Miˬyehˇ˗euˬ dawˬ peh, aˬ joˆ˗ehˇ jiˆ peh leˇ nya˗eu nga?

1. Miˬyehˇ yawˬ gʼaˬ na luꞈ˗euˬ shaˇ dawˬ˗ahˇ, naˇ haˬ ngaˇ loˇ?

Miˬyehˇ yawˬ gʼaˬ na luꞈ˗ahˇ, guiˬ lahˬ shaˇ˗eu jeˬ neh, aˬ yawꞈ˗euˬ dawˬ peh jiˆ peh laˇ˗awˬ lehˇ kuˇ luꞈ meh. (Ja ceuˬ 65:2) Ehˇ kʼawꞈ, yawˬ gʼaˬ na luꞈ˗euˬ shaˇ dawˬ˗ahˇ, Miˬyehˇ naˇ haˬ˗eu maˬ ngeuˇ˗a. Yaw jeˬ ma jeˬ, miˬ zaˬ˗ahˇ yehˬ bawˬ sehˇ lu˗ehˇ jahˇ˗eu kʼaˬ dzeˇ zaˬ deuˬ˗euˬ shaˇ dawˬ˗ahˇ, Miˬyehˇ maˬ naˇ haˬ˗a. (1 Beˬtuˆluˆ 3:7) Maˬ muiˬ˗eu jeˬ˗ahˇ mˇ poˆ mˇ poˆ˗ehˇ dehꞈ luꞈ˗eu Iˇsaˬleˬlaˆ tsawˇ haˬ deuˬ˗euˬ shaˇ dawˬ˗ahˇ, Miˬyehˇ maˬ naˇ haˬ˗a. Ehˇ kʼawꞈ, iˬ baˇ mˇ˗euˬ tsawˇ haˬ maˇ diˇ noeˬ paˇ˗awˇ neh shaˇ naˇ, Miˬyehˇ naˇ haˬ nehˬ˗eu meh. Guiˬ lahˬ shaˇ˗eu heu naˇ, yaw˗ehˇ muiˬ˗eu tiˬ jeˬ pyeuꞈ˗eu meh.—Iˇsaˬyaˇ 1:15; 55:7-ahˇ gui˗awˬ.

Biˬdiˬoˬ haw Miˬyehˇ yawˬ gʼaˬ na luꞈ˗euˬ shaˇ dawˬ˗ahˇ, naˇ haˬ ngaˇ loˇ?

2. Aˬ dui guiˬ lahˬ aˬ joˆ˗ehˇ shaˇ˗eu tsaˬ nga?

Yeˬhawˇbaˬ Miˬyehˇ˗aˬ, Beh˗euˬ yaw sahˇ pyeuꞈ˗eu miˇ neh, aˬ dui maꞈ aˬ yawꞈ˗ahˇ tehꞈ˗ehˇ guiˬ lahˬ shaˇ˗eu tsaˬ meh. (Maꞈtehˬ 4:10; 6:9) Aˬ dui maˬ byah kuꞈ˗eu tsawˇ haˬ zaˬ pyeuꞈ˗eu miˇ neh, Yeˬsuˇ shiˇ dah nehˬ le˗euˬ meh. Teu miˇ neh guiˬ lahˬ shaˇ ngeh, Yeˬsuˇ˗euˬ tsawˇ myahˇ˗ahˇ ya gʼoe˗eu meh. (Yoˇhaˬ 14:6) Aˬ dui guiˬ lahˬ shaˇ ngeh, nehꞈ toˇ toˇ˗eu loꞈ˗ehˇ aˬ yawꞈ yaw oeˇ tehꞈ˗ehˇ shaˇ poˆ gaˇ, Yeˬhawˇbaˬ maˬ ya leˇ˗a. Yawˬ ha˗euˬ nui ma laꞈ kʼoeˇ neh shaˇ˗eu jeˬ˗ahˇ tehꞈ˗ehˇ, Miˬyehˇ geuꞈ mawꞈ˗eu meh.—Maꞈtehˬ 6:7; Piˇliˇpiˆ 4:6, 7-ahˇ gui˗awˬ.

Aˬ dui˗ahˇ Beh˗euˬ Miˬyehˇ, nui ma laꞈ kʼoeˇ neh guiˬ lahˬ shaˇ gaˇ kʼawꞈ gaˬ nya˗eu meh. (1 Saˬmeuˬlaˆ 1:12, 13) Aˇ yamˬ aˇ law maˬ baw ni, Miˬyehˇ˗ahˇ guiˬ lahˬ shaˇ nya meh. Yaw jeˬ ma jeˬ, yuꞈ leˇ ngeh yamˬ, noeˬ laˇ ngeh yamˬ, hawˬ dzaˬ ngeh yamˬ, shaˬ zahˬ puˬ le ngeh yamˬ˗ahˇ meh.—Ja ceuˬ 55:22; Maꞈtehˬ 15:36-ahˇ gui˗awˬ.

