ bi noeˬ doˆ˗awˇ boꞈ˗euˬ meh. (2 Saˬmeuˬlaˆ 23:2) Aˬ yawꞈ maꞈ˗euˬ nui noeˬ boꞈ˗euˬ maˬ ngeuˇ˗a, Miˬyehˇ˗euˬ nui noeˬ boꞈ˗euˬ meh. Teu miˇ neh, noeˬ doˆ˗euˬ yaw sahˇ gʼaˬ naˇ, Yeˬhawˇbaˬ pyeuꞈ˗eu meh.—2 Tiˆmoˇseˬ 3:16; 2 Beˬtuˆluˆ 1:20, 21-ahˇ gui˗awˬ.

Biˬdiˬoˬ haw Jaˇliꞈ dawˬ kawˬ heu, aˬ suˇ gʼaˬ˗euˬ nui noeˬ nga?

2. Jaˇliꞈ Miˬyehˇ jawˇ gaˇ neh oe˗euˬ meh lehˇ, aˬ dui aˬ joˆ˗ehˇ jah nya˗eu nga?

Jaˇliꞈ˗aˬ, Miˬyehˇ jawˇ gaˇ neh oe˗eu meh lehˇ aˬ dui jah nya˗eu meh. Aˬ jeˬ miˇ neh ehˇ naˇ, mehˬ hu paw pyeuꞈ laˇ˗eu gaˇ kawˆ deuˬ˗ahˇ, mehˬ duˬ taˬ˗euˬ miˇ neh meh. Tsawˇ haˬ tiˬ gʼaˬ˗iˬ teu loꞈ˗ehˇ maˬ ehˇ duˬ nya˗a. (Yawˇshuˆ 23:14) Baoˬ huiˬ˗eu Miˬyehˇ tiˬ gʼaˬ tehꞈ˗ehˇ, mehˬ hu paw tsawˇ haˬ zaˬ˗ahˇ pyeuꞈ laˇ˗eu gaˇ kawˆ deuˬ˗ahˇ, mehˬ duˬ nehˬ nya˗eu meh.—Iˇsaˬyaˇ 42:9; 46:10-ahˇ gui˗awˬ.

Miˬyehˇ jawˇ gaˇ neh oe˗euˬ sahˬ boꞈ˗aˬ, aˬ cawˬ naˆ maˬ tseˇ muiˬ dzehˬ meh lehˇ noeˬ˗euˬ loꞈ˗ehˇ, maˇ diˇ muiˬ dzehˬ gaˇ ya mawˇ˗euˬ ma. Miˇ kʼahˬ doe ni, tsawˇ jeuˬ tsawˇ ca˗euˬ sahˬ boꞈ yaw myaˬ jeˬ jahˇ doˆ˗awˇ, yaw myaˬ lam dmˬ pyehˬ kʼawˬ taˬ˗euˬ meh. Jaˇliꞈ˗aˬ, oeˇ dui dui kʼawꞈ, miˇ tsaˬ tahˬ kʼawˇ˗euˬ gaˇ kawˆ˗ahˇ ngehˬ keuˆ ngeh kʼawꞈ, nymˇ˗euˬ zaˬ siˬ nui gahˇ deuˬ nehˬ˗ehˇ tsaˬ leˇ˗eu meh. Jaˇliꞈ˗ahˇ 40 gʼaˬ boꞈ˗euˬ kʼawꞈ tiˬ gaˇ tsaˬ jiˇ˗eu meh. Miˬyehˇ˗euˬ nui gaˬ˗ahˇ taꞈ˗eu gaˇ kawˆ maˇ jawˆ ni boꞈ taˬ˗euˬ uˬ taꞈ, Jaˇliꞈ˗aˬ, baoˬ ahˇ˗eu baˬ da neh, tsawˇ haˬ˗euˬ dehꞈ ziˇ˗ahˇ bi paˇ laˇ nya˗eu meh. Teu miˇ neh, Jaˇliꞈ˗aˬ maˇ maˇ ni Miˬyehˇ˗euˬ dawˬ nga lehˇ, tsawˇ haˬ gʼawˬ mya lam gʼaˬ jah˗eu meh.—1 Teˇsaˬloˇni 2:13-ahˇ gui˗awˬ.

Biˬdiˬoˬ haw Jaˇliꞈ Miˬyehˇ jawˇ gaˇ neh oe˗euˬ meh lehˇ, aˬ dui aˬ joˆ˗ehˇ jah nya˗eu nga?

3. Jaˇliꞈ laꞈ kʼoeˇ aˬ jeˬ˗euˬ gaˇ kawˆ ahˇ˗eu nga?

Jaˇliꞈ laꞈ kʼoeˇ ahˇ˗eu aˇ yehˇ huiˬ˗eu gaˇ kawˆ naˇ, Miˬyehˇ tsawˇ haˬ zaˬ˗ahˇ gaˬ˗awˇ, muiˬ dui dui˗eu jeˬ mˇ nehˬ ma lehˇ ehˇ taˬ˗euˬ heu meh. Kʼoeˇ naˇ, nymˇ tsawˇ haˬ zaˬ deuˬ aˬ jeˬ miˇ neh Baˬlaˬdiˇsuˆ˗ahˇ maˬ ya jawˇ˗eu gaˇ kawˆ hawˇ˗eu mehˬ hu paw tsawˇ haˬ zaˬ deuˬ aˬ joˆ˗ehˇ jahˇ˗awˇ neh, Baˬlaˬdiˇsuˆ muiˬ˗eu jawˇ duˬ˗ahˇ paˇ ya jawˇ kʼoꞈ˗eu gaˇ kawˆ heu deuˬ ahˇ˗eu meh.—Pah mehˬ˗eu 21:4, 5-ahˇ gui˗awˬ.

Jaˇliꞈ laꞈ kʼoeˇ, zahˇ dawˬ kʼoꞈ dawˬ, dawˬ mehˬ dawˬ tsoˆ, Jaˇliꞈ zahˇ lehˇ ahˇ˗eu meh. Kʼoeˇ naˇ Miˬyehˇ, aˇ hu ba˗euˬ tsawˇ haˬ deuˬ nehˬ˗ehˇ, cawˬ cawˬ taꞈ˗euˬ gaˇ haw ngeh, aˬ yawꞈ˗euˬ nui noeˬ nui duˇ, aˬ joˆ˗ehˇ gʼeh˗eu lehˇ, aˬ dui ya siˬ nya˗euˬ ma. Teu miˇ neh Jaˇliꞈ˗aˬ, nawˇ Miˬyehˇ˗ahˇ siˬ nya laˇ ni caw ba nehˬ nya˗eu meh. Nawˇ aˬ yawꞈ˗euˬ cawˬ pyeuꞈ laˇ nya ni aˬ joˆ˗ehˇ ya jahˇ˗eu lehˇ Jaˇliꞈ laꞈ koeˇ ehˇ nehˬ taˬ˗euˬ meh.—Ja ceuˬ 19:7, 11; Yaˬkoˆ 2:23; 4:8-ahˇ gui˗awˬ.

4. Jaˇliꞈ˗ahˇ gʼoˆ shaw nya ni aˬ joˆ˗ehˇ ya jahˇ˗eu nga?

Nawˇ Jaˇliꞈ˗ahˇ gʼoˆ shaw nya ni, paˇ dmˬ heu dmˬ nawˬ˗ahˇ caw ba nya˗eu meh. Yeˬsuˇ Jaˇliꞈ aˇ deuˆ kʼaˇ gui ngeh, dawˬ tsuiꞈ yaw naꞈ deuˬ˗ahˇ puiˇ kʼawˬ nehˬ˗euˬ loꞈ˗ehˇ, paˇ dmˬ heu dmˬ kʼawꞈ, “Jaˇliꞈ aˇ deuˆ dawˬ tsuiꞈ” deuˬ˗ahˇ, siˬ nya laˇ ni caw ba nya˗eu meh.—Luˇkaꞈ 24:27, 45-ahˇ gui˗awˬ.

Miˬyehˇ jawˇ gaˇ neh oe˗euˬ muiˬ˗eu gaˇ kawˆ naˇ, yaw˗ehˇ muiˬ˗eu tiˬ jeˬ pyeuꞈ˗eu meh. Ehˇ kʼawꞈ tsawˇ haˬ myaˬ ni, maˬ ha geuꞈ mawꞈ˗a. Tsawˇ haˬ tiˬ deuˬ na maˬ ya leˇ˗a. Ehˇ kʼawꞈ nui ma gʼaˬ taˬ baˬ. Nawˇ dehꞈ ziˇ za˗eu gʼaˇ duˬ˗aˬ, Miˬyehˇ˗ahˇ siˬ nya˗eu hawˇ˗eu maˬ siˬ nya˗eu gaˇ iˇ˗eu tehꞈ meh.—Yoˇhaˬ 17:3-ahˇ gui˗awˬ.