Miˬyehˇ miˇ tsaˬ heu siˬ˗ahˇ, aˬ jeˬ lehˇ noeˬ˗awˇ beh˗euˬ nga?

1. Miˬyehˇ miˇ tsaˬ˗ahˇ aˬ jeˬ miˇ neh beh˗euˬ nga?

Yeˬhawˇbaˬ miˇ tsaˬ˗ahˇ tsawˇ haˬ zaˬ bi jawˇ˗eu lehˇ beh˗euˬ meh. Aˬdaˬ hawˇ˗eu Eˇbaˆ˗ahˇ, mˬ kʼoeˇ taˆ bi jawˇ˗eu lehˇ beh˗euˬ maˬ ngeuˇ˗a. Mˬ naˇ, mˬ taˆ gʼaˬ kʼehˇ bi jawˇ˗eu lehˇ beh˗euˬ meh. (Yawˇbaˆ 38:4, 7) Teu miˇ neh, Miˬyehˇ dahˬ beh˗euˬ kʼaˬ dzeˇ zaˬ gʼaˬ˗ahˇ, muiˬ˗eu jawˇ duˬ Eˬdeˬ yaˇ kmˇ˗ahˇ bi jawˇ˗euˬ meh. (Aˇdahˬbeh˗eu 2:15-17) Yeˬhawˇbaˬ Aˬdaˬ hawˇ˗eu aˬ yawꞈ˗euˬ oeˬ paˬ oeˬ ma deuˬ˗ahˇ, miˇ tsaˬ kʼoeˇ taˆ mˬ maˬ maˬ byaˆ zaˇ ziˇ byawˬ byawˬ˗ehˇ dehꞈ˗eu aˬ kawˬ˗aˬ biꞈ nehˬ˗euˬ meh.—Ja ceuˬ 37:29; 115:16-ahˇ gui˗awˬ.

Aˇ dahˬ beh ngeh, Eˬdeˬ yaˇ kmˇ maˬ ngeuˇ naˇ muiˬ˗eu jawˇ duˬ maˬ jaˆ. Miˇ tsaˬ kʼoeˇ taˆ aˬ nyaꞈ dzeˇ zaˬ˗euˬ oeˬ paˬ oeˬ ma ya bi byah laˇ˗eu meh. Kʼoeˇ naˇ, aˬ yawꞈ maꞈ miˇ kʼahˬ dawˬ tawˆ luꞈ˗ahˇ uˆ lahˇ˗awˇ, muiˬ˗eu jawˇ duˬ pyeuꞈ laˇ ni, aˬ yawꞈ maꞈ ya mˇ˗eu meh. (Aˇdahˬbeh˗eu 1:28) Miˇ tsaˬ heu siˬ tiˬ jawˇ˗iˬ maˬ cawˆ iˇ˗a, mˬ maˬ maˬ byaˆ zaˇ ziˇ tsawˇ haˬ zaˬ˗euˬ jawˇ duˬ pyeuꞈ˗eu meh.—Ja ceuˬ 104:5-ahˇ gui˗awˬ.

Biˬdiˬoˬ haw Miˬyehˇ miˇ tsaˬ˗ahˇ aˬ jeˬ miˇ neh beh˗euˬ nga?

2. Nymˇ miˇ tsaˬ heu siˬ, aˬ jeˬ miˇ neh Baˬlaˬdiˇsuˆ maˬ pyeuꞈ˗eu nga?

Aˬdaˬ hawˇ˗eu Eˇbaˆ Yeˬhawˇbaˬ Miˬyehˇ˗euˬ dawˬ maˬ naˇ haˬ˗eu miˇ neh, Eˬdeˬ yaˇ kmˇ˗ahˇ neh bi teh doˆ˗euˬ meh. Kʼoeˇ gaˇ neh naˇ, Baˬlaˬdiˇsuˆ kʼawꞈ byoˆ iˇ˗awˇ, muiˬ kʼoꞈ laˇ ni mˇ nya˗eu gʼaˬ jiˇ maˬ jawˇ˗a. “Haiˬ˗eu tsawˇ haˬ˗ahˇ miˇ kʼahˬ bi dzaˬ” taˬ˗euˬ meh lehˇ, Jaˇliꞈ ehˇ˗eu meh.—Yawˇbaˆ 9:24.—Aˇdahˬbeh˗eu 3:23, 24-ahˇ gui˗awˬ.

Yaw beh Yeˬhawˇbaˬ neh tsawˇ haˬ zaˬ deuˬ˗euˬ gʼaˇ duˬ, noeˬ taˬ˗euˬ jeˬ kʼoeˇ byehˇ dzeh mehˬ loˇ? Maˬ byehˇ dzeh˗aˬ. Aˬ yawꞈ baoˬ huiˬ˗eu Miˬyehˇ miˇ neh, maˬ mˇ pyeuꞈ nya˗eu tiˬ jeˬ˗iˬ maˬ jaˆ. (Iˇsaˬyaˇ 45:18) Yaw beh aˬ yawꞈ neh noeˬ taˬ˗euˬ loꞈ˗ehˇ, paˇ ya pyeuꞈ kʼoꞈ laˇ tehꞈ˗a.—Ja ceuˬ 37:11, 34-ahˇ gui˗awˬ.