3. Ka li zaˬ deuˬ aˬ jeˬ miˇ neh uiˬ leˇ˗awˇ bawˬ dzaˬ˗eu nga?

Miˬyehˇ˗euˬ dawˬ peh jiˆ peh leˇ˗eu yaw awˬ maˬ ngeuˇ˗a. Aˬ jeˬ miˇ neh ehˇ naˇ, Miˬyehˇ˗ahˇ maˬ jah˗eu uˬ taꞈ, miˇ kʼahˬ bi saˇ laˇ ma lehˇ Miˬyehˇ neh ngehˬ taˬ˗euˬ saˇ jaˇ dawˬ˗ahˇ, cehꞈ lehꞈ ka˗eu tsawˇ haˬ deuˬ nehˬ˗ehˇ ya jawˇ˗eu miˇ neh meh. (2 Tiˆmoˇseˬ 3:1, 4; 2 Beˬtuˆluˆ 3:3, 13) Teu miˇ neh, Miˬyehˇ˗ahˇ jah˗eu deuˬ nehˬ˗ehˇ uiˬ leˇ˗awˇ, tiˬ gʼaˬ tiˇ gʼaˬ cawˬ cawˬ˗eu laꞈ kʼoeˇ gʼaˬ yuˇ geuꞈ˗eu loˬ meh.—Heˬbyehˇ 10:24, 25-ahˇ gui˗awˬ.

Miˬyehˇ˗ahˇ gaˬ˗eu deuˬ nehˬ˗ehˇ cawˬ cawˬ ngeh jawˇ, aˬ dui˗ahˇ Miˬyehˇ˗euˬ dawˬ peh jiˆ peh leˇ nya ni, caw ba nehˬ laꞈ˗eu meh. Yeˬhawˇbaˬ Saˇ kiˇ deuˬ bawˬ dzaˬ gaˇ, tiˬ gʼaˬ tiˇ gʼaˬ˗euˬ jah jeˬ laꞈ kʼoeˇ neh, gʼaˬ yuˇ geuꞈ nya˗eu meh.—Loˇmaˆ 1:11, 12-ahˇ gui˗awˬ.

4. Nawˇ Miˬyehˇ˗euˬ dawˬ peh, aˬ joˆ˗ehˇ jiˆ peh leˇ nya˗eu nga?

Jaˇliꞈ laꞈ kʼoeˇ neh ya siˬ nya˗euˬ jeˬ˗ahˇ, shaˇ noeˬ shaˇ sawˇ˗eu baˬ da neh, Yeˬhawˇbaˬ˗euˬ dawˬ peh jiˆ peh leˇ nya˗eu meh. Miˬyehˇ˗euˬ mˇ jeˬ shaˇ kawˆ, mehˬ jeˬ mehˬ kawˆ hawˇ˗eu aˬ yawꞈ˗euˬ saˇ jaˇ dawˬ˗ahˇ, yaw muiˬ paˬ˗ehˇ shaˇ noeˬ shaˇ sawˇ˗awˬ. Kʼaˇ shaˇ sawˇ ngeh guiˬ lahˬ shaˇ naˇ, Miˬyehˇ˗euˬ nui gaˬ hawˇ˗eu zaˬ siˬ nui gahˇ˗ahˇ, aˇ poeˬ taˬ baw nya laˇ meh.—Yawˇshuˆ 1:8; Ja ceuˬ 1:1-3-ahˇ gui˗awˬ.

Nawˇ Miˬyehˇ˗ahˇ jah˗awˇ nui ma taˬ coeˇ laˇ ngeh tehꞈ˗ehˇ, Miˬyehˇ˗euˬ dawˬ peh jiˆ peh leˇ nya˗eu meh. Ehˇ kʼawꞈ jah˗eu jeˬ˗aˬ, iˇ cuꞈ loˬ˗eu aˇ bawˬ tiˬ bawˬ˗ahˇ duˇ meh. Kʼoeˇ loꞈ˗ehˇ duˇ ni, nawˬ neh jah taˬ˗euˬ jeˬ˗ahˇ, shaˇ noeˬ shaˇ sawˇ poˆ˗eu heu naˇ, nawˇ jah luꞈ˗eu jeˬ˗ahˇ gʼaˬ dawˆ lahˬ nehˬ˗eu jeˬ pyeuꞈ meh.—Maꞈtehˬ 4:4; Heˬbyehˇ 11:1, 6-ahˇ gui˗awˬ.

5. Miˬyehˇ˗euˬ dawˬ peh jiˆ peh leˇ˗eu heu naˇ, nawˬ˗ahˇ aˬ jeˬ gaˇ dahˇ tsoeˬ nga?

Yeˬhawˇbaˬ, aˬ yawꞈ˗ahˇ gaˬ˗eu deuˬ˗ahˇ haw piˇ nehˬ meh. Aˬ yawꞈ maꞈ jah˗eu jeˬ hawˇ˗eu dehꞈ ziˇ˗euˬ noeˬ tmˬ˗eu jeˬ˗ahˇ, laˆ cawˆ laˇ˗eu aˬ geu jeˬ˗ahˇ maˬ kaˬ, Miˬyehˇ laˆ piˇ nehˬ˗eu meh. (Ja ceuˬ 91:1, 2, 7-10) Aˬ dui˗euˬ mawˇ do˗ahˇ, deuˬ laˇ paˬ˗ehˇ gʼeh˗eu yawˬ jeˬ na luꞈ˗ahˇ yahˇ nya laˇ ni, Yeˬhawˇbaˬ dehꞈ ziˇ gaˇ ma yaw˗ehˇ muiˬ˗eu kahˇ˗ahˇ mehˬ nehˬ laꞈ˗eu meh.—Ja ceuˬ 73:27, 28; Yaˬkoˆ 4:4, 8-ahˇ gui˗awˬ.