3. Baˬlaˬdiˇsuˆ aˬ joˆ˗ehˇ pyeuꞈ kʼoꞈ laˇ˗eu nga?

Miˬyehˇ neh tseˇ doˆ˗euˬ, Sahˬpaˬ Yeˬsuˇ uˆ lahˇ le ngeh, miˇ tsaˬ heu siˬ Baˬlaˬdiˇsuˆ pyeuꞈ kʼoꞈ laˇ meh. Aˬmaˬgeˬdoˬ lehˇ kuˇ˗eu guiˇ heu hmˬ mˇ ngeh, Yeˬsuˇ mˬ taˆ gʼaˬ kʼehˇ sheuˬ˗awˇ, Miˬyehˇ˗ahˇ muiˇ˗eu deuˬ˗ahˇ laˆ cawˆ le meh. Kʼoeˇ naˇ, Yeˬsuˇ Saˬdaˬ˗ahˇ nyehꞈ˗awˇ 1,000 kʼoꞈ paꞈ tawꞈ taˬ˗eu meh. Miˬyehˇ˗euˬ tsawˇ haˬ deuˬ naˇ, Yeˬsuˇ laˆ piˇ nehˬ˗eu baˬ da neh, laˆ cawˆ˗eu jeˬ˗ahˇ neh buˬ iˇ˗awˇ, muiˬ˗eu jawˇduˬ miˇ tsaˬ kʼoeˇ taˆ laꞈ kʼaˬ tiˬ cehˇ ya dehꞈ gʼeh meh.—Pah mehˬ˗eu 20:1-3; 21:3, 4-ahˇ gui˗awˬ.

4. Shaˬ˗eu zahˬ˗eu jeˬ aˇ myah byoˆ˗iˇ jiˇ˗eu nga?

Miˬyehˇ maˬ muiˬ˗eu jeˬ˗ahˇ, aˇ myah laˆ byoˆ jiˇ˗eu nga? Aˇ saˬ saˬ yamˬ keuˆ le shaw˗iˬ meh lehˇ “bi siˬ” nya˗eu gʼaˇ duˬ, gaˇ kawˆ yaw myaˬ jeˬ˗ahˇ, Yeˬsuˇ toeˬ mehˬ taˬ yaꞈ˗euˬ meh. Nymˇ pyeuꞈ luꞈ˗eu gaˇ kawˆ heu deuˬ, aˬ dui maꞈ “aˇ saˬ saˬ˗eu” aˇ yamˬ laꞈ kʼoeˇ jawˇ luꞈ meh lehˇ, toeˬ mehˬ nehˬ˗eu jeˬ pyeuꞈ meh.—Maꞈtehˬ 24:3, 7-14, 21, 22-ahˇ gui˗awˬ.

Yeˬsuˇ mˬ kʼoeˇ taˆ neh miˇ tsaˬ heu siˬ˗ahˇ, 1,000 kʼoꞈ uˆ lahˇ˗eu aˇ yamˬ laꞈ kʼoeˇ, shaˬ˗eu zahˬ˗eu jeˬ byoˆ iˇ jiˇ tehꞈ˗a. (Iˇsaˬyaˇ 9:6, 7; 11:9) Yeˬsuˇ˗aˬ, Sahˬpaˬ kʼawꞈ ngeuˇ, Piˇma yaw huiˬ kʼawꞈ ngeuˇ meh. Teu miˇ neh, Miˬyehˇ˗ahˇ gaˬ˗eu tsawˇ haˬ deuˬ˗euˬ iˬ baˇ˗ahˇ, bi buˬ bi law iˇ nya˗eu meh. Kʼoeˇ naˇ, Miˬyehˇ Yeˬsuˇ˗ahˇ gʼoe˗awˇ, naˇ˗eu gawˇ˗eu, mawˬ iˇ˗eu, shiˇ˗eu jeˬ,heu deuˬ˗ahˇ laˆ byoˆ jiˇ nehˬ˗eu meh.—Iˇsaˬyaˇ 25:8; 33:24-ahˇ gui˗awˬ.

5. Mehˬ hu paw Baˬlaˬdiˇsuˆ˗ahˇ, aˬ geu deuˬ ya jawˇ˗eu nga?

Miˬyehˇ ehˇ dawˬ naˇ haˬ˗eu deuˬ ya jawˇ˗eu meh. (1 Yoˇhaˬ 2:17) Nui ma nahˬ yu ni gʼeh˗eu deuˬ˗ahˇ poˆ iˇ˗awˇ, Miˬyehˇ nui ma tsaˬ˗eu jeˬ˗ahˇ bi mˇ˗eu gʼaˇ duˬ mehˬ nehˬ iˇ˗awˬ lehˇ, Yeˬsuˇ aˬ yawꞈ˗euˬ gʼaˬ kʼehˇ deuˬ˗ahˇ kʼehˇ gʼeh˗euˬ meh. Nymˇ iˬ nah tsawˇ haˬ yaw myaˬ lam gʼaˬ, mehˬ hu paw Baˬlaˬdiˇsuˆ˗ahˇ bi jawˇ˗eu gʼaˇ duˬ, Yeˬhawˇbaˬ lehˬ hmˬ luꞈ meh. (Zeˬpaˬniˇ 2:3) Yeˬhawˇbaˬ Saˇ kiˇ˗euˬ Miˬyehˇ Miˇ kʼahˬ Bawˬ dzaˬ nymˇ laꞈ kʼoeˇ, muiˬ˗eu aˬ da aˬ ma pyeuꞈ nya˗eu gʼaˇ duˬ, dzaw geuꞈ luꞈ meh. Zaˬ hawˇ˗eu aˬ da aˬ ma tiˬ kawˆ loꞈ˗ehˇ guiˬ lahˬ shaˇ˗awˇ, Jaˇliꞈ laꞈ kʼoeˇ˗euˬ zaˬ siˬ nui gahˇ deuˬ za nya ni, dzaw geuꞈ luꞈ˗eu meh.—Miˇkaˬ 4:1-4-ahˇ gui˗awˬ